Oborẹ Ukoko na sa Vwẹrokere Ẹro ri Jihova Vwo nẹ Irumwemwu

1. Die yen Jihova guọnọre vwọ kẹ ihworakpọ eje?

JIHOVA kẹ avwanre ugbomọphẹ ọke rọ vwọ ma ihworakpọ. Avwanre reyọ okẹ yena vwo ruiruo siẹrẹ e de brẹ erhiẹn. Orhiẹn rọ ma ghanre rẹ ohwo se bru yen rọ vwọ vwomakpahotọ kẹ Jihova je dia ọvo usun rẹ orua rọyen re vwẹ ẹga kẹ. Jihova guọnọre nẹ kohwo kohwo ru ọtiọyen. Diesorọ? Kidie o vwo ẹguọnọ rẹ ihwo, ọ je guọnọ erhuvwu rayen. Ọ guọnọre nẹ ayen vẹ ọyen vwo uvi rẹ oyerinkugbe je dia bẹdẹ.​—Urh 30:19, 20; Ga 6:7, 8.

2. Die yen Jihova guọnọ mie irumwemwu ri ji kurhẹriẹẹ? (1 Jọn 2:1)

² Ẹkẹvuọvo, Jihova gba ohwo vuọvo nẹ ọ vwẹ ẹga kẹ ọyeen. Ọ vwẹ uphẹn kẹ ohwo ọvuọvo nẹ o brorhiẹn rẹ obo ro che ru. Kẹ, ọ da rha dianẹ Onenikristi ro bromaphiyame re churhi rẹ Ọghẹnẹ ji ru umwemwu ọgangan vwo? O rhe kurhẹriẹẹ, ke sio nẹ ukoko na. (1Kọ 5:13) Jẹ, a da tobọ sio nẹ ukoko na dede, Jihova je rhẹro nẹ o che kurhẹriẹ ji rhivwin bru Ọyen rhe. Vwọrẹ uyota, ọnana yen oboresorọ o vwo ru ọrhuẹrẹphiyotọ rẹ ọtanhirhe na, rere o se vwo ghovwo irumwemwu ri kurhẹriẹ. (Se 1 Jọn 2:1.) Ọghẹnẹ rẹ avwanre ro vwo ẹguọnọ na jiriro kẹ irumwemwu nẹ ayen kurhẹriẹ.​—Zek 1:3; Ro 2:4; Jem 4:8.  

3. Die yen a cha ota kpahen vwẹ uyono nana?

³ Jihova guọnọre nẹ avwanre vwẹrokere ẹro ro vwo nẹ umwemwu kugbe irumwemwu. Vwẹ uyono nana, a cha ta ota kpahen obo re se vwo ru ọtiọyen. Wo vwo muegbe rẹ uyono nana, vwo oniso rẹ (1) oborẹ ukoko ri Kọrẹnt rẹ ẹgbukpe ujorin rẹsosuọ ruru ọke rẹ oniọvo ọshare ọvo vwo ru umwemwu ọgangan, (2) odjekẹ rẹ ọyinkọn Pọl vwọphia siẹrẹ orumwemwu de kurhẹriẹ, kugbe (3) obo ri Baibol ta kpahen ẹro ri Jihova vwo nẹ ihwo ri ru umwemwu ọgangan.

OBORẸ UKOKO NA RURU ỌKE RẸ ONIỌVO ỌSHARE ỌVO VWO RU UMWEMWU ỌGANGAN

4. Die yen phiare vwẹ ukoko ri Kọrẹnt vwẹ ẹgbukpe ujorin rẹsosuọ? (1 Kọrẹnt 5:1, 2)

⁴ Se 1 Kọrẹnt 5:1, 2. Ọke ri Pọl vwọ hẹ oyan rẹ imishọnare rọyen rerha, o de nyo iyẹnrẹn ọbrabra ọvo kpahen ukoko ri Kọrẹnt ra ghwa reyọ vwo mu obọ. Oniọvo ọshare ọvo vwẹ ukoko yena nene aye rẹ ọsẹ rọyen vwerhẹn. Ọnana uruemu ra ghẹmrẹ “ra je tobọ mrẹ vwẹ ohri rẹ ẹgborho na-a”! Ọ dia ukoko na di kuẹrofia kẹ uruemu na ọvoo, ukperẹ ọtiọyen kẹ ayen tobọ reyọ vwọ yonma. Ọ sa dianẹ evo vwevunrẹ ukoko na roro nẹ ayen vwẹrokere arodọnvwẹ ri Jihova ro vwo ẹruọ rẹ ihworakpọ re gbaree. Ẹkẹvuọvo, Jihova rhọnvwaphiyọ umwemwu vwẹ ohri rẹ ihwo rọyeen. Ọshare na vwẹ uruemu ra ghẹmrẹ nana vwo miovwin odẹ rẹ ukoko na. Vwọba, o ji se miovwin iniọvo efa re vẹ ọyen gbe ruẹ kuẹgbe vwevunrẹ ukoko na. Kẹ, die yen Pọl vuẹ ukoko na nẹ ayen ru?

5. Die yen Pọl vuẹ ukoko na nẹ ayen ru, kẹ die yen otọ rẹ ota rọyen na? (1 Kọrẹnt 5:13) (Ni uhoho na.)

⁵ Se 1 Kọrẹnt 5:13. Ẹwẹn ọfuanfon na de mu ọyinkọn Pọl vwo si ileta vwo rhe ukoko na nẹ, e si orumwemwu rọ rhọnvwe kurhẹriẹẹ nẹ ukoko na. Mavọ yen iniọvo na che nene ohwo ọtiọyena yerin? Pọl vuẹ ayen nẹ ayen vẹ ọyen “ruẹ kuẹgbe-e.” Die ọyena mudiaphiyọ? Pọl je nabọ djefiotọ nẹ ayen vẹ ọyen “tobọ riemu kuẹgbe-e.” (1Kọ 5:11) Wọ vẹ ohwo tiọyena de chidia riemu kugbe ọnana sa nẹrhẹ wọ vẹ ọyen gbikun je ghwọrọ ọke kugbe. O phẹnre dẹn nẹ, Pọl guọnọre nẹ ayen nene ohwo ọtiọyena ru kugbee. Ọnana cha sẹro rẹ ukoko na vwo nẹ erharhe iruemu ri se miovwin iniọvo na. (1Kọ 5:5-7) Vwọba, siẹrẹ ayen vẹ ohwo ọtiọyena rhe ruẹ kuẹgbee, ọnana sa nẹrhẹ ọ riẹn nẹ oborẹ ọyen ruru na da Jihova mamọ, ọkiọvo oma sa vuọ ọ da nẹrhẹ o kurhẹriẹ.

6. Die yen ileta ri Pọl na mu ukoko kugbe orumwemwu na vwo ru?

⁶ O vwo si ileta rhe Inenikristi rehẹ Kọrẹnt nu, Pọl kọ rhoma ro ẹnwan kpahen oborẹ ukoko na che ru. Ukuotọ rọyen, Taitọs da ghwa iyẹnrẹn rẹ omavwerhovwẹn rhe nẹ ukoko na nene iji rọyen ji si orumwemwu na no. (2Kọ 7:6, 7) Emeranvwe evo vwọ wan rẹ ọyinkọn Pọl vwọ reyọ ileta rẹsosuọ na vwo rhe ayen nu, oniọvo ro ru umwemwu na de kurhẹriẹ nẹ umwemwu rọyen! O de wene uruemu kugbe oka rẹ ohwo rọ hepha ji nene iwan rẹ ọvwata ri Jihova. (2Kọ 7:8-11) Kẹ, die yen Pọl cha vuẹ ukoko na nẹ o ru asaọkiephana?  

OBORẸ INIỌVO NA CHE NENE ORUMWEMWU RO KURHẸRIẸ YERIN WAN

7. Erhuvwu vọ yen nuro rhe kidie nẹ e si orumwemwu na nẹ ukoko na? (2 Kọrẹnt 2:5-8)

⁷ Se 2 Kọrẹnt 2:5-8. Pọl tare nẹ “ọghwọku nana ri buebun rẹ ovwan vwọ kẹ na te kẹ.” Kọyen, ọghwọku na ru obo ra guọnọre vwẹ oma rọyen re. Die yen o ruru? Ọ nẹrhẹ o kurhẹriẹ nẹ umwemwu rọyen.​—Hib 12:11.

8. Die yen Pọl rhoma vuẹ iniọvo na nẹ ayen ru?

⁸ Ọtiọyena, Pọl da vwẹ iji kẹ ukoko na kpahen oniọvo ro ru umwemwu na nẹ: Ayen “gbe vwo ghovwo nẹ otọ ẹwẹn rhe ji bro uche” ayen ji “dje ẹguọnọ kẹ.” Noso nẹ Pọl guọnọre nẹ iniọvo na ru vrẹ a de vwọ rhọnvwe kẹ ohwo ro ru umwemwu na nẹ o rhivwin rhe ukoko na. Ọ guọnọre nẹ ayen vwẹ imuẹro kẹ oniọvo ro kurhẹriẹ na nẹ ayen ghini vwo ghovwo ji vwo ẹguọnọ rọyen womarẹ eta, uruemu kugbe obo rayen ruẹ. Ọtiọyena, oniọvo ro ru umwemwu na kọ cha mrẹ nẹ oma vwerhen iniọvo rẹ ukoko na nẹ ọyen rhivwin rhe.

9. Diesorọ ọ sa vwọ bẹn kẹ itu evo rẹ ayen vwọ reyọ vwo ghovwo orumwemwu ro kurhẹriẹ na?

⁹ O vwo itu evo re mrẹrẹ bẹnbẹn rẹ ayen vwo dede orumwemwu ro kurhẹriẹ na rhe ukoko na? Baibol na vuẹ avwanree, jẹ ọ sa dia ọtiọyen. Kidie obo ro ruru na so okpetu rhe ukoko na eje, ọkiọvo ọ je ghwa ophọphọvwe rhe ihwo evo. Ihwo evo ri nene urhi ri Jihova rọ tarẹ nẹ e gbe ọfanrhiẹẹn se no nẹ o shephiyọ ra vwọ rhoma dede ohwo tiọyena rhe ukoko naa. (Ni Luk 15:28-30.) Kẹ, diesorọ rọ vwọ ghanre iniọvo rẹ ukoko na vwo vwo uvi rẹ ẹguọnọ kpahen oniọvo rayen ro kurhẹriẹ na?

10-11. Die yen sa phia ọ da dianẹ ekpako na rhọnvwe vwo ghovwo orumwemwu ro kurhẹriẹ naa?

¹⁰ Di vwẹ ẹwẹn roro obo re sa phia ọ da dianẹ ekpako na rhọnvwere nẹ orumwemwu ro ghini kurhẹriẹ na rhoma rhivwin rhe ukoko naa, yẹrẹ o vwo rhivwin rhe nu, iniọvo rehẹ ukoko na rhe dje ẹguọnọ kẹẹ. “Omaemuophiyọ ọgangan” se muo rọ. O se no nẹ ọyen rha cha sa ga Jihova ọfaa. Ọ sa tobọ kpairoro vrẹ ẹgbaẹdavwọn rọ vwọ rhuẹrẹ oyerinkugbe rọyen vẹ ọ rẹ Ọghẹnẹ phiyọ.

¹¹ Ma bra kparobọ, ọ da dianẹ iniọvo rẹ ukoko na rhọnvwe vwo ghovwo orumwemwu ro kurhẹriẹ naa, ayen se phi oyerinkugbe rẹ ayen vẹ Jihova vwori phiyọ ẹdia rẹ imuoshọ. Diesorọ? Kidie ayen vwẹrokere uruemu rẹ ọkon ro rhe Idẹbono rọ dia ohwo ro vwẹ arodọnvwẹẹ ukperẹ ọ ri Jihova ro vwo ghovwo irumwemwu ri kurhẹriẹ. Ayen rha jomaotọọ, Idẹbono sa reyọ ayen vwọ dia eshegberudion vwọ kẹ oniọvo ro kurhẹriẹ na.​—2Kọ 2:10, 11; Ẹf 4:27.

12. Mavọ yen iniọvo rehẹ ukoko na sa vwọ vwẹrokere Jihova?

¹² Kẹ, mavọ yen iniọvo rehẹ ukoko ri Kọrẹnt sa vwọ vwẹrokere Jihova ukperẹ Idẹbono? Ayen de nene irumwemwu ri kurhẹriẹ yerẹn kirobo rẹ Jihova ruẹ. Jokaphiyọ oborẹ ihwo evo ri si Baibol na ta kpahen Jihova. Devid tare nẹ: Ọyen “ohwo esiri vẹ evwoghovwo.” (Un 86:5) Maika de rhe si: “Ono Ọghẹnẹ rọ họhọ owẹ, rọ vwẹ orukuruku vwo ghovwo ro mi gbobọnyẹ ogbeku?” (Mai 7:18) Aizaya da je ta: “Jẹn oruimwemwu jẹ imwemwu rọye vwọ, re ohwoumwemwu jẹ iroro ọbrabra rọye vwo; jẹn o rhivwi bru Ọrovwohwo, rere o ni arodọvwẹ rọye, bru Ọrovwohwo, kidie evwoghovwo rhere buebu.”​—Aiz 55:7.

13. Diesorọ o vwo fo ra vwọ reyọ orumwemwu ro kurhẹriẹ rhe ukoko na? (Ni ekpeti na “Ọke vọ Yen a Vwọ Reyọ Ọshare Rọhẹ Ukoko ri Kọrẹnt na?”)

¹³ Ayen sa vwọ vwẹrokere Jihova, ofori nẹ iniọvo rehẹ ukoko ri Kọrẹnt dede oniọvo ro kurhẹriẹ je kẹ imuẹro nẹ ayen vwo ẹguọnọ rọyen. Siẹrẹ ayen de nene iji ri Pọl re vwo dede orumwemwu ro kurhẹriẹ, jẹ ayen djephia nẹ ayen ihwo ri ‘nyẹmẹ . . . vwẹ erọnvwọn ejobi.’ (2Kọ 2:9) Dede nẹ emeranvwe evo yen e si ro nẹ ukoko na, jẹ ọghwọku ra vwọ kẹ na nẹrhẹ o kurhẹriẹ. Ọtiọyena, o rhe fo nẹ ekpako na ghwọrọ ọke ayen ke reyọ rhivwiin.

OBO RA SA VWỌ VWẸROKERE ORHIẸN-ABAVO VẸ ARODỌNVWẸ RI JIHOVA

14-15. Die yen e yono vwo nẹ oborẹ ukoko ri Kọrẹnt ruru ọke rẹ oniọvo ọshare ọvo vwo ru umwemwu ọgangan? (2 Pita 3:9) (Ni uhoho na.)

¹⁴ A sẹro rẹ ikuegbe rẹ oborẹ iniọvo ri Kọrẹnt awanre ruru ọke ọniọvo ọvo vwo ru umwemwu ọgangan “vwọ kẹ eyono rẹ avwanre.” (Ro 15:4) Vwo nẹ ikuegbe yena, avwanre yonori nẹ Jihova rhọnvwaphiyọ umwemwu ọgangan vwẹ ohri rẹ ihwo rọyeen. Ọ rhọnvwa nẹ e gbe “arodọnvwẹ” kẹ irumwemwu re rhọnvwe kurheriẹẹ, nẹ a je yanjẹ ayen vwo vwevunrẹ ukoko naa. Dede nẹ Jihova gbe arodọnvwẹ, jẹ ọ rhọnvwaphiyọ obo re chọre yẹrẹ wene iwan rọyeen. (Jud 4) Vwọrẹ uyota, ọyena dia arodọnvwẹ siẹrẹ o de ru ọtiọyeen, kidie o che phi arhọ rẹ ihwo eje rehẹ ukoko na phiyọ ẹdia rẹ imuoshọ.​—Isẹ 13:20; 1Kọ 15:33.

¹⁵ Dedena, avwanre ji yono nẹ Jihova guọnọre nẹ ohwo vuọvo ghwọrọọ. Ọ guọnọ reyọ kuphẹn kuphẹn eje vwo sivwin ihwo. O gbe arodọnvwẹ kẹ ihwo ri wene ẹwẹn re guọnọ rhuẹrẹ oyerinkugbe rayen vẹ ọyen. (Izi 33:11; se 2 Pita 3:9.) Kọyensorọ ọke rẹ ọshare ro ru umwemwu vwẹ ukoko ri Kọrẹnt na vwo kurhẹriẹ ji wene uruemu rọyen, Jihova da vwẹ odjekẹ vwọ kẹ ukoko na womarẹ Pọl nẹ ayen vwo ghovwo je reyọ rhivwin rhe ukoko na.

16. Mavọ yen oma ru we kpahen oborẹ ukoko ri Kọrẹnt ruru ọke rẹ oniọvo ọshare ọvo vwo ru umwemwu ọgangan?

¹⁶ Oborẹ ukoko ri Kọrẹnt ruru ọke rẹ oniọvo ọshare ọvo vwo ru umwemwu ọgangan dje ẹguọnọ, ophiọnphiọn kugbe orhiẹn-abavo ri Jihova phia. (Un 33:5) Ofori nẹ ọnana mu we vwo jiri Jihova vrẹ obo ri jovwo. Kidie avwanre eje irumwemwu, a je guọnọ evwoghovwo rọyen. A guọnọre nẹ kohwo kohwo dje ọdavwaro kẹ Jihova fikirẹ ọtanhirhe na rọ nẹrhẹ a sa vwẹ imwemwu rẹ avwanre vwo ghovwo avwanre. Mavọ yen ọ vwerhoma te ra vwọ riẹn nẹ Jihova ghini vwo ẹguọnọ rẹ ihwo rọyen je guọnọ erhuvwu rayen!

17. Die yen a cha ta ota kpahen vwẹ iyono re vwọ kpahen ọnana?

¹⁷ Kẹ, die yen e ruẹ siẹrẹ ohwo de ru umwemwu ọgangan nonẹna? Mavọ yen ekpako sa vwọ vwẹrokere owenvwe ro rhe Jihova rọ vwọ vwẹ ukẹcha kẹ irumwemwu vwo kurhẹriẹ? Die ofori nẹ iniọvo rẹ ukoko na ru, siẹrẹ ekpako na de brorhiẹn rẹ ayen vwo si orumwemwu nẹ ukoko na yẹrẹ reyọ rhivwin rhe? A cha kpahenphiyọ enọ nana vwẹ iyono re vwọ kpahen ọnana.