Obo ra sa Vwọ Vwẹ Uchebro Phia

1. Ono yen ofori nẹ ọ vwẹ uchebro phia? Djekpahọn.

MAVỌ yen oma ru we siẹrẹ wọ da vwẹ uchebro vwọ kẹ ihwo efa? Oma vwerhan ihwo evo ayen vwo ru ọtiọyen. Efa siomauko ayen vwọ reyọ uchebro yẹrẹ ọkpọvi vwọphia, oma riẹn ihwo efa ruẹ siẹrẹ ayen de ru ọtiọyeen. O toro obo rọ wanree, avwanre eje vwo oghwa ra vwọ reyọ uchebro vwọphia nọke ra ruọke. Diesorọ? Kidie Jesu tare nẹ ẹguọnọ ayen dje vwọ kẹ ohwohwo yen e che vwo vughe idibo rọyen rẹ uyota. (Jọn 13:35) Jẹ, idjerhe ọvo avwanre vwo dje ẹguọnọ avwanre phia yen a vwọ vwẹ uchebro vwọ kẹ iniọvo avwanre vwẹ ọke ro fori. Baibol na tare nẹ “uchebro ro nẹ otọ rẹ ẹwẹn rhe” yen ghwa “oyerinkugbe ọvwevwerhen” cha yẹrẹ nẹrhẹ ọ rhuaphiyọ.—Isẹ 27:9.

2. Die yen ekpako se ru, kẹ diesorọ? (Ni ekpeti na “Uchebro ra Vwọphia vwẹ Uyono rẹ Uvwre rẹ Udughwrẹn na.”)

² Ekpako yen me fo ihwo re riẹn obo ra vwẹ uvi uchebro vwọphia. Jihova womarẹ Jesu vwọ vwẹ eshare nana vwo mu nẹ ayen vwẹrote ukoko na. (1 Pita 5:2, 3) Idjerhe ọvo ayen vwo ruẹ ọtiọyen yen ayen vwọ ta eta ri nẹ Baibol rhe vwọ vwẹ uchebro vwọ kẹ ukoko na. O ji fo nẹ ayen reyọ ọkpọvi vwọ kẹ ogodẹ ọvuọvo, ọtiọyen ji te i ri bo ghwru. Mavọ yen ekpako ji te avwanre eje sa vwọ vwẹ uvi uchebro vwọphia?

3. (a) Mavọ yen a sa vwọ dia omamọ rẹ obruche? (Aizaya 9:6; ni ekpeti na “Vwẹrokere Jesu Wọ da Vwẹ Uchebro Phia.”) (b) Die yen a cha ta ota kpahen vwẹ uyono nana?

³ E se yono erọnvwọn buebun kpahen obo ra sa vwọ dia omamọ obruche womarẹ e vwo yono kpahen idje rẹ ihwo sansan vwẹ Baibol na, ma rho kẹ Jesu. Ọvo usun rẹ edova re vwo se yen “Ọgba-Aghwanre.” (Se Aizaya 9:6.) Vwẹ uyono nana, a cha ta ota kpahen oborẹ avwanre se ru ọ da dianẹ ohwo nokpẹn uchebro mie avwanre kugbe obo re se ru a rha nokpẹn rọyen mie avwanree. A je cha ta ota kpahen oboresorọ ọ vwọ ghanre a vwọ vwẹ uchebro phia vwẹ ọke ro fori kugbe idjerhe ro fori.

A DA NOKPẸN UCHEBRO MIE AVWANRE

4-5. Siẹrẹ ohwo da nokpẹn uchebro mie avwanre, onọ vọ yen ofori nẹ a ka nọ oma avwanre? Djudje ọvo.

⁴ Siẹrẹ ohwo da nokpẹn uchebro mie avwanre, die yen orọnvwọn rẹsosuọ ofori nẹ e ru? Oma sa vwerhen avwanre je guọnọ vwẹ ukẹcha phia ugege yena. Ẹsosuọ, ofori nẹ a nọ oma avwanre, ‘Mi muwan re me vwọ vwẹ uchebro vwọ kẹ?’ Ọkievo, idjerhe ro fori avwanre sa vwọ vwẹ ukẹcha phia yen a vwọ vuẹ ohwo na nẹ o bru ohwo ro muwan ra, rọ riẹn kpahen obo ri kpokpo na, ukperẹ avwanre ọvo vwọ vwẹ uchebro vwọ kẹ.

⁵ Roro kpahen udje nana. Vwẹ ẹwẹn roro nẹ ugbeyan rọ kẹrẹ owẹ mwa okpọga ọvo. Ọ da vuẹ wẹ nẹ ọyen ru ehiahiẹ kpahen ena rẹ obo re sivwẹn ọga na wan, ọ da nọ wẹ nẹ oka rẹ ona vọ yen wo rorori nẹ ọyen me yovwin. Ọ sa dianẹ o vwo ọvo ro me je we, ẹkẹvuọvo wẹwẹ dia ọboo, e ji yono uwe kpahen obo re sivwẹn oka rẹ ọga tiọyenaa. Ọtiọyena, idjerhe ro me yovwin ru wọ sa vwọ vwẹ ukẹcha kẹ ugbeyan wẹn, ọyen wọ vwọ cha uko vwọ guọnọ ohwo ro muwan rọ sa vwẹ ukẹcha vwọ kẹ.

6. Diesorọ a vwọ hẹrhẹ ọmọke tavwen a ke vwẹ uchebro vwọphia?

⁶ Ọ da tobọ dianẹ avwanre niro nẹ avwanre fo ihwo re vwẹ uchebro phia kpahen emu ọvo kiriguo, a sa hẹrhẹ ọmọke tavwen a ke kpahen vwọ kẹ ohwo rọ guọnọ uchebro na. Diesorọ? Isẹ 15:28 tare nẹ “ọvwata nabọ roro ota te rọ ke kpahọ.” Kẹ, e de rhe roro nẹ a riẹn ẹkpahọnphiyọ na vwo? A je sa reyọ ọke vwo ru ehiahiẹ, nẹrhovwo, ji roro kpahọn. Ọtiọyena, ke se vwo imuẹro nẹ ẹkpahọnphiyọ vẹ ẹro rẹ Jihova vwo ni ẹdia na shephiyọ. Jokaphiyọ udjẹ rẹ ọmraro Netan.

7. Die yen wo yono vwo nẹ udje rẹ ọmraro Netan?

⁷ Ọke rọ vẹ ọmraro Netan vwọ ta ota, Ovie Devid da vuẹ nẹ ọyen guọnọ bọn uwevwin ẹga vwọ kẹ Jihova. Ugege yena, Netan da vuẹ nẹ o se ru ọtiọyen. Ẹkẹvuọvo ofori nẹ Netan ka nọ mie Jihova tavwen. Diesorọ? Kidie Jihova guọnọre nẹ Devid bọn uwevwin ẹga naa. (1 Ikun 17:1-4) Kirobo ra ghwa mrẹ vwẹ udje nana, siẹrẹ a da nokpẹn uchebro mie avwanre, ọyen emu rẹ aghwanre a rha ‘fobọ ta otaa.’—Jems 1:19.

8. Ọrhọ yen iroro ọfa rọ sorọ o vwo fo a vwọ jomaotọ a da vwẹ uchebro phia?

⁸ Roro kpahen orọnvwọn ọfa rọ sorọ ra vwọ jomaotọ siẹrẹ a da vwẹ uchebro vwọ kẹ ohwo: Ihwo sa hanrhe avwanre siẹrẹ ohwo de bru orharhe orhiẹn fikirẹ uchebro rẹ avwanre vwọ kẹ. Ọtiọyena, ọyen obo re ghanre a vwọ frẹkotọ roro tavwen a ke vwẹ uchebro phia.

RA VWỌ VWẸ UCHEBRO PHIA A RHA NOKPẸN RỌYEEN

9. Die yen ofori nẹ ekpako na mrẹvughe tavwen ayen ke vwẹ ọkpọvi vwọ kẹ ohwo? (Galesha 6:1)

⁹ Nọke ra ruọke, ofori nẹ ekpako davwẹngba vwọ vwẹ ọkpọvi kẹ oniọvo rọ “jowọ rọ chọre.” (Se Galesha 6:1.) Ọ sa dianẹ ohwo na jẹ ojẹ rọ chọre rọ sa nẹrhẹ o ru umwemwu ọgangan. Oborẹ ekpako na tẹnroviẹ yen ayen vwọ vwẹ ukẹcha vwọ kẹ ohwo na vwọ dia idjerhe ro suẹn ohwo kpo arhọ ri bẹdẹ na. (Jems 5:19, 20) Rere uchebro rayen vwọ nabọ ghwotọ, ẹsosuọ o fori ayen mrẹvughe sẹ ohwo na ghene jowọ rọ chọre. Jihova vwẹ uphẹn kẹ avwanre eje nẹ a reyọ ẹwẹn obrorhiẹn avwanre vwo bru erhiẹn komobọ. (Rom 14:1-4) Kẹ, ọ da rha dianẹ oniọvo ọshare na ghene jowọ rọ chọre, ekpako na da davwẹngba ayen vwọ vwẹ ọkpọvi kẹ vwo?

10-12. Die yen ofori nẹ ekpako ru siẹrẹ ayen da vwẹ uchebro ra nokpẹn rọyeen vwọ kẹ ohwo? Djudje rọyen. (Ni ihoho na.)

¹⁰ Ọ pha bẹnbẹn ekpako vwọ vwẹ uchebro phia a rha nokpẹn rọyeen. Idjerhe vọ? Ọyinkọn Pọl tare nẹ, ohwo sa jowọ rọ chọre tavwen ọ ke riẹn. Ẹsosuọ, ofori nẹ ekpako na nabọ muegbe ẹwẹn rẹ ohwo na rere ọ sa vwọ reyọ ọkpọvi na.

¹¹ Ra vwọ kẹ ohwo uchebro ra nokpẹn rọyeen pha kerẹ ohwo rọ davwẹngba rọ vwọ kọn ekankọn phiyọ otọ ọgangan. Tavwen ọghwẹrẹ ke tuẹn okankọn ẹkọn phiyọ, o voro otọ na. Ọnana kọ nẹrhẹ otọ na dia lọlọhọ kidie o muegbe rọyen kẹ ubi omamọ na nure. Ọtiọyena kọ cha kọn ubi omamọ na. Ukuotọ rọyen, ko ku ame kuẹ ubi omamọ na rere ọ sa vwọ djẹ. Ọtiọyen ọ je hepha nẹ tavwen ọkpako ke vwẹ uchebro ra nokpẹn rọyeen vwọ kẹ ohwo, o fori nẹ o ji muegbe rẹ otọ na kirobo re djere na. Kerẹ udje, o fori nẹ ọkpako na guọnọ ọke ro fori je vwẹ imuẹro kẹ oniọvo na nẹ ọyen vwo ọdavwẹ rọyen vwẹ ubiudu. Obruche na da dia ohwo ra riẹn phiyọ ohwo rẹ ẹguọnọ ro ji dje uruemu esiri phia, ọ cha lọhọ ihwo efa vwọ reyọ uchebro rọyen.

¹² Siẹrẹ ayen da ta ota, ọkpako na se ru otọ na lọhọ ọkieje womarẹ ọ vwọ rhọnvwa nẹ ihwo eje yen ruẹ chọ nẹ a je guọnọ ọkpọvi nọke ra ruọke. (Rom 3:23) Vẹ upho re bọrọ bọrọ vẹ ọghọ, ọkpako na ko dje vwo nẹ Baibol na cha obo ro ruru ro djerephia nẹ ọ ghene jowọ rọ chọre. Ugege rẹ oniọvo na ghwa vwọ rhọnvwe oruchọ rọyen nu, ọkpako na kọ “kọn ubi omamọ na” rọ vwọ nabọ djefiotọ kẹ obo ro fori nẹ o ru ọ vwọ rhuẹrẹ ẹdia na phiyọ. Ukuotọ rọyen, ọkpako na ko “ku ame kuẹ” okankọn na womarẹ o vwo jirẹ oniọvo na nẹ otọ ubiudu cha ji nene nẹrhovwo.—Jems 5:15.

13. Mavọ yen ekpako na sa vwọ riẹn sẹ ohwo na vwo ẹruọ rẹ uchebro na?

¹³ Ọkiọvo, oborẹ obruche na tare vẹ oborẹ ohwo ra vwẹ uchebro kẹ na nyori sa fẹnẹ ohwohwo. Die yen ekpako se ru orọnvwọn tiọyen vwo jẹ phia? Ayen sa vwẹ aghwanre vwọ nọ enọ vwọ vwẹ ẹkpo na phia. (Aghwo. 12:11) Ẹkpahọnphiyọ rẹ ohwo na cha vwẹ ukẹcha vwọ kẹ obruche na vwọ riẹn sẹ ohwo na ghini vwo ẹruọ rẹ uchebro ra vwọ kẹ na.

RA VWỌ VWẸ UCHEBRO PHIA VWẸ IDJERHE RO FORI KUGBE ỌKE RO FORI

14. Diesorọ o rhe fo ra vwọ vwẹ uchebro phia siẹrẹ ivun de miovwo avwanree? Djekpahọn.

¹⁴ Avwanre eje gbaree, ọtiọyena avwanre sa ta chọ yẹrẹ ruẹ obo ri miovwo ihwo efa ivun. (Kọl. 3:13) Baibol na tare nẹ ọkievo avwanre se ru obo re nẹrhẹ ophu muẹ ohwohwo. (Ẹfe. 4:26) Ọtiọyena, o fori nẹ a kẹnoma kẹ uruemu ra vwọ vwẹ uchebro phia okẹ ophu de muẹ ohwo. Diesorọ? ‘Kidie ophu rẹ ohworakpọ che se ru obo re gbare vwẹ ẹro rẹ Ọghẹnẹẹ.’ (Jems 1:20) Ọke a da vwẹ uchebro kẹ ohwo jẹ ophu ji muẹ avwanre, ọnana cha ghwa erhuvwu vuọvo rhee, ukperẹ ọtiọyen obo re brare. Ọ dia ọnana mudiaphiyọ nẹ a rha cha sa vuẹ ohwo ro gbe avwanre ku na oborẹ oma ruẹ avwanre yẹrẹ obo rehẹ evunrẹ ẹwẹn avwanree. Ẹkẹvuọvo, a sa ta ota kpahọn a da fọ rere ẹwẹn avwanre totọ tavwen. Jokaphiyọ uvi udje rẹ Elihu, obruche ri Job phi phiyotọ.

15. Die yen e yono vwo nẹ udje rẹ Elihu? (Ni uhoho na.)

¹⁵ Elihu ghwọrọ ẹdẹ buebun vwọ kerhọ kẹ Job rọ vwọ chochọn rẹ oma rọyen vwo nẹ abọ rẹ erharhe eta rẹ ibruche rọyen ta kpahọn. Elihu de ni aruẹdọn rẹ Job. Ẹkẹvuọvo, ophu ji mu Elihu mamọ kidie Job ta uyota kpahen Jihovaa, ọ je tẹnrovi oma rọyen ọvo gan nọ. Dedena, Elihu hẹrhẹ te ọke ra vwọ vwẹ uphẹn kẹ nẹ ọ ta ota, ọ da je ta ota vẹ ọghọ ọke rọ vwọ vwẹ uchebro vwọ kẹ Job. (Job 32:2; 33:1-7) Udje rẹ Elihu na yono avwanre uyota ọghanghanre ọvo nẹ: Ofori a vwẹ uchebro phia vwọrẹ ẹguọnọ vẹ ọghọ vwẹ idjerhe ro fori kugbe ọke ro fori.—Aghwo. 3:1, 7.

RHA VWẸ UCHEBRO PHIA WO JI RHIABỌREYỌ

16. Die yen e yono vwo nẹ Une rẹ Ejiro 32:8?

¹⁶ Ẹkpo ri Baibol re mu uyono nana kpahen tare nẹ ‘Jihova vwẹ uchebro kẹ avwanre vẹ ẹro rọyen vwẹ enu avwanre.’ (Se Une rẹ Ejiro 32:8.) Ọnana mudiaphiyọ nẹ ọkieje yen ọ vwọ vwẹ ukẹcha vwọ kẹ avwanre. Ọ dia ọ de vwẹ uchebro vwọ kẹ avwanre ọvoo, ọ je cha avwanre uko a sa vwọ reyọ vwo ruiruo. Ọnana ghini omamọ udje vwọ kẹ avwanre! Siẹrẹ e de vwo uphẹn ra vwọ vwẹ uchebro kẹ ihwo efa, a sa vwẹrokere Jihova womarẹ a vwọ vwẹ ẹro vwọ kpẹn ji ru kemu kemu eje re se ru ra vwọ vwẹ ukẹcha kẹ ayen vwo bru erhiẹn aghwanre.

17. Die yen a vwẹ ekpako re vwẹ uchebro ri Baibol kiriguo vwọphia vwo dje? Djekpahọn. (Aizaya 32:1, 2)

¹⁷ Ofori nẹ a vwẹ uchebro phia je reyọ uchebro enẹna vwọ vrẹ obo ri jovwo. (2 Tim. 3:1) Ekpako re vwẹ uchebro ri Baibol phia kiriguo pha “kerẹ uto rẹ ame vwẹ otọ ọyaya.” (Se Aizaya 32:1, 2.) Igbeyan re riẹn oborẹ avwanre guọnọ nyo, ẹkẹvuọvo ayen me vuẹ avwanre obo ro fori nẹ avwanre nyo, okẹ ọghanghanre rọ pha kerẹ “ubi oro vwẹ ohri rẹ idọnọ” yen ayen vwọ kẹ avwanre. (Isẹ 25:11) E jẹ avwanre eje vwo aghwanre a sa vwọ vwẹ uchebro phia ji rhiabọreyọ uchebro ọkieje.