Jihova Guọnọre nẹ Ihwo Eje Kurhẹriẹ

1. Die yen okurhẹriẹ churobọ si?

SIẸRẸ avwanre de ru obo re brare, o fori e vwo kurhẹriẹ. Vwẹ Baibol na, ohwo ro kurhẹriẹ wene ẹwẹn ji vwo utuoma kpahen obo ro ruru rọ brare na, kọ je davwẹngba ro vwo jẹ obo ro ruru na ẹvwanriẹn.​—Ni Eta re Vwomaphia Vwẹ Baibol Na, “Okurhẹriẹ.”

2. Diesorọ o vwo fo e vwo yono kpahen okurhẹriẹ? (Nehemaya 8:9-11)

² A guọnọre nẹ kohwo kohwo rọ herọ yerẹn riẹn oborẹ okurhẹriẹ mudiaphiyọ. Diesorọ? Kidie avwanre ru umwemwu kẹdi kẹdẹ. Kerẹ emọ rẹ Adam vẹ Ivi, avwanre eje riuku rẹ umwemwu vẹ ughwu. (Ro 3:23; 5:12) O vwo ohwo vuọvo ro nuroo. Ihwo re tobọ vwo esegbuyota ọgangan kerẹ Pọl, nene umwemwu muabọ. (Ro 7:21-24) Kẹ, ọnana mudiaphiyọ nẹ e muomaphiyọ kọke kọke re de ru umwemwu? Ẹjo, Jihova nẹ aruẹdọn, ọ je guọnọ nẹ oma vwerhen avwanre eje. Roro kpahen obo re phia kẹ ihwo ri Ju ọke ri Nehemaya. (Se Nehemaya 8:9-11.) Jihova guọnọre nẹ ayen muomaphiyọ fikirẹ imwemwu rẹ ayen ruru vwẹ obuko ree, ẹkẹvuọvo ọ guọnọre nẹ ayen mrẹ aghọghọ vwẹ ẹga rayen vwọ kẹ. Jihova riẹnre nẹ okurhẹriẹ ghwa omavwerhovwẹn cha. Ọtiọyena ko yono avwanre kpahọn. Siẹrẹ e de kurhẹriẹ nẹ imwemwu rẹ avwanre, ke se vwo imuẹro nẹ Ọsẹ avwanre rọ vọnre vẹ arodọnvwẹ che vwo ghovwo avwanre.

3. Die yen a cha ta ota kpahen vwẹ uyono nana?

³ Vwẹ uyono nana e che yono kpahen okurhẹriẹ, a je cha ta ota kpahen erọnvwọn erha. Ọrẹsosuọ, uyono rẹ Jihova vwọ kẹ ihwo rẹ Izrẹl kpahen okurhẹriẹ. Ọrivẹ, oborẹ Jihova cha ihwo rọyen uko vwo kurhẹriẹ. Ọrerha, a cha ta ota kpahen oborẹ idibo ri Jesu yono kpahen okurhẹriẹ.

OBORẸ JIHOVA YONO IHWO RẸ IZRẸL KPAHEN OKURHẸRIẸ

4. Die yen Jihova yono ẹgborho rẹ Izrẹl kpahen okurhẹriẹ?

⁴ Ọke rẹ Jihova vwọ vwẹ Izrẹl vwo ru ẹgborho nu, ọ vẹ ayen da re ọphọ je rhọnvwe kugbe nẹ ayen de nene irhi rọyen, kọ chochọn rayen ji bruba kẹ ayen. Kpahen irhi na, ọ da vwẹ imuẹro kẹ ayen: “Urhi nana mi ji kẹ ovwan nonẹ na gan kẹ ovwa-an, o ji sheri nọ-ọ.” (Urh 30:11, 16) Ẹkẹvuọvo siẹrẹ ayen de gbevwọsuọ, kerẹ udje, da ra ga eghẹnẹ efa​—kọ cha rhan abọ nẹ ayen, ọ gbe cha chochọn rayeen, ọke yena kẹ ayen cha rioja. Dedena, ayen sa rhoma mrẹ aroesiri rẹ Ọghẹnẹ. Ayen se “rhivwi bru Ọrovwohwo rẹ Ọghẹnẹ [rayen ra siẹrẹ ayen] de nyo urhuru rọye.” (Urh 30:1-3, 17-20) Kọyen, ayen se kurhẹriẹ. Siẹrẹ ayen de ru ọtiọyen, Jihova ko che sikẹrẹ ayen je rhoma bruphiyọ kẹ ayen.

5. Mavọ yen Jihova vwo djephia nẹ ọyen kpairoro vrẹ ihwo rọyeen? (2 Ivie 17:13, 14)

⁵ Abọ buebun yen ihwo rẹ Izrẹl gbevwọso Jihova. Vwọ vrẹ edjọ rẹ ayen gare, ayen ji ru erọnvwọn efa ra ghẹmrẹ. Fikirẹ ọnana ayen da rioja. Dedena Jihova kpairoro vrẹ ihwo rọyeen. Abọ buebun yen o ji emraro rọyen bru ayen ra, da ra vuẹ ayen nẹ ayen kurhẹriẹ ji rhivwin bru ọyen rhe.​—Se 2 Ivie 17:13, 14.

6. Mavọ yen Jihova reyọ emraro rọyen vwo yono ihwo rọyen kpahen oborẹ okurhẹriẹ ghanre te? (Ni uhoho na.)

⁶ Abọ buebun yen Jihova reyọ emraro rọyen vwo si ihwo rọyen orhọ je vwẹ ọkpọvi vwọ kẹ ayen. Kerẹ udje, Ọghẹnẹ vuẹ ayen womarẹ Jerimaya nẹ: “Rhivwi Izrẹl re igberadja na . . . Mi gbi vwẹ ophu ni we-e, kidie me vọnre vẹ aruẹdo . . . Takpe rhọvwe abe wẹn ri wo ru kpahe Ọrovwohwo Ọghẹnẹ wẹn.” (Jer 3:12, 13) Jihova je vuẹ Joẹl nẹ ọ ta kẹ ihwo rọyen nẹ: “Vwẹ udu wẹn ejobi rhivwi bru vwe rhe.” (Joẹ 2:12, 13) Ọ je vuẹ Aizaya nẹ ọ ta kẹ ayen nẹ: “Ru oma wẹn fọn; si uruemu ọbrabra wẹn nu oma sio nẹ obaro mẹ; siobọ nẹ umwemwu.” (Aiz 1:16-19) Jihova je womarẹ Izikiẹl vuẹ ayen nẹ: “Mi vwo omavwerhe vwẹ ughwu rẹ oruimwemwu-u? . . . Ọ dianẹ ro kurhẹriẹ nẹ idjerhe rọye rere ọ rhọ? Mi vwo omavwerhe vwẹ oma rẹ ughwu rẹ ohwo ọvuọvo-o, . . . ọtiọye na gbe kurhẹriẹ rere wọ rhọ.” (Izi 18:23, 32) Oma vwerhen Jihova siẹrẹ ihwo de kurhẹriẹ nẹ imwemwu rayen, kidie ọ guọnọre nẹ ayen dia bẹdi bẹdẹ! Ọtiọyena, Jihova hẹrhẹ nẹ irumwemwu rẹ ihwo wene tavwen ọ ke vwẹ ukẹcha kẹ ayeen. E jẹ a mrẹ idje efa ri dje ọnana phia.

7. Die yen Jihova yono ihwo rọyen womarẹ udje rẹ ọmraro Hosia vẹ aye rọyen?

⁷ Vwo oniso oborẹ Jihova reyọ udje ri Goma, aye rẹ ọmraro Hosia vwo yono ihwo rọyen. O vwo gbe igberadja nu, ọ da yanjẹ Hosia vwo bru eshare efa ra. Kẹ ọnana mudiaphiyọ nẹ o rhe che se wene? Jihova, rọ mrẹ obo rehẹ evunrẹ ubiudu rẹ ohwo ọvuọvo da vuẹ Hosia: “Rhoma yanran, ra guọnọ aye ra riẹriẹ nẹ obọ rẹ Ọshare rọye ro gbe igberadja; kirobo rẹ Ọrovwohwo guọnọ ihwo rẹ Izrẹl, dede na yẹ ayen hirhe bru edjọ efa.” (Ho 3:1; Isẹ 16:2) Jokaphiyọ nẹ aye ri Hosia jehẹ evunrẹ umwemwu shue. Dedena, Jihova da vuẹ Hosia nẹ o bro ra, ọ reyọ vwo ghovwo, ọ vẹ ọyen je rhuẹrẹ kugbe.a Vwẹ idjerhe vuọvo na, Jihova je rhe kpairoro vrẹ ihwo rọyen ri ru uyovwin gangan naa. Dede nẹ ayen hẹ evunrẹ umwemwu shue, Jihova ji vwo ẹguọnọ rayen, ọkieje yen ọ vwọ vwẹ ukẹcha kẹ ayen, ayen vwo kurhẹriẹ ji wene idjerhe rayen. Kẹ, udje nana yono avwanre nẹ Jihova rọ dia ohwo rọ “davwa udu rẹ ihwo nẹ” na cha vwẹ ukẹcha kẹ ohwo ro ji ru umwemwu je cha uko vwo kurhẹriẹ? (Isẹ 17:3) E jẹ a mrẹ oborẹ Jihova ru ọnana wan.

OBORẸ JIHOVA CHA IRUMWEMWU UKO VWO KURHẸRIẸ

8. Die yen Jihova ruru vwọ vwẹ ukẹcha vwọ kẹ Ken vwo kurhẹriẹ? (Jẹnẹsis 4:3-7) (Ni uhoho na.)

⁸ Ken yen ọmọkpako rẹ Adam vẹ Ivi. Ọ riuku rẹ umwemwu mie ọsẹ vẹ oni rọyen. Vwọba, Baibol na ta kpahọn nẹ: “Iruo rọyen pha brabra.” (1Jọ 3:12) Ọ sa dianẹ ọyensorọ Jihova vwọ ‘vwẹ ẹro saka vwo ni Ken vẹ izobo rọyen.’ Ukperẹ o vwo wene idjerhe rọyen, “ivun de miovwo Ken gangan, o de muomaphiyọ.” Kẹ, die yen Jihova rhoma ru? O de nene Ken ta ota. (Se Jẹnẹsis 4:3-7.) Noso nẹ Jihova ta ota kẹ Ken bọrọbọrọ je vuẹ nẹ ọyen che bruba vwọ kẹ siẹrẹ o de ru obo ri yovwirin, o ji sio orhọ nẹ ophu rọyen na sa nẹrhẹ o ru obo re brare. Ọ da ohwo nẹ Ken kerhọọ. Ọ vwẹ uphẹn kẹ Jihova nẹ ọ vwẹ ukẹcha kẹ ọyen vwo kurhẹriẹẹ. Dede nẹ Ken ru ọtiọyen, kọyen Jihova vwọ sen nẹ ọyen rha vwẹ ukẹcha vwọ kẹ ihwo efa vwo kurhẹriẹẹ? Ẹjo kakaka!

9. Idjerhe vọ yen Jihova vwọ vwẹ ukẹcha kẹ Devid vwo kurhẹriẹ?

⁹ Jihova vwo ẹguọnọ rẹ Ovie Devid mamọ. Ọ tobọ tanẹ ọyen “ohwo ro ruẹ obo rọ vẹ ubiudu mẹ shephiyọ.” (Iru 13:22) Ẹkẹvuọvo Devid de rhi vwobọ vwẹ imwemwu egangan, o gbe igberadja je dẹ ozighẹ. Vwo nene obo rehẹ Urhi ri Mosis, ofori nẹ e hwe Devid. (Li 20:10; Uk 35:31) Jẹ, Jihova guọnọ vwẹ ukẹcha kẹ Devid vwo kurhẹriẹ.b Ọtiọyena, Jihova de ji ọmraro rọyen Natan bru ovie na ra, dede nẹ Devid ji dje oka rẹ okurhẹriẹ vuọvo phiaa. Natan de kpe itẹ ọvo vwọ kẹ Devid rọ nẹrhẹ ọ riẹn nẹ ọyen ru umwemwu ọgangan, itẹ na tere ẹwẹn mamọ. O de kurhẹriẹ. (2Sa 12:1-14) O si Une rẹ Ejiro 51 vwo djephia nẹ obo ro ruru na da rọ mamọ. (Ni ovuẹ rọhẹ obenu rẹ Une rẹ Ejiro 51, nw) Une rẹ Ejiro yena vwẹ ọbọngan vwọ kẹ ihwo buebun ri ru umwemwu je nẹrhẹ ayen kurhẹriẹ. Oma rha vwerhen avwanre nẹ Jihova vwẹ ukẹcha kẹ odibo rọyen Devid ro vwo ẹguọnọ kpahen vwo kurhẹriẹ?  

10. Mavọ yen oma ru we kpahen edirin vẹ evwoghovwo ri Jihova vwẹ oborẹ o nene avwanre yerẹn wan?

¹⁰ Jihova vwo utuoma kpahen koka koka rẹ umwemwu, o vwo ọvuọvo rọ rhọnvwephiyọọ. (Un 5:4, 5) Dede nẹ ọ riẹnre nẹ avwanre eje irumwemwu, ọ vwẹ ukẹcha kẹ avwanre a sa vwọ họnre so umwemwu kidie o vwo ẹguọnọ rẹ avwanre. Ọ davwẹngba ọkieje vwọ vwẹ ukẹcha kẹ ihwo re tobọ ru umwemwu ọgangan ayen vwo kurhẹriẹ ji sikẹrẹ. Mavọ yen ọ vwerhoma te ra vwọ riẹn nẹ Jihova vwo ghovwo avwanre! Siẹrẹ e de roro kpahen edirin vẹ evwoghovwo ri Jihova, ọnana se mu avwanre vwọ fuevun kẹ, je fobọ kurhẹriẹ nẹ imwemwu rẹ avwanre. Enẹna e jẹ a fuẹrẹn obo re yono ukoko rẹ Inenikristi kpobarophiyọ kpahen evwoghovwo.

OBORẸ IDIBO RI JESU YONORI KPAHEN EVWOGHOVWO

11-12. Die yen Jesu yono avwanre kpahen owenvwe ri Jihova vwori rọ vwọ reyọ vwo ghovwo? (Ni opharo ọbe na.)

¹¹ Vwẹ ẹgbukpe ujorin rẹsosuọ, jẹ ọke ri Mesaya cha vwọ rhe te re. Kirobo re djunute vwẹ uyono rọ wanre na, Jihova reyọ Jọn ro Brẹ Ihwo Phiyame vẹ Jesu Kristi vwo yono ihwo obo rọ ghanre te re vwo kurhẹriẹ.​—Mt 3:1, 2; 4:17.

¹² Ọke rẹ Jesu vwo ruiruo rẹ aghwoghwo rọyen vwẹ otọrakpọ na, o yono ihwo nẹ Ọsẹ rọyen vwo owenvwe rọ vwọ reyọ imwemwu rẹ avwanre vwo ghovwo avwanre. Jesu ru ọtiọyen ro vwo kpe itẹ rẹ ọmọ osoghoro na. Eghene yena brorhiẹn ro vwo nẹ uwevwin ji vwobọ vwẹ erọnvwọn ebrabra. Ọke vwọ yanran na, “ọhọ rọyen vwo rhivwin bro rhe” o de rhivwin kpo. Kẹ, die yen ọsẹ na ruru? Jesu tare nẹ, ọmọ na “je vwọ hẹ ugboko, ọsẹ rọyen da kparo mrẹ, aro rọyen da dọn, ọ da djẹ yanran, ọ da gbanọ, ọ da fiọnfiọn vwọrẹ ẹguọnọ.” Ọmọ na guọnọ nọ sẹ ọyen sa dia odibo vwevunrẹ uwevwin rẹ ọsẹ rọyen, ẹkẹvuọvo ọsẹ na da tanẹ “ọmọ mẹ nana” rhoma rhivwin rhe, ọ da reyọ kerẹ ọmọ rọyen. Ọsẹ na da ta: “O ghwruru jovwo, a mrẹrẹ re.” (Lu 15:11-32) Ọke rẹ Jesu vwọ hẹ odjuvwu ọ ke rhe otọrakpọ na, o muẹro nẹ ọ mrẹ ọsẹ rọyen rọ re ehrọre ji vwo ghovwo irumwemwu buebun ri kurhẹriẹ. Mavọ yen ikuegbe ri Jesu nana vwerhoma te nẹ Jihova ọyen Ọsẹ rẹ avwanre ro gbe arodọnvwẹ!

13-14. Die yen ọyinkọn Pita yonori kpahen okurhẹriẹ, kẹ die yen o yono ihwo efa kpahọn? (Ni uhoho na.)

¹³ Ọ dia ọmọrhiẹ erọnvwọn yen ọyinkọn Pita yono mie Jesu kpahen okurhẹriẹ vẹ evwoghovwoo. Abọ buebun yen Pita ru obo re chọre, Jesu de vwo ghovwo odedede. Kerẹ udje, Pita vwọ sen nẹ ọyen riẹn Jesuu abọ erha soso nu, ẹwẹn rọyen de kpokpo mamọ. (Mt 26:34, 35, 69-75) Ẹkẹvuọvo ọke rẹ Jesu vwo vrẹnushi nu, ọ da vwẹ oma phia kẹ Pita ọvo rere o se nene ta ota. (Lu 24:33, 34; 1Kọ 15:3-5) Aphro herọọ nẹ, Jesu riẹnre nẹ Pita kurhẹriẹ re, ọtiọyena ọ da vwẹ imuẹro kẹ nẹ ọyen vwo ghovwo.

¹⁴ Ọ vwọ dianẹ Pita riẹn obo ro mudiaphiyọ e vwo kurhẹriẹ je mrẹ evwoghovwo na, ko se yono ihwo efa kpahen okurhẹriẹ kugbe evwoghovwo. Re vwo ru orẹ ri Pẹntikọst nu, Pita da nabọ djefiotọ vwọ kẹ ihwo ri Ju evo ri segbuyotaa nẹ ayen yen hwe Mesaya na. Ọtiọyena, o de jiro kẹ ayen nẹ: “Ovwan kurhẹriẹ rere ovwan wene idjerhe rẹ ovwan, e se vwo phoro imwemwu rẹ ovwan no, rere ọke rẹ ufuoma se vwo nẹ obọ ri Jihova komobọ bru ovwan rhe.” (Iru 3:14, 15, 17, 19) Pita djerephia nẹ okurhẹriẹ muẹ orumwemwu vwo wene idjerhe rọyen​—kọyen o wene iroro ọchọchọ ro rhere, kọ je dobọ rẹ obo re brare jẹ rere o se ru obo re vwerhen Ọghẹnẹ oma. Pita ji djephia nẹ Jihova cha reyọ imwemwu rayen vwo ghovwo ayen yẹrẹ phoro ayen no kakare. Ikpe buebun vwọ wan nu, Pita da vwẹ imuẹro kẹ Inenikristi nẹ: “Jihova . . . vwo edirin rẹ ovwan, kidie ọ guọnọre nẹ ohwo vuọvo ghwọrọ-ọ, ukperẹ ọtiọyen ọ guọnọre nẹ ihwo eje kurhẹriẹ.” (2Pi 3:9) Mavọ yen ọ vwerhoma te ra vwọ riẹn nẹ a da tobọ ru imwemwu egangan dede, Jihova vwo ghovwo avwanre!

15-16. (a) Idjerhẹ vọ yen ọyinkọn Pọl vwo yono kpahen evwoghovwo? (1 Timoti 1:12-15) (b) Die yen a cha ta ota kpahen vwẹ uyono rọ kpahen ọnana?

¹⁵ Ihwo re guọnọ okurhẹriẹ vẹ evwoghovwo vrẹ Sọl ri Tasọs bunruu. Sọl obọdẹn rẹ ukọn vwọ kẹ idibo ri Jesu. Inenikristi buebun niro nẹ o ghwru sheri re, o che se kurhẹriẹ ọfaa. Ẹkẹvuọvo, Jesu riẹnre nẹ o se wene ji kurhẹriẹ. Ọ vẹ ọsẹ rọyen mrẹ erhuvwu rọhẹ oma ri Sọl. Jesu da ta: “Ọshare nana ochẹ re me sanere kẹ oma mẹ.” (Iru 9:15) Jesu tobọ ru emu igbevwunu rọ nẹrhẹ Sọl kurhẹriẹ. (Iru 7:58–​8:3; 9:1-9, 17-20) Sọl ra rhe riẹn phiyọ ọyinkọn Pọl rhe vwọ dia Onenikristi nu, ọkieje yen o vwo dje ọdavwaro kpahen uruemu esiri vẹ arodọnvwẹ rẹ Jihova vẹ Jesu dje vwọ kẹ. (Se 1 Timoti 1:12-15.) Ọyinkọn Pọl vuẹ iniọvo na nẹ: “Ọghẹnẹ guọnọ cha wẹ uko vwo kurhẹriẹ fikirẹ uruemu esiri rọyen.”​—Ro 2:4.

¹⁶ Ọke rẹ Pọl vwo nyo kpahen obẹnbẹn rẹ ọfanrhiẹn ro do nene asan eje vwẹ ukoko ri Kọrẹnt, die yen o ruru? Obo ro ruru yono avwanre oborẹ Jihova dje ẹguọnọ phia siẹrẹ ọ da ghwọkuẹ idibo rọyen kugbe obo ro gbe arodọnvwẹ siẹrẹ ayen de kurhẹriẹ. Ọna yen obo ra cha fuẹrẹn vwẹ uyono rọ vwọ kpahen ọnana.