“Ia ineine roa no te mau ohipa maitatai atoa ra”
1 Te fanaˈo nei te nunaa o Iehova i teie mahana i te maa pae varua faahiahia e te ore e pau. (Isa. 25:6) E rave rahi tumu parau Bibilia ta tatou e tuatapapa i roto i te haapiiraa tataitahi aore ra utuafare, i te mau putuputuraa a te amuiraa e i te mau tairururaa. Te haafaufaa mau ra anei râ tatou i te reira ma te tapao e riro mai ei taata ‘[aravihi] roa, [ineine roa no] te mau ohipa maitatai atoa ra’?—Tim. 2, 3:17; MN.
2 E feruri anaˈe na maa taime i nia i te maa pae varua o te matahiti 1998, o tei tae aˈena i te afaraa! I te mau putuputuraa i te mau hebedoma atoa a te amuiraa, te ite mǎrû noa nei tatou i te mau vahi faufaa o na buka e 23 a te mau Papai Heleni Kerisetiano. Te faufaa-atoa-hia nei tatou i te hoê tabula tumu parau i roto i te vea iti ra Tumu parau Tauaparauraa Bibilia, i te mau tumu parau faaitoito o Te Pare Tiairaa o te matahiti 1996 e tae noa ˈtu i te hoê haapiiraa hohonu o te buka ra “Toute Écriture est inspirée de Dieu et utile.” Te haapii atoa nei tatou hoê tuhaa i nia i te toru o te buka ra Te ite, fatata te taatoaraa o te buka ra Te oaoa i te utuafare, e tae noa ˈtu te buka ra Parau na te Atua i roto i to ˈna taatoaraa. Hau atu, te faaamuhia nei tatou e te mau 12 neneiraa o Te taviniraa o te Basileia, 52 tumu parau o Te Pare Tiairaa e fatata hoê â faito o te mau oreroraa parau huiraatira o te vauvau nei i te mau tumu parau Bibilia huru rau. E amuihia mai i te taatoaraa o teie mau ohipa te porotarama o te mau tairururaa. Auê ïa tatou i te fanaˈo i te mau faufaa i te pae varua!
3 E faaite anaˈe i to tatou mauruuru no te mau faanahoraa o ta Iehova e rave ra: Ia faufaa-maitai-hia tatou, e tia ia tatou ia ite no te aha Iehova e horoa rahi mai ai i te maa. Ma te faatamaaraa ia tatou i teie mau mea maitatai, te patu ra ïa tatou i to tatou faaroo e te haapuai ra ïa tatou i to tatou mau taairaa e o ˈna. (Tim. 1, 4:6) Teie râ, aita te maa pae varua i faanahohia no tatou ia haapii-noa-hia tatou. Te turai ra te reira ia tatou ia faaite i te parau mau ia vetahi ê e ia ineine tatou no te riro mai ei mau tavini aravihi o te parau apî maitai.—Tim. 2, 4:5.
4 Eiaha roa ˈtu tatou e haapae i to tatou mau hinaaro i te pae varua, ia tamau noa râ tatou i te atuatu i te hoê hinaaro rahi no te mau faanahoraa pae varua e rave rahi no ǒ mai i te amuraa maa a Iehova e o te faatupu mai i te oaoa. (Mat. 5:3; Pet. 1, 2:2) Ia faufaa-maitai-hia tatou, e mea titauhia ia horoa tatou i te taime, ma te tano e te tamau, no te haapiiraa Bibilia tataitahi e utuafare, e no te haere-atoa-raa i te mau putuputuraa. (Eph. 5:15, 16) E tano ïa te mau haamaitairaa e fanaˈohia mai i te faaitoitoraa faauruahia o ta Paulo i horoa i te mau Kerisetiano Hebera haapao maitai i roto i te Hebera 13:20, 21.