Pahonoraa i ta outou mau uiraa

◼ E tano anei ia rapaauhia e ia utuutuhia te hoê Ite no Iehova i te hoê fare maˈi aore ra i te hoê fare ruau faaterehia e te hoê faanahonahoraa faaroo?

Ua rau te faanahonahoraa faaroo o te faatere ra i te mau fare maˈi aore ra i te mau fare ruau o te rapaau aore ra o te utuutu i te feia e maˈi maoro to ratou. I te rahiraa o te taime, aita taua mau fare ra i haamauhia no te turu i te mau faufaa a Babulonia Rahi. (Apo. 18:2, 4) I te omuaraa, ua haamauhia paha te reira no te tavini i te hoê faanahonahoraa faaroo ei ravea imiraa moni. I teie mahana, e fare maˈi faaroo vetahi i te iˈoa noa, area te tahi atu e melo o te pǔpǔ ekalesiatiko ïa te tahi mau rave ohipa.

Mai te peu e e mea tia ia utuutuhia te hoê Ite no Iehova i te fare maˈi aore ra i te fare ruau, na ˈna iho e faaoti e haere anei i te hoê fare tei taaihia paha i te hoê faanahonahoraa faaroo. E faatia paha to ˈna manaˈo haava ia ˈna ia haere atu, area to te tahi atu, eita paha ïa. (Tim. 1, 1:5, MN) E nehenehe te tahi mau tupuraa e ohipa i nia i te faaotiraa o te hoê taata, e e mea maitai ia hiˈopoa i te reira.

Ei hiˈoraa, peneiaˈe o te fare maˈi aore ra o te fare ruau anaˈe e iˈoa faaroo to ˈna te mea fatata. Aore ra mai te peu e te vai ra te tahi atu fare maˈi fatata, tei taaihia paha i te haapaoraa, ua matauhia paha ïa no ta ˈna utuuturaa maitai roa. O taua anaˈe paha fare maˈi ra e iˈoa faaroo to ˈna te fanaˈo ra i te tauihaa taa ê no te horoa i te hoê ravea rapaauraa taa ê hinaarohia, aore ra i reira noa to oe taote aore ra taote tâpû e faatiahia ˈi ia ohipa. I te tahi taime, e faatura atoa paha te mau fare maˈi e taairaa pae faaroo to ratou i to oe manaˈo ei Kerisetiano no nia i te faaohiparaa i te toto, area râ vetahi atu mau fare maˈi e ere na te Hau aore ra ta te Hau, eita paha ïa. Tera ïa te tahi mau tuhaa e mea tia paha ia haapao oe a maiti ai oe i te fare maˈi.

Ia faaoti oe i te haere i te hoê fare maˈi aore ra i te hoê fare ruau e taairaa pae faaroo to ˈna, e nehenehe ta oe e hiˈo i te reira mai te hoê noa aufauraa no te mau ohipa i ravehia. E hiˈo paha oe i te reira mai te huru ra e te faatere ra te faanahonahoraa faaroo i te tahi taiete, e na roto i te aufauraa i te hoê ohipa i ravehia e taua taiete ra, aita ïa oe e horoa tia ˈtu ra e ma te opua i te moni no te turu i te haapaoraa hape. Te aufau noa ra oe i te hoê taoˈa aore ra te hoê ohipa.

Papu maitai, ei Kerisetiano, i roto i taua mau huru tupuraa ra e mea tia ia papu ia oe e aita oe e apiti ra i te tahi ohipa a te haamoriraa hape. Eiaha atoa oe e faaohipa i te mau tiaraa iˈoa faaroo mai “te Metua” aore ra “Paretenia,” no te feia e ohipa ra i reira aore ra e haere maira e hiˈo i te feia maˈi. (Mat. 23:9) E mea tia ia hiˈo oe i te reira mai te hoê noa ohipa tapihooraa i reira oe e fanaˈo ai i te hoê rapaauraa aore ra ohiparaa, e aita ˈtu.

Ia ô oe i te fare maˈi, e nehenehe oe e faaite e e Ite no Iehova oe e te hinaaro nei oe e fanaˈo i te farereiraa a te mau matahiapo o te amuiraa. Mea papu ïa e e fanaˈo oe i te turu pae varua e tano a faaea ˈi oe i reira.—Tes. 1, 5:14.

E mea tia ia haapao maite te mau melo Kerisetiano o te utuafare, te mau matahiapo e te mau melo o te amuiraa, i te mau hinaaro pae varua o te mau taeae e tuahine ruhiruhia atoa o te ora ra i roto i te fare ruau, tei faaterehia iho â râ e te hoê faanahonahoraa faaroo. E faaitoito rahi te haapao-maite-raa i roto i te reira tuhaa i taua mau taata paari ra e e paruru ia ratou ia ore ratou ia faaô-hape-hia i roto i te mau ohipa faaroo, te mau oroa, aore ra te tahi atu mau ohipa mai tera te huru e ravehia i tera mau fare.

Ma te haamanaˈo i tera mau manaˈo, na te taata taitahi e hiˈopoa i te mau huru tupuraa atoa i taaihia e e rave i ta ˈna iho faaotiraa e haere i teihea fare maˈi aore ra fare ruau.—Gal. 6:5.