Oboresorọ Ofovwin vẹ Ozighi Egbe je Vwọ Herọ

UMWEMWU

Ọghẹnẹ ma ọsẹ vẹ oni rẹ avwanre rẹsosuọ, Adam vẹ Ivi vwọ họhọ oma rọyen. (Jẹnẹsis 1:27) Ọyena mudiaphiyọ nẹ ayen cha vwẹrokere iruemu rẹ Ọghẹnẹ, kerẹ ufuoma vẹ ẹguọnọ. (1 Kọrẹnt 14:33; 1 Jọn 4:8) Ẹkẹvuọvo, Adam vẹ Ivi nyupho rẹ Ọghẹnẹẹ, ayen de ru umwemwu. Fikirẹ ọyena, avwanre eje da riuku rẹ umwemwu vẹ ughwu. (Rom 5:12) Umwemwu ra riuku rọyen na nẹrhẹ e vwo iroro ọchọchọ ọke buebun, ọnana ko mu avwanre vwo ru obo re brare.—Jẹnẹsis 6:5; Mak 7:21, 22.

USUON RẸ IHWORAKPỌ

Ọ dia Ọghẹnẹ ma avwanre re vwo sun oma rẹ avwanree. Baibol na da ta: “Ohwo sa vwẹ ogangan rẹ omobọ rọye kpọ oma rọye vi-i.” (Jerimaya 10:23) Ọtiọyena, usuon rẹ ihworakpọ che se si ofovwin vẹ ozighi noo.

ESHU VẸ EMEKASHE RỌYEN

Baibol na djerephia nẹ “akpọ na eje hẹ obọ rẹ ohwo umwemwu na.” (1 Jọn 5:19) Eshu rọ dia Idẹbono yen “ohwo umwemwu” na, ozighẹ yen o ruẹ. (Jọn 8:44) Ọ vẹ emekashe rọyen nẹrhẹ ihwo phi ofovwin ji gbe ozighi.—Ẹvwọphia 12:9, 12.