Kala Ukuanjanga Koku Kuatisa Vana va Lekisa Onjongole Kolondaka Viwa

1. Ovituwa vipi omanu vamue va pondola oku lekisa poku va kundila olondaka viwa? (Ovilinga 13:​47, 48; 16:​14, 15)

KOTEMBO Yakristão vokocita catete, omanu valua va tava lonjanga kocili eci va yeva olondaka viwa. (Tanga Ovilinga 13:​47, 48; 16:​14, 15.) Cimuamue haico okuti, koloneke vilo omanu vamue va siatavo oku kuata esanju eci va yeva esapulo Liusoma onjanja yatete. Omanu vakuavo kefetikilo ka va lekisa onjongole, pole, noke va lekisa onjongole yoku lilongisa kuenda oku fendela Yehova. Oco hẽ, nye tu sukila oku linga eci tu sanga omanu ‘vakuotima wa sunguluka?’

2. Momo lie upange woku linga olondonge u sokisiwila lupange womunu umue ukuakulima?

² Upange woku linga olondonge u sokisiwa lupange womunu umue ukuakulima. Eci ukuakulima a limbuka okuti ovikũla vimue a lima via yela, eye ungula lonjanga ovaima aco, pole, amamako oku lima osi loku tata ovikũla vikuavo okuti handi ka via yelele. Cimuamue haico okuti, eci tu sanga omunu umue o lekisa onjongole kesapulo liusoma, tu sukila oku u kuatisa lonjanga oco a linge ondonge ya Kristu. Pole, tu sukilavo oku amamako oku vetiya onjongole yomanu vana okuti, va ambata otembo yalua oco va kuate elomboloko liovina va kasi oku lilongisa. (Yoa. 4:​35, 36) Eci tu limbuka okuti omunu umue o lekisa onjongole kesapulo Liusoma ale sio, ci leluka kokuetu oku sanga onjila ya suapo yoku u kuatisa. Vocipama cilo, tu lilongisa ovina tu pondola oku linga kombangulo yatete oco tu kuatise omanu vana va yongola oku tu yevelela. Handi vali, tu ka lilongisavo ndomo tu pondola oku va kuatisa oku amamako oku kula konepa yespiritu.

NDOMO TU KUATISA OMUNU UMUE WA LEKISA ONJONGOLE KOLONDAKA VIWA

3. Kupange woku kunda, nye tu sukila oku linga eci tu sanga omunu umue wa lekisa onjongole? (1 Va Korindo 9:26)

³ Kupange woku kunda, eci tu sanga omunu umue o lekisa onjongole, lonjanga yalua tu sukila oku u kuatisa oku lilongisa catiamẽla ku Yehova kuenda oku kuata ukamba uwa laye. Omo liaco, kombangulo yatete tu sukila oku fetika laye elilongiso Liembimbiliya loku u laleka oco a ende kolohongele vietu.—Tanga 1 Va Korindo 9:26.

4. Tukula ulandu womunu umue wa lekisa lonjanga onjongole yoku lilongisa Embimbiliya.

⁴ Fetika elilongiso Liembimbiliya. Omanu vamue tu sapela lavo kupange woku kunda, va lekisa onjongole yoku fetika oku lilongisa Embimbiliya. Ndeci, eteke limue vokuãla, ufeko umue kofeka yo Kanada wamela kokakãlu kalivulu kuenda wa tikula ombrochura yimue losapi hati, Sanjukili Omuenyo Otembo ka yi Pui! Manji ukãi wa kala oku kunda lokakãlu kaco, wo lomboluila okuti, lekuatiso liombrochura yaco wa ponduile oku lilongisa Embimbiliya ocali. Ufeko waco wa lekisa onjongole kuenje wa eca etendelo liotelefone ku manji yaco, noke manji wa ecavo etendelo liaye. Noke keteke liaco, ufeko wa tuma esapulo ku manji oku pula catiamẽla kelilongiso Liembimbiliya. Eci manji a pula nda ovo va ponduile oku li sanga kesulilo liosemana, ufeko wa tambulula ndoco: “Hẽla hẽ ka citava? Momo lacimue ndi linga.” Ovo va fetika elilongiso Liembimbiliya Votãlo kuenje kesulilo liosemana ufeko wa endele kohongele onjanja yatete kuenda wamamako oku kula lonjanga konepa yespiritu.

5. Nye ci pondola oku tu kuatisa oku kũlĩha epuluvi lia suapo lioku fetika elilongiso Liembimbiliya? (Talavo oviluvialuvia.)

⁵ Etu ka tu lavoka okuti omanu vosi va tava lonjanga elilongiso Liembimbiliya ndeci ca li pita lufeko wa tukuiwa. Olonjanja vimue, pamue ci ambata otembo oco tu vetiye onjongole yomunu umue. Oco tu ci linge, tu sukila oku sapela lomunu waco catiamẽla kulandu umue u pondola oku u vetiya. Nda tua lekisa ocituwa ca sunguluka kuenda oku amamako oku lekisa okuti tua kapako omunu waco, citava okuti vokuenda kuotembo yimue yitito tu ka tẽla oku fetika oku u longisa Embimbiliya. Nye tu pondola oku popia eci tu fetika oku longisa Embimbiliya omunu umue? Tu kũlĩhĩsi eci vamanji vamue va loñoloha koku fetika alilongiso Embimbiliya va popia.

6. Nye tu sukila oku popia oco tu kuatise omunu umue oku kuata onjongole yoku amamako lombangulo?

⁶ Vamanji vaco va lombolola okuti, kovitumãlo vimue poku vangula catiamẽla koku fetika elilongiso Liembimbiliya, ci kuete esilivilo oku yuvula oku tukula olondaka ndeci, “elilongiso,” “elilongiso Liembimbiliya”ale “ame ndu ku longisa.” Pole, ovo va limbuka okuti olondaka vi eca onima yiwa vievi viokuti, “ombangulo,” “oku sapela” kuenda “oku kuata elomboloko Liembimbiliya.” Oco omunu umue a kuate onjongole yoku amisako lombangulo, ove o pondola oku popia ndoco: “Ci komõhisa oku mola ndomo Embimbiliya li eca atambululo kapulilo a velapo komuenyo” ale “Embimbiliya ka li kuatisa lika vakuetavo; pole, olio li tu ĩhavo olonumbi viwa vi tu kuatisa eteke leteke.” Handi vali, tu pondola oku popia ndoco: “Ombangulo yaco ka yi tumala otembo yalua. Vokuenda kueci ci soka 10 ale 15 kakukutu, tu pondola oku lilongisa ovina vialua vi tu kuatisa komuenyo.” Oco ku ka kokele omunu waco oku kuata usumba, yuvulavo oku popia okuti tu ka ci linga vokuenda “kuolosemana viosi.”

7. Vepuluvi lipi omanu vamue va limbuka okuti ovina va kala oku lilongisa viocili? (1 Va Korindo 14:​23-25)

⁷ Laleka omunu oku enda kohongele. Koloneke viupostolo Paulu, omanu vamue va limbuka okuti va kala oku lilongisa ocili eci va endele kohongele onjanja yatete. (Tanga 1 Va Korindo 14:​23-25.) Cimuamue haico ca siata oku lipita koloneke vilo. Omanu valua tu longisa Embimbiliya ukamba wavo la Yehova wa siata oku pamisiwa lonjanga eci va fetika oku enda enda kolohongele viekongelo. Vepuluvi lipi lia sunguluka o pondola oku laleka omunu umue oku enda kohongele? Velivulu Sanjukili Omuenyo Otembo ka yi Pui! kocipama 10, mu sangiwa elaleko liaco. Pole, ove ku sukila oku kevelela toke o pitĩla kocipama caco oco o laleke omunu. Kombangulo yatete, ove o pondola oku laleka omunu oku enda kohongele yesulilo liosemana. Citava okuti, o sapuila komunu waco osapi yohundo yowiñi ale etosi limue lia velapo lielingiso Liutala Wondavululi liosemana yaco.

8. Nye tu sukila oku popia eci tu laleka omunu umue oku enda kohongele? (Isaya 54:13)

⁸ Eci o laleka omunu umue wa lekisa onjongole, u lomboluila ndomo olohongele vietu via litepa lovina eye pamue a siata oku mola katavo akuavo. Ndeci, eci ukãi umue o kasi oku lilongisa Embimbiliya a endele kohongele onjanja yatete, poku mola Elilongiso Liutala Wondavululi, wa pulisa ku manji ukãi wa kala oku u longisa Embimbiliya hati: “Anga hẽ manji wa kũlĩha olonduko viomanu vosi?” Manji ukãi wo tambulula hati, ndeci tua kũlĩha olonduko via vakuepata lietu, tua siatavo oku likolisilako oku kũlĩha olonduko via vamanji vosi. Ukãi waco wa popia okuti hacoko ca siata konembele yaye. Cimuamue haico okuti, tu sukilavo oku lombolola komunu catiamẽla kesunga lieci olohongele vietu via litepela latavo akuavo. (Tanga Isaya 54:13.) Etu tua siata oku liongolola oco tu fendele Yehova, oku lilongisa catiamẽla kokuaye kuenda oku lipamisa pokati. (Va Hev. 2:12; 10:​24, 25) Eli olio esunga lieci olohongele vietu via sokiyiwila oco vi tu kuatise oku lilongisa kuenda ka mua kongelele ovihilahila. (1 Va Kor. 14:40) Handi vali, ovitumãlo vietu violohongele, via tungiwa lonjila yimue ya leluka, oco vi tu kuatise oku lilongisilamo catiamẽla ku Yehova lonjila yimue yiwa. Omo okuti ka tu pangi onepa ko pulitika, ka tu kuatisa ocitundo cimue kuenda ka tu litengivo volombangulo viopulitika. Ocina cikuavo ci pondola oku tu kuatisa, oku lekisa komunu osimbu ka endele kohongele ovideo losapi hati: Nye ci Lingiwa Vonjango Yusoma? Poku ci linga, eye o ka kũlĩha ale ndomo ohongele yaco yi ka lingiwa.

9-10. Nye tu pondola oku sapuila komunu umue o kuete ohele yoku enda kohongele? (Talavo ociluvialuvia.)

⁹ Omanu vamue va kuete ohele yoku enda kolohongele momo, va sima okuti va ka kisikiwa oku “linga Olombangi Via Yehova.” Pole, etu tu sukila oku sapuila komunu okuti, tu sole oku tambula omanu vana veya kolohongele vietu kuenda ka tu kisika laumue oku li situlula ale oku linga cimue vokuenda kuohongele ndaño muẽle oku kala Ombangi ya Yehova. Vosi va pondola oku lianja, oku kongelamo omãla vatito. Kolohongele vietu omãla ka va likalila. Pole, ovo va tumala lolonjali viavo loku lilongisa ovina vimuamue. Kuenje, olonjali vi kũlĩha apa omãla vavo va kasi kuenda ovina va kasi oku longisiwa. (Esin. 31:12) Ka tu pingivo ovilumba ale oku pitisa olohumba oco omanu va kapemo olombongo. Etu tu kuãi onumbi ya Yesu yokuti: “Omo wa tambuli ocali, ecivo ocali.” (Mat. 10:8) Handi vali, tu pondolavo oku sapuila komunu okuti, eye ka sukila oku wala uwalo umue wa tĩla oco a ende kohongele. Momo, Yehova ka vanji kemõleho lietu, pole, eye o vanja eci tua tuwa vutima.—1 Sam. 16:7.

¹⁰ Nda omunu una ove wa laleka weya kohongele, u kuatisa oku lianja. Noke, u lekisavo kakulu vekongelo kuenda ku vamanji vakuavo. Nda eye wa liyeva okuti wa tatiwa ciwa, ci ka leluka kokuaye oku tiuka vali kohongele yikuavo. Vokuenda kuohongele, nda eye ka kuete Embimbiliya, kuameleli kumosi Vembimbiliya liove. Handi vali, u kuatisavo oku kuata elomboloko liohundo yi kasi oku lingiwa ale olonepa vikuavo viohongele.

NDOMO TU KUATISA OMUNU UMUE WA FETIKA OKU LILONGISA EMBIMBILIYA

11. O lekisa ndati okuti wa sumbila otembo kuenda esokiyo liomunu ove o kasi oku longisa Embimbiliya?

¹¹ Ovina vipi tu sukila oku kapako eci tu longisa Embimbiliya komunu umue? Tu sukila oku kapako elivala kuenda esokiyo liaye. Ndeci, nda wa sokiyi oku lilongisa velivala limue, likolisilako oku pitĩla velivala liaco, ndaño okuti omanu vokocikanjo cove va kuete ocituwa coku cilua. Handi vali, likolisilako okuti elilongiso liatete ka li tumala otembo yalua. Akundi vamue va loñoloha va popia okuti, ciwa oku malusula selo elilongiso Liembimbiliya ndaño okuti omunu o kuete onjongole yoku lilongisa vali. Omo liaco, kuata utate oco ku ka vangule calua. Ecelela okuti omunu o longisa Embimbiliya, eye o vangulapo vali loku situlula ovisimĩlo viaye.—Olosap. 10:19.

12. Ocimãho cipi tu sukila oku kuata poku fetika elilongiso limue Liembimbiliya?

¹² Tunde kefetikilo, ocimãho cove ci kale coku kuatisa omunu o longisa Embimbiliya oku kũlĩha Yehova la Yesu kuenda oku pamisa ocisola a va kuetele. Oco tu ci linge, olonjanja viosi tu sukila oku lekisa kokuaye eci Embimbiliya li popia okuti, ovisimĩlo vietu muẽle havioko. (Ovil. 10:​25, 26) Upostolo Paulu wa tu sila ongangu yiwa konepa eyi. Poku longisa omanu, wa enda oku tiamisila alongiso aye ku Yesu Kristu, una weyile palo posi, oco a tu kuatise oku kũlĩha Yehova kuenda oku u sola. (1 Va Kor. 2:​1, 2) Handi vali, upostolo Paulu wa lekisavo esilivilo lioku kuatisa vana va fetika ndopo oku lilongisa Embimbiliya, oku kuata ovituwa viwa vina vi sokisiwa lulu, opalata kuenda ovawe a kuete esilivilo lialua. (1 Va Kor. 3:​11-15) Vovituwa viaco, mua kongela ekolelo, olondunge, elomboloko kuenda oku sumbila Yehova. (Osa. 19:​9, 10; Olosap. 3:​13-15; 1 Pet. 1:7) Omo liaco, setukula onjila upostolo Paulu a kuama poku longisa kuenda kuatisa omunu o longisa Embimbiliya oku kuata ekolelo lia pama kuenda ukamba uwa la Yehova, Isietu wokilu.—2 Va Kor. 1:24.

13. Tu lekisa ndati epandi kuenda esunguluko poku kuatisa omunu tu longisa Embimbiliya? (2 Va Korindo 10:​4, 5) (Talavo ociluvialuvia.)

¹³ Poku longisa Embimbiliya, setukula ongangu ya Yesu yoku lekisa epandi kuenda esunguluko. Yuvula oku linga apulilo ana a katangisa omunu o kasi oku longisa Embimbiliya. Nda okuti eye ka kuatele elomboloko lietosi limue, amisiko lelingiso kuenda sapeli etosi liaco vepuluvi likuavo. Ku ka kisike omunu o longisa Embimbiliya oku tava kelongiso limue, pole, ecelela okuti vokuenda kuotembo eye o sokolola kovina a kasi oku lilongisa kuenda o pongolola ovisimĩlo viaye. (Yoa. 16:12; Va Kol. 2:​6, 7) Embimbiliya li sokisa alongiso esanda lombonge yimue ya pama tu kasi oku seteka oku nyõla. (Tanga 2 Va Korindo 10:​4, 5.) Pamue ka ci leluka komunu umue tu longisa Embimbiliya oku siapo ovina a lilongisa tunde osimbu. Omo liaco, tu sukila oku u kuatisa oku kolela ku Yehova. Poku ci linga ci ka leluka kokuaye oku siapo alongiso ana eye a kakatela, a-o a sole.—Osa. 91:9.

NDOMO TU KUATISA OMUNU UMUE WA FETIKA NDOPO OKU ENDA ENDA KOLOHONGELE

14. Tu kuatisa ndati vana va fetika ndopo oku enda enda kolohongele?

¹⁴ Yehova o yongola okuti tu yuvula ocame kuenda tu lekisa ocisola komanu vosi, ci kaile okuti va tunda kovikoti via litepa, olohuasi ale olohukũi. (Tia. 2:​1-4, 9) Oco hẽ, tu lekisa ndati ocisola komanu vana va fetika ndopo oku enda enda kolohongele?

15-16. Tu kuatisa ndati vana veya onjanja yatete kohongele oku lianja?

¹⁵ Omanu vamue va enda lika kolohongele vietu, omo va yongola oku kũlĩha cimue ale va lalekiwa lomunu umue wo vekongelo likuavo. Eci o mola omunu umue weya onjanja yatete kohongele, u yolela lesanju. Pole, kuata utate oco ku ka kokele okuti omunu waco o kuata osõi. U laleka oco a tumale love, oku kuamelela Vembimbiliya liove kuenda valivulu akuavo ale u pingilako alivulu amue. Handi vali, lekisa ocikembe kokuaye. Ulume umue wa endele kohongele onjanja yatete, wa sapuila ku manji wo yolela okuti, ka liyevele ciwa momo wa wala lonjila yimue ya litepa. Manji yaco, wo kuatisa oku lianja kuenda wo sapuila okuti, etu Tulombangi Via Yehova tua lisoka lomanu vosi. Noke liotembo yimue eye wa papatisiwa, pole, lalimue eteke a ivaleleko etambululo manji o wĩhile. Omo liaco, poku sapela lomunu weya onjanja yatete kohongele, ivaluka okuti ocimãho cetu oku lekisa kokuaye okuti tuo kapako kuenda tu sukila oku yuvula oku litenga vomuenyo waye.—1 Pet. 4:15.

¹⁶ Kulivo onjila yikuavo yoku kuatisa omunu weya onjanja yatete kohongele oku lianja. Ndeci, tu sukila oku lekisa esumbilo kolombangulo vietu, katambululo tu eca kolohongele, kolonepa tu linga ale ceci tu vangula lomunu umue ka vumbi Yehova. Yuvula oku vangula olondaka vi sumuisa ale oku linga ovina vi koka okuti, omunu o liwekapo oku enda enda kolohongele. (Tito 2:8; 3:2) Lalimue eteke ka tu ka pisi ovina omanu vakuavo va tava. (2 Va Kor. 6:3) Vamanji va linga olohundo, va sukila oku kapako calua etosi liaco. Ovo va lekisa okuti va kapako omanu, poku yuvula oku lombolola ovina okuti, vana veya onjanja yatete kohongele ka va kuata elomboloko liaco.

17. Nye tu sukila oku linga eci tu sanga omanu ‘vakuotima wa sunguluka’ kupange woku kunda?

¹⁷ Eteke leteke tu sukila oku lekisa okuti, upange woku linga olondonge u sukila onjanga. Momo tu kamamako oku sanga omanu vana “vakuotima wa sungulukila omuenyo ko pui.” (Ovil. 13:48) Eci tu sanga omanu vaco, ka tu ka kuati ohele yoku fetika elilongiso limue Liembimbiliya lavo ale oku va laleka oku enda kolohongele. Omo liaco, tu sukila oku va kuatisa oku eca ananga atete oco va endele ‘vonjila yi tuala komuenyo.’—Mat. 7:14.