Se Ekpako Na

1. Idjerhe vọ yen Jihova vwo djephia nẹ igodẹ rọyen pha ghanghanre kẹ ọyen?

IGODẸ ri Jihova pha ghanghanre vwọ kẹ. Ọbara ri Jesu yen ọ vwọ dẹ ayen, ọ da vwẹ ekpako rẹ ukoko na vwo mu nẹ e vwẹrote uchuru Rọyen. (Iruo 20:28) Ọghẹnẹ guọnọre nẹ a vwẹrote igodẹ rọyen vwẹ idjerhe ri dẹndẹn. Vwẹ otọ rẹ usuon ri Kristi, ekpako na vwẹrote je sẹro rẹ igodẹ na vrabọ rẹ imuoshọ.—Aiz. 32:1, 2.

2. Amono yen Jihova nabọ vwẹrote san? (Izikiẹl 34:15, 16)

² Jihova vwo ọdavwẹ rẹ igodẹ rọyen eje, ẹkẹvuọvo ọ nabọ vwẹrote itu re rioja san. Womarẹ ekpako na, ọ vwẹ ukẹcha kẹ ihwo re rioja fikirẹ oborẹ ayen ruru. (Se Izikiẹl 34:15, 16.) Ẹkẹvuọvo, ọ guọnọre nẹ a nokpẹn rẹ ukẹcha siẹrẹ a da guọnọ. Vwẹ ọke tiọyena, vwọ vrẹ ẹrhovwo rẹ avwanre nẹ kpahen ukẹcha rẹ Ọghẹnẹ, o ji fo a vwọ nokpẹn rẹ ukẹcha rẹ “isuigodẹ kugbe iyono” rehẹ ukoko na.—Ẹfe. 4:11, 12.

3. Mavọ yen avwanre eje sa vwọ mrẹ erere siẹrẹ a da fuẹrẹn ẹdia ro te ekpako na?

³ Vwẹ uyono nana, a cha ta ota kpahen ọrhuẹrẹphiyotọ rẹ Jihova ru kẹ avwanre rere a sa vwọ mrẹ ukẹcha womarẹ ekpako na. A cha kpahenphiyọ enọ nana: Ọke vọ yen a vwọ nokpẹn rẹ ukẹcha mie ekpako na? Diesorọ e vwo ru ọtiọyen? Idjerhe vọ yen ayen vwọ vwẹ ukẹcha kẹ avwanre? Ọ da tobọ dianẹ e vwo ebẹnbẹn vuọvo enẹnaa, ẹkpahọnphiyọ rẹ enọ nana cha nẹrhẹ ọdavwaro avwanre kpahen ọrhuẹrẹphiyotọ nana rẹ Ọghẹnẹ ruru na ganphiyọ, o ji se sivwin urhuarhọ avwanre ẹdẹ ọvo.

ỌKE VỌ YEN E VWO “SE EKPAKO” NA?

4. Diesorọ a sa vwọ tanẹ ọga rẹ ẹwẹn yen Jems 5:14-16, 19, 20 ta ota kpahen? (Ni ihoho na.)

⁴ Odibo Jems nọ onọ nana rọ vwọ ta ota kpahen ọrhuẹrẹphiyotọ rẹ Ọghẹnẹ ruru ra vwọ mrẹ ukẹcha: “O vwo ohwo rọ muọga vwẹ ohri rẹ ovwan? E jẹ o se ekpako rẹ ukoko na.” (Se Jems 5:14-16, 19, 20.) Eta re riariẹ onọ nana phiyọ djerephia nẹ ọga rẹ ẹwẹna yen Jems ta ota kpahan. Kerẹ udje, ọ dia ọbo yen a tare nẹ ohwo rọ muọga na see, ẹkẹvuọvo ekpako na. Ọ vwọ dianẹ ọga rẹ ẹwẹn yen a ta ota kpahen na, e vwo sivwin ọga na kpo se churobọ si evwoghovwo rẹ imwemwu. Vwẹ ẹdia evo, owọẹjẹ ra guọnọre e se vwo sivwin ọga rẹ ẹwẹn vẹ ọ rẹ ugboma sa họhọ ohwohwo. Siẹrẹ avwanre da muọga, e bru ọbo ra je vuẹ oborẹ oma ruẹ avwanre, e mi ji nene odjekẹ rọyen. Ọtiọyen ọ je hepha nẹ, a da muọga rẹ ẹwẹn o fori e vwo bru ọkpako ra, vuẹ kpahen ẹdia avwanre hepha, ji nene odjekẹ ri Baibol rọ vwọ kẹ avwanre.

5. Mavọ yen a sa vwọ riẹn sẹ oyerinkugbe rẹ avwanre vẹ Jihova dogho obọ re?

⁵ Ọrhuẹrẹphiyotọ ra ta ota kpahen vwẹ Jems uyovwin 5 jiriro kẹ avwanre nẹ e bru ekpako na ra siẹrẹ e de no nẹ oyerinkugbe avwanre vẹ Jihova dogho obọ. Ọyen emu aghwanre a vwọ nokpẹn rẹ ukẹcha tavwẹn oyerinkugbe avwanre vẹ ọ rẹ Ọghẹnẹ ke va avwanre abọ! Ofori nẹ avwanre ta uyota kẹ oma rẹ avwanre. Baibol na si avwanre orhọ nẹ a rha jomaotọọ, a sa phiẹn oma rẹ avwanre nẹ a vẹ Jihova vwo uvi rẹ oyerinkugbe. (Jems 1:22) Ọtiọyen Inenikristi evo vwẹ Sadis rẹ ẹgbukpe ujorin rẹsosuọ rorori, ọtiọyena Jesu de si ayen orhọ kpahen ẹdia rayen na. (Ẹvwọ. 3:1, 2) Idjerhe ọvo ra sa vwọ riẹn sẹ a vẹ Jihova vwo uvi rẹ oyerinkugbe, yen a vwọ vwẹ oruru rẹ ẹga rẹ avwanre enẹna vwọ vwanvwẹn ọ re vwori vwẹ obuko. (Ẹvwọ. 2:4, 5) A sa nọ oma rẹ avwanre: ‘Aghọghọ re me mrẹ siẹrẹ mi de se ji roro kokodo kpahen Baibol na shekpotọ re? Ọke ro wen vwe yen mi vwo muegbe ji kpo uyono? Oruru mẹ vwẹ iruo aghwoghwo na shekpotọ? Akpọẹrio vẹ ekuakua akpeyeren yen ma reyọ ọke mẹ yẹrẹ eyen mi me roro kpahan?’ Ọ da dianẹ e yen ẹkpahọnphiyọ wẹn vwọ kẹ ọvo usun rẹ enọ nana, ọnana sa dia ovwiẹrẹ, e rhe ru emu vuọvo kpahọọn ọ sa braphiyọ. Avwanre komobọ rha sa rhuẹrẹ ẹdia rẹ ovwiẹrẹ na phiyọọ yẹrẹ ọ da nẹrhẹ e gbevwọso iwan rẹ Ọghẹnẹ, a gba nokpẹn rẹ ukẹcha mie ekpako na.

6. Die yen o fori nẹ ihwo ri ru umwemwu ọgangan ru?

⁶ Vwọrẹ uyota, o fori nẹ ihwo ri ru umwemwu ọgangan rọ sa nẹrhẹ e si ohwo nẹ ukoko na bru ọkpako ra. (1 Kọr. 5:11-13) Kohwo kohwo ro she ro umwemwu ọgangan guọnọ ukẹcha rọ vwọ rhuẹrẹ oyerinkugbe rọ vẹ Jihova vwori phiyọ. A sa vwọ mrẹ evwoghovwo ri Jihova womarẹ ọtanhirhe na, o fori nẹ e “ruiruo ri dje okurhẹriẹ phia.” (Iruo 26:20) Iruo yena churobọ si e vwo bru ekpako na ra e de ru umwemwu ọgangan.

7. Amono yen ekpako na je vwẹ ukẹcha kẹ?

⁷ Ọ dia ihwo ri ru umwemwu ọgangan ọvo yen ekpako na vwẹ ukẹcha kẹẹ; ayen ji ru ọtiọyen kẹ ihwo rẹ oyerinkugbe rayen vẹ Jihova dogho obọ. (Iruo 20:35) Kerẹ udje, wo se no nẹ ẹgba ru wọ vwọ họnre vwọso erharhe urhurusivwe rhe rhe wee. Wọ sa mrẹ bẹnbẹn ọ da dianẹ wọ reyọ ihuvwun egangan, ni ihoho rẹ ihwo re banphiyọ, yẹrẹ yeren akpọ rẹ ọfanrhiẹn tavwen wọ ke mrẹ uyota na vughe. Ofori nẹ wẹwẹ ọvo nene ebẹnbẹn nana muabọọ. Wọ sa ta ota kẹ ọkpako rọ cha kerhọ kẹ ọdavwẹ wẹn, vwẹ uchebro ro fori kẹ wẹ, je kẹ wẹ imuẹro nẹ wo rhe gbe nene orharhe rẹ urhurusivwee, wo se ru obo re vwerhen Jihova oma. (Aghwo. 4:12) Ofu rẹ obẹnbẹn ru wo nene muabọ na de dje we, ekpako na sa karophiyọ owẹ nẹ wo ni oyerinkugbe wẹn vẹ ọ ri Jihova ghanghanre, nẹ wọ je vwẹroso ẹgba romobọ wẹẹn.—1 Kọr. 10:12.

8. Eka rẹ ebẹnbẹn vọ yen e che mu bru ekpako raa?

⁸ Ọ dia ọkieje yen e vwo bru ekpako ra siẹrẹ e de vwo obẹnbẹẹn. Kerẹ udje, e gbe dje nẹ wọ ta ota ro miovwo oniọvo wẹn ivun, ọkiọvo ọ sa dianẹ wọ tobọ muophu ọgangan. Wọ sa reyọ uchebro ri Jesu rọ tare nẹ wọ vẹ oniọvo wẹn rhuẹrẹ kugbe vwo ruiruo, ukperẹ wo bru ọkpako ra. (Mat. 5:23, 24) Wo se ru ehiahiẹ kpahen iyovwinreta re ta ota kpahen dẹndẹn, edirin, kugbe omaẹriẹnsuon rere wọ sa vwọ nabọ dje iruemu iyoyovwin nana phia ọke ọfa. Ọ da dianẹ wọ je sa rhuẹrẹ obẹnbẹn wẹn na phiyọọ, wọ sa nokpẹn rẹ ukẹcha mie ọkpako ọvo. Vwẹ ileta rẹ ọyinkọn Pọl si rhe ukoko ri Filipae, ọ vuẹ oniọvo ọvo re se odẹ rọyeen nẹ ọ vwẹ ukẹcha kẹ Yuodia kugbe Sintiki vwọ rhuẹrẹ ẹghwọ rayen phiyọ, ọkpako rẹ ukoko wẹn je sa vwẹ ukẹcha tiọyen vwọ kẹ wẹ.—Fil. 4:2, 3.

DIESORỌ E VWO SE EKPAKO NA?

9. Diesorọ oma re vwo se ekpako na vwo jẹ avwanre ẹvuọ? (Isẹ 28:13)

⁹ A guọnọ esegbuyota vẹ uduefiogbere ra vwọ nokpẹn rẹ ukẹcha siẹrẹ e de ru umwemwu ọgangan yẹrẹ e de no nẹ ẹgba ra vwọ họnre vwọso ovwiẹrẹ romobọ rhe rhe avwanree. E jẹ omavovwẹ djẹ avwanre ekpako na e see. Diesorọ? E de nene ọrhuẹrẹphiyotọ ri Jihova, je djephia nẹ a vwẹrosuọ vẹ odjekẹ re vwo ru esegbuyota rẹ avwanre gan. E djephia nẹ a guọnọ ukẹcha rọyen a da guọnọ she. (Une 94:18) Ọ da dianẹ avwanre ru umwemwu, ka cha mrẹ arodọnvwẹ rọyen siẹrẹ a da fan ji siobọnẹ imwemwu rẹ avwanre.—Se Isẹ 28:13.

10. Die yen sa phia e de si imwemwu rẹ avwanre nu?

¹⁰ Vwọ fẹnẹ ebruphiyọ ro no cha a da nokpẹn rẹ ukẹcha mie ọkpako, avwanre sa nẹrhẹ ẹdia na braphiyọ siẹrẹ e de si imwemwu rẹ avwanre nu. Ọke rẹ Ovie Devid vwọ davwẹngba vwo si imwemwu rọyen nu, o de miovwo oyerinkugbe rọyen vẹ Jihova, ẹwẹn de ji kpokpo mamọ. (Une 32:3-5) Kerẹ ọga yẹrẹ ora ra fobọ sivwiin, ọtiọyen yẹn ọga rẹ ẹwẹn je hepha, ọ cha braphiyọ a rha fobọ ru emuọvo kpahọọn. Jihova riẹn ọnana, kọyensorọ ọ vwọ vuẹ avwanre nẹ a rhe rere a vẹ ọyen jẹ “iroro kugbe” womarẹ ọrhuẹrẹphiyotọ ro ruru a sa vwọ mrẹ esivwon rẹ ẹwẹn.—Aiz. 1:5, 6, 18.

11. Idjerhe vọ yen imwemwu egangan re si nu se vwo ghworo ihwo efa?

¹¹ E de si imwemwu egangan rẹ avwanre ruru nu, a sa reyọ ayen vwo ghworo ihwo efa. Ọnana sa nẹrhẹ ẹwẹn ọfuanfon rẹ Ọghẹnẹ jẹ ukoko na eje ẹ dia, ji gbowọphiyọ okugbe rẹ iniọvo na. (Ẹfe. 4:30) Vwẹ idjerhe vuọvo na, a da mrẹ ohwo ọvo vwẹ ukoko na ro ru umwemwu ọgangan, jiro kẹ ohwo na nẹ ọ ra vuẹ ekpako na.b E de si umwemwu rẹ ohwo ọfa ruru nu, ọ cha nẹrhẹ avwanre je riabe. (Liv. 5:1) Ofori nẹ ẹguọnọ avwanre vwo kpahen Jihova mu avwanre vwọ yanphia je ta uyota na. Ọtiọyena, ke se ru ukoko na fon je vwẹ ukẹcha kẹ ihwo tiọyen ri ru umwemwu vwọ rhuẹrẹ oyerinkugbe rayen vẹ Jihova phiyọ.

IDJERHE VỌ YEN EKPAKO NA VWỌ VWẸ UKẸCHA KẸ AVWANRE?

12. Idjerhe vọ yen ekpako na vwọ vwẹ ukẹcha kẹ otu rẹ oyerinkugbe rayen vẹ Jihova dogho obọ?

¹² A vwẹ iji kẹ ekpako na nẹ ayen vwẹ ukẹcha kẹ otu rẹ oyerinkugbe rayen vẹ Jihova dogho obọ. (1 Tẹsa. 5:14) Wo de ru umwemwu, ayen sa nọ wẹ enọ vwọ riẹn obo rehẹ evun wẹn kugbe oborẹ oma ru we. (Isẹ 20:5) Wọ sa cha ayen uko womarẹ wo vwo rhievun ta ota kẹ ayen, ọ da tobọ dianẹ wọ mrẹ bẹnbẹn wo vwo ru ọtiọyen fikirẹ ẹkuruemu wẹn, oka rẹ ohwo ru wọ hepha, yẹrẹ oma rẹ obo ru wo hirharokuẹ vo wẹ. Ọ da tobọ dianẹ eta wẹn pha “gbaegbae,” wo jẹ oshọ mu wee. (Job 6:3) Ekpako na che brokpakpa reyọ owẹ vwo guẹdjọọ, ukperẹ ọtiọyen ayen cha nabọ frẹkotọ fuẹrẹn otọ rẹ ota na eje tavwen ayen ke vwẹ uchebro kẹ wẹ. (Isẹ 18:13) Ayen riẹnre nẹ ẹroevwote rẹ uchuru na reyọ ọke, ọtiọyena ayen rhe no nẹ echidiotọ vuọvo teri ayen vwọ rhuẹrẹ obẹnbẹn rọhẹ otọ na phiyọọ.

13. Idjerhe vọ yen ẹrhovwo vẹ odjekẹ ri Baibol rẹ ekpako na vwọphia sa vwọ cha avwanre uko? (Ni ihoho na.)

¹³ Ekpako na che toroba oghwa rẹ abe ru wo muru siẹrẹ wo de se ayeen. Ukperẹ ọtiọyen, ayen che djunute obẹnbẹn wẹn na vwẹ ẹrhovwo rayen. O se gbe we unu nẹ ẹrhovwo rayen “vọnre vẹ ẹgba mamọ.” Ukẹcha rẹ ayen vwọphia ji churobọ si ‘evwri rẹ ayen che vwo ghworo uwe vwẹ odẹ ri Jihova.’ (Jems 5:14-16) “Evwri” nana mudiaphiyọ uyota Ota rẹ Ọghẹnẹ. Kidie nẹ ekpako na tẹn ona rẹ obo ra reyọ Baibol na vwo ruiruo, ayen sa reyọ vwo bru we uche ọnana me nẹrhẹ ẹwẹn wẹn totọ je cha wẹ uko vwọ rhuẹrẹ oyerinkugbe ru wẹ vẹ Jihova vwori phiyọ. (Aiz. 57:18) Odjekẹ ri Baibol rẹ ayen vwọphia na se ru owenvwe wo vwo ru obo ri yovwinri ganphiyọ. Womarẹ ayen, wo se nyo urhuru ri Jihova rọ vuẹ wẹ nẹ: “Ọnana hẹ idjerhe na, yan nene.”—Aiz. 30:21.

14. Vwo nene obo rehẹ Galesha 6:1, idjerhe vọ yen ekpako na vwọ vwẹ ukẹcha kẹ kohwo kohwo rọ “jowọ rọ chọre”? (Ni ihoho na.)

¹⁴ Se Galesha 6:1. Onenikristi rọ “jowọ rọ chọre” nene iwan rẹ ọvwata rẹ Ọghẹnẹẹ. Owọ rọ chọre na se mudiaphiyọ ohwo rẹ iroro phiẹnre yẹrẹ ohwo rọ vwẹ arudo vwo gbevwọso Urhi rẹ Ọghẹnẹ. Ẹguọnọ yen nẹrhẹ ekpako na ‘davwẹngba vwọ kpọ ohwo tiọyena viẹ vẹ ẹwẹn re dẹndẹn.’ A sa reyọ ota ri Grik ra fan phiyọ ‘ọkpọvi’ vwo dje ohwo ro muẹ ubeku ro vwirhiri phiyọ ẹdia rere asan na vwo jẹ ohwo na ẹda. Kirobo rẹ ọbo rọ tẹn ona davwẹngba vwo muẹ ubeku ro vwirhiri phiyọ ẹdia rere ọmiaovwẹ na vwo jẹ ẹgan nọ ye, ọtiọyen ekpako na je tẹnroviẹ oborẹ ayen se vwo sivwin ọga rẹ ẹwẹn rẹ avwanre ababọ rẹ ayen vwo jẹ ọmiaovwẹ na e toroba. A je vuẹ ayen nẹ “[ayen] nomaso.” Rẹ ayen vwọ cha avwanre uko vwọ kpọ idjerhe rẹ avwanre viẹ ye, ekpako na ji se noso nẹ ayen sa jowọ re chọre kidie ayen ihwo re gbaree. Ọtiọyena, kẹ ayen dje erorokẹ phia ukperẹ ayen vwo nẹ oma rayen gegerege, nẹ ayen ma fon, yẹrẹ reyọ ihwo vwo guẹdjọ.—1 Pita 3:8.

15. Die yen avwanre se ru e de vwo obẹnbẹn?

¹⁵ A sa vwẹroso ekpako ukoko rẹ avwanre. E yono ayen obo re rhurhu eta rẹ odjahọn, mu uchebro rayen kpahen Baibol na ukperẹ ọhọ romobọ rayen, je cha avwanre uko vwo mu eghwa rẹ avwanre. (Isẹ 11:13; Gal. 6:2) Oka rẹ ohwo rẹ ayen hepha vẹ oborẹ ayen rhiẹromrẹ vwẹ akpeyeren fẹnẹ ohwohwo, ẹkẹvuọvo e se bru ayen ra je vuẹ ayen kpahen ebẹnbẹn avwanre. Uyota nẹ avwanre cha yan nẹ owọ rẹ ọkpako ọvo kpo ọfa ra guọnọ uchebroo, vẹ ẹwẹn ra vwọ mrẹ ọvo rọ cha vuẹ avwanre obo ra guọnọ nyoo. E de ru ọtiọyen, avwanre ke cha họhọ ihwo re “guọnọ nyo” Ota rẹ Ọghẹnẹẹ rọ dia “uyono rọ vọnre vẹ erere” na. (2 Tim. 4:3) E de bru ọkpako ọvo ra kpahen obẹnbẹn rẹ avwanre vwori, ọ sa nọ avwanre sẹ a vuẹ ekpako efa kpahọn re vẹ uchebro rẹ ayen vwọphia. Omaevwokpotọ sa nẹrhẹ ọ nokpẹn rẹ uchebro mie ọkpako ọfa.—Isẹ 13:10.

OGHWA RO TE AVWANRE KOMOBỌ

16. Oghwa vọ yen avwanre vwori komobọ?

¹⁶ Dede nẹ ekpako na vwẹrote avwanre kerẹ igodẹ rẹ Ọghẹnẹ, ayen vuẹ avwanre oborẹ avwanre che ruu. Avwanre vwo oghwa ro te avwanre komobọ re vwo yeren akpọ rẹ omaẹvwọkpahotọ kẹ Oghẹnẹ. Avwanre cha niyẹnrẹn rẹ oma avwanre kẹ Ọghẹnẹ kpahen eta kugbe uruemu rẹ avwanre. Womarẹ ukẹcha rọyen, e se phi egbabọse ra vwọ sẹro rẹ ọyọnregan rẹ avwanre kparobọ. (Rom 14:12) Ọtiọyena, ukperẹ ekpako na vwọ vuẹ avwanre obo re ru, kẹ ayen rionbọ kpo Ota rẹ Ọghẹnẹ rọ dia Baibol na. Siẹrẹ e de nene uchebro ro nẹ Baibol na rhe, ke se yono “ẹgba rẹ ọmrẹvughe” rẹ avwanre vwo bru emamọ erhiẹn.—Hib. 5:14.

17. Orhiẹn vọ yen avwanre che bru?

¹⁷ Okpuphẹn rode yen avwanre vwori ra vwọ dia igodẹ ri Jihova! Jihova ji Jesu rọ dia “omamọ osuigodẹ na,” rhe hwosa rẹ ọtanhirhe na rere e se vwo vwo uphẹn arhọ ri bẹdẹ. (Jọn 10:11) Jihova womarẹ ekpako ukoko rẹ Inenikristi na ru ive rọyen gba nẹ: “Ke me cha kẹ ovwan isuigegede ri Je vwe, re cha vwẹ eriẹn vẹ evughe ghẹrẹ ovwan.” (Jer. 3:15) A da muọga rẹ ẹwẹn yẹrẹ oyerinkugbe rẹ avwanre vẹ ọ ri Jihova de dogho obọ, e jẹ e hwọke a ke nokpẹn rẹ ukẹcha mie ekpako naa. E je brorhiẹn ra vwọ reyọ ọrhuẹrẹphiyotọ rẹ Jihova vwo mu womarẹ ekpako na vwo ruiruo vọnvọn.