“Faaamuhia i te parau i faaroohia nei”
1 E titau te tapiraa i te hoê oraraa paieti i te tutavaraa itoito mau. (Tim. 1, 4:7-10) Na roto i to tatou iho puai, e pohe oioi tatou i te rohirohi e e hiˈa ˈtu i te tamataraa i te pee i tera huru oraraa. (Isa. 40:29-31) Hoê ravea e noaa ˈi ia tatou te puai no ǒ mai ia Iehova ra, o te ‘amuraa ïa i te parau i faaroohia nei.’—Tim. 1, 4:6.
2 Maa maitai i te pae varua: Na roto i ta ˈna Parau e na roto i “te tavini haapao maitai e te paari,” te horoa ra Iehova i te maa maitai i te pae varua. (Mat. 24:45) Te rave ra anei tatou i ta tatou tuhaa ia fanaˈo tatou i te reira? Te taio ra anei tatou i te Bibilia i te mau mahana atoa? Te faaherehere ra anei tatou i te taime no te haapiiraa ia tatou iho e no te feruriruriraa? (Sal. 1:2, 3) E haapuai e e paruru te amuraa i te maa maitai i te pae varua ia tatou i te mana ino o te ao a Satani. (Ioa. 1, 5:19) Mai te peu e e faaî tatou i to tatou feruriraa i te mau mea maitai e faaohipa ˈtu ai i roto i to tatou oraraa, ei pihai iho ïa Iehova ia tatou.—Phil. 4:8, 9.
3 E haapuai atoa Iehova ia tatou na roto i te mau putuputuraa a te amuiraa. (Heb. 10:24, 25) E faaitoito te haapiiraa pae varua e te amuimuiraa maitai e itehia i taua mau putuputuraa ra ia tatou ia tapea maite i mua i te mau tamataraa. (Pet. 1, 5:9, 10) Ua parau te hoê potii Kerisetiano e: “E haere au i te haapiiraa i te mahana taatoa e e rohirohi roa vau. Area te mau putuputuraa râ, e au ïa i te hoê vahi haumǎrû i roto i te medebara, e itoito-faahou-hia vau no te faaruru atu i te hoê mahana haapiiraa apî.” Auê ïa haamaitairaa ta tatou e fanaˈo no to tatou tutavaraa i te tae atu i te mau putuputuraa!
4 E poro anaˈe i te parau mau: E au te pororaa ia vetahi ê i te maa na Iesu. Ua faaitoito te reira ia ˈna. (Ioa. 4:32-34) Oia atoa, ia aparau tatou ia vetahi ê no nia i te mau parau fafau faahiahia mau a te Atua, e itoito-faahou-hia tatou. E tapea atoa te ohipa-rahi-raa tatou i roto i te taviniraa i to tatou mafatu e feruriraa i nia i te Basileia e i nia i te mau haamaitairaa e fatata maira. E faaitoito mau te reira ia tatou.—Mat. 11:28-30.
5 Auê ïa haamaitairaa taa ê faahiahia ta tatou i te fanaˈoraa i te maa maitai i te pae varua ta Iehova e horoa ra i to ˈna nunaa i teie mahana! Ia tamau â tatou i te himene hua i te arueraa ia ˈna!—Isa. 65:13, 14.