A tiai maite ia Iehova
1. Eaha te manaˈo tumu o te tairururaa mataeinaa i mua nei, e no te aha mea tano ai te reira?
1 Ua papai Isaia e: ‘E Atua parau au [aore ra no te haavaraa] Iehova: e ao to te feia atoa i tiai maite ia ˈna ra.’ (Isa. 30:18b) Mea rahi te aamu bibilia o te faatia ra i te haavaraa a te Atua i to ˈna mau enemi e to ˈna faaoraraa i ta ˈna mau tavini haapao maitai. Eaha ta tera mau aamu e haapii ra i te feia haamori o Iehova i teie mahana? E nafea tatou i teie nei ia ineine tatou no te “mahana rahi riaria o Iehova”? (Ioe. 2:31, 32) E turai te tairururaa mataeinaa “Faaoraraa fatata!” ia tatou ia feruriruri i tera na uiraa e ia hiˈopoa ia tatou iho. E tauturu te reira ia tatou ia tiai maite ia Iehova.
2. E nafea tatou e faaite ai i te mauruuru no ta tatou tairururaa mataeinaa?
2 Ua rave anei oe i te mau faanahoraa ia faufaahia oe i na mahana e toru atoa o te tairururaa? Ei hiˈoraa, ua ani anei oe i to oe paoti ohipa i te tahi mahana faaearaa ohipa no te haere mai? Eiaha e vaiiho i te mau mea mai tera. A pure no te reira. E a ani atu. (Neh. 2:4, 5) Oia atoa, eiaha tatou e faanaho i te taime hopea i te faurao, te nohoraa, e te tahi atu mau mea e titauhia. E faaite tera faanaho-maite-raa i to tatou mauruuru hohonu no te amuraa maa pae varua a Iehova. E mea tia ia ara te mau matahiapo e e tauturuhia te feia e hinaaro i te turu i roto i ta ratou faaineineraa, te feia ruhiruhia iho â râ o te amuiraa.—Gal. 6:10.
3. Eaha te mau huru maitatai e mea tia ia itehia i rotopu i te nunaa o Iehova i roto i te oire e tupu ai te tairururaa?
3 E faahanahana te haerea maitai i te Atua: Ia amui rahi tatou i te mau tairururaa, e riro to tatou haerea maitai roa ei faaiteraa no te feia e hiˈopoa ia tatou. Eaha ta te reira e titau maira? Ia farerei tatou i te taata i roto i te mau hotera, fare tamaaraa, e te tahi atu mau tuhaa fenua tapihoo tapiri mai i te vahi tairururaa, e mea tia ia maere mau ratou i to tatou mau huru maitatai Kerisetiano, mai te faaoromai, te mamahu, te hitahita ore, e te mǎrû. (Gal. 5:22, 23; Phil. 4:5) E mea tia ia faaite tatou paatoa i te here o ‘te ore e rave i te mea au ore, o te ore e imi i te maitai no ˈna iho, o te ore e riri vave.’ Noa ˈtu e e tupu mai te mau fifi aore ra haafifiraa, e hinaaro tatou ‘e rave i te mau mea atoa ma te haamaitai i te Atua.’—Kor. 1, 10:31; 13:5.
4. E nafea te mau metua e nehenehe ai e tauturu i ta ratou mau tamarii ia faahanahana ia Iehova na roto i to ratou haerea?
4 I muri aˈe i te hoê tairururaa, ua maere roa te hoê taata faatere hotera i te haerea e te faanehenehe o to tatou feia apî i faaite ai oia i to ˈna hinaaro “ia riro noa te mau Ite no Iehova ei hoani i roto i ta ˈna hotera.” Auê ïa tumu no te oaoa e! Te faaite ra te reira i te haamataroraa e te aratairaa a te mau metua. E ere i te haerea paari no te mau metua ia vaiiho noa i ta ratou mau tamarii i roto i te hoê piha hotera ma te ore e haapao. E mea tia ia haapao-maitai-noa-hia te mau tamarii. (Mas. 29:15) Ia faahanahana to ratou haerea maitai ia Iehova e ia faaoaoa i to ˈna aau!—Mas. 27:11.
5. E nafea tatou e faahanahana ˈi ia Iehova na roto i to tatou ahu e faanehenehe rouru?
5 Te ahu e te faanehenehe rouru e au: E paturu tatou taitahi i te hiˈoraa o te taatoaraa e horoahia ra i te tairururaa ma te ape i te mau faito ahu aore ra faanehenehe rouru huru ê roa, te au ore, te tia ore, aore ra te haapaoraa ore roa. E au te reira ia haere tatou i te vahi tairururaa aore ra ia hoˈi mai tatou, ia apiti tatou i te mau faaineineraa e i te mau rururaa. Ei tavini a Iehova, ta tatou tapitapi matamua, o te iˈoa ïa o te Atua e to ˈna roo, eiaha râ ta tatou iho e au aˈe aore ra to tatou maitai. Ta te mau upoo utuafare hopoia, o te papuraa ïa e te faaite ra te hiˈoraa rapaeau o te utuafare i te faaieie ore e te haapao maitai i te mau taime atoa.—Tim. 1, 2:9.
6. No te aha e mea tia ˈi ia tapea noa tatou i te hoê â hiˈoraa rapaeau tura i te taime faafaaearaa e i te tairururaa atoa?
6 E mea faufaa atoa ia tapea noa i te hoê hiˈoraa rapaeau tura i te taime faafaaearaa i roto i te mau hotera, fare toa, e fare tamaaraa. E tano atoa ia oomo noa tatou i to tatou ahu tairururaa mai te peu e e tamaa tatou i te tahi atu vahi i muri aˈe i te mau rururaa. Ma te pine i ta tatou tareta tairururaa, e faatupu te reira i te mau ravea e poro ai tatou ma te faanaho-ore-hia.—Kor. 2, 6:3, 4.
7. E nafea tatou e paturu ai i te naho maitai e te oaoa i te tairururaa? (A hiˈo i te “Haamanaˈoraa no te tairururaa mataeinaa.”)
7 Ua faaite atea Isaia e: “E tiai . . . Iehova ia faaite atu ia outou i to ˈna aroha; e ia faateiteihia oia ia faahereherehia outou.” (Isa. 30:18a) Ia turai te mauruuru no to Iehova aroha e maitai rahi ia tatou ia faahanahana ia ˈna na roto i to tatou haerea e faanehenehe a putuputu ai tatou i ta tatou mau tairururaa e tia ˈi. Ia faahanahana te tairururaa mataeinaa “Faaoraraa fatata!” i to tatou Atua e ia tauturu ia tatou ia tiai maite ia ˈna!
[Tumu parau tarenihia i te api 5]
Haamanaˈoraa no te tairururaa mataeinaa
◼ Hora: E haamata te porotarama i na mahana taitahi i te hora 9:30. E matara te opani i te hora 8. Tau minuti na mua ˈˈe e haamata ˈi te rururaa, e haere te peretiteni e parahi i nia i te tahua a taˈi ai te upaupa o te Basileia. E mea titauhia ia haere tatou paatoa e parahi ia nehenehe te porotarama e haamata ma te tura. E hope te porotarama i te hora 5:15 i te Mahana pae, i te hora 5:05 i te Mahana maa, e i te hora 4:10 i te Tapati.
◼ Vairaa pereoo: I te mau vahi tairururaa atoa i reira te vairaa pereoo e tiaihia ˈi, e nehenehe e tomo atu ma te tamoni ore e e faanahohia na mua te mau pereoo e tae matamua mai. E riro te mau tareta tairururaa ei parau faatia no te tomo atu. O te mau pereoo anaˈe e fanaˈo nei i te parau faatia a te ture no te tapea i te mau vahi faataahia no te mau huma mero te nehenehe e tapea i te vahi faataahia no ratou. I te mea e e mea pinepine e taotiahia te rahiraa pereoo i te vairaa pereoo, te faaitoito atu nei matou mai te peu e e nehenehe eiaha e haere mai i te tairururaa hoê aore ra piti taata hoê pereoo.
◼ Parahiraa: E tapaohia te mau parahiraa no te feia anaˈe e tere na muri ia oe aore ra e noho ra i ǒ oe.
◼ Tamaaraa i te avatea: A hopoi mai i ta oe maa eiaha râ e faarue i te vahi tairururaa i te taime faafaaearaa i te avatea no te haere e hoo mai i te maa. E nehenehe e faaohipahia te hoê farii faatoetoeraa maa nainai o te nehenehe e tuuhia i raro aˈe i te parahiraa. Eita e fariihia te mau farii faatoetoeraa maa rahi, te mau farii hiˈo e te ava i te vahi tairururaa.
◼ Ô: Te vai ra te mau haamâuˈaraa rahi ia faanahohia te hoê tairururaa mataeinaa. E nehenehe tatou e faaite i to tatou mauruuru ma te horoa i te mau ô no te ohipa na te ao nei i ta tatou Piha a te Basileia aore ra i te tairururaa. E mea tia ia papaihia i nia i te parau moni atoa o te horoahia ˈtu i te tairururaa te iˈoa i muri nei: “Association Les Témoins de Jéhovah.”
◼ Ati e rapaauraa ru: No te hoê rapaauraa ru i te vahi tairururaa, a faaite atu i te hoê taeae e haapao ra i te fariiraa o te faaara oioi i te utuuturaa matamua. I reira, na te hoê pǔpǔ tauturu rapaauraa e hiˈo e mea atâta anei te tupuraa e e rave i tei titauhia. Ia hinaarohia, e niuniu o ˈna i te piha rapaauraa ru.
◼ Feia eita e faaroo maitai: E horoahia ˈtu te mau haamaramaramaraa no te reira i te haamataraa iho â o te rururaa matamua. Te haamanaˈohia ˈtu nei râ e e hurihia te porotarama na roto i te reo aparaa rima Farani i te tairururaa e tupu i te 14 e tae atu i te 16 no Tiurai 2006.
◼ Haruharuraa: Eiaha ia patiahia te mau mauhaa faaharuharuraa rau atoa i nia i te mau faahaereraa uira aore ra i nia i te faanahoraa o te haapurororaa, e eiaha roa ˈtu to ratou faaohiparaa ia haapeapea ia vetahi ê.
◼ Pataraa hohoˈa: Ia pata oe i te hohoˈa i te roaraa o te rururaa, eiaha e faaohipa i te mori pura.
◼ Pageur e vini: Ia faatanohia te reira ia ore te feia i tae mai ia fifihia e tia ˈi.
◼ Faanoˈanoˈa: I te mea e e faatupuhia ta tatou mau tairururaa i te hoê vahi e tapirihia te opani, e tapao o te hamani maitai eiaha e pîpî faarahi i te monoˈi e te faanoˈanoˈa hauˈa puai ia ore ia fifihia te mau taata i roohia i te maˈi i te pae o te hutiraa aho aore ra te tahi atu.—Kor. 1, 10:24.
◼ Atuatu i te anaanatae: E faaohipahia te api parau Veuillez suivre l’intérêt (S-43) no te horoa i te mau haamaramarama no nia i te taata atoa o tei anaanatae mau i te pororaa faanaho-ore-hia i te roaraa o te tairururaa. E manaˈo ïa te mau taata poro i te afai mai hoê aore ra e piti o taua api parau ra. Te vai atoa ra i te vahi tairururaa, i te tuhaa haapao buka. E nehenehe te mau api parau i faaîhia e horoahia i taua tuhaa ra aore ra i te papai parau o ta oe amuiraa ia hoˈi atu oe.—A hiˈo i Ta tatou taviniraa i te Basileia no Fepuare 2005, api 6.
◼ Hotera: (1) Eiaha e tarahu i te mau piha hau aˈe i te hinaaro-mau-hia, e a faatura i te rahiraa taata fariihia no te hoê piha. (2) Mai te peu e e mea titauhia ia faaore i ta oe tarahuraa, a faaara oioi atu i te hotera. (3) A rave noa i te hoê paepae turairaa taihaa ua ineine anaˈe oe i te faaohipa i te reira. (4) Eiaha e tunu i te maa i roto i te mau piha mai te peu e eita e faatiahia. (5) Ei Kerisetiano, e vai faito noa tatou ia rave tatou i te maa e pûpûhia na te mau hoani o te amuhia i te hotera (taime taoferaa, taofe aore ra pape paari). (6) A faaite i te hotu a te varua i nia te mau rave ohipa o te hotera, i te taime iho â râ o te tapaoraa i te taeraa mai e te revaraa, e pinepine e mea huehue.