Taime maitai no te tamaa i te pae varua e te oaoa
1. E nafea Iehova e haamâha ˈi i te mau hinaaro pae varua o ta ˈna mau tavini?
1 Te haamâha ra Iehova i te mau hinaaro pae varua o ta ˈna mau tavini ma te here. A pohe ai te rahiraa o te taata na te ao atoa i te poia pae varua, te tamaa maitai ra ïa tatou. (Isa. 65:13) O ta tatou mau tairururaa mataeinaa matahiti te hoê ravea ta Iehova e faaohipa ra no te faatamaa ia tatou i te pae varua. Te faaineine ra anei oe ia oe no te tae i te mau rururaa atoa o te tairururaa mataeinaa “Arataihia e te varua o te Atua” e haere maira? Ua faanahohia te hoê amuraa maa pae varua au roa e te maitai.
2. Eaha te titauhia ia rave tatou no te faaineine no te tairururaa?
2 A faanaho aˈena: “Te imiraa o te feia faaitoito ra, tei nia ïa i te taoˈa rahi.” (Mas. 21:5) No reira, ia papu ta oe mau faanahoraa no te haere i na mahana tairururaa e toru, eiaha e faataime i te paraparau i ta oe paoti ohipa mai te peu e e mea tia ia ani oe i te tahi mahana faaearaa ohipa. Mai te peu e e titauhia te hoê vahi taotoraa, ua ineine anei te reira? E feruri atoa oe i ta oe maa no te avatea ta oe e nehenehe e amu i te vahi tairururaa e to oe mau taeae. A rave i te mau faanahoraa ia tae oioi i te tairururaa i te mahana taitahi no te imi i te hoê parahiraa e te apiti i te himene e te pure haamataraa.
3. Teihea huru ahu e mea maitai ia oomo tatou?
3 Ia papu ia tatou e mea au e mea faaieie ore te ahu ta tatou e oomo. (Tim. 1, 2:9, 10) E ravea maitai roa te mau tairururaa mataeinaa no te horoa i te faaiteraa i te tuhaa oire. Ma te tapea i te hoê faaahuraa tura i roto i te oire tei reira te tairururaa e ma te pine i ta tatou tareta tairururaa, e taa ê ïa tatou i te feia e ere i te Kerisetiano e e vaiiho tatou i te hoê manaˈo maitai i te feia e mataitai maira.
4. Na te aha e tauturu ia tatou e i to tatou utuafare ia faufaa-roa-hia i te porotarama?
4 A faaroo maite: Mea papu e eita tatou e hinaaro e ere i te hoê noa ˈˈe huˈa rii maa horoahia i teie amuraa maa pae varua! (Mas. 22:17, 18) E tauturu te apeeraa i te taioraa o te mau irava i roto i ta tatou Bibilia e te tapaoraa i te mau manaˈo poto ia tatou ia haamau i to tatou feruriraa i nia i te porotarama e ia ape i te nevaneva. I te po, e nehenehe ïa tatou e faaohipa i ta tatou mau tapaopaoraa no te tauaparau i nia i te mau manaˈo faufaa o te porotarama e vetahi atu. I teie mau matahiti i mairi aˈenei, ua itehia i te tairururaa e e parahi amui vetahi feia apî e e tauaparau ratou i te roaraa o te porotarama aore ra e afai i te mau SMS i nia i ta ratou mau vini. Mai te peu e e tamarii ta tatou, tae noa ˈtu te mau taurearea, mea maitai aˈe ia parahi amui tatou e ia faaroo i te porotarama ei utuafare eiaha râ ia vaiiho i ta tatou mau tamarii ia parahi i te tahi atu vahi e te tahi atu feia apî.
5. E nafea tatou e faarahi ai i to tatou oaoa i te tairururaa?
5 A fanaˈo i te auhoaraa: E oaoa ˈtu â tatou ia amu tatou i te hoê maa au maitai e te mau hoa. (Mas. 15:17) Oia atoa, e rahi to tatou oaoa i te tairururaa ia amui atu tatou i to tatou mau taeae e tuahine. No reira, i rapaeau i te mau rururaa, auê i te au ia haere matamua e farerei i te tahi atu mau taeae e tuahine e ia fanaˈo i te auhoaraa! (Sal. 133:1) Ia ani mǎrû mai te peretiteni ia tatou ia parahi hou te upaupa e haamata ˈi, e mea tia ia tâpû tatou i ta tatou mau aparauraa e ia parahi no te haamataraa o te porotarama.
6. A faatia i te hoê tupuraa ta oe iho i farerei o te faaite ra e nafea tatou e nehenehe ai e poro i te taata i roto i te oire i reira te tairururaa e tupu ai.
6 A faaohipa i te mau taime maitatai atoa no te poro: E taime maitatai roa te mau tairururaa no te horoa i te faaiteraa. Ua ani te mau tuati e vetahi atu i e rave rahi taata tei tae mai i te tairururaa o tei haere i te fare tamaaraa i muri aˈe i te porotarama no nia i te manaˈo tumu faaitehia i nia i te tareta tairururaa. Ua faatupu te reira i te mau tauaparauraa e ua horoa i te hoê faaiteraa maitai roa o te parau mau. Ua titau-manihini-hia vetahi ia haere mai i te tairururaa e ua tae mai.
7. No te aha e mea tia ˈi ia tae tatou i te tairururaa mataeinaa e haere maira?
7 Ua ravehia e tausani hora no te faaineine i te porotarama, no te faanaho i te mau vahi e te mau tuhaa o te tairururaa, e no te faaineine i te mau oreroraa parau. Te faaite ra te ohipa atoa tei ravehia ma te here no te faaineine i te reira amuraa maa pae varua i to Iehova aupuru î i te here i to ˈna nunaa. Ia nehenehe tatou pauroa ia tae atu e ia tamaa maitai! Ia na reira tatou, taa ê roa i te ao, e ‘himene hua tatou i te oaoa aau ra.’—Isa. 65:14.
[Tumu parau tarenihia i te api 4]
Haamanaˈoraa no te tairururaa mataeinaa
◼ Hora: E haamata te porotarama i na mahana atoa e toru i te hora 9:20. E matara te opani i te hora 8. A taˈi ai te upaupa o te Basileia, e mea titauhia ia haere tatou paatoa e parahi ia nehenehe te porotarama e haamata ma te tura. E hope te porotarama i te hora 4:55 i te Mahana pae e te Mahana maa, e i te hora 4 i te Tapati.
◼ Vairaa pereoo: I te mau vahi tairururaa atoa i reira te vairaa pereoo e tiaihia ˈi, e nehenehe e tomo atu ma te tamoni ore e e faanahohia na mua te mau pereoo e tae matamua mai. E riro te mau tareta tairururaa ei parau faatia no te tomo atu. O te mau pereoo anaˈe e fanaˈo nei i te parau faatia a te ture no te tapea i te mau vahi faataahia no te mau huma mero te nehenehe e tapea i te vahi faataahia no ratou.
◼ Parahiraa: E tapaohia te mau parahiraa no te feia anaˈe e tere na muri ia oe aore ra e noho ra i ǒ oe.
◼ Tamaaraa i te avatea: A hopoi mai i ta oe maa eiaha râ e faarue i te vahi tairururaa i te taime faafaaearaa i te avatea no te haere e hoo mai i te maa. E nehenehe oe e faaohipa i te hoê farii faatoetoeraa maa nainai o te nehenehe e tuuhia i raro aˈe i to oe parahiraa. Eita e fariihia te mau farii faatoetoeraa maa rahi, te mau farii hiˈo e te ava i te vahi tairururaa.
◼ Ô: E nehenehe tatou e faaite i to tatou mauruuru ma te horoa i te mau ô no te ohipa na te ao nei i ta tatou Piha a te Basileia aore ra i te tairururaa. E mea tia ia papaihia i nia i te parau moni atoa o te horoahia ˈtu i te tairururaa te iˈoa i muri nei: “Association Les Témoins de Jéhovah.”
◼ Ati e rapaauraa ru: No te hoê rapaauraa ru i te vahi tairururaa, a faaite atu i te hoê taeae e haapao ra i te fariiraa o te faaara oioi i te utuuturaa matamua. I reira, na te hoê pǔpǔ tauturu rapaauraa e hiˈo e mea atâta anei te tupuraa e e rave i tei titauhia. Ia hinaarohia, e niuniu ratou i te piha rapaauraa ru.
◼ Feia eita e faaroo maitai: E haapurorohia te porotarama i nia i te ratio i te vahi tairururaa. E rave ïa te feia e hinaaro i ta ratou taoˈa nainai o te haru i te ratio e te taoˈa faaroo tamauhia i roto i te tariˈa.
◼ Pereoo turairai tamarii e parahiraa tufetu: E opanihia te mau pereoo turairai tamarii e te mau parahiraa tufetu i te vahi tairururaa. E faatiahia râ te mau parahiraa aiû o te nehenehe e tamauhia i nia i te hoê parahiraa i pihai iho i te mau metua.
◼ Faanoˈanoˈa: I te mea e e faatupuhia ta tatou mau tairururaa i te hoê vahi e tapirihia te opani, e tapao o te hamani maitai eiaha e pîpî faarahi i te monoˈi e te faanoˈanoˈa hauˈa puai o te nehenehe e haafifi i te feia e maˈi hutiraa aho to ratou aore ra te tahi atu.—Kor. 1, 10:24.
◼ Atuatu i te anaanatae: E faaohipahia te api parau Veuillez suivre l’intérêt (S-43) no te horoa i te mau haamaramaramaraa no nia i te taata atoa o tei anaanatae mau i te pororaa faanaho-ore-hia i te roaraa o te tairururaa. E manaˈo ïa te mau taata poro i te afai mai hoê aore ra e piti o taua api parau ra. E nehenehe te mau api parau i faaîhia e horoahia i te tuhaa haapao buka aore ra i te papai parau o ta oe amuiraa ia hoˈi atu oe.—A hiˈo i Ta tatou taviniraa i te Basileia no Fepuare 2005, api 6.
◼ Fare tamaaraa: A faahanahana i te iˈoa o Iehova na roto i to oe haerea maitai i te mau fare tamaaraa.
◼ Hotera: (1) Eiaha e tarahu i te mau piha hau aˈe i te hinaaro-mau-hia, e a faatura i te rahiraa taata fariihia no te hoê piha. (2) Mai te peu e e mea titauhia ia faaore i ta oe tarahuraa, a faaara oioi atu i te hotera. (3) A rave noa i te hoê turairaa taihaa ua ineine anaˈe oe i te faaohipa i te reira, e a faahoˈi oioi atu ia nehenehe te tahi atu e faaohipa i te reira. (4) Eiaha e tunu i te maa i roto i te mau piha mai te peu e eita e faatiahia. (5) E vai faito noa tatou ia rave tatou i te maa e pûpûhia na te mau hoani o te amuhia i te hotera (maa, taofe aore ra pape paari). (6) A faaite i te hotu a te varua i nia i te mau rave ohipa o te hotera i te mau taime atoa.