Te haapaoraa e te tamaˈi i Ukraine: Eaha ta te Bibilia e parau ra?

Taio anaˈe no nia i te mau tia haapaoraa e te tamaˈi i Ukraine:

• “Aita te tia haapaoraa Orthodoxe no Rusia, Kirill i parau hoê noa ˈˈe parau no ta Rusia i rave. . . . Ua tamau ta ˈna ekalesia i te haaparare i te parau haavare no nia ia Ukraine, e ua faaohipa Poutine i teie mau parau no te turu i te tamaˈi.”—EUobserver 7 no Mati 2022.

• “Ua afai te tia haapaoraa Kirill . . . i ta ˈna poroi puai no te haapapu te tomoraa Rusia i Ukraine ma te parau e tuhaa teie tamaˈi no te aro i te hara.”—AP News 8 no Mati 2022.

• “Ua haamaitai te tia haapaoraa Orthodoxe no Ukraine, Epiphane I no Kiev i Monire ra i te nunaa no te ‘aro i te feia i tomo no Rusia mai’ . . . Ua parau atoa [oia] e ere i te tahi hara ia haapohehia te mau faehau no Rusia.”—Jerusalem Post 16 no Mati 2022.

• “Te turu nei matou [te mau ekalesia e te mau faanahonahoraa o te mau haapaoraa no Ukraine] i te mau nuu faehau no Ukraine e pauroa te feia e turu ra ia matou. E te haamaitai ra matou i ta ratou mau tutavaraa no te paruru ia Ukraine i te enemi e te pure ra matou no ratou.”—Parau faaite no EFHUa 24 no Fepuare 2022.

Eaha to outou manaˈo? Mea tia anei ia faaitoito te mau haapaoraa o te parau ra te pee nei ia Iesu Mesia, i ta ratou mau mero ia haere i te tamaˈi? Eaha ta te Bibilia e parau ra?

Te aamu o te haapaoraa i te tamaˈi

Te faaite ra te aamu, ua parau pinepine te haapaoraa mea tano ia haere i te tamaˈi, aore ra mea titauhia ia haere i te tamaˈi ma te faahua rave i te reira no te hau. E rave rahi matahiti i teie nei, ua faaite te mau Ite no Iehova i te huru haavare o te faaroo. Hiˈo anaˈe te tahi mau hiˈoraa faahitihia i roto i ta matou mau papai.

• Te faaite ra “Les croisades : une ‘illusion tragique’” te hopoia a te ekalesia Katolika no Roma no te mau taparahiraa taata i ravehia i te ioˈa o te Atua e no Iesu.

• Te faataa ra “L’Église catholique en Afrique” i te tahi hiˈoraa nafea te haapaoraa i te manuïa-ore-raa no te tapea i te tamaˈi e te haapoheraa i te hoê nunaa taatoa.

• Te faataa ra te mau tumu parau “La religion est-elle responsable ?,” “Le rôle de la religion dans les guerres,” e “La religion prend parti” e nafea te haapaoraa Katolika, Orthodoxe e Porotetani i te tururaa i na pae e piti o te mau tamaˈi e rave rahi.

Mea tia anei ia turu te mau haapaoraa Kerisetiano i te tamaˈi?

Eaha ta Iesu i haapii: “Ia here oe i to oe taata tupu mai ia oe iho.” (Mataio 22:39) “A here noa i to outou mau enemi.”—Mataio 5:44-47.

Eaha ta Iesu i haapii: “E ere ta ˈu Faatereraa arii no teie nei ao. Ahiri no teie nei ao ta ˈu Faatereraa arii, e aro ïa to ˈu mau taata ia ore au ia tuuhia.” (Ioane 18:36) “Te taata atoa hoi e rave i te ˈoˈe, e pohe ïa i te ˈoˈe.”—Mataio 26:47-52.

A feruri na: Mai te peu aita te mau Kerisetiano i aro no te paruru ia Iesu, mea tia anei ia aro ratou no te tahi atu tumu? A taio i te tumu parau “Peut-on concilier guerre et christianisme ?” no te ite nafea te mau Kerisetiano matamua taiva ore i pee i te hiˈoraa o Iesu e ta ˈna mau haapiiraa.

Eaha te tupu no te mau haapaoraa o te faaitoito ra i te tamaˈi?

Te haapii ra te Bibilia e patoi te Atua i te mau haapaoraa o te faahua parau ra e tia ratou no Iesu aita râ ratou e pee ra i ta ˈ na mau haapiiraa.—Mataio 7:21-23; Tito 1:16.

• Te faaite ra te buka Apukalupo e no te Atua no teie mau haapaoraa te tumu i pohe ai “te feia atoa i haapohehia i nia i te fenua.” (Apokalupo 18:21, 24) No te ite no te aha, a taio i te tumu parau “Qu’est-ce que Babylone la Grande ?”

• Ua faaite Iesu e haamou te Atua i te mau haapaoraa atoa ta ˈna i patoi no ta ratou mau ohipa ino, mai te tumu raau ino tei faahotu i te maa ino “e tâpûhia . . . a hurihia ˈtu ai i roto i te auahi.” (Mataio 7:15-20) A taio i te tumu parau “Ua fatata te hopea o te haapaoraa hape!” no te ite atu â nafea te reira e tupu ai.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images