علاقائی اِجتماع کے دعوتنامے بانٹنے کی مہم
1. ہم 2015ء کے علاقائی اِجتماع کے لیے دعوت دینا کب شروع کریں گے؟
1 فرض کریں کہ آپ نے اپنے دوستوں یا رشتےداروں کے لیے کوئی خاص دعوت کا اِنتظام کِیا ہے۔ آپ نے کھانا بڑی محنت سے تیار کِیا ہے اور سارے اِنتظام پر آپ کا بہت پیسہ خرچ ہوا ہے۔ یقیناً آپ اِس دعوت کے لیے لوگوں کو بڑے شوق سے بلائیں گے۔ اِسی طرح 2015ء کے علاقائی اِجتماع پر پیش کی جانے والی روحانی خوراک کو بھی بڑی محنت سے تیار کِیا گیا ہے۔ یہوواہ خدا نے ہمیں اعزاز بخشا ہے کہ ہم لوگوں کو اِس ضیافت پر آنے کی دعوت دیں۔ اِجتماع سے تین ہفتے پہلے ہم لوگوں کو دعوتنامے دینے کی مہم شروع کریں گے۔ آئیں، کچھ ایسی باتوں پر غور کریں جن سے ہمیں اِس مہم میں خوشی اور جوش کے ساتھ حصہ لینے کی ترغیب ملے گی۔
2. ہم مہم میں بھرپور حصہ کیوں لینا چاہتے ہیں؟
2 جب ہم اِس بات پر غور کرتے ہیں کہ ہمارے اِجتماعوں پر پیش کی جانے والی روحانی خوراک سے ہمیں ذاتی طور پر کیا فائدے ہوتے ہیں تو یقیناً ہم اِس مہم میں بھرپور حصہ لینا چاہیں گے۔ (یسع 65:13، 14) ہمیں یہ بھی یاد رکھنا چاہیے کہ ہر سال اِس مہم کے بڑے اچھے نتائج سامنے آتے ہیں۔ (بکس ”مہم کے اچھے نتیجے“ کو دیکھیں۔) لیکن علاقائی اِجتماعوں پر حاضری کم ہو یا زیادہ، اِس مہم کے دوران ہم جو کوششیں کرتے ہیں، اُن سے یہوواہ کی بڑائی ہوتی ہے اور اُس کی فراخدلی ظاہر ہوتی ہے۔—زبور 145:3، 7؛ مکا 22:17۔
3. دعوتنامے کیسے بانٹے جائیں گے؟
3 ہر کلیسیا میں بزرگوں کی جماعت کو اِس بات پر غور کرنا چاہیے کہ کلیسیا کے علاقے میں زیادہ سے زیادہ دعوتنامے کیسے بانٹے جا سکتے ہیں۔ مثال کے طور پر وہ یہ طے کر سکتے ہیں کہ کیا مبشر اُن گھروں میں دعوتنامے چھوڑیں گے جن میں اُن کی ملاقات صاحبِخانہ سے نہیں ہوتی؟ اور کیا وہ اپنے علاقے میں عوامی جگہوں پر گواہی دیتے وقت دعوتنامے بانٹیں گے؟ ہفتے اور اِتوار کے دن اگر موقع ملے تو دعوتناموں کے ساتھ رسالے بھی پیش کیے جانے چاہئیں۔ اِس مہم کے آخر میں ہمیں یقیناً اِس بات سے بڑی خوشی ہوگی کہ ہم نے اِس میں پوری لگن سے حصہ لیا اور اِس مہم کی وجہ سے بہت سے لوگ اُس روحانی ضیافت میں شریک ہوئے جو یہوواہ خدا نے تیار کی تھی۔