Oborẹ Ofovwin Djobọte Avwanre Wan
“Ghwe vwo nẹ Ofovwin rẹ Akpọeje Rivẹ rhe yen akpọ na vwo hirharokuẹ ifovwin ri me kpenu kparobọ. Vwẹ asan rẹ ihwo ẹne hepha vwẹ akpọ na, ọvo usun rayen dia ekogho rẹ ofovwin djobọte re.”
United Nations Deputy Secretary-General Amina J. Mohammed, January 26, 2023.
Ofovwin sa phia kpregede vwẹ asan rẹ ufuoma hepha enẹna. Ihwo re tobọ dia sherẹ vwọ kẹ asan rẹ ofovwin da phia je sa rioja rọyen. Ọ da tobọ dianẹ ofovwin na dobọji nu, ihwo je rioja rẹ ọmiaovwẹ rọ soro ọke grongron. E jẹ a fuẹrẹn evo:
Ọkanrovwẹ rẹ emu. Ukoko rẹ World Food Programme tare nẹ “ofovwin yen ma so owẹnvwe vwẹ akpọ na. Ẹkẹn 70 rẹ ujorin rẹ ihwo rẹ owẹnvwe hwe vwẹ akpọ na dia ekogho re de phi ofovwin.”
Ebẹnbẹn rẹ omakpokpọ rẹ ugboma kugbe iroro. Ọ da dianẹ ofovwin cha phia vwẹ ekogho ọvo, ọnana so ẹnwan vwọ kẹ ihwo re dia ekogho yena. Ihwo re dia ekogho rẹ ofovwin da phia yen ma rioja rẹ ebẹnbẹn rẹ omakpokpọ rẹ ugboma vẹ ọ rẹ iroro. Jẹ ọ da ohwo nẹ ọke buebun na, ayen se vwo ekuakua rẹ omaesivwon rẹ ayen guọnọree.
Ofovwin nẹrhẹ ihwo djẹ nẹ uwevwin rayen. United Nations High Commissioner for Refugees tare nẹ vwẹ September 2023, ihwo re vrẹ uriorin 114 vwẹ akpọ na eje yen djẹ nẹ uwevwin rayen. Emuọvo kiriguo rọ sua ọnana yen ofovwin.
Ofovwin sua uweren ọgangan. Ọke buebun yen ihwo vwọ rioja fikirẹ uweren ọgangan rẹ ofovwin soro, ọ me nẹrhẹ erọnvwọn ghanre vrẹka. Ayen sa rioja kidie igọmẹti ghwọrọ igho buebun phiyọ iruo rẹ isodje vwọ vrẹ ekuakua rẹ omaesivwon vẹ ẹbe eyono. Jẹ ofovwin na de vwoba nu, ọ dia ọmọriẹ igho yen a cha vwọ rhuẹrẹ ekuakua rẹ ofovwin na guọghọree.
Ofovwin sua oghwọrọ vwẹ akpọ na. Ihwo rioja ọ da dianẹ erọnvwọn ra ma phiyọ otọrakpọ na rẹ ayen vwẹroso guọghọre fikirẹ ofovwin. Ame, odju, vẹ etọ ri miovwirin sa so ọga rọ bẹn esivwon kẹ ugboma na, ofovwin na da tobọ vwoba nu, ibọmbu ra tọn phiyọ otọ je sa so omaẹwan kẹ ihwo.
Aphro herọọ, ofovwin so oghwọrọ vẹ ọmiaovwẹ ọgangan.