Te faaohiparaa i te mau hohoˈa i roto i te haamoriraa: Eaha ta te Bibilia e parau ra?

Ia au i te hoê vea Katolika, i te 25 no Mati 2022, i te hoê oroa tei tupu i roto i te fare pure rahi Saint-Pierre, ua tia te pâpa François i mua i te tii o Maria. Ua tapiri o ˈna i to ˈna na mata, a piˈo atu ai i to ˈna upoo no te pure ia Maria e no te taparu ia ˈna ia faatupu i te hau. Ua papaihia i roto i te tahi vea a te Vatikana e ua pure te pâpa ia Maria no te pûpû atu i te huitaata, to Ukraine iho â râ e to Rusia.

Eaha to oe manaˈo? Mea tano anei ia pure i mua i te hoê hohoˈa aore ra ia faaohipa i te reira i roto i te haamoriraa? A feruri na i nia i to muri nei mau irava Bibilia:

• “Eiaha roa oe e hamani na oe i te hoê tii taraihia, aore ra te hoê hohoˈa no te tahi mea i nia i te raˈi, i raro i te fenua nei aore ra i roto i te mau pape i raro aˈe i te fenua. Eiaha roa oe e piˈo i raro i mua ia ratou aore ra e umehia e tavini ia ratou, no te mea o vau, o Iehova to oe Atua, e Atua ïa o te titau ra ia haamori ia ˈu anaˈe.”—Exodo 20:4, 5.a

• “E ario e e auro ta ratou mau idolo, e ohipa a te rima taata. E vaha to ratou, aita râ e paraparau ra. E mata to ratou, aita râ e ite ra. E tariˈa to ratou, aita râ e faaroo ra. E ihu to ratou, aita râ e hauˈa ra. E rima to ratou, eita râ e nehenehe e tapea. E avae to ratou, eita râ e nehenehe e haere. Aita e mea e faaroohia ra no roto mai i to ratou arapoa. Te feia i hamani ia ratou, e riro ïa mai ia ratou, oia atoa te feia o te tiaturi ra ia ratou.”—Salamo 115:4-8.

• “O vau o Iehova. O to ˈu iˈoa tera. E ore au e horoa i to ˈu hanahana no vetahi ê, e ta ˈu arueraa no te mau tii nanaˈohia.”—Isaia 42:8.

• “A maue ê atu i te haamori idolo.”—Korinetia 1, 10:14.

• “A ara i te mau idolo.”—Ioane 1, 5:21.

No te ite atu â eaha ta te Bibilia e parau ra no nia i te faaohiparaa i te mau hohoˈa i roto i te haamoriraa, a taio i te tumu parau “Ia au i te Bibilia: Te mau hohoˈa” aore ra a mataitai i te video E farii anei te Atua ia faaohipahia te hohoˈa i roto i te haamoriraa?

E hinaaro atoa paha oe e ite eaha ta te Bibilia e parau ra no nia i to muri nei mau tumu parau:

• “La Vierge Marie : Que dit la Bible à son sujet ?”

• “Devrait-on prier la Vierge Marie ?”

• “Mau semeio e mau faraa mai—No ǒ mai anei i te Atua?”

• “La paix dans le monde : comment sera-t-elle établie ?”

Hohoˈa: Vincenzo Pinto/AFP via Getty Images