Obo re se Vwo Vwo Ufuoma Dede nẹ e Phiẹ Ofovwin ji Gbe Ozighi
Gary ro ruiruo rẹ isodje jovwo da ta: “Tavwen mi ki rhi yono Baibol na, me riẹn oboresorọ oshenyẹ vẹ umiovwo vwọ vọn akpọ naa. Jẹ enẹna mi rhi vwo ufuoma rẹ ẹwẹn re. Me riẹnre nẹ Jihova Ọghẹnẹ che ru akpọ na phiyọ asan ro fuoma.”
Ọ dia Gary ọvo yen vwo ọkpọ rẹ iroro yenaa. Ja mrẹ oborẹ Baibol na vwọ vwẹ ukẹcha kẹ ihwo buebun re.
BAIBOL NA DA TA: “Kidie wọwẹ, E Ọrovwohwo, ohwo esiri vẹ evwoghovwo.”—Une rẹ Ejiro 86:5.
UKẸCHA RỌ VWỌPHIA: “Owọrota nana kẹ vwẹ imuẹro nẹ Jihova gbe arodọnvwẹ. Me riẹnre nẹ o muegbe rọ vwọ reyọ vwo ghovwo uvwe fikirẹ erọnvwọn eje mi ruru vwẹ obuko re vwẹ ofovwin ri mi vwobọ vwọ.”—Wilmar, Colombia.
BAIBOL NA DA TA: “Me ma idjuvwu ọkpokpọ vẹ akpọ ọkpokpọ; ekuakua rẹ awanre na a gbe karophihọ aye-en eyẹ iroro gbe ra-a.”—Aizaya 65:17.
UKẸCHA RỌ VWỌPHIA: “Me muọga rẹ PTSD (post-traumatic stress disorder) ji muomaphiyọ gangan fikirẹ oborẹ mi rhiẹromrẹ kerẹ isodje. Ẹkẹvuọvo ẹkpo ri Baibol nana nẹrhẹ me karophiyọ nẹ o rhe che krii Jihova che phioba phiyọ ẹnwan rẹ udu mẹ eje. Me gbe cha karophiyọ ayen ọfaa. Ọnana vwerhen oma dẹn!”—Zafirah, United States.
BAIBOL NA DA TA: “Vwẹ ọke rọye o jẹn ọvwata dia buebu, rere ufuoma bu, bẹsiẹ rẹ emeranvwe na vwo no fue.”—Une rẹ Ejiro 72:7.
UKẸCHA RỌ VWỌPHIA: “Ọkieje yen mi vwo roro kpahen eta yena. O rhe che krii, ofovwin vẹ erọnvwọn ebrabra rẹ ofovwin soro che notọ, oshọ rhe che mu avwanre ọfa nẹ emuọvo cha phia kẹ ihwo rẹ avwanre vwo ẹguọnọ kpaheen.”—Oleksandra, Ukraine.
BAIBOL NA DA TA: “Irivwi wẹn ri ghwuru cha rhọ. . . . E ihwo re dia iwurhie na, we vrẹn wa so ine wa ghọghọ!”—Aizaya 26:19.
UKẸCHA RỌ VWỌPHIA: “Ihwo rẹ orua mẹ eje joma ghwu re ọke ephẹrẹ ọfa vwọ guọnọ teyen ihwo ri Tutsi eje hwe. Ẹkẹvuọvo, owọrota nana kẹ vwẹ imuẹro nẹ me cha rhoma mrẹ ayen. Mi nẹ kiọkiọkiọ vwo kpo ọke mi che vwo nyo urhurhu rayen a da rọvwọn ayen nushi nu!”—Marie, Rwanda.
BAIBOL NA DA TA: “Ọmọke krẹ, oruimwemwu gbe cha dia-a . . . Ẹkẹvuọvo ihwo dẹndẹn ri che vwo otọ na, vwẹ evun rẹ oyovwe rode kọye ayen da gọlọ.”—Une rẹ Ejiro 37:10, 11.
UKẸCHA RỌ VWỌPHIA: “Dede nẹ ofovwin na vwoba re, jẹ oshenyẹ vẹ ihwo ebrabra jehẹ akpọ na. Awọreta nana cha vwẹ uko mamọ re. Jihova mrẹ erọnvwọn eje, o vwo ẹruọ mẹ. O veri nẹ o rhe che krii, ojaẹriọ ejobi che vwoba, a gbe karophiyọ ayeen.”—Daler, Tajikistan.
Ihwo ra ta ota kpahen vwẹ imagazini nana hẹ usun rẹ iduduru rẹ Iseri ri Jihova ri Baibol na vwẹ ukẹcha kẹ vwọ mrẹ ufuoma re. Ayen yono kpahen oborẹ ayen se vwo phi utuoma ri koka koka kparobọ. (Ẹfesọs 4:31, 32) Iseri ri Jihova ka ẹbẹre vuọvo rẹ usuon rẹ akpọ naa, ayen ji vwobọ vwẹ ozighii.—Jọn 18:36.
Iseri ri Jihova vwẹ akpọ na eje ji biẹcha ohwohwo kerẹ orua. (Jọn 13:35) Kerẹ udje, Oleksandra ra ta ota kpahen jovwo re mu oniọvo rọyen rẹ ọmọtẹ djẹ nẹ ẹkuotọ rẹ ayen hepha fikirẹ ofovwin. Ọ da ta: “Ugege rẹ avwanre vwọ shariẹ ughwru na nu, avwanre da mrẹ Iseri ri Jihova re dia ekogho na re hẹrhẹ avwanre rẹ ayen vwo dede avwanre. Obicha rayen nẹrhẹ avwanre sa dia ẹkuotọ kpokpọ na.”
Avwanre durhie uwe nẹ wọ vwomaba avwanre vwẹ emẹvwa rẹ avwanre, rọ dia asan rẹ avwanre de yono Baibol na vẹ obo ra reyọ evuẹ rehẹ evun rọyen vwo ruiruo wan. Kpo jw.org wọ vwọ guọnọ asan rọ kẹrẹ owẹ yẹrẹ nokpẹn rẹ uyono ri Baibol rẹ ọphẹ vwo mie Oseri ri Jihova ọvo, ovwan reyọ ibroshọ na Vwo Omavwerhovwẹn Bẹdẹ! vwo ruiruo.