Tuhaa 5: E faatere anaˈe i te mau haapiiraa bibilia o te paturu i te mau haereraa i mua
E nafea ia faaoti ehia rahiraa paratarafa e hiˈopoa
1 Ia ˈna i haapii i ta ˈna mau pǐpǐ, i haapao na Iesu i to ratou mau taotiaraa, ma te parau atu i tei “tia ia ratou ia faaroo ra.” (Mar. 4:33; Ioa. 16:12) I teie mahana atoa, e mea titauhia ia faaoti te mau orometua haapii i te Parau a te Atua ehia rahiraa paratarafa e mea tano ia hiˈopoa i roto i te area taime o te hoê haapiiraa bibilia. Tei te neheneheraa e te mau huru tupuraa o te orometua haapii e o te piahi, e itehia ˈi ehia rahiraa paratarafa e nehenehe e hiˈopoahia.
2 A patu i te faaroo puai: E titau paha vetahi mau piahi e piti aore ra e toru taime haapiiraa no te aapo i te mea ta te tahi atu mau piahi e taa ohie i roto i te hoê noa taime haapiiraa. Eita tatou e hinaaro e faaere i te hoê piahi i te maramarama-maitai-raa no te hinaaro-noa-raa e haavitiviti. E hinaaro te piahi taitahi i te hoê niu papu no to ˈna faaroo apî i te Parau a te Atua.—Mas. 4:7; Roma 12:2.
3 A faatere ai outou i te haapiiraa i te mau hebedoma atoa, a rave i te taime e hinaarohia no te tauturu i te piahi ia maramarama e ia farii i ta ˈna e haapii ra i roto i te Parau a te Atua. A ape i te faatere vitiviti o te faaiti i te faufaa o te pue parau mau i haapiihia ˈtu. A rave i te taime e navai no te haamahitihiti i te mau manaˈo faufaa e no te hiˈopoa i te mau irava tumu, oia hoi te niu o te mau haapiiraa.—Tim. 2, 3:16, 17.
4 A pee maite i te tereraa tano: Mai te peu e eita tatou e hinaaro e ru i te haapiiraa, e ape atoa ïa tatou i te faaatea ê i te tumu parau. Mai te peu e e taata paraparau rahi te piahi no nia i ta ˈna iho mau ohipa, e faanaho paha ïa tatou i te aparau i te reira i muri aˈe i te haapiiraa.—Koh. 3:1.
5 I te tahi aˈe pae, e nehenehe atoa to tatou iho anaanatae no te parau mau e riro ei tautooraa eiaha e paraparau rahi roa i te roaraa o te haapiiraa. (Sal. 145:6, 7) E faufaahia te haapiiraa i te tahi taime i te hoê manaˈo tapiri aore ra i te hoê faatiaraa, eiaha râ tatou e faarahi e e faaroa roa i te reira a fifi atu ai te piahi i te fanaˈo i te ite mau i te mau haapiiraa tumu o te Bibilia.
6 Ma te hiˈopoa i te rahiraa paratarafa au noa i te taime haapiiraa taitahi, e tauturu ïa tatou i te mau piahi Bibilia ia ‘haere na te parau maramarama a Iehova.’—Isa. 2:5.