Rhiabọreyọ Evwoghovwo ri Jihova

1-2. Omafuvwe vọ yen irumwemwu ri kurhẹriẹ se vwo? (Ni uhoho na.)

OVIE Devid riẹn oborẹ oma ruẹ ohwo siẹrẹ abe rẹ umwemwu re ruru vwẹ obuko re de kpokpo ohwo. (Une 40:12; 51:3; ovuẹ rọhẹ obenu rẹ Une rẹ Ejiro 51, nw) O ruẹ imwemwu egangan vwẹ akpeyeren rọyen. Dedena, o dje okurhẹriẹ ro nẹ otọ ubiudu rhe, Jihova de vwo ghovwo. (2 Sam. 12:13) Fikirẹ ọnana, Devid de rhi vwo ẹruọ rẹ omafuvwe ro no cha siẹrẹ e de rhiabọreyọ evwoghovwo ri Jihova.​—Une 32:1.

² Kerẹ Devid, e ji se vwo ẹwẹn ri dọe e de rhiabọreyọ arodọnvwẹ ri Jihova. Mavọ yen ọ vwerhoma te ra vwọ riẹn nẹ siẹrẹ a da fan imwemwu avwanre, kurhẹriẹ nẹ imwemwu, je davwẹngba re vwo jẹ ayen ẹvwanriẹn, Jihova vwo owenvwe rọ vwọ reyọ imwemwu avwanre vwo ghovwo avwanre​—tobọ te imwemwu egangan dede! (Isẹ 28:13; Iruo 26:20; 1 Jọn 1:9) Ọ vwerhoma ra vwọ riẹn nẹ o vwo ghovwo kakare kerẹsiẹ a da mrẹ nẹ umwemwu na phiare dedee!​—Izi. 33:16.

3-4. Mavọ yen oma ru oniọvo aye ọvo ro vwo bromaphiyame nu, kẹ die yen a cha ta ota kpahen vwẹ uyono nana?

³ Ọkievo, ihwo evo sa mrẹ bẹnbẹn rẹ ayen vwo rhiabọreyọ evwoghovwo ri Jihova. Roro kpahen obo re phia kẹ Jennifer, ra yọnre ghwanre vwevunrẹ uyota na. Rọ vwọ hẹ eghene, o de vwobọ vwẹ erharhe iruemu ji yeren akpọ rẹ aro ivẹ. Ikpe evo vwọ wan nu, o de rhivwin bru Jihova rhe ji muwan kẹ omaebrophiyame. Ọ da ta: “Akpọ ọvwọfanrhiẹn yen mi ke yerin jovwo, ra vwọ da idi vroma, guọnọ igho ji muophu ọgangan. Vwẹ ẹwẹn mẹ, me riẹnre nẹ me vwọ rẹ kẹ evwoghovwo ji kurhẹriẹ nu, izobo ri Kristi de ru vwe fon. Jẹ, mi vwo imuẹro vuọvo vwẹ ubiudu mẹ nẹ e vwo ghovwo uvwe ree.”

⁴ Wọ mrẹ bẹnbẹn ọkievo wo vwo vwo imuẹro nẹ Jihova vwẹ oruchọ rẹ wo ruru vwẹ obuko re vwo ghovwo uwe? Jihova guọnọre nẹ a mrẹ aruẹdọn rọyen kirobo rẹ Devid ruru. Vwẹ uyono nana, a cha ta ota kpahen oboresorọ e vwo rhiabọreyọ evwoghovwo ri Jihova kugbe obo re sa vwẹ ukẹcha kẹ avwanre vwo ru ọtiọyen.

DIESORỌ O VWO FO E VWO RHIABỌREYỌ EVWOGHOVWO RI JIHOVA?

5. Die yen Eshu guọnọre nẹ e vwo imuẹro rọyen? Djudje ọvo.

⁵ E de rhiabọreyọ evwoghovwo ri Jihova, ka sa vrabọ ifi rẹ Eshu ọvo. Karophiyọ nẹ Eshu che ru kemu kemu rọ vwọ dobọ rẹ ẹga rẹ avwanre vwọ kẹ Jihova ji. O se vwo ru ọnana, Eshu sa davwẹngba e vwo vwo imuẹro nẹ a cha sa vwẹ imwemwu rẹ avwanre vwo ghovwo avwanree. Roro kpahen obo re phia kẹ ọshare ọvo vwẹ Kọrẹnt, re si nẹ ukoko na fikirẹ ọfanrhiẹn. (1 Kọr. 5:1, 5, 13) Ọke vwọ yanran na o vwo kurhẹriẹ, Eshu rha guọnọ nẹ iniọvo rehẹ ukoko na vwo ghovwoo​—ayen nenire jẹ eghrẹn te ẹdia ayen rhọnvwe dede rhivwiin. Vwẹ ọke vuọvo na, Eshu guọnọre nẹ ọshare ro kurhẹriẹ na no nẹ e che se vwo ghovwo ọyeen, rere “omaemuophiyọ ọgangan” vwo muo rọ ọ me nẹrhẹ ọ dobọ rẹ ẹga ri Jihova ji. Ọdavwẹ vẹ ena rẹ Eshu ji rhi wenee. Ẹkẹvuọvo ‘avwanre dia igbori rẹ ena rọyeen.’​—2 Kọr. 2:5-11.

6. Mavọ yen e se vwo vwo ẹwẹn ri dọe siẹrẹ ẹwẹn rẹ abe de kpokpo ohwo?

⁶ E de rhiabọreyọ evwoghovwo ri Jihova, ẹwẹn rẹ abe rhe che kpokpo avwanree. Siẹrẹ e de ru umwemwu, ẹwẹn rẹ abe se kpokpo avwanre. (Une 51:17) Ọyen obo ri yovwinrin. Ẹwẹn obrorhiẹn rẹ avwanre se mu avwanre vwọ jowọ ra vwọ kpọ idjerhe rẹ avwanre vi. (2 Kọr. 7:10, 11) Jẹ, e de kurhẹriẹ nu jẹ ẹwẹn rẹ abe ji kpokpo avwanre, ọnana sa nẹrhẹ ofu dje ohwo ra da dobọ rẹ ẹga ri Jihova ji. E de rhiabọreyọ evwoghovwo ri Jihova, ke se phi ẹwẹn rẹ abe phiyọ asan ro foro​—obuko avwanre. Ọtiọyena ka sa vwẹ ẹga kẹ Jihova kirobo rọ guọnọre​—vẹ ẹwẹn obrorhiẹn rọ fonro vẹ aghọghọ. (Kọl. 1:10, 11; 2 Tim. 1:3) Mavọ yen e se vwo vwo imuẹro nẹ Ọghẹnẹ vwo ghovwo avwanre?

DIE YEN SA VWẸ UKẸCHA KẸ AVWANRE VWO RHIABỌREYỌ EVWOGHOVWO RI JIHOVA?

7-8. Mavọ yen Jihova djisẹ rẹ oma rọyen kẹ Mosis, kẹ imuẹro vọ yen ọnana vwọ kẹ avwanre? (Eyanno 34:6, 7)

⁷ Roro kpahen oborẹ Jihova djisẹ rẹ oma rọyen. Kerẹ udje, jokaphiyọ oborẹ Jihova vuẹ Mosis vwẹ Ugbenu ri Sainai.a (Se Eyanno 34:6, 7.) Jihova rha sa ta eta buebun kpahen iruemu kugbe idjerhe rọyen, ukpe ro vwo ru ọtiọyen, o de djisẹ rẹ oma rọyen kerẹ “Ọghẹnẹ rẹ arodọnvwẹ rọ je ria ehrọre.” Oka rẹ Ọghẹnẹ tiọyena se jẹ odibo rọyen ro kurhẹriẹ nẹ otọ rẹ ubuidu rhe e vwo ghovwo? Kakaka! Ọyen uruemu rẹ ọkon ro ji dje aruẹdon phiaa​—iruemu ra cha sa mrẹ vwẹ oma ri Jihovaa.

⁸ E se vwo imuẹro nẹ Jihova ọyen Ọghẹnẹ rẹ aruẹdọn kidie ọkieje yen ọ vwọ ta uyota. (Une 31:5) Ọtiọyena, a sa vwẹroso obo rọ tare. Ọ da dianẹ wọ mrẹ bẹnbẹn wọ vwọ kpairoro vrẹ abe rẹ imwemwu wo ru vwẹ obuko re, nọ oma wẹn: ‘Mi vwo imuẹro nẹ Jihova ghene ria ehrọre ji gbe arodọnvwẹ, o de jẹ kohwo kohwo ro kurhẹriẹ nẹ imwemwu rọyen e vwo ghovwo? Kẹ, o rhe fo mi vwo vwo imuẹro nẹ o vwo ghovwo uvwe?’

9. Die yen o mudiaphiyọ ra vwọ reyọ imwemwu avwanre vwo ghovwo avwanre? (Une rẹ Ejiro 32:5)

⁹ Roro kpahen oborẹ ẹwẹn ọfuanfon ri Jihova mu ihwo ri si Baibol na vwọ ta kpahen evwoghovwo rọyen. Kerẹ udje, roro kpahen oborẹ Devid, ọvo usun ihwo ri si Baibol na ta kpahen evwoghovwo ri Jihova. (Se Une rẹ Ejiro 32:5.) Devid da ta: “Wọ vwẹ abe rẹ umwemwu mẹ ghovwo uvwe.” Ota rẹ Hibru ra fan phiyọ “ghovwo” se mudiaphiyọ “ra vwọ kpara kpenu,” “ra vwọ reyọ,” yẹrẹ “re vwo muo.” Ọke rọ vwọ reyọ vwo ghovwo Devid, kọ ghwa họhọ nẹ Jihova kpare imwemwu rọyen ji mu ayen yanran. Devid da rhe mrẹ omafuvwe vwo nẹ abe rẹ imwemwu ro muẹ jovwo na. (Une 32:2-4) A je sa mrẹ ọkpọ rẹ omafuvwe tiọyena. Siẹrẹ e de kurhẹriẹ vwo ne imwemwu avwanre nẹ otọ rẹ ubuidu rhe, o rhe fo e vwo mu eghwa abe rẹ imwemwu rẹ Jihova kpare nu yẹrẹ mu nẹ avwanre omaa.

10-11. Die yen eta na ohwo “vẹ evwoghovwo” vuẹ avwanre kpahen Jihova? (Une rẹ Ejiro 86:5)

¹⁰ Se Une rẹ Ejiro 86:5. Vwẹ ẹkpo ri Baibol nana, Devid ta kpahen Jihova nẹ ọyen ohwo “vẹ evwoghovwo.” Vwọ kpahen ota nana, ọbe ọvo rọ ta ota kpahen Baibol na da ta kpahen Jihova nẹ: “[Ọyen] ohwo rọ reyọ vwo ‘ghovwo’​—ọyena ghwa hẹ ‘uruemu’ rọyen. ” Diesorọ Jihova vwọ reyọ vwo ghovwo? Ẹkpo rivẹ ri Baibol na da ta: “Wọ vọnre vẹ ẹguọnọ ro jẹ rhẹriẹ kẹ ihwo ejobi ri se we.” Kirobo re yonori vwẹ uyono rọ wanre na, ẹguọnọ ro jẹ rhẹriẹ yen mu Jihova ọ vẹ idibo rọyen re fuevun ga vwo vwo uvi rẹ oyerinkugbe ọkpẹkpẹkpẹ. Kidie nẹ “evwoghovwo rhere buebu” kọ sa reyọ vwo ghovwo irumwemwu eje ri kurhẹriẹ fikirẹ ẹguọnọ rọyen ro jẹ rhẹriẹ na. (Aiz. 55:7.) Wọ da mrẹ bẹnbẹn wo vwo rhiabọreyọ evwoghovwo rẹ Ọghẹnẹ, wọ sa nọ oma wẹn: ‘Mi vwo imuẹro nẹ Jihova ọyen ohwo rọ reyọ vwo Ghovwo​—nẹ o muegbe rọ vwọ reyọ vwo ghovwo ihwo eje ri kurhẹriẹ re rẹ nẹ o gbe arodọnvwẹ kẹ ayen? Me da rẹ nẹ o gbe arodọnvwẹ kẹ vwẹ, o rhe fo mi vwo imuẹro nẹ o vwo ghovwo uvwe re?’

¹¹ Ọ vwerhoma ra vwọ riẹn nẹ Jihova nabọ vwo ẹruọ rẹ ẹdia rẹ umwemwu rẹ avwanre hepha. (Une 139:1, 2) Une ọfa rẹ Devid soro dje ọnana phia, rọ je sa cha avwanre uko vwo rhiabọreyọ evwoghovwo ri Jihova.

WO JẸ OBORẸ JIHOVA KAROPHIYỌ CHỌRỌ OWẸ ẸROO

12-13. Vwo nene obo rehẹ Une rẹ Ejiro 103:14, die yen Jihova karophiyọ kpahen avwanre, kẹ die yen ọnana muo vwo ruẹ?

¹² Se Une rẹ Ejiro 103:14. Devid ta kpahen Jihova nẹ ọ “karohọ nẹ avwanre iwurhie.” Vẹ eta yena, Devid dje oboresorọ Jihova vwo muegbe rọ vwọ reyọ vwo ghovwo idibo rọyen re ga ri kurhẹriẹ: O vwo ẹruọ ẹdia rẹ umwemwu rẹ avwanre hepha. A sa vwọ nabọ vwo ẹruọ rẹ ọnana fiotọ, e jẹ a nabọ fuẹrẹn eta rẹ Devid tare na.

¹³ Devid tare nẹ Jihova “riẹn obo ra ma avwanre wan.” “Ekpẹn rẹ otọ na” yen ọ reyọ vwọ ma Adam, ọ nabọ riẹn oborẹ ihworakpọ re gbare guọnọre​—kerẹ udje, ofori ayen vwọ riemu, vwerhẹn je wẹn. (Jẹn. 2:7) Jẹ, otọ rẹ ekpẹn rẹ ayen hepha na da rhe vwomaphia rẹ Adam vẹ Ivi vwo ru umwemwu nu. Kerẹ emọ rayen, avwanre da riuku rẹ umwemwu rọ nẹrhẹ e ru erọnvwọn re chọre. Ọ dia Jihova de riẹn ẹdia rẹ umwemwu rẹ avwanre ọvoo; Devid tare nẹ ọ “karohọ.” Ota ri Hibru re vwo ruiruo vwẹ etinẹ na se mudiaphiyọ a vwọ jowọ ro fori. A sa djẹ otọ rẹ eta ri Devid na koko vwẹ idjerhe ọtiọna: Jihova vwo ẹruọ nẹ e che ru umwemwu ọkievo; siẹrẹ emu tiọyen da vwomaphia, e de kurhẹriẹ nẹ otọ rẹ ubiudu rhe, ko gbe arodọnvwẹ ji vwo ghovwo avwanre.​—Une 78:38, 39.

14. (a) Mavọ yen Devid djisẹ rẹ oborẹ evwoghovwo ri Jihova rho te? (Une rẹ Ejiro 103:12) (b) Mavọ yen udje rẹ oborẹ Jihova vwo ghovwo Devid wan vwo djephia nẹ o vwo ghovwo kakare? (Ni ekpeti na “Oborẹ Jihova Reyọ Vwo Ghovwo ọ me je Kpairoro Vrẹ.”)

¹⁴ Mavọ yen evwoghovwo ri Jihova rho te? (Se Une rẹ Ejiro 103:12.) Devid tare nẹ, “kirobo rẹ obaro ọnre sheri te kẹ obuko ọnre na,” ọtiọyen Jihova ji siẹ ogbeku rẹ avwanre sherẹ te siẹrẹ O de vwo ghovwo. Vwọrẹ uyota, ọkieje yen ẹbẹre ọnre nẹcha vwo sherabọ kẹ ẹbẹre ọnre shera; o vwo ọke vuọvo ayen sa vwọ yan gbahẹ omaa. Die yen ọnana vuẹ avwanre kpahen imwemwu rẹ Jihova vwo ghovwo nure? Ọbe ọvo ra rionbọ ra de dje vwẹ idjerhe tiọna: “E de si umwemwu no shesheri nu, ke se vwo imuẹro nẹ asan vuọvo ọnrhe nẹcha rha herọ rọ cha nẹrhẹ a karophiyọ umwemwu naa.” Di roro​—ọnrhe sa nẹrhẹ a karophiyọ obo re phiare vwẹ obuko re. Ẹkẹvuọvo, siẹrẹ Jihova de vwo ghovwo, kọ ghwa họhọ nẹ o vwo asan vuọvo rẹ ọnrhe nẹcha rọ cha nẹrhẹ ọ karophiyọ umwemwu na o mi kere ba avwanre obọọ.​—Izi. 18:21, 22; Iruo 3:19.

15. Die yen e se ru oghwa rẹ abe imwemwu re ru vwẹ obuko re de kpokpo avwanre?

¹⁵ Mavọ yen eta ri Devid rehẹ Une rẹ Ejiro 103 sa vwọ vwẹ ukẹcha kẹ avwanre vwo rhiabọreyọ evwoghovwo ri Jihova? Oghwa rẹ abe imwemwu re ru vwẹ obuko re de kpokpo avwanre, a sa nọ oma rẹ avwanre: ‘Oborẹ Jihova karophiyọ kpahen avwanre chọrọ ovwẹ ẹro, nẹ o riẹn ẹdia umwemwu re me hepha, nẹ o ji vwo ghovwo orumwemwu ro kurhẹriẹ kerẹ omẹvwẹ? Me je karophiyọ oborẹ Jihova kpairoro vrẹ nu, nẹ o rhe che kere imwemwu rọ reyọ vwo ghovwo uvwe nu ba vwẹ obọọ?’ Ọ dia imwemwu re ru vwẹ obuko re yen Jihova tẹnroviẹẹ. Ọtiọyena, o rhe fo e ji vwo ru ọtiọyeen. (Une 130:3) E de rhiabọreyọ evwoghovwo ri Jihova, ka sa kpairoro vrẹ imwemwu re ru vwẹ obuko re je ga Jihova vẹ aghọghọ.

16. Djudje rẹ imuoshọ rọhẹ herọ ra vwọ tẹnrovi abe umwemwu re ru vwẹ obuko re. (Ni uhoho na.)

¹⁶ Roro kpahen udje nana. Ohwo rọ tẹnroviẹ abe umwemwu ro ru vwẹ obuko re pha kerẹ ohwo ro nẹ ughegbe rẹ imoto ra vwọ mrẹ obuko jẹ ọ djẹ yanran. Ọyen obo ri yovwirin o de djuẹ ẹro nẹ ughegbe na nọke ra ruọke; rọ sa vwọ mrẹ imuoshọ rehẹ obuko rọ sa kẹnoma kẹ. Ẹkẹvuọvo, ọ sa vwọ vrabọ rẹ imuoshọ rehẹ obaro, ofori nẹ ọ tẹnrovi idjerhe na. Ọtiọyen ọ je hepha nẹ, e de ni kpuko kpo imwemwu re ru vwẹ obuko re; e se yono nẹ ayen rhe je nẹrhẹ e vwo owenvwe e vwo jẹ ayen ẹvwanriẹn. Jẹ, ọ da dianẹ ọkieje yen a vwọ tẹnroviẹ ayen, oghwa rẹ abe umwemwu se si obo re se ru vwẹ ẹga ri Jihova enẹna kpotọ. Ukperẹ ọtiọyen, e jẹ a tẹnrovi idjerhe rọhẹ obaro rẹ avwanre na. Avwanre hẹ evunrẹ idjerhe ro sun ohwo kpo akpọ kpọkpọ rẹ Ọghẹnẹ veri na, ra rha cha “karophihọ” erharhe iroro ọfaa.​—Aiz. 65:17; Isẹ 4:25.

VWO IMUẸRO VWẸ UBIUDU WẸN ỌKIEJE

17. Diesorọ o vwo fo e vwo vwo imuẹro vwẹ ubiudu rẹ avwanre kpahen ẹguọnọ vẹ evwoghovwo ri Jihova?

¹⁷ Ofori nẹ e vwo imuẹro vwẹ ubiudu rẹ avwanre kpahen ẹguọnọ vẹ evwoghovwo ri Jihova. (1 Jọn 3:19) Diesorọ? Kidie ọkieje yen Eshu cha vwọ davwẹngba e vwo jẹ imuẹro evwo nẹ Jihova vwo ghovwo yẹrẹ vwo ẹguọnọ rẹ avwanre. Vwẹ ẹdia ivẹ nana, obo rọ guọnọ yen avwanre vwọ dobọ rẹ ẹga ra vwọ kẹ Jihova ji. E se rhẹro nẹ Eshu cha davwẹngba rọyen eje kidie ọ riẹnre nẹ ọmọke krẹn yen o vwori. (Ẹvwọ. 12:12) E jẹ a vwẹ uphẹn kẹ ro vwo phikparobọọ!

18. Die yen wo se ru vwo vwo imuẹro kpahen ẹguọnọ vẹ evwoghovwo ri Jihova?

¹⁸ Wo se vwo ru imuẹro wẹn kpahen ẹguọnọ ri Jihova ganphiyọ, reyọ iroroẹjẹ ra ta ota kpahen vwẹ uyono rọ wanre na vwo ruiruo. Wo se vwo vwo imuẹro vwẹ ubiudu wẹn kpahen evwoghovwo ri Jihova, karophiyọ oborẹ Jihova djisẹ rẹ oma rọyen. Roro kpahen oborẹ ihwo rẹ ẹwẹn ọfuanfon rọyen mu vwo si Baibol na ta kpahen evwoghovwo rọyen. Wo jẹ ọ chọrọ owẹ ẹroo nẹ, ọ nabọ riẹn ẹdia rẹ umwemwu ru wọ hepha nẹ o ji che gbe arodọnvwẹ kẹ wẹ. Wọ me je karophiyọ nẹ o de vwo ghovwo, o ru ọtiọyen kakare. Ọtiọyena, ku wọ sa vwẹrokere Devid vwọ ta vẹ imuẹro kpahen arodọnvwẹ ri Jihova nẹ, “Me kpẹvwẹ owẹ Jihova, wọ vwọ reyọ ‘abe rẹ umwemwu mẹ’ vwo ghovwo uvwe!”​—Une 32:5.