Mioñolola ‘Uloño Wove Woku Longisa’ Kupange Woku Kunda

1. Uloño upi tu sukila oku likolisilako oku mioñolola kuenda momo lie? (2 Timoteo 4:2) (Talavo ociluvialuvia.)

YESU wa sapuila olondonge viaye hati: ‘Lingi olondonge . . . , va longisi oku linga ovina viosi ndo kundiki.’ (Mat. 28:​19, 20) Onumbi eyi yi lekisa okuti, Akristão vosi va sukila oku longisa omanu vakuavo. Ocili okuti, Yehova eye o koka vosi vana “vakuotima wa sunguluka” kuenda ovangelo va tu kuatisa oku sanga omanu vaco. (Ovil. 13:48; Yoa. 6:44; Esit. 14:6) Pole, tu sukila oku likolisilako oku longisa omanu catiamẽla ku Yehova. Sokolola kongangu upostolo Paulu kuenda Barnaba va tu sila. Embimbiliya li popia okuti eci ovo va enda oku kundila vosunangonga yo ko Ikoniyu, “va vangula lonjila yimue okuti, owiñi walua wa va Yudea la va Helasi, va tava.” (Ovil. 14:1) Eci ci lekisa okuti, Paulu kuenda Barnaba va mioñolola ‘uloño wavo woku longisa.’ (Tanga 2 Timoteo 4:2.) Akristão vosi va sukilavo oku likolisilako oku mioñolola uloño wavo woku longisa.

2. Momo lie Akristão vamue va simila okuti ka va pondola oku mioñolola uloño wavo woku longisa?

² Akristão vamue va sima okuti ka va pondola oku mioñolola uloño wavo woku longisa, momo ka va lilongisile calua kosikola ale ka va tẽla oku lombolola ciwa ovina komanu vakuavo. Handi vali, alume vamue va tukuiwa Vembimbiliya va liyevelevo okuti ka va loñolohele. (Etu. 4:10; Yer. 1:6) Vakuavo va sima okuti ka va tẽla oku longisa ciwa momo, ka va kuete alilongiso alua Embimbiliya ale ovolandu awa kupange woku kunda ndeci vakuavo. Ocili okuti havosiko tu sanga kupange woku kunda okuti va ka tambulula ciwa kesapulo tu va kundila. Handi vali, onima tu kuata kupange waco, ka ya tambele kalikolisilo etu muẽle. Ndomo ca tukuiwa ale, Yehova kuenda ovangelo va tu kuatisa oku sanga omanu vakuotima wa sunguluka. Pole, tu sukila oku likolisilako oku kunda lonjila yimue yi vetiya omanu. Vocipama cilo, tu ka konomuisa ovina vitatu vi ka tu kuatisa oku mioñolola uloño wetu woku longisa kupange woku kunda.

TU SUKILA OKU KAPAKO OMANU

3. Momo lie omanu valua va solaile oku yevelela Yesu?

³ Embimbiliya li popia okuti, Yesu “wa kũlĩhĩle eci ca kala vovitima viomanu.” (Yoa. 2:25) Olondaka evi vi lekisa okuti Yesu wa kũlĩhĩle ovina omanu va enda oku sokolola kuenda esunga liaco. Omo okuti Yesu wa kuatele elomboloko lia suapo liovina omanu va sukilile, eye wa tẽla oku vangula ovina via enda oku vetiya ovitima viavo. Eye wa kũlĩhĩle okuti omanu va sukila olonumbi kuenda elembeleko momo, asongui vetavo va enda oku va sakalaisa loviholo kuenda ovihandeleko via tumbikiwa lomanu. (Mat. 9:36; 23:4) Omo liaco, Yesu wa kuatisa omanu vaco pocakati Cohundo a lingila Komunda. Omanu valua va enda oku sola ovina Yesu a kala oku longisa momo, eye wa enda oku vangula ovina via kuatele esilivilo kokuavo.

4. Tu lekisa ndati okuti tua kapako omanu? (Talavo oviluvialuvia.)

⁴ Tu pondola oku lekisa okuti tua kapako omanu, poku seteka oku kuata elomboloko liovina vi va sakalaisa. Omanu vosi tu kundila, va siata oku liyaka lovitangi violuali lulo lua Satana. Oku kũlĩha ovina viaco, ci tu vetiya oku lekisa ocikembe komanu vana tu sanga vocikanjo. Ndeci, anga hẽ kocitumãlo tu sangiwa ku kasi oku pita esapulo limue li kasi oku sakalaisa omanu? Anga hẽ olonjali via sakalala lovina vĩvi vi pondola oku lipita lomãla vavo kosikola? Anga hẽ ka ca lelukile oku sanga upange? Seteka oku sokolola ndomo koloneke vilo via sulako omuenyo ka wa lelukile komanu vana ka va kũlĩhĩle ovina Embimbiliya lia likuminya.—2 Tim. 3:1; Isa. 65:​13, 14.

5. Yesu wa litepele ndati lasongui vetavo va va Yudea? (Mateo 11:​28-30)

⁵ Yesu wa kapeleko omanu kuenje ovo va ponduile oku ci limbuka konjila ndomo eye a enda oku va tata. Eye wa litepele calua lasongui vetavo vana va enda oku tata lãvi omanu! (Mat. 23:13; Yoa. 7:49) Momo Yesu wa enda oku tata omanu lohenda kuenda lesumbilo. Eye wa kala omunu umue ‘womboka haye wonjuka vutima’ kuenje eci co kuatisa oku kala ulongisi umue uwa. (Tanga Mateo 11:​28-30.) Cimuamue haico okuti, etu tu sukilavo oku tata lohenda kuenda lesumbilo omanu vana tu kundila.

6. Tu lekisa ndati ohenda kuenda esumbilo komanu vana ka va yongola oku yevelela esapulo tu va kundila ale va tu lambalala?

⁶ Omanu vamue ka va yongola oku yevelela esapulo tu va kundila kuenda vakuavo va tema letu. Tu tata ndati omanu vaco? Yesu ka tu longisile oku tata lãvi omanu vana va tu lambalala, pole, wa tu longisa okuti, ‘tu sukila oku linga eci ciwa ku vana va tu suvuka,’ ‘oku sumũlũisa vana va tu yonguila eci cĩvi,’ ‘loku likutililako vana va tu sepula.’ (Luka 6:​27, 28) Ci ka leluka kokuetu oku lekisa ohenda komanu vana va tu tata lãvi, nda tua ivaluka okuti kuli esunga limue lieci ka va yonguila oku tu yevelela. Ocili okuti omanu vamue va siata oku tu lambalala omo liesapulo tu va kundila. Pole, vakuavo ka va yongola oku tu yevelela momo, va sakalala locitangi cimue ci kasi oku lipita vepata liavo ale locina cimue cikuavo. Kuenje citava okuti eci tu pitĩla konjo yavo, tu va sanga okuti va tema. Omo liaco, olonjanja viosi tu sukila oku kapako elungulo liokuti, “olondaka [vietu] vi kale viumbombe, loku singiwa lomongua oco okuti, [tu] kũlĩha ndomo [tu] tambulula omunu lomunu.” (Va Kol. 4:6) Nda okuti tua kapako omanu loku limbuka okuti ovo va kasi oku liyaka lovitangi komuenyo wavo, tu ka tẽla oku sanga ocina cimue ci ka va kuatisa.

TALAVAYA LEMBIMBILIYA POKU LONGISA OMANU

7. Yesu poku longisa wa lekisa ndati okuti wa kolelele Kondaka ya Suku? (Yoano 7:​14-16)

⁷ Yesu ka longisile omanu ovisimĩlo viaye muẽle. Ovina eye a longisa via kunamelẽle Vondaka ya Suku kuenda wa ci linga lonjila yimue ya leluka oku kuata elomboloko loku ivaluka ovina viaco. Embimbiliya li tu sapuila okuti, Yesu wa longisa “ndomunu o vangula lunene kuenje ka ci lingile nda vakuavisonehua.” Kuenje omanu “va komõha” loku longisa kuaye. (Mar. 1:22) Koloneke via Yesu, vakuavisonehua va enda oku longisa komanu ovina alongisi vakuavo vetavo vana va kemãla va longisa ale. Pole, Yesu wa longisa komanu ovina vi sangiwa Vondaka ya Suku. Ndaño okuti Yesu wa kala ale kilu kumue la Suku, eye ka setekele oku komõhisa omanu lovina viosi eye a kũlĩhĩle, ale oku va vetiya oku liyeva ndu okuti ka va kuete esilivilo. Pole, eye wa talavaya Londaka ya Suku oco a longise ovina Suku a yonguilile omanu. (Tanga Yoano 7:​14-16.) Yesu wa sia ongangu yiwa kolondonge viaye.

8. Petulu wa setukula ndati ongangu ya Yesu?

⁸ Olondonge via Yesu poku longisa, via kolelelevo Kondaka ya Suku. Ndeci, upostolo Petulu wa talavaya Londaka ya Suku eci a vanguila kovaso yowiñi walua ko Pendekoste yunyamo 33 K.K. Petulu ka pindisiwile kolosikola via kemãla. Pole, eye wa vetiya ovitima violonjeveleli viaye poku va lomboluila ovitumasuku Viembimbiliya Yesu a tẽlisa. (Ovil. 2:​14-37) Onima yipi yeyililako? Embimbiliya li popia hati: “Kuenje vana va tava kondaka yaye lesanju, va papatisiwa kuenda keteke liaco kua vokiyiwa 3.000 komanu.”—Ovil. 2:41.

9. Eci tu longisa omanu, momo lie tu sukilila oku kolela Kondaka ya Suku?

⁹ Embimbiliya olio lika li kuete unene woku kuatisa omanu oku linga apongoloko komuenyo oco va sanjuise Suku. (Va Hev. 4:12) Omo liaco, poku longisa omanu tu sukila oku talavaya Lembimbiliya. Tu yongola oku “kunda ondaka” ya Suku okuti ovisimĩlo vietu muẽle havioko. (2 Tim. 4:2) Elivulu Liolosapo 2:6 li popia hati: “Momo Yehova eye eca olondunge; vomẽla waye mu tunda ukũlĩhĩso kuenda uloño.” Eci ci lekisa okuti, eci tu longisa ovina vi sangiwa Vembimbiliya, tu kasi oku ecelela okuti Yehova o vangula. (Mal. 2:7) Ocimãho cetu, oku kuatisa omanu oku kũlĩha okuti Vembimbiliya mu sangiwa ovina via velapo calua okuti, ukũlĩhĩso womanu ci sule. Ovina Embimbiliya li longisa, vi tunda Kululiki wetu kuenda vi tu kuatisa oku u sanjuisa loku kuata omuenyo umue wesanju.—2 Tim. 3:​16, 17.

10. Nye tu pondola oku linga oco omunu tu longisa a limbuke okuti ovina a kasi oku lilongisa vi tunda Vembimbiliya?

¹⁰ Poku pongiya elilongiso limue Liembimbiliya, sokolola kocisonehua cimue o ka tangela omunu o longisa. Ndaño okuti poku longisa tu talavaya loviluvialuvia kuenda olovideo, tu sukila oku lekisa okuti Embimbiliya olio ocimalẽho ca velapo. Omo liaco, vokuenda kuelilongiso Liembimbiliya, tanga ovinimbu vi ka kuatisa omunu o longisa oku kuata elomboloko lia suapo lietosi lia velapo. Noke u kuatisa oku sokolola kovina a pondola oku lilongisa kovinimbu viaco. Poku talavaya loviluvialuvia kuenda olovideo, kuatisa omunu o longisa oku limbuka ovina viatiamẽla Kembimbiliya a pondola oku lilongisilako. Eci ka ci lomboloka okuti ove o sukila oku vangula calua ale oku tanga ovinimbu viosi Viembimbiliya vi sangiwa vocipama. Pole, ecelela okuti omunu o longisa, o kuata otembo yoku sokolola catiamẽla kocinimbu caco kuenda oku kuata elomboloko liovina a tanga. Olonjanja vimue, pamue ove ale omunu o longisa, vu ka sukila oku tanga vali ocinimbu caco. Poku ci linga, ci ka lekisa okuti ka tu kasi oku longisa komunu ovina elivulu li popia, elitalatu ale olovideo, pole, tu kasi oku longisa eci Embimbiliya li popia.—1 Va Kor. 2:13.

11-12. (a) Tu lekisa ndati epandi komanu tu longisa Embimbiliya? (Ovilinga 17:​1-4) (Talavo ociluvialuvia.) (b) Nye omanu vamue va sukila oku kũlĩha catiamẽla Kembimbiliya kuenda tu pondola oku va kuatisa ndati?

¹¹ Olonjanja vimue, omunu o longisa ka ka tava ale ka ka kuata elomboloko lietosi limue. Eci ovina viaco vi lipita, ivaluka okuti o sukila oku amamako oku “kunda ondaka . . . lepandi liosi.” Havosiko va kula konepa yespiritu lonjila yimuamue. Omanu vamue tu longisa Embimbiliya, pamue va sukila otembo yalua oco va kuate elomboloko lielongiso limue okuti kokuetu lia leluka. Upostolo Paulu wa sukilile oku eca uvangi ku va Yudea vo ko Tesalonike olonjanja vialua loku va longisa Ovisonehua toke eci ovo va kuata elomboloko liovina a kala oku longisa.—Tanga Ovilinga 17:​1-4.

¹² Onjila yikuavo yoku lekisa epandi komanu tu longisa, oku linga apulilo loku yuvula onjongole yoku vangula calua. Likolisilako oku yevelela lutate kuenda oku kuata elomboloko liovina eye a kasi oku sokolola. Noke tanga kuenda sapeli eci catiamẽla kovinimbu viaco Viembimbiliya, oco o kuatise omunu o longisa oku kuata elomboloko liovisimĩlo via Suku viatiamẽla kondaka yaco. Handi vali, ivaluka okuti omanu vamue lalimue eteke va muile Embimbiliya limue kuenda ka va kũlĩhĩle ovina vi sangiwamo. Anga hẽ, ci kuete esilivilo oku va lekisa Embimbiliya limue? Ove o pondola oku talavaya lonepa yokuti “Ulandu u Sangiwa Vondaka ya Suku,” yi kasi kefetikilo Liembimbiliya Li Kola Epongoluilo Lioluali Luokaliye, oco o lekise kokuavo ovina vialua vi sangiwa Vembimbiliya. Noke o pondola oku va kuatisa oku kuata elomboloko liokuti, Embimbiliya li pondola oku va kuatisa komuenyo wavo poku va tangela ocisonehua cimosi ale vivali vi sangiwa kepulilo 15, oco o lekise ndomo Embimbiliya li pondola oku tu kuatisa oku sanga esanju liocili. Omo liaco, nda wa kuatisa omanu o longisa oku limbuka esilivilo Liembimbiliya, ovo va ka kapako alongiso aco komuenyo wavo kuenda va ka kuata onjongole yoku lilongisa ovina vikuavo.

VA KUATISA OKU KŨLĨHA YEHOVA

13. Eci tu longisa Embimbliya, kulie tu sukila oku tiamisila alongiso etu? Tukula ocindekaise cimue.

¹³ Ocimãho cetu, oku kuatisa omanu tu longisa Embimbiliya oku kũlĩha Yehova kuenda oku kala akamba vaye. (Tia. 4:8) Upange wetu u sokisiwa lomunu umue o talavaya locinyi condiyelo, oco a kuatise omunu ukuavo oku sanga ocikuata cimue vowelema. Osimbu omunu ukuavo a kasi oku sandiliya, eye ka li mĩhila eye muẽle. Pole, o mĩhila kocitumãlo va kasi oku sandiliya ocikuata caco. Cimuamue haico okuti, eci tu longisa Embimbiliya, tu sukila oku yuvula oku longisa ovisimĩlo vietu muẽle, pole, tu sukila oku kuatisa omanu oku kũlĩha Yehova.

14. Tu kuatisa ndati omunu tu longisa Embimbiliya oku sanjuisa Yehova?

¹⁴ Poku songola elilongiso limue Liembimbiliya, tu sukila oku kuatisa omunu tu kasi oku longisa oku sola Yehova kuenda oku u sanjuisa. (Olosap. 27:11) Tu ivaluki okuti ka tu kasi lika oku u longisa oku linga eci ciwa, loku yuvula eci cĩvi oco a linge Ombangi ya Yehova. Pole, tu yongola okuti omunu tu longisa Embimbiliya o linga apongoloko komuenyo oco a sanjuise Yehova. Ndeci, nda okuti omunu tu longisa o kasi oku likolisilako oku yuvula ocituwa cimue ka ca sungulukile, tu pondola oku linga kokuaye apulilo amue ndeci: “Momo lie Yehova a suvukila ocituwa eci? Momo lie Yehova a ku kisikila oku liwekapo oku linga ocina cimue o sole? Ocihandeleko caco ci situlula ndati okuti Yehova oku sole?” Nda okuti tua kuatisa omunu tu longisa Embimbiliya oku sokolola catiamẽla ku Yehova kuenda kovituwa viaye, eye o ka limbuka okuti Yehova u sole calua. Kuenje eci ci ka vetiya omunu waco oku kuata onjongole yoku sanjuisa Yehova.

AMAMAKO OKU MIOÑOLOLA ULOÑO WOVE WOKU LONGISA

15. Nye tu sukila oku linga oco tu amameko oku mioñolola uloño wetu woku longisa?

¹⁵ Tu pondola oku likutilila ku Yehova oco a tu kuatise oku sokolola kovina tu sukila oku linga oco tu mioñolole onjila ndomo tu longisa. (1 Yoa. 5:14) Noke yoku likutilila, tu sukila oku likolisilako oco tu tambule asumũlũho a Yehova. Omo liaco, tu sukila oku yevelela lutate kolohongele, muna Yehova a siata oku tu pindisa oco tu longise omanu. Tu pondola oku laleka manji umue wa loñoloha oco a ende letu oku ka songola elilongiso lietu Liembimbiliya. Noke tu pinga kokuaye oco a tu sapuile ovina tu sukila oku mioñolola. Tu ivaluki okuti, ndaño tua kũlĩha ale ovina viosi via kongela kocipama tu ka longisa, omunu tu longisa Embimbiliya ka vi kũlĩhĩle. Tu sokololi ndomo omunu tu longisa a ka liyeva catiamẽla kovina tu ka lilongisa. Noke vokuenda kuelilongiso, tu sukila oku u kuatisa oku limbuka onima yi tunda koku lilongisa Embimbiliya kuenda ovina viwa Yehova a tu likuminya. Nda tua ci linga, tu ka kuatisa omunu tu longisa Embimbiliya oku kala ekamba lia Yehova kuenda oku kuata omuenyo umue wesanju.—Osa. 1:​1-3.

16. Momo lie ci kuetele esilivilo oku mioñolola uloño wetu woku longisa?

¹⁶ Ocina cimue ci tu nenela esanju liocili, oku longisa omanu ovina viatiamẽla ku Yehova. Handi vali, upange woku longisa u ka sukiliwa calua voluali luokaliye. Omo liaco, poku kunda olondaka viwa, tu amamiko oku kapako omanu, oku talavaya Lembimbiliya poku longisa kuenda oku va kuatisa oku kũlĩha Yehova. Nda tua ci linga, tu ka mioñolola uloño wetu woku longisa kupange woku kunda.