Te tauturu e horoahia i rotopu i “te tamaˈi e te parau o te tamaˈi”

I teie mau mahana hopea nei, e faaroo tatou “i te tamaˈi e te parau o te tamaˈi.” (Mataio 24:6) Tera râ, ia faaruru to tatou mau taeae i tera huru fifi, e fanaˈo ratou i te tauturu hinaarohia. Ua horoa mai te Video parau apî n^o 3 a te Tino aratai (2022) i te tahi mau haamaramaramaraa mahanahana mau no nia i te tauturu tei horoahia i Europa hitia o te râ no te feia i roohia i te tamaˈi i Ukraine. Mea nafea teie tauturu i te horoaraahia a tupu ai te tamaˈi i tera mau vahi? Mea nafea to tatou mau taeae no Ukraine i te faufaaraahia i taua tauturu ra?

Eaha te hinaarohia ra? E nafea e hapono atu?

I te 24 no Fepuare 2022, ua tupu te tamaˈi i Ukraine. I taua mahana ra, ua farii te Tomite tiaau e faataa i te hoê tino moni no te tauturu i to tatou mau taeae i Ukraine. Oioi atura te amaa no Ukraine i te hoo mai i te mea hinaarohia a opere atu ai na roto i na 27 pu e tiaau ra i te ohipa tauturu.

No te tururaa i taua ohipa ra, haamata ihora te pu rahi a te mau Ite no Iehova i te imi e nafea e nehenehe ai e tauturu atu. Ua ani te Tomite tiaau e te Tomite piaraa a te Tino aratai ia ohipa amui te Tuhaa hooraa na te ao nei e te mau tia o te mau amaa no Ukraine e Poronia no te faaineine i tera tauturu e no te haamau i te hoê tapura ohipa. No reira, i te mau mahana atoa, ua putuputu te mau taeae o te Tuhaa hooraa, haponoraa e to te ture o na amaa e piti, hoê mero o te Tomite amaa no Ukraine e te tahi mau mero o te Tuhaa hooraa na te ao nei no te faanaho i teie tuhaa ohipa.

Te na ô ra Jay Swinney, te hoê mero o te Tuhaa hooraa na te ao nei: “Na mua roa, e tia ia feruri eaha tei hinaarohia. Ua hinaaro matou e hapono atu i te maa e te mau taoˈa i matauhia e te mau taeae e tuahine no te aupuru ia ratou. Tera râ, te tahi fifi, te feruriraa ïa eaha tei hinaarohia. Te mea fifi roa ˈtu râ, te feruriraa ïa e nafea ia hapono atu i te reira i Ukraine a tupu ai te tamaˈi.”

I te area 9 no Mati 2022, ua taa ia matou eaha te hapono atu: e afata maa, mai te maa punu, te huero maa, te raiti, te pipi, e oia atoa te tahi mau taoˈa mai te puˈa e te papie haumitiraa. I tera taime, ua numerahia te haamâuˈaraa no hoê taata i te roaraa e maha hebedoma, ua raeahia ïa e 65 tara Marite. I te mea hoi e tausani taeae e tuahine te hinaaro i te tauturu, ua faatia te Tomite tiaau ia faaohipahia te hoê tino moni rahi no te horoa i teie tauturu. E nafea râ to tatou mau taeae e hapono ai i te reira ia ore ratou e fifihia?

I te 13 no Mati, ua tamata e piti taeae no Poronia i te hapono i te tahi mau taoˈa mai te amaa ra o Poronia i te hoê fare vairaa tauihaa piri ia Lviv, i Ukraine. I te mau mahana hou raua a reva ˈi, ua tauturu te mau mero o te amaa no Poronia e no Ukraine ia raua no te faaineine i to raua tere. Na te amaa i haapao i te mau parau e tia ia faaî no te tomo atu i Ukraine no te faatae atu i teie tauturu. Na te amaa atoa i haapao ia ite-maitai-hia e pereoo faauta tauturu ta raua e faahoro ra e ua feruri amui e te mau taeae no Ukraine eaha te purumu ohie aˈe ia rave no te tae oioi atu. Maoti teie faaineineraa e te haamaitairaa a Iehova, ua tae atu teie tauturu i Lviv i te mau pu e tiaau i te ohipa tauturu i roto e 24 hora, e ua hoˈi to tatou nau taeae i Poronia ma te hau.

Noa ˈtu ua manuïa te tere matamua, aita te tauturu i haponohia ˈtu i ravai, inaha hoi, aita i raeahia hoê tǎne taihaa tauturu. Ua titauhia hoi e 200 tane no te haamâha i te hinaaro o te mau taeae. E nafea râ teie rahiraa tauturu e nehenehe e hapono-oioi-hia ˈtu?

“E pûpû to nunaa ia ratou iho ma te aau tae”

I to te tahi mau taeae e tuahine na te ao nei taioraa i te ohipa e tupu ra i Ukraine i nia i te jw.org, ua hinaaro ratou e tauturu atu. Ua pûpû to te atea i te moni na roto i te faanahonahoraa a te mau Ite no Iehova, ua ite hoi ratou e faaohipa-maitai-hia ta ratou ô. E te mau taeae e ora ra na te mau fenua tapiri ia Ukraine, ua pûpû ïa ratou i to ratou taime, puai e faufaa no te tauturu atu. Teie te tahi mau hiˈoraa.

I Poronia, ua haaputuputu te tahi mau rima tauturu hau i te ahuru tausani afata, e ua peni te tamarii i te hohoˈa no te tuu i roto. Te na ô ra te hoê mero o te Tuhaa hooraa o te amaa no Poronia, o Bartosz Kościelniak: “Pinepine au i te taio i te Salamo 110:3 o te parau ra ‘e pûpû to [Iehova] nunaa ia ratou iho ma te aau tae.’ I to ˈu râ iteraa i te aau tae mau o na hanere rima tauturu tei ineine i te ohipa i reira iho, ua papu roa ˈtu â ia ˈu e mea mau iho â teie mau parau.”

E taiete faauta taihaa na te ao atoa nei ta te hoê Ite no Iehova. Ua horoa oia i ta ˈna mau pereoo faauta taihaa no te turu i teie ohipa e na ˈna i aufau i te mori. Te parau ra oia: “E ravea teie no ˈu no te faaite i to ˈu here i to ˈu mau taeae e ia Iehova. Ua oaoa roa vau i te horoa i te rima tauturu.” Ua hau i te 7 700 litera mori tei pûpûhia e ua faaohipa te mau taeae i to ratou taime e puai no te faahoro fatata e 48 000 kilometera no te hapono i te taihaa tauturu.

I te area 28 no Mati, e 15 noa ïa mahana i muri noa mai i te tere matamua, ua haponohia 100 tǎne maa, te raau e te taihaa no te atuatu i te tino i Ukraine maoti te aau tae e te here o to tatou mau taeae e tuahine. E ua iti roa mai te haamâuˈaraa maoti te ô a to tatou mau taeae e te tahi atu feia tauturu. Tae roa mai i teie mahana, 190 tǎne taihaa tauturu ta te mau Ite no Iehova i hapono atu i Ukraine. Mea nafea to tatou mau taeae i te faufaaraahia i taua tauturu ra?

“Te tapao o to outou here ia matou”

I te taeraa te mau taihaa i Lviv, ua opere te mau pu e tiaau i te ohipa tauturu na te fenua taatoa o Ukraine i teie mau taihaa i te feia i roohia i te ati. Ua haponohia te reira i roto e rave rahi oire, 1 300 kilometera te atea ia Lviv te tahi mau oire. Noa ˈtu ua rave-maite-hia teie ohipa, ua titauhia râ te taime.a

Te parau ra Markus Reinhardt, e mero no te Tomite amaa no Ukraine: “I roto i teie ati, ua ite e rave rahi taeae i te here o Iehova e te faufaaraa ia auraro maite i te aratairaa a ta ˈna faanahonahoraa, hou te fifi a tae mai ai. Ei hiˈoraa, o tatou pauroa tei faaitoitohia e haaputu i te maa e te pape i te fare no tau hebedoma. No nia i teie aratairaa, te parau ra te hoê matahiapo o Anton o te tavini ra i Kiev: ‘Ua faaineine noa te faanahonahoraa a Iehova ia tatou ia tupu noa mai te ati, e ua mauruuru matou i teie aratairaa. Inaha, ua ora matou, e maa hoi, e pape e e radio ta matou i te fare.’” Te na ô faahou ra taeae Markus Reinhardt: “Ua oaoa roa matou e ua haapao maite te mau taeae i teie aratairaa no te mea ua nehenehe te amaa e faaineine atea i te tauturu hinaarohia.”

Eaha te huru o te mau taeae i to ratou fanaˈoraa i teie tauturu? Te na ô ra Mykola raua Zinaida e ora ra i Kharkiv: “Ua putapû roa mâua i teie tauturu. Mauruuru roa no te maa e te mau raau. Te ite ra mâua i te rima o Iehova na roto i tera tauturu.” Te na ô ra o Valentyna e ora atoa ra i tera vahi: “I te haamataraa te tamaˈi, e tiai te taata e rave rahi hora i te fare toa no te hoo mai i te tahi maa. I te tahi taime, mea fifi ia noaa mai tei hinaarohia. Tera râ, ua ite Iehova i tera fifi. Ua aratai oia i te mau taeae faatoroahia no te tauturu i te mau utuafare tei roohia i te ati e i roto i te mau afata, ua tuuhia te mau mea ta matou i hinaaro mau. Ia tupu teie huru fifi, e au ra e aita e ravea faahou. Tera râ, ua aupuru Iehova e ta ˈna faanahonahoraa ia matou. Mea putapû mau ia ite e ua tamau Iehova i te tauturu mai, aita hoi o ˈna i faarue aˈe ia matou.”

Ua faatia Yevhen e Iryna tei faarue ia Marioupol: “Ua mauruuru roa matou e to matou utuafare i to outou tautururaa ia matou. Ua tae mai tera tauturu i te taime tano. Ua ite outou, i te omuaraa, ua manaˈo matou e taihaa anaˈe to roto i te mau afata tauturu tei haponohia mai. I to matou râ tatararaa ˈtu, ua ite matou hau atu â i te reira. Ua ite matou i te tapao o to outou here ia matou.”

Eita e ore e ua ite outou e ua faaohipa Iehova i to ˈna varua no te aratai i ta ˈna faanahonahoraa ia nehenehe to tatou mau taeae na te ao nei e fanaˈo i te tauturu ia tupu “te tamaˈi” aore ra ia faaroohia “te parau o te tamaˈi.” Ua nehenehe atoa teie mau faanahoraa e ravehia maoti ta outou mau ô horoa noa, na roto anei i te natirara i nia i te reni donate.jw.org. Ua mauruuru roa matou i ta outou mau ô horoa noa.

Hapono oioi i te tauturu

1. 

   24 no Fepuare 2022: Ua farii te Tomite tiaau e faataa i te hoê tino moni no te tauturu i to tatou mau taeae i Ukraine, ua nehenehe atura te amaa no Ukraine e hapono i te taihaa tauturu

2. 

   24 no Fepuare–8 no Mati 2022: Ua hoo mai te amaa no Ukraine i te mea hinaarohia a opere atu ai na roto i te mau pu e tiaau ra i te ohipa tauturu. Ua faaineine atoa te amaa ia farii e ia opere i te mau taihaa tauturu tei tae na Poronia mai

3. 

   9 no Mati 2022: Ua farii te Tomite tiaau ia haponohia te taihaa tauturu i Ukraine

4. 

   10-12 no Mati 2022: Ua opuahia e hapono i te maa e te taihaa mai Poronia mai i Lviv, Ukraine

5. 

   13 no Mati 2022: Ua haponohia te maa e te taihaa tauturu mai Poronia mai i Lviv, Ukraine

6. 

   14–16 no Mati 2022: I te hoê Piha tairururaa piri ia Poznan, Poronia, ua faanahohia te mau rima tauturu o te tuhaa LDC no te faaineine i te mau afata tauturu. E tuuhia i roto i taua mau afata ra te maa e te taihaa no te atuatu i te tino

7. 

   17 no Mati 2022: E maha mahana i muri mai, ua haamata te mau taeae i te hapono 13 tǎne afata taihaa tauturu i Ukraine

8. 

   21–27 no Mati 2022: A pee ai i te hoê â faanahoraa, ua haponohia te toea o te mau afata tauturu mai Poronia mai tae atu i Ukraine e ua operehia te reira i te vahi tei roohia i te ati i roto e 24 hora

9. 

   28 no Mati 2022: E 20 mahana i muri mai i te parau faatia, ua haponohia i Ukraine 100 tǎne maa, te raau e te taoˈa no te atuatu i te tino

Tae roa mai i teie mahana, 190 tǎne taihaa tauturu ta te mau Ite no Iehova i hapono atu i Ukraine.