Wo Muegbe kẹ Ebẹnbẹn Wo se Hirharoku Wo de Bromaphiyame Nu?

1-2. Erhọ yen owọẹjẹ evo a guọnọ mie avwanre e se vwo muegbe hẹrhẹ ebẹnbẹn re sa vwomaphia vwevunrẹ ukoko na? Djudje rọyen.

AVWANRE rhẹro rẹ ebẹnbẹn vwẹ akpọ rẹ Eshu na. Jesu si idibo rọyen orhọ nẹ: “Ekprowọ che jẹ ẹcha-a.” (Mat. 18:7) Vẹ orhọesio nana vwẹ ẹwẹn, ofori nẹ e muegbe hẹrhẹ ebẹnbẹn re se hirharoku, ọyena ji churobọ si ebẹnbẹn avwanre vẹ iniọvo se vwo.

² Roro kpahen udje ọvo. E jiriro kẹ idibo ri Jihova nẹ ayen muegbe hẹrhẹ oghwọrọ ri kpregede. Mavọ yen e se vwo ru ọtiọyen? Ẹsosuọ, ofori nẹ e vwo oniso oka rẹ oghwọrọ rọ sa phia vwẹ ekogho rẹ avwanre. Ọyena ghanre mamọ ọ da dianẹ avwanre erhorha vwẹ ekogho yena. E de vwo oniso rẹ oka rẹ oghwọrọ rọ sa vwomaphia nu, ofori nẹ e ru ọrhuẹrẹphiyotọ rẹ oborẹ avwanre se vwo muegbe hẹrhẹ ọvuọvo. (Isẹ 21:5) Ọtiọyen ọ je hepha, e se vwo oniso rẹ ebẹnbẹn re se hirharoku vwevunrẹ ukoko na je choma enẹna re se vwo muegbe siẹrẹ i de te avwanre oma. Eriyina, ebẹnbẹn tiọyena rhe che kpokpo avwanre ẹwẹn gan nọ yẹrẹ miovwon oyerinkugbe avwanre vẹ Jihovaa. (Une 17:5) Ọtiọyena, e jẹ a ta ota kpahen ebẹnbẹn erha e se hirharoku kugbe obo re se vwo muegbe hẹrhẹ ọvuọvo.a

ONIỌVO DE GBE WE KU

3. Obẹnbẹn vọ yen e se hirharoku vwevunrẹ ukoko na?

³ Wọ karophiyọ oborẹ oma ru we wo ke vwo kpo uyono je mrẹ ẹguọnọ rọhẹ uvwre rẹ idibo ri Jihova? O muwẹro nẹ wọ mrẹ uyota na re? (Jọn 13:35; Kọl. 3:12) Ọtiọyen yen oma ji ru Blanca.b Ẹkẹvuọvo, obo ro rhẹro rọyeen da phia ro vwo bromaphiyame nu. Ọ da ta: “Oniọvo aye ọvo ta ota kẹ vwẹ gbaegbae. Mi ji noso nẹ ọtiọyen ọ je ta erharhe eta kpahen ihwo efa. Me nama rhẹro rẹ ọnanaa; e yono uvwe nẹ Iseri ri Jihova ihwo rẹ ufuoma ri ji vwo ẹguọnọ.” Vwọrẹ uyota, iniọvo avwanre wian gangan rere iruemu rẹ Onenikristi rẹ ayen vwori se vwo yovwinphiyọ, dede nẹ ayen ihwo re gbaree. (Ẹfe. 4:23, 24; 1 Jọn 1:8) Ọtiọyena, oniọvo sa ta ota yẹrẹ ru obo ri miovwon uwe ivun ọkievo. (Jems 3:8) Ọ da ohwo mamọ nẹ, ebẹnbẹn tiọyena nẹrhẹ itu evo dobọ rẹ ẹga rẹ ayen vwọ kẹ Jihova ji.

4. Die yen sa vwẹ ukẹcha kẹ avwanre vwo muegbe siẹrẹ oniọvo de gbe avwanre ku? (Ẹfesọs 4:32)

⁴ Die yen wo se ru enẹna vwo muegbe ọ da dianẹ oniọvo ru obo re da wẹ yẹrẹ o gbe we ku? Jẹ ọ dia ẹkuruemu wẹn wo vwo nene uchebro rọhẹ Ẹfesọs 4:32. (Se.) Wọ da davwẹngba vwo dje erorokẹ vẹ uruemu esiri phia, wọ sa kẹnoma kẹ ẹghwọ rẹ ọkamuka rọ sa vwomaphia vwẹ uvwre wẹn vẹ ọ rẹ ihwo efa. Tẹnrovi oborẹ wọ sa vwọ reyọ vwo ghovwo ihwo efa vwo nẹ ubiudu rhe ọ da dianẹ ayen gbe we ku. Die yen sa vwẹ ukẹcha kẹ wẹ vwo ru ọtiọyen? Roro kpahen uchabọ rẹ Jihova reyọ vwo ghovwo uwe ọphẹ siẹrẹ wo de gbeku. (Mat. 6:12) Wọ da tẹnrovi oborẹ Jihova reyọ vwo ghovwo uwe ghwologhwolo, ọ rha cha bẹn wọ vwọ reyọ vwo ghovwo ihwo efaa.

5. Odjekẹ ri Baibol vọ yen sa vwẹ ukẹcha kẹ avwanre siẹrẹ oniọvo de gbe avwanre ku? (Isẹ 19:11) (Ni ifoto na.)  

⁵ Se Isẹ 19:11. Baibol na tare nẹ e de gbe avwanre ku, ẹruọc sa vwẹ ukẹcha kẹ avwanre vwo sun ophu rẹ avwanre. Odjekẹ nana cha Rima uko ro bromaphiyame imikpe evo re. Ọ tare nẹ: “Me da mrẹ oniọvo ro ru orọnvwọn ro miovwon uvwe ivun yẹrẹ mi niri nẹ oforii, ẹsosuọ iroro mẹ kọ ghwa djẹ kpo obo rehẹ Isẹ 19:11. Mi de roro kpahen ẹdia vẹ asan rẹ ayen dia ghwanre, ọnana kọ nẹrhẹ me riẹn oboresorọ ayen vwo ru oborẹ ayen ruru na. Me je davwẹngba me vẹ ayen vwọ wian kugbe vwẹ iruo aghwoghwo na. Ọnana vwẹ ukẹcha kẹ vwẹ vwọ nabọ vughe ayen phiyọ.” Ọyena uvi rẹ uchebro. Wọ sa nabọ vughe iniọvo wẹn phiyọ enẹna. Wọ da nabọ vughe oka rẹ ihwo rẹ ayen hepha, ọ rha cha bẹn wọ vwọ reyọ vwo ghovwo ayen siẹrẹ ayen de gbe we kuu.

6. Die yen sa vwẹ ukẹcha kẹ avwanre, a vẹ iniọvo rẹ ukoko se vwo vwo uvi rẹ oyerinkugbe?

⁶ Die yen wo se ru wẹ vẹ iniọvo rẹ ukoko na se vwo vwo uvi rẹ oyerinkugbe? Wo vwo vughe iniọvo wẹ phiyọ ye, davwẹngba vwọ tẹnrovi iruemu iyoyovwin rẹ ayen vwori. (Ni Isẹ 10:12; Rom 12:10; Fil. 2:2, 3) Jokaphiyọ oborẹ ọnana vwẹ ukẹcha kẹ Mark ro ghwe bromaphiyame nu obọ. Ọke ro vwo nene iniọvo rẹ ukoko rọyen ghwọrọ ọke kugbe, o de rhi vwo oniso rẹ iruemu evo rẹ ayen ruẹ ro vwo omavwerhovwẹn kpaheen. Die yen vwẹ ukẹcha kẹ Mark rọ nẹrhẹ iruemu rayen na rha so ikprowọ vwọ kẹẹ? Ọ da ta: “Mi de rhi noso nẹ oruchọ ri fiemuu yen me tẹnroviẹ, jẹ wọ da reyọ ayen vwọ vwanvwen umiovwo rọhẹ evunrẹ akpọ na i te emuọvoo. O de rhi muvwẹro nẹ o fori me vwọ tẹnrovi oruchọ rẹ iniọvo mẹẹ. Ọtiọyena erhuvwu rayen kọyen me tẹnroviẹ.” Wo de ru ọtiọyen, wọ vẹ iniọvo rẹ ukoko na che vwo uvi rẹ oyerinkugbe.

URHURU RẸ OBO WỌ YAN JOVWO DE SI WE

7. Die yen sa nẹrhẹ e vwo urhurusivwe rẹ erọnvwọn re gbobọnyẹ vwẹ obuko re?

⁷ Aphro herọọ nẹ, wọ ka vwọ mrẹ uyota na vughe, ẹwẹn wẹn totọ nẹ wọ yanjẹ akpọ umwemwu rẹ Eshu vwo re. Wo se roro, ‘Kẹ mavọ yen urhuru rẹ akpọ tiọyena sa vwọ rhoma si ohwo?’ Dedena, wọ sa karophiyọ yẹrẹ urhuru rẹ erọnvwọn ru wọ yan jovwo tavwen wọ ke rhe ga Jihova sa rhoma si we. (Ni Ukeri 11:4-6.) Kerẹ udje, iniọvo evo se gbobọnyẹ omamọ iruo ro titiri rọ je reyọ ọke rayen. Efa herọ rẹ igbeyan rayen yan jovwo rẹ ayen vwọ ton uyono ri Baibol phiyọ. Efa ji gbobọnyẹ iruemu ri je ayen rẹ Jihova vwo utuoma kpahen. Mavọ yen ọ bra te Onenikristi da rhoma vwobọ vwẹ erọnvwọn rọ yan jovwo vwẹ obuko re, e me nẹrhẹ o bo nẹ ẹga ri Jihova! Ọ da dianẹ wo vwo ebẹnbẹn, die wo se ru enẹna vwọ kẹnoma kẹ erọnvwọn ru wo gbobọnyẹ vwẹ obuko re?

8. Die yen avwanre yono vwo nẹ udje rẹ Ebraham vẹ Sera?

⁸ Baibol na vọnre vẹ idje rẹ idibo ri Jihova re fuevun ri rhe se vwo urhurusivwe rẹ erọnvwọn rẹ ayen gbobọnyẹ vwẹ obuko re. Kerẹ udje, Ebraham vẹ Sera vrẹn nẹ orere ri Ọr ra gbogba riariẹ ra dia itughẹ vwo nene iji rẹ Jihova vwọ kẹ ayen. (Hib. 11:8, 9) Uyota nẹ, nọke ra ruọke ẹwẹn rayen sa djẹ kpo oka rẹ akpọ rẹ ayen yerin vwẹ Ọr. Jẹ kọ dianẹ ayen mu ẹwẹn rayen kpahen oborẹ ayen yan jovwo yẹrẹ kẹ ayen ‘roro kpahọn ọkieje,’ ọnana rha sa nẹrhẹ ayen rhivwin kpo Ọr. Ẹkẹvuọvo, ayen tẹnrovi obaro na.​—Hib. 11:15, 16.

9. Ẹro vọ yen ọyinkọn Pọl vwo ni erọnvwọn rọ yan jovwo? (Filipae 3:7, 8, 13)

⁹ Ọyinkọn Pọl ru ewene evo vwẹ akpeyeren ọ sa vwọ vwẹ ẹga kẹ Jihova. Tavwen ọ ke rhe dia Onenikristi, o yono vwẹ obotọ ri Gamaliẹl rọ dia oyono rẹ Urhi rẹ ihwo ri Ju ro titiri mamọ. (Iruo 22:3) Pọl rha sa dia ohwo rode re muọghọ kẹ vwẹ ẹga rẹ ihwo ri Ju. (Gal. 1:13, 14) Ẹkẹvuọvo, ro vwo rhiabọreyọ iyẹnrẹn esiri na nu, o de gbobọnyẹ erọnvwọn yena eje. Akpeyeren lọhọ kẹ rọ rhe vwọ dia Onenikristi nu? Ẹjo. E hwe re, e muro phiyọ uwodi, ihwo rọyen ji vwo utuoma kpahọn. (2 Kọr. 11:23-26) Mane kẹ o mu ẹwẹn kpahen ebẹnbẹn ro hirharoku je vwẹ akpeyeren rọyen enẹna vwọ vwanvwen ọ ri jovwo, ọ rha sa tanẹ o rhe yovwin kọ dianẹ ọyen kurhẹriẹẹ. Ukperẹ ọtiọyen, Pọl mu ẹwẹn rọyen kpahen okpuphẹn ro vwori enẹna rọ vwọ dia odibo ri Jesu Kristi kugbe osa rọ hẹrhẹ vwẹ obaro na. Pọl vwo imuẹro nẹ ebruphiyọ ri tere obọ ghanre vrẹ kemu kemu rọ yan jovwo!​—Se Filipae 3:7, 8, 13.

10. Die yen ofori nẹ e roro kpahen ọkieje? (Mak 10:29, 30) (Ni ifoto na.)

¹⁰ Die yen e yono norhe? Ọ da dianẹ wo roro kpahen erọnvwọn ru wọ yan jovwo wọ ke rhe dia Onenikristi, karophiyọ oboresorọ wọ vwọ yanjẹ ayen vwo. (Aghwo. 7:10) Reyọ erọnvwọn ru wọ kpairoro vrẹ vwẹ obuko re vwọ vwanvwen ebruphiyọ ri te we obọ wọ vwọ hẹ ukoko na. Wọ vẹ ọ ro Me Kpenu vwẹ akpọ vẹ odjuvwu vwo oyerinkugbe rọ kpẹkpẹre. (Isẹ 3:32) Wo vwo orua rẹ iniọvo ri vwo ẹguọnọ wẹn vwẹ akpọ na eje. (Se Mak 10:29, 30.) Wo ji vwo uvi rẹ iphiẹrophiyọ kpahen obaro na! (Aiz. 65:21-23) Wo de roro kpahen ebruphiyọ ri nẹ ẹga ri Jihova cha ọkieje, ọ cha bẹn ẹwẹn wẹn vwo kpo erọnvwọn ru wo gbobọnyẹ na.

11. Die yen avwanre yono nẹ obo re phia kẹ Rosemary rhe?

¹¹ Oniọvo aye ọvo re se Rosemary bromaphiyame ọke rọ vwọ hẹ omarẹ ẹgbukpe 50. Vwo oniso rẹ obo ro ruru rọ sa vwọ kpairoro vrẹ erọnvwọn ro gbobọnyẹ vwẹ obuko re. Ọ tare nẹ: “Ẹsosuọ, urhuru ri Krismasi si vwe, kidie ọyen ọke me vẹ orua mẹ vwọ nabọ riakpọ kuẹgbe. Oma vwerhen ovwẹ mi de ruẹse kẹ ihwo mi vwo ẹguọnọ kpahen ọke yena. O je vwe me da mrẹ emọ na ri mudia kẹrẹ urhe ri Krismasi re hwẹ siẹrẹ ayen de rhie obo re me dẹ kẹ ayen.” Die yen vwẹ ukẹcha kẹ? Rosemary da ta: “Me gbẹn idjerhe ọfa me reyọ vwo wene Krismasi. Kukpe kukpe, o vwo ẹdẹ sansan mi vwo se ihwo orua mẹ koko, ruẹse kẹ ayen je vuẹ ayen oboresorọ oma rayen vwọ vwerhen ovwẹ.” Rosemary ji hirharoku obẹnbẹn ọfa. Ọ tare nẹ: “Me vwọ mrẹ ukoko na vughe, igbeyan mi vwori jovwo de chukoku uvwe. Ọkievo, urhuru rayen ko si vwe, ki mi ji no nẹ omẹvwẹ ọvo yen herọ.”d Die yen vwẹ ukẹcha kẹ? Ọ vẹ iniọvo eya sansan ru ọrhuẹrẹphiyotọ ayen vwo kpo aghwoghwo. Ọ da ta: “Ọyena mi ruru na nẹrhẹ mi mu igbeyan kpokpọ mi vwo ẹguọnọ rayen ji ni ghanghanre.” Die wo se yono mie Rosemary? Urhuru orọnvwọn ru wo vwo omavwerhovwẹn kpahen tavwen wọ ke mrẹ uyota na vughe se si we, ẹkẹvuọvo wọ sa reyọ orọnvwọn ọfa ro fori vwo wene ọ ri jovwo na. (Fil. 4:8, 9) Karophiyọ nẹ Jihova cha kẹ wẹ vrẹ kemu kemu ru wọ yan jovwo.  

EVO YANJẸ JIHOVA VWO

12. Die yen sa phia vwevunrẹ ukoko na rẹ avwanre sa mrẹ bẹnbẹn?

¹² Wọ rhe vwọ dia Oseri ri Jihova, ẹwẹn wẹn de rhi te otọ nẹ wọ yanjẹ akpọ umwemwu nana vwo je vwomaba ukoko ri Jihova rẹ ihwo rọyen davwẹngba ri vwo ru obo ri yovwirin. (Aiz. 65:14) Jẹ ọkievo, wo se nyo nẹ e si oniọvo ọvo nẹ ukoko na kidie nẹ o ru umwemwu ọgangan. (1 Kọr. 5:13) Vwo oniso oborẹ ẹdia tiọyena ru vwẹ oma rẹ oniọvo aye ọvo re se Samar. Ọ da ta: “Mi ghwe vwo bromaphiyame nu, o kririi, e de si ọkpako ọvo ro ru umwemwu ọgangan nẹ ukoko na. Ọnana dino nẹrhẹ mi she nẹ ukoko na kidie me nama roro nẹ ọkpako se ru umwemwu so Jihova vẹ ukoko naa.” Vwọrẹ uyota, ofori a vwẹroso iniọvo avwanre ọkieje nẹ ayen vwo ẹguọnọ ri Jihova ayen je guọnọ tinkamuo. (1 Kọr. 13:4, 7) Dedena, ọ da ohwo mamọ nẹ kukpe kukpe yen e vwo si iniọvo evo vwo nẹ ukoko na. Jẹ, wọ sa mrẹ bẹnbẹn ma rho ọ da dianẹ ohwo rọ kẹrẹ owẹ yẹrẹ ohwo ru wọ vwẹroso yen yanjẹ Jihova vwo.

13. Die yen e se ru enẹna vwọ fuevun kẹ Jihova ọ da dianẹ ohwo rọ kẹrẹ avwanre yanjẹ Jihova vwo?

¹³ Die yen wo se ru vwo muegbe enẹna wọ sa vwọ fuevun kẹ Jihova ọ da dianẹ ohwo rọ kẹrẹ owẹ yanjẹ Jihova vwo? Davwẹngba ọkieje vwo ru oyerinkugbe wẹn vẹ Jihova ganphiyọ. (Jems 4:8) Wo muẹ oyerinkugbe wẹn vẹ ọ rẹ Ọghẹnẹ kpahen ọ rẹ ohwo ọfaa. Kerẹ udje, dede nẹ ọkieje yen avwanre vwọ ga kuẹgbe kerẹ orua yẹrẹ ukoko, o ji fo avwanre vwo ru ọrhuẹrẹphiyotọ re vwo se Baibol na je nẹrhovwo komobọ.​—Une 1:2; 62:8.

14. Die yen e yono nẹ udje ri Pita rhe? (Jọn 6:66-68)

¹⁴ E se yono emuọvo vwo nẹ oborẹ Pita ruru ọke rẹ idibo ri Jesu buebun vwọ yan jovwo. Ọ sa dianẹ ẹwẹn ri Pita komobọ tighiri vwẹ ọke yena. Ẹkẹvuọvo, jokaphiyọ obo rọ tare vwẹ Jọn 6:66-68. (Se.) Ukpe rọ vwọ tẹnrovi oborẹ ihwo efa ruẹ, ọ da tẹnrovi uyota rẹ Jesu yoniro na. Ọtiọyena, ọ rha yanjẹ Jesu vwoo. Eriyin ọ je hepha nonẹna, oborẹ ihwo efa ruẹ che se wene uyota ọghanghanre rẹ avwanre womarẹ ukoko rẹ Ọghẹnẹ mrẹẹ. Tinkamu uyota yena! Samar, re djunute siẹvure na tare nẹ, “Ọkieje yen me vwọ karophiyọ oma mẹ nẹ a cha sa reyọ iruemu echọchọ rẹ ohwo ọvo vwo ghworo ukoko na ejee; iruemu tiọyena dia iruemu rẹ Ọghẹnẹẹ.”

15. Die wo yono nẹ obo re phia kẹ Emily rhe?

¹⁵ Roro kpahen obo re phia kẹ Emily. Udughwrẹn ọvo Emily ghwe vwo bromaphiyame nu, e de si oni rọyen nẹ ukoko na, ọ da yanjẹ orua rayen vwo. Emily da ta: “Me nama vwẹ ẹwẹn roro nẹ emu tiọna cha sa phiaa. Ọnana yen obẹnbẹn rọ ma rho kẹ vwẹ, urhuru rẹ oni mẹ si vwe.” Die yen vwẹ ukẹcha kẹ Emily? Ọ da ta: “Ọ dia omẹvwẹ ọvo yen herọọ. Me mrẹ obicha vwo nẹ obọ rẹ ọsẹ mẹ rhe, ọtiọyen ji te iniọvo rẹ ukoko na re pha kerẹ orua vwọ kẹ vwẹ. O vwo ọdavwini rẹ ohwo ọvuọvo nene muabọ. Kọyensorọ ọ vwọ ghanre e vwo sikẹrẹ ohwohwo ji phiuduphiyọ ohwohwo awọ.” (1 Pita 5:9) Wọ hẹrhẹ te ọke ebẹnbẹn vwo te we oma tavwen wo ki ru oyerinkugbe wẹn vẹ iniọvo na ganphiyọọ. Rhe ruẹ ọtiọyen asaọkiephana. O toro obo re phiaree, iniọvo na ki che bicha wẹ siẹrẹ wo de si ayen kẹrẹ oma.

16. Die yen foro nẹ a karophiyọ? (Ni ifoto na.)

¹⁶ Je karophiyọ nẹ ihwo rẹ Jihova vwo ẹguọnọ kpahen yen ọ ghwọkuẹ. (Hib. 12:6) Ọ guọnọre nẹ ihwo eje re si nẹ ukoko na rhivwin rhe. (2 Pita 3:9) Ọtiọyena, jẹ o mu we ẹro nẹ ekpako na che ru oborẹ ayen se ru eje vwọ vwẹ ukẹcha kẹ ihwo re si nẹ ukoko na vwo rhivwin bru Jihova rhe.​—2 Tim. 2:24, 25.

17. Imuẹro vọ yen e se vwo?

¹⁷ A ta ota kpahen ebẹnbẹn evo ru wo se hirharoku wo de bromaphiyame nu. Uyota nẹ, evo rayen sa gan mamọ, ẹkẹvuọvo, wo jẹ oshọ mu wee. O vwo erọnvwọn buebun wo se ru vwo muegbe. Wo jẹ ọ chọrọ owẹ ẹro nẹ obọ ri Jihova yen ukẹcha ro ma rho kparobọ nẹchaa. Ọ cha wẹ uko re, ọ je guọnọ vwẹ ukẹcha kẹ wẹ bẹdẹ! (1 Pita 5:10) Ọ cha kẹ wẹ ogangan vẹ akoechiro ru wọ guọnọre wo se vwo hirharoku kebẹnbẹn kebẹnbẹn ri te we oma. Wo vwo rhiabọreyọ ukẹcha ri Jihva ye, o vwo obẹnbẹn vuọvo ro che se si we nẹ obọ rọyeen!​—Une 119:165; Rom 8:38, 39.