Wo ji se Yono nẹ Iyono Elọlọhọ ri Baibol na Rhe?

1. Die yen iyono ri Baibol na ru vwẹ oma wẹn ọke wọ ka vwọ mrẹ uyota na vughe?

IYONO ri Baibol elọlọhọ wene akpeyeren rẹ avwanre. Kerẹ udje, ọke avwanre vwo yono nẹ odẹ rẹ Ọghẹnẹ yen Jihova, avwanre da jowọ rẹsosuọ ra vwọ dia igbeyan rọyen. (Aiz. 42:8) Avwanre vwo yono kpahen ẹdia rẹ ihwo ri ghwuru hepha nu, ẹwẹn rhe kpokpo avwanre sẹ ayen riojaa. (Aghwo. 9:10) Avwanre vwo yono kpahen ive rẹ Ọghẹnẹ nẹ otọrakpọ na cha dia Iparadaisi, avwanre rha ro ẹnwan kpahen obaro naa. Avwanre vwo imuẹro nẹ ọ dia ọmọke krẹn—ikpe 70 yẹrẹ 80 yen a cha diaa, ẹkẹvuọvo rhirin bẹdẹ.—Une 37:29; 90:10.

2. Idjerhe vọ yen 2 Pita 1:12, 13 vwo djephia nẹ Inenikristi ri tedje dede sa mrẹ erere vwo nẹ iyono elọlọhọ rehẹ Baibol na?

² O fori ra vwọ vwẹ ẹro ri phovwin vwo nẹ iyono elọlọhọ rehẹ Baibol naa. Vwẹ ileta rọyen rivẹ, ọyinkọn Pita si rhe Inenikristi rẹ ‘awọ rayen nabọ muotọ vwevunrẹ uyota na.’ (Se 2 Pita 1:12, 13.) Jẹ, asaọkiephana, ayen hirharoku erọnvwọn ri se miovwo oyerinkugbe rayen vẹ Ọghẹnẹ vwevunrẹ ukoko na, ọtiọyen ji te iyono refian kugbe ihwo re riẹn Ọghẹnẹẹ. (2 Pita 2:1-3) Pita guọnọ vwẹ ọbọngan kẹ iniọvo rọyen rere ayen sa vwọ họnre vwọso imuoshọ nana. O se vwo ru ọtiọyen, ọ da karophiyọ ayen erọnvwọn evo rẹ ayen yonori vwẹ obuko re. Iyono nana cha vwẹ ukẹcha kẹ ayen vwọ sẹro rẹ ọyọnregan rayen rhi te oba.

3. Djudje oboresorọ Inenikristi vwọ vwẹ ọkieje yono kpahen iyono elọlọhọ rehẹ Baibol na.

³ A vwọ ghwanran phiyọ kerẹ Onenikristi ro tedje ye, e se yono erọnvwọn kpokpọ vwo nẹ iyono elọlọhọ rehẹ Baibol na. Kerẹ udje, ochere emu rọ tẹn ona vẹ ogbori sa reyọ ekuakua re vwo chere emu vwo muegbe rẹ emu echere. Ẹkẹvuọvo, kidie nẹ ochere emu rọ tẹn ona chere emu ọke grongron cha re, ọ rhe riẹn obo re bru ona phiyọ ekuakua re vwo chere emu na vwẹ idjerhe sansan, ọnana kọ sa nẹrhẹ ọ reyọ ayen vwo chere oka rẹ emu sansan kpokpọ re vwerhan. Ọtiọyen ọ je hepha nẹ, ẹro rẹ idibo ri Jihova re ga krẹre vwo nẹ iyono elọlọhọ rehẹ Baibol na vẹ ihwo kpokpọ ra vwẹ Baibol yono sa fẹnẹ ohwohwo. Ọ sa dianẹ ẹdia avwanre yẹrẹ uphẹn avwanre vwori vwẹ ẹga ri Jihova weneri rhanvwẹ ọke re vwo bromaphiyame nu. Siẹrẹ a da reyọ oborẹ avwanre yonori ọke grongron vwo ruiruo nene oborẹ ẹdia avwanre hepha, avwanre se yono erọnvwọn kpokpọ re sa vwẹ ukẹcha kẹ avwanre. E jẹ a mrẹ oborẹ Inenikristi ri tedje se yono nẹ iyono elọlọhọ erha rehẹ Baibol na.

JIHOVA YEN ỌMEMAMA NA

4. Die yen ẹriẹn avwanre riẹnre nẹ Jihova yen Ọmemama na ru vwẹ oma avwanre?

⁴ Ọgbaghwanre ọvo rọ je dia Ọmemama ro vwo ẹgba, yen ma akpọ rẹ avwanre na kugbe arhọ eje rehẹ evunrẹ rọyen. Baibol na tare nẹ: “Ọghẹnẹ yen ma erọnvwọn ejobi.” (Hib. 3:4) Ọyen ma avwanre, ọ je riẹn avwanre fiotọ. Vwọ vrẹ ọyena, o vwo ọdavwẹ rẹ avwanre. Ọ je riẹn obo ri me yovwin kẹ avwanre. Uyota nana nẹ Jihova yen Ọmemama na wene akpeyeren avwanre mamọ, ọ nẹrhẹ akpeyeren avwanre rhi vwo otọ, je riẹn oboresorọ a vwọ ma avwanre.

5. Uyota vọ yen sa vwẹ ukẹcha kẹ avwanre vwọ vwẹ oma kpotọ? (Aizaya 45:9-12)

⁵ E se yono omaevwokpotọ vwo nẹ uyota na nẹ Jihova yen Ọmemama na. Job vwọ tẹnrovi oma rọyen vẹ ihwo efa nu, Jihova da karophiyọ nẹ ọyen yen Ọmemama ro me kpenu. (Job 38:1-4) Ọnana nẹrhẹ Job riẹn nẹ idjerhe rẹ Ọghẹnẹ yovwin nọ rẹ ihworakpọ dibidibi. Kọyensorọ ọmraro Aizaya vwo si nẹ: “Ọphiẹn kọ ta kẹ ọmẹma nẹ, Die wọ vwọ ma vwẹ?’”—Se Aizaya 45:9-12.

6. Ọke vọ yen o me fo e vwo roro kpahen ẹdia rẹ Jihova hepha kerẹ Ọmemama rẹ avwanre? (Ni ihoho na.)

⁶ Onenikristi vwo ghwanra phiyọ ye, ọ sa vwẹroso oma rọyen gan nọ ukperẹ ọ vwọ vwẹroso Jihova kugbe Ota rọyen vwọ kẹ odjekẹ. (Job 37:23, 24) Kẹ, ohwo de rhe roro kpahen aghwanre kugbe ọrho rẹ Ọmemama rọyen ra mrẹ vwo djee vwo? (Aiz. 40:22; 55:8, 9) Ọnana cha vwẹ ukẹcha vwọ kẹ vwọ vwẹ oma kpotọ je riẹn nẹ iroro ri Jihova ghanre vrẹ e rọyen.

7. Die yen Rahela ruru o se vwo rhiabọreyọ ewene kpokpọ rẹ ukoko na vwọphia?

⁷ Rahela, rọ dia Slovenia, mrẹvughe nẹ o vwo roro kpahen Ọmemama rọyen cha rọ uko vwo rhiabọreyọ ewene rẹ ukoko na ruru. O da ta: “Ọ dia ọkieje yen ọ vwọ lọhọ kẹ vwẹ mi vwo rhiabọreyọ ewene rẹ ukoko na ruruu. Kerẹ udje, me vwọ tobọ nẹ Iyẹnrẹn rẹ Ẹko Rọvwerote rẹ #8 ri 2023 nu, o gbevwunu obọ rẹsosuọ me vwọ mrẹ oniọvo ọshare vẹ ẹtuegba rọ ta ota. Ọtiọyena, me da nẹrhovwo rhe Jihova nẹ ọ cha vwẹ uko vwo rhiabọreyọ ewene nana.” Rahela mrẹvughe nẹ kerẹ Ọmemama rẹ akpọ vẹ odjuvwu, Jihova muwan rẹ ohwo ro sun ukoko rọyen vwẹ idjerhe ro fori. Ọ da dianẹ wọ mrẹ bẹnbẹn wo vwo rhiabọreyọ ewene kpokpọ yẹrẹ odjekẹ kpokpọ, diesorọ wọ rha vwomakpotọ roro kpahen oborẹ aghwanre vẹ egba rẹ Ọmemama avwanre rho tee?—Rom 11:33-36.

OBORESORỌ ỌGHẸNẸ VWỌ VWẸ UPHẸN KẸ OJAẸRIỌ

8. Erere vọ yen te avwanre obọ ra vwọ riẹn oboresorọ Ọghẹnẹ vwọ fọ kẹ ojaẹriọ?

⁸ Diesorọ Ọghẹnẹ vwọ vwẹ uphẹn kẹ ojaẹriọ? Ivun rẹ Ọghẹnẹ miovwo ihwo evo re sa mrẹ ẹkpahọnphiyọ vwọ kẹ onọ yenaa, ọtiọyena kẹ ayen roro nẹ Ọghẹnẹ herọ kakakaa! (Isẹ 19:3) Vwọ fẹnẹ ayen, wo yonori nẹ umwemwu ra riuku rọyen kugbe jẹgba yen ghwa ojaẹriọ rhe, ọ dia Jihovaa. Wo ji yono nẹ edirin ri Jihova kpahen ihworakpọ nẹrhẹ iduduru buebun rhe riẹn je mrẹ oborẹ Jihova che vwo phioba phiyọ ojaẹriọ kakare. (2 Pita 3:9, 15) Ọnana nẹrhẹ wo vwo imuẹro ji sikẹrẹ phiyọ.

9. Erhọ yen ẹdia evo e di se roro kpahen oboresorọ Jihova vwọ vwẹ uphẹn kẹ ojaẹriọ?

⁹ Avwanre vwọ hẹrhẹ ọke rẹ Jihova che vwo phioba phiyọ ojaẹriọ na, o fori nẹ e vwo edirin. Jẹ, avwanre yẹrẹ ohwo re vwo ẹguọnọ kpahen de hirharoku ofudjevwe, oshenyẹ yẹrẹ ohwo re vwo ẹguọnọ kpahen de ghwu, avwanre ki roro nẹ Jihova gbeghẹrẹ gan nọ. (Hab. 1:2, 3) Vwẹ ọke tiọyena, ọyen emu aghwanre e vwo roro kpahen oboresorọ Jihova vwọ vwẹ uphẹn kẹ evwata nẹ e rioja ọgangan.a (Une 34:19) E ji se roro kpahen obo ro vwori vwẹ ẹwẹn ro vwo phioba phiyọ ojaẹriọ kakare.

10. Idjerhe vọ yen Anne vwo yerin ghene ughwu rẹ oni rọyen?

¹⁰ Kidie nẹ a riẹn uyota oboresorọ a vwọ vwẹ uphẹn kẹ ojaẹriọ na sa cha avwanre uko vwo chiranko. Anne, rọ dia otọ rẹ ame riariẹ phiyọ ri Mayotte, vwevunrẹ Indian Ocean, da ta: “Ughwu rẹ oni mẹ vwẹ ikpe evo obuko re nẹrhẹ mi muomaphiyọ. Jẹ, ọkieje me vwọ karophiyọ oma mẹ nẹ ọ dia Jihova yen so ojaẹriọọ. O vwo owenvwe ro vwo si koka koka rẹ ojaẹriọ no je kpare ihwo rẹ avwanre vwo ẹguọnọ kpahen ri ghwuru nushi. Mi de roro kpahen erọnvwọn tiọyena, ọnana nẹrhẹ ẹwẹn mẹ dia dọee, o gbevwunu ọkieje.”

11. Mavọ yen oboresorọ Jihova vwọ vwẹ uphẹn kẹ ojaẹriọ sa vwọ cha avwanre uko vwo ghwoghwo ọkieje?

¹¹ Kidie nẹ a riẹn uyota oboresorọ Oghẹnẹ vwọ vwẹ uphẹn kẹ ojaẹriọ, se mu avwanre vwo ghwoghwo ọkieje. Ọ vwọ nabọ djefiotọ nẹ edirin ri Jihova mudiaphiyọ usivwin rẹ ihwo ri kurhẹriẹ nu, Pita de si: “Ovwan gbe roro kpahen oka rẹ ihwo ro fori nẹ ovwan dia. Ovwan vwo uruemu ọfuanfon ji vwobọ vwẹ irueru ri djerephia nẹ ovwan vwomakpahotọ kẹ Ọghẹnẹ.” (2 Pita 3:11) Ọvo usun irueru ri djerephia nẹ a ‘vwomakpahotọ kẹ Ọghẹnẹ’ yen iruo aghwoghwo na. Avwanre vwo ẹguọnọ rẹ ihwo kerẹ ọsẹ avwanre. Ọtiọyena, avwanre guọnọre nẹ ayen dia akpọ kpokpọ rẹ Ọghẹnẹ na. Jihova vwo erhiorin rere ihwo rehẹ ekogho wẹn se vwo vwẹ uphẹn rẹ ayen vwọ ga. Okpuphẹn rode yen wo vwori wọ vẹ Ọghẹnẹ vwọ wian kugbe je vwẹ ukẹcha vwọ kẹ ihwo buebun vwo yono kpahọn bẹsiẹ oba na ki te!—1 Kọr. 3:9.

AVWANRE YERẸN VWẸ “ẸDẸ RE KOBA NA”

12. Erere vọ yen a mrẹ a vwọ riẹn nẹ e yerẹn vwẹ “ẹdẹ re koba na”?

¹² Baibol na djisẹ oborẹ iruemu rẹ ihwo cha dia vwẹ “ẹdẹ re koba na” gbagba. (2 Tim. 3:1-5) Siẹrẹ avwanre da mrẹ oborẹ ihwo ruẹ, ọnana ghwe dje orugba rẹ aroẹmrẹ ri Baibol na phia. Avwanre da mrẹ iruemu rẹ ihwo ri miovwẹnphiyọ, ọnana sa nẹrhẹ e vwo imuẹro nẹ a sa vwẹroso Ota rẹ Ọghẹnẹ.—2 Tim. 3:13-15.

13. Vwo nene itẹ ri Jesu kperi vwẹ Luk 12:15-21, onọ vọ yen a sa nọ oma avwanre?

¹³ Avwanre yerẹn akpọ vẹ ẹwẹn rẹ okpakpa asaọkiephana kidie, ẹdẹ re koba rẹ eyeren nana yen avwanre hepha na. Jokaphiyọ obo re se yono kpahen okpakpa vwo nẹ itẹ ri Jesu rọhẹ Luk 12:15-21. (Se.) Diesorọ a vwọ tanẹ ọdafe na vwo ‘iroroo’? Ọ dia kidie nẹ ọshare na ferii, ẹkẹvuọvo ọ vwẹ erọnvwọn rẹsosuọ vwọ ka obaroo. O koko ‘efe kẹ oma rọyen, jẹ [o] feri vwẹ ẹro rẹ Ọghẹnẹẹ.’ Diesorọ ọnana vwọ dia emu rẹ okpakpa kẹ ọshare na? Ọghẹnẹ da vuẹ nẹ: “Vwẹ ason nana, a cha nokpẹn rẹ arhọ wẹn mie we.” Nonẹna, oba rẹ eyeren nana vwo siẹkẹrẹ phiyọ na, avwanre sa nọ oma avwanre: ‘Die yen obo re me vwọtua djephia kpahen ẹwẹn rẹ okpakpa ro rhe vwe? Die yen mi jirẹ kẹ emọ mẹ nẹ e vwọ tua? Me reyọ ẹgba mẹ, ọke mẹ kugbe igho ri mi vwori vwo koko efe vwọ kẹ oma mẹ gbanẹ vwo koko efe phiyọ odjuvwu?’

14. Vwo nene oborẹ Miki rhiẹromrẹ, diesorọ ọ vwọ dia emu aghwanre e vwo roro kpahen imuẹro ri Baibol ri djerephia nẹ e yerẹn vwẹ ẹdẹ re koba na?

¹⁴ Ẹro rẹ avwanre vwo nẹ akpeyeren se wene siẹrẹ e de roro kpahen obo ri djerephia nẹ e yerẹn vwẹ ẹdẹ re koba na. Ọnana yen obo re phia vwọ kẹ oniọvo aye re se Miki. Ọ da ta: “Mi vwo wontọ nẹ isikuru nu, ẹwẹn mẹ kọ vuẹ vwẹ nẹ mi yono kpahen eranvwe. Jẹ, mi ji vwo ẹwẹn re me vwọ ga kerẹ ọkobaro ọkieje ji kpo asan ra da ma guọnọ ukẹcha. Igbeyan ri tedje da vwẹ uchebro kẹ vwẹ nẹ me nabọ roro te tavwen sẹ mi se yono uyono rẹ eranvwe je yanmu ẹkẹn ri mi bru kẹ oma vwẹ ẹga ri Jihova. Ayen karophiyọ ovwẹ nẹ eyeren nana che vwoba kẹrẹkpẹ. Vwọ vrẹ ọyena, vwẹ akpọ kpokpọ na, mi vwo ọke eje mi vwo yono kpahen eranvwe buebun kirobo re me guọnọre. Ọtiọyena, mi de yono iruo rọ cha reyọ ọkee, rọ sa nẹrhẹ me tẹn ena sansan re cha vwẹ ukẹcha kẹ vwẹ. Ọnana nẹrhẹ me mrẹ iruo mi se vwo bicha oma mẹ vwẹ iruo ọkobaro na, ọke vwọ yanran, me da kua kpo Ecuador, rọ dia asan ra da ma guọnọ ukẹcha.” Asaọkiephana, Miki vẹ ọshare rọyen ruiruo rẹ ikiekin vwẹ ẹkuotọ yena.

15. Ẹwẹn vọ yen ihwo se vwo kpahen iyẹnrẹn esiri na? Djudje ọvo. (Ni ihoho na.)

¹⁵ E jẹ ofu dje avwanre siẹrẹ ihwo da ka sen iyẹnrẹn esiri naa. Ihwo se wene. Roro kpahen udje rẹ oniọvo ri Jesu, Jems. Ọ mrẹ ọke rẹ Jesu vwọ ghwanre, rọ vwọ dia Mesaya na, ji yono ihwo kirobo rẹ ohwo ọfa vuọvo ruruu. Ẹkẹvuọvo, vwẹ ikpe buebun, Jems rhọnvwe nene Jesuu. Jẹ, a vwọ kpare Jesu nushi nu, oniọvo rọyen da rhe dia odibo—rọ nabọ vwo oruru mamọ!b (Jọn 7:5; Gal. 2:9) Wọ vwẹ ẹro okueku vwo nẹ ọghanrovwẹ rọ herọ re vwo bru ihwo rẹ orua ri ji dje omavwerhovwẹn phia raa yẹrẹ e vwo rhivwin bru ihwo ri ji rhiabọreyọ ovuẹ rẹ Uvie naa. Karophiyọ nẹ avwanre yerẹn vwẹ ẹdẹ re koba na, ọtiọyena, iruo aghwoghwo rẹ avwanre na vẹ okpakpa. Obo wọ vuẹ ayen nonẹna se te ẹwẹn rayen vwẹ ọke ọfa, ọkiọvo ukpokpogho rode na da tobọ tonphiyọ nu.c

VWO ỌDAVWARO KPAHEN ODJEKẸ RI JIHOVA ỌKIEJE

16. Idjerhe vọ yen wọ vwọ mrẹ erere vwo nẹ odjekẹ ri Jihova? (Ni ekpeti na “Reyọ Ayen Vwọ Cha Ihwo Efa Uko.”)

¹⁶ Erọnvwọn buebun rẹ ukoko ri Jihova ruẹ, e ru ayen kẹ ihwo re riẹn emu ọvo kpahen Baibol naa. Kerẹ udje, ota rotu rẹ kudughwrẹn kudughwrẹn, iyovwinreta evo kugbe ividio rehẹ jw.org, kugbe imagazini re phiẹ phiyọ ada, e ru ayen kẹ ihwo re dia Iseri ri Jihovaa. Dedena, avwanre je mrẹ erere nẹ ayen cha. E nẹrhẹ ẹguọnọ rẹ avwanre vwo kpahen Jihova kodophiyọ, nẹrhẹ esegbuyota avwanre kpahen Ota rọyen ganphiyọ, ọ je nẹrhẹ ona avwanre vwo yono ihwo efa iyota rehẹ Baibol na ghwotọphiyọ.—Une 19:7.

17. Erhọ yen ẹdia evo a da sa karophiyọ iyono rehẹ Baibol elọlọhọ?

¹⁷ Kerẹ Iseri ri Jihova, oma vwerhan avwanre siẹrẹ e de ru ewene kpokpọ phiyọ ẹruọ re vwo kpahen uyota ri Baibol ọvo. Oma je vwerhan avwanre kpahen iyono elọlọhọ rehẹ Baibol na re nẹrhẹ avwanre mrẹ uyota na vughe ẹsosuọ. E de she ro ufi ra vwọ tanẹ ọ rẹ avwanre ọvo yen gbare, ukpe ra vwọ vwomakpotọ nene odjekẹ ro nẹ obọ rẹ ukoko ri Jihova rhe, e jẹ avwanre karophiyọ nẹ ọgbaghwanre kugbe Ọmemama ro me kpenu yen sun ukoko na. Siẹrẹ avwanre yẹrẹ ohwo re vwo ẹguọnọ kpahen de chiranko rẹ ọdavwini, e se vwo erhiorin je karophiyọ oboresorọ Jihova vwọ vwẹ uphẹn kẹ ojaẹriọ. E de brorhiẹn rẹ asan ro fori nẹ a ghwọrọ ọke vẹ ekuakua avwanre phiyọ, a sa karophiyọ nẹ ẹdẹ re koba re de yerẹn na guọnọ okpakpa. E jẹ odjekẹ ri Jihova mu avwanre, ru avwanre ganphiyọ, je nẹrhẹ avwanre dia evwaghwanre rẹ ihwo ọkieje.