E taime haamoriraa oaoa te tairururaa mataeinaa
1. Mea nafea te mau oroa a to Iseraela i tu ai i ta tatou mau tairururaa mataeinaa?
1 I haere tamau na Iosepha, Maria, ta raua mau tamarii e te tahi atu feia haamori ia Iehova i Ierusalema no te mau oroa tamatahiti. E vaiiho ïa ratou e to ratou mau hoa haamori i to ratou fifi i muri no te haapao i te tuhaa pae varua faufaa roa ˈˈe. E feruriruri e e paraparau ratou no nia i te maitai o Iehova e e hiˈopoa ratou i ta ˈna Ture. E taime maitai atoa ïa ta tatou tairururaa mataeinaa i mua nei no te haamori ia Iehova ma te oaoa.
2. Ia aha tatou no te faaineine no te tairururaa mataeinaa i mua nei?
2 Te faaineineraa: No te haere i Ierusalema e no te hoˈi mai i Nazareta, e na raro te utuafare o Iesu fatata e 200 kilometera. Aita tatou i ite ehia rahiraa taeae e tuahine to Iesu, e nehenehe râ tatou e feruri i te mau faanahoraa e tutavaraa a Iosepha raua Maria. Ua faanaho anei outou e tae atu i na mahana e toru atoa o te tairururaa mataeinaa i mua nei? E mea tia paha ia rave i te tahi mahana faaearaa aore ra ia faaara i ta outou paoti ohipa aore ra i te orometua haapii e aita outou i tera mahana. Ua tarahu anei outou i te piha hotera? E nehenehe anei outou e tauturu i te tahi melo o te amuiraa e hinaaro taa ê to ˈna ia tae atu i te tairururaa?—Ioa. 1, 3:17, 18.
3. E haamaitairaa te mau oroa ati Iuda no te fanaˈo i te amuimuiraa maitai, mea nafea hoi?
3 Te amuimuiraa maitai: E haamaitairaa mau â ia fanaˈo i te amuimuiraa maitai o te tahi atu mau hoa haamori i te mau oroa ati Iuda! Ua tiai ru iho â paha to Iesu utuafare i te amuimui-faahou-raa ˈtu i to ratou mau hoa rahi. Ua hoa atoa ˈtu paha ratou e te ati Iuda e te peroseluto e rave rahi tei tae mai aore ra o te haere ra i Ierusalema e o te hoˈi mai ra.
4. E nafea ia faaite e te haafaufaa ra tatou i to tatou auhoêraa e to tatou mau taeae Kerisetiano?
4 Ua faanaho te tavini haapao maitai e te paari ia tae paatoa ˈtu tatou no te faaroo i te mau oreroraa parau i te mau tairururaa mataeinaa, aita noa oia i pia i tera mau haamaramaramaraa. No te aha? Ia faaitoito tatou te tahi e te tahi. (Heb. 10:24, 25) A faanaho ïa no te tae oioi atu i te tairururaa i te mahana taitahi no te fanaˈo i te auhoaraa hou te peretiteni e omua ˈi i te upaupa, ei tapao no te haere e parahi. Te faaitoitohia ra tatou eiaha ia faarue i te vahi tairururaa no te haere e hoo mai i te maa. Ia afai mai râ tatou i te tahi farii maa e ia faaea noa i reira no te paraparau e vetahi atu. E ô no ǒ mai ia Iehova ra to tatou auhoêraa e to tatou mau taeae Kerisetiano. Eiaha roa ˈtu ïa tatou e haafaufaa ore i te reira!—Mika 2:12.
5. Eaha te tauturu mai ia haafaufaa roa i te porotarama?
5 Taime no te haapii: Mai to ˈna tamariiriiraa ra, ua haafaufaa Iesu i te mau oroa no te haapii no nia i to ˈna Metua i te raˈi. (Luka 2:41-49) Eaha te tauturu ia tatou e i to tatou utuafare ia haafaufaa roa i te mau tuhaa atoa e vauvauhia? I te roaraa o te mau porotarama, a parahi noa e eiaha e paraparau faufaa ore noa. Eiaha atoa ta outou niuniu paraparau afaifai, aore ra te tahi atu taihaa e haapeapea ia outou e ia vetahi ê. A hiˈo i te taeae orero e a tapaopao. A parahi ei utuafare ia papu ia outou e te faaroo ra ta outou mau tamarii. Ia hoˈi atu i te fare, a tauaparau i te mau manaˈo faufaa ta outou i apo mai.
6. Eaha ta tatou e haamanaˈo no nia i to tatou faaneheneheraa?
6 Faaneheneheraa: E mea ohie no te feia tapihoo ěê ia ite i to Iesu utuafare e vetahi atu hoa haamori ati Iuda o te haere ra i te oroa e o te hoˈi mai ra no te faaunaunaraa i nia i to ratou ahu e te taamu ereere tapemoana i nia iho. (Num. 15:37-41) Eita te mau Kerisetiano e oomo i te hoê ahu taa ê, ua matauhia râ tatou no to tatou faaahuraa faaieie ore, mâ e te au maitai. Ia haapao maitai tatou i to tatou huru rapaeau a haere ai i te tairururaa e a hoˈi mai ai, e i te oire atoa e tupu ai te tairururaa. Noa ˈtu e e taui tatou i te ahu i muri iho i te porotarama, ia tura noa to tatou huru rapaeau e ia pine noa i ta tatou tareta tairururaa. E taa ê ïa tatou i te taata e ere i te Ite e e horoa tatou i te hiˈoraa maitai ia vetahi atu.
7. No te aha e mea maitai ai ia feruri tatou i te riro ei rima tauturu i te tairururaa?
7 E hinaarohia te rima tauturu: No te tere-maite-raa o te tairururaa, e hinaarohia te rima tauturu e rave rahi. E nehenehe atoa anei oe? (Sal. 110:3) E taviniraa moˈa te ohipa e ravehia i te mau tairururaa e e faaiteraa maitai atoa te reira. Ua maere roa te taata e haapao ra i te vahi i tupu ai te hoê tairururaa i te mau rima tauturu tei tamâ i tera vahi, ua papai oia: “Te hinaaro ra vau e haamauruuru ia outou no te ohipa faahiahia roa ˈˈe ta ˈu i ite aˈenei. I faaroo noa na vau e mea taa ê te mau Ite no Iehova. Ua matauhia ratou e ta matou taiete no te vaiiho i te hoê vahi mâ aˈe i ta ratou i ite. Ua faariro outou e ta outou faanahonahoraa i teie vahi ei vahi maitai aˈe no te huiraatira e te reira maoti te pǔpǔ taata haerea maitai roa ˈˈe ta matou i ore aˈenei i farerei.”
8. Eaha te mau taime maitatai no te poro i te oire e tupu ai te tairururaa?
8 Taime maitatai no te poro: I te oire e tupu ai te tairururaa, e rave rahi te tapao i te faaahuraa maitai e te mâ o te taata e tareta tairururaa to nia i te ahu. E uiui paha te taata eaha te reira, e nehenehe ïa tatou e horoa i te faaiteraa no nia i te tairururaa. I muri aˈe i te porotarama, ua afai te hoê tamarii e maha matahiti i te buka tei matara apî mai i te hoê fare tamaaraa e ua faaite atura i te tuati vahine. Ua nehenehe te mau metua o te tamaroa e titau manihini i tera vahine i te tairururaa.
9. Ua haafaufaa to Iesu utuafare i te mau faanahoraa pae varua ta Iehova i rave, e nafea tatou e pee ai ia ratou?
9 Ua riro te mau oroa i tahito ra ei taime oaoa ta te mau ati Iuda i tiai ru na. (Deut. 16:15) Ua oaoa to Iesu utuafare i te rave i te tahi mau haapaeraa no te tae atu ia faufaa-roa-hia ratou. E haafaufaa atoa tatou i ta tatou mau tairururaa mataeinaa ia hiˈo tatou i te reira mai te hoê ô no ǒ mai i to tatou Metua here i te raˈi. (Iak. 1:17) Teie te taime no te faaineine no teie oroa tamatahiti no te haamori ia Iehova ma te oaoa!
[Tumu parau tarenihia i te api 6, 7]
Haamanaˈoraa no te tairururaa mataeinaa
◼ Hora: E haamata te porotarama i na mahana atoa e toru i te hora 9:20. E matara te opani i te hora 8. A taˈi ai te upaupa, e mea titauhia ia haere tatou paatoa e parahi ia nehenehe te porotarama e haamata ma te tura. E hope te porotarama i te hora 4:55 i te Mahana pae e te Mahana maa e i te hora 3:40 i te Tapati.
◼ Vairaa pereoo: I te mau vahi tairururaa atoa i reira te pereoo e tiaihia ˈi, e nehenehe e tomo atu ma te tamoni ore e e faanahohia na mua te mau pereoo e tae matamua mai. O te mau pereoo anaˈe e fanaˈo nei i te parau faatia a te ture no te tapea i te mau vahi faataahia no te mau huma mero te nehenehe e tapea i reira. I te mea e mea taotiahia te vairaa pereoo, e mea maitai ia na nia mai i te pereoo mataeinaa aore ra ia rave hoê noa pereoo.
◼ Parahiraa: E tapaohia te mau parahiraa no te feia anaˈe e tere na muri ia oe aore ra e noho ra i ǒ oe, e te feia atoa ta oe e faatere tamau nei i te haapiiraa Bibilia.—Kor. 1, 13:5.
◼ Tamaaraa i te avatea: A hopoi mai i ta oe maa. Eiaha e faarue i te vahi tairururaa i te taime faafaaearaa i te avatea no te haere e hoo mai i te maa. E nehenehe oe e faaohipa i te hoê farii faatoetoeraa maa nainai a tuu atu ai i te reira i raro aˈe i to oe parahiraa. Eita e fariihia te mau farii faatoetoeraa maa rahi e te mau farii hiˈo i te vahi tairururaa.
◼ Ô: E nehenehe tatou e faaite i to tatou mauruuru no te mau faanahoraa no te tairururaa ma te horoa noa i te mau ô no te ohipa na te ao nei i ta tatou Piha a te Basileia aore ra i te tairururaa. E mea tia ia papaihia i nia i te parau moni atoa o te horoahia ˈtu i te tairururaa te iˈoa: “Association Les Témoins de Jéhovah.”
◼ Ati e rapaauraa ru: Eita te pu rapaauraa ru e taniuniuhia no te mau fifi iti haihai. No te hoê rapaauraa ru i te vahi tairururaa, a faaite atu i te hoê taeae e haapao ra i te fariiraa e na ˈna e faaara oioi atu i te piha utuuturaa matamua. I reira, na te hoê pǔpǔ tauturu rapaauraa e hiˈo e mea atâta anei te tupuraa e e rave i tei titauhia. Ia hinaarohia, e niuniu ratou i te 18.
◼ Tiaa: I te mau matahiti atoa mea rahi roa te pepe nei no te mau tiaa. E mea au aˈe ia oomo mai i te mau tiaa au maitai e te tano no te haere i nia i te mau taahiraa, te mau niuniu e te vai ra ˈtu â.
◼ Feia eita e faaroo maitai: E haapurorohia te porotarama i nia i te ratio i te vahi tairururaa. E rave ïa te feia e hinaaro i ta ratou taoˈa nainai o te haru i te ratio e te taoˈa faaroo tamauhia i roto i te tariˈa.
◼ Haruharuraa: Eiaha e patia i te mau mauhaa faaharuharuraa i nia i te mau faahaereraa uira aore ra i nia i te faanahoraa o te haapurororaa, e eiaha roa ˈtu to ratou faaohiparaa ia haapeapea ia vetahi ê.
◼ Pereoo turairai tamarii e parahiraa tufetu: E opanihia te mau pereoo turairai tamarii e te mau parahiraa tufetu i te vahi tairururaa. E faatiahia râ te mau parahiraa aiû o te nehenehe e tamauhia i nia i te hoê parahiraa i pihai iho i te mau metua.
◼ Faanoˈanoˈa: I te mea e e faatupuhia ta tatou mau tairururaa i te hoê vahi e tapirihia te opani, e tapao o te hamani maitai eiaha e pîpî faarahi i te monoˈi e te faanoˈanoˈa hauˈa puai o te nehenehe e haafifi i te feia e maˈi hutiraa aho to ratou aore ra te tahi atu.—Kor. 1, 10:24.
◼ Atuatu i te anaanatae: E faaohipahia te api parau Veuillez suivre l’intérêt (S-43) no te horoa i te mau haamaramaramaraa no nia i te taata atoa tei anaanatae i te pororaa faanaho-ore-hia i te roaraa o te tairururaa. E manaˈo ïa te mau taata poro i te afai mai hoê aore ra e piti o taua api parau ra. E nehenehe te mau api parau i faaîhia e horoahia i te tuhaa haapao buka aore ra i te papai parau o ta oe amuiraa ia hoˈi atu oe.—A hiˈo i Ta tatou taviniraa i te Basileia no Novema 2009, api 4.
◼ Fare tamaaraa: A faahanahana i te iˈoa o Iehova na roto i to oe haerea maitai i te mau fare tamaaraa. I vetahi mau fenua, ua matauhia i te vaiiho i te tahi moni haamauruuru na te tuati.
◼ Hotera: (1) Eiaha e tarahu i te mau piha hau aˈe i te hinaaro-mau-hia, e a faatura i te rahiraa taata fariihia no te hoê piha. (2) Mai te peu e e mea titauhia ia faaore i ta oe tarahuraa, a faaara oioi atu i te hotera. (3) A rave noa i te hoê turairaa taihaa ua ineine anaˈe oe, e a faahoˈi oioi atu ia nehenehe te tahi atu e faaohipa i te reira. (4) Eiaha e tunu i te maa i roto i te mau piha mai te peu e eita e faatiahia. (5) I vetahi mau fenua, e mea tano ia vaiiho i te tahi moni haamauruuru na te vahine tamâ piha. (6) E vai faito noa tatou ia rave tatou i te maa e pûpûhia na te mau hoani o te hotera (maa, taofe aore ra pape paari). (7) A faaite i te hotu a te varua i nia i te mau rave ohipa o te hotera i te mau taime atoa. Te haapao ra ratou e rave rahi hoani e e oaoa ratou ia faaite tatou i te mǎrû, te faaoromai, e te haerea e au. (8) Ia fifi oe no to oe piha, a ani i te tauturu i te tuhaa haapao i te nohoraa i te tairururaa.
◼ Rima tauturu: E oaoa rahi atoa tatou i te taeraa ˈtu i te tairururaa ia tauturu tatou no te rave i te ohipa e hinaarohia. (Ohi. 20:35) Ia hinaaro noa ˈtu te tahi, a tapao ïa i te iˈoa i te mau taeae e haapao ra i tera tuhaa i te tairururaa. E nehenehe atoa te mau tamarii i raro aˈe i te 16 matahiti e tauturu ma te haa e to ˈna metua aore ra te taata e haapao ra ia ˈna aore ra te tahi atu taata paari ta raua i faatia.