Tomoraa Rusia i Ukraine

I te poipoi roa i te 24 no Fepuare 2022, ua haamata te nuu faehau no Rusia i te tomo i Ukraine, noa ˈtu te mau tutavaraa o te mau tia faatere no te patoi i te tamaˈi. Nafea teie tamaˈi e ohipa ˈi i nia i te ao? Tau mahana i teie nei, ua parau António Guterres, tia mana no te Hau amui: “Aita tatou e nehenehe e taa i te mauiui e te ati ta teie tamaˈi e faatupu e e nafea te reira e ohipa ˈi i nia i te ati ore o te mau tuhaa fenua no Europa e na te ao nei.”

Eaha te auraa o teie mau tupuraa ia au i te Bibilia?

• Ua tohu Iesu “e aro . . . te tahi nunaa i te tahi atu nunaa e te tahi faatereraa i te tahi atu faatereraa” i te hoê tau. (Mataio 24:7) A taio i te tumu parau “Eaha te tapao o ‘te mau mahana hopea’?” no te ite nafea te Bibilia i te faataaraa te tupu ra te parau tohu a Iesu no nia i te tamaˈi.

• Te faahiti ra te Bibilia i roto i te buka Apokalupo, i te tamaˈi mai te hoê taata faahoro puaahorofenua o te parahi ra i nia “i te tahi . . . puaahorofenua, mea uteute” e o te faaore ra “i te hau i nia i te fenua.” (Apokalupo 6:4) A taio i te tumu parau “Na te taata faahoro puaarehenua: Te auraa no tatou” no te ite nafea teie parau tohu i te ohiparaa no te mau tamaˈi i teie mahana.

• Ua tohu te buka Daniela e aro “te arii no apatoerau” e “te arii no apatoa.” (Daniela 11:25-45) A hiˈo i te video Te tupuraa o te mau parau tohu: Daniela pene 11 no te haapii no te aha o Rusia e te mau faatereraa e tahoê ia ˈna te arii no apatoerau.a

• Te faataa atoa ra te Apokalupo i “te tamaˈi o te mahana rahi o te Atua Manahope.” (Apokalupo 16:14, 16) Aita râ teie tamaˈi i te hoê tamaˈi i rotopu i te mau nunaa mai ta tatou i matau. A taio i te tumu parau “Eaha te tamaˈi o Aramagedo?” no te ite atu â no nia i teie tupuraa i mua nei.

No te aha outou e nehenehe ai e tiaturi i te a muri aˈe?

• Te parau ra te Bibilia e faaore te Atua i “te mau tamaˈi ati aˈe i te fenua.” (Salamo 46:9) A taio i te tumu parau “Te hoê tiaturiraa papu no te hoê oraraa maitai aˈe” no te ite atu â no nia i te mau parau fafau a te Atua no a muri aˈe.

• Ua haapii Iesu i ta ˈna mau pǐpǐ, ia pure ia tae mai te Faatereraa arii a te Atua. (Mataio 6:9, 10) Teie Faatereraa arii te hoê ïa faatereraa i te raˈi o te faatupu i te hinaaro o te Atua i nia i te fenua oia atoa te hau na te ao nei. No te ite nafea outou e faufaa ˈi i teie Faatereraa arii, a hiˈo i te video Eaha te Basileia o te Atua?

Te vai ra hau atu 129 000 Ite no Iehova o te ora ra i Ukraine. Mai te mau Ite no Iehova i te tahi atu tuhaa fenua, te pee ra ratou te hiˈoraa o Iesu ma te tapea i te tiaraa amui ore e ma te patoi i te haere i te tamaˈi. (Ioane 18:36) Te tamau ra te mau Ite no Iehova na te ao nei i te poro i “te parau apî oaoa o te Faatereraa arii” mai te ravea no te mau fifi o te huitaata oia atoa te tamaˈi. (Mataio 24:14) Te titau manihini nei matou ia outou ia farerei ia matou no te ite atu â no nia i te tiaturiraa ta te Bibilia e faaite mai ra.