Oborẹ Ofovwin vẹ Ozighi Egbe Che Vwo Vwoba

ỌGHẸNẸ CHA GHWỌRỌ USUON RẸ IHWORAKPỌ

Ọghẹnẹ cha womarẹ ofovwin rẹ Amagidọn vwo phioba phiyọ usuon rẹ ihworakpọ.a (Ẹvwọphia 16:16) Vwẹ ọke yena, “ivie rẹ akpọ na ejobi” che koko vwọ kẹ “ofovwin rẹ ẹdẹ rode rẹ Ọghẹnẹ Ọromevwẹgba na.” (Ẹvwọphia 16:14) Amagidọn ọyen ofovwin rẹ Ọghẹnẹ che vwo phioba phiyọ ifovwin eje.

Ọghẹnẹ cha reyọ Uvie yẹrẹ usuon rọyen ro che sun nẹ odjuvwu rhe na vwo wene usuon rẹ ihworakpọ, usuon rọyen kọ dia bẹdẹ. (Daniẹl 2:44) Ọghẹnẹ sane Ọmọ rọyen, Jesu Kristi, nẹ ọ dia Ovie rẹ Uvie na. (Aizaya 9:6, 7; Matiu 28:18) Ọnana yen Uvieb ri Jesu yono idibo rọyen nẹ ayen nẹrhovwo kpahen. (Matiu 6:9, 10) Ihworakpọ na eje cha dia vwọrẹ okugbe vwẹ otọ rẹ usuon ọvo vwẹ akpọ na eje ri Jesu che sun.

Vwọ fẹnẹ isun rẹ ihworakpọ, Jesu cha vwẹ ogangan rọyen vwo ru ọdavwẹ romobọ rọyeen. Kidie nẹ ọyen ohwo ro brorhiẹn rẹ ọsoso, o gbi vwo ohwo vuọvo ro che ni oma rọyen kueku fikirẹ ohọroma, ẹkuotọ yẹrẹ ẹkuruemu re fẹnẹree. (Aizaya 11:3, 4) Ihwo gbe họnre kidie nẹ e shenyẹ ayeen. Diesorọ? Kidie Jesu che se ohwo ọvuọvo gboja. “Kidie o sivwi ọ rẹ akpọ bẹn vwẹ ọke ro de kperi se, ovwiogbere kugbe ohwo ro vwo ọchuko-o. . . . Nẹ oshenyẹ vẹ ogbarogba ọ tan arhọ rayen nurhe.”—Une rẹ Ejiro 72:12-14.

Uvie rẹ Ọghẹnẹ cha ghwọrọ ekuakua rẹ ofovwin vwo nẹ otọrakpọ na. (Maika 4:3) Ọ je cha ghwọrọ irumwemwu re rhọnvwe dobọ rẹ ohọnre jii vẹ e re so omaẹwan vwọ kẹ ihwo efa. (Une rẹ Ejiro 37:9, 10) O toro asan rẹ a rare vwẹ akpọ naa, ẹwẹn rẹ ihwo ejobi che te otọ.—Izikiẹl 34:28.

Ihworakpọ na eje che yeren omamọ rẹ akpọ vwẹ otọ rẹ Uvie rẹ Ọghẹnẹ. Uvie na che si ebẹnbẹn re so ohọnre no, ebẹnbẹn kerẹ ọbẹnvwẹ, owẹnvwe, vẹ jẹ omamọ uwevwin evwo. Ihwo eje che vwo omamọ emu rẹ ayen cha re vẹ asan ro fuoma rẹ ayen cha dia.—Une rẹ Ejiro 72:16; Aizaya 65:21-23.

Vwẹ otọ rẹ Uvie rẹ Ọghẹnẹ, emiavwe rẹ ofovwin soro eje che no. Ọ dia emiavwe rẹ ugboma ọvo yen Uvie na che si noo, o ji che si ebẹnbẹn rẹ iroro vẹ ọkuọrọn eje rẹ ofovwin soro no. A cha tobọ rhọvwọn ihwo ri ghwuru rhivwin. (Aizaya 25:8; 26:19; 35:5, 6) Orua sansan cha rhoma dia kugbe, erọnvwọn ebrabra eje re phiare vwẹ ofovwin cha rhe dia ‘erọnvwọn awanre re wanvrẹ re.’—Ẹvwọphia 21:4.

ỌGHẸNẸ CHE SI UMWEMWU NO

Uvie rẹ Ọghẹnẹ che ku ihwo kugbe vwọ ga Ọghẹnẹ rẹ uyota vuọvo na Jihovac, “Ọghẹnẹ rẹ ẹguọnọ kugbe ufuoma.” (2 Kọrẹnt 13:11) Ihwo che yono oborẹ ayen sa vwọ dia kugbe vwọrẹ ufuoma. (Aizaya 2:3, 4; 11:9) Ihwo eje re reyọ oborẹ ayen yonori vwo ruiruo rha cha dia ọviẹn vwọ kẹ umwemwu ọfaa.—Rom 8:20, 21.

ỌGHẸNẸ CHA GHWỌRỌ ESHU VẸ EMEKASHE RỌYEN

Uvie rẹ Ọghẹnẹ cha ghwọrọ Eshu vẹ emekashe rọyen no, re dia ihwo re nẹrhẹ ihwo phi ofovwin. (Ẹvwọphia 20:1-3, 10) “Ufuoma [che] bu” vwẹ akpọ na a da ghwọrọ ayen nu.—Une rẹ Ejiro 72:7.

Jẹ o muwẹro nẹ ive rẹ Ọghẹnẹ veri ro vwo phioba phiyọ ofovwin vẹ ozighi egbe che rugba. O vwo ẹgba kugbe owenvwe ro vwo si ofovwin no.

• Ọghẹnẹ vwo ẹgba vẹ aghwanre ro vwo phioba phiyọ ofovwin vẹ ozighi. (Job 9:4) O vwo emu vuọvo rọ bẹn kẹ eruoo.—Job 42:2.

• O tuẹn Ọghẹnẹ oma ọ da mrẹ ihwo re rioja. (Aizaya 63:9) O ji vwo utuoma “kpahe ohwo ro gbe ozighi.”—Une rẹ Ejiro 11:5.

• Ọkieje yen Ọghẹnẹ vwo ruẹ nene obo rọ tare; o che se gun efiaan.—Aizaya 55:10, 11; Taitọs 1:2.