Pahonoraa i ta outou mau uiraa

◼ E titauhia anei ia tapao i te taime o te hoê haapiiraa utuafare i nia i ta tatou tapura taviniraa?

Ia faatere te hoê metua Kerisetiano i te hoê haapiiraa bibilia e te utuafare e e apiti atu te mau tamarii aita i bapetizohia, e tapao oia hoê hora e hoê farerei-faahou-raa i te hebedoma, e hoê haapiiraa bibilia i te avaˈe. Tera atoa te tupuraa noa ˈtu e e faaterehia te haapiiraa hau atu i te hoê hora, hau atu i te hoê taime i te hebedoma, aore ra e te tamarii taitahi.—A hiˈo i te buka Notre ministère, api 105.

Mai te peu e ua bapetizohia te utuafare taatoa, eita te hora e te haapiiraa iho e tapaohia i nia i te tapura taviniraa (e tapaohia râ mai te peu e te haapii noa ra hoê tamarii i te piti o te buka i muri aˈe i to ˈna bapetizoraa). No te mea te faaite na mua ra te ohipa a te amuiraa i te ohipa e ravehia ra i roto i te pororaa i te parau apî maitai e te haapiiraa i te parau mau bibilia i te feia e ere â i te mau tavini pûpûhia e bapetizohia a Iehova. (Mat. 24:14; 28:19, 20) Teie râ, eita te reira e faaiti mai i te faufaaraa ia faatere tamau i taua haapiiraa ra.

E hopoia na te mau metua Kerisetiano e haapii e ta ratou tamarii. Te metua o te hinaaro i te tauturu no te haamau aore ra haamaitai i ta ratou haapiiraa utuafare, a ani i te tauturu a te mau matahiapo. Mai te peu e mea maitai aˈe e na te tahi atu taata poro e haapii i te Bibilia e te hoê tamarii bapetizo-ore-hia o te hoê utuafare Kerisetiano o te amuiraa, e ani na mua tatou i te manaˈo o te tiaau peretiteni aore ra te tiaau no te taviniraa. Ia fariihia, e tapao te taata poro mai ta ˈna e na reira e te hoê haapiiraa bibilia ê atu.

E titau te haapiiraa i te eˈa o Iehova i te mau tamarii i te taime e te tutavaraa rahi atu â i tei papaihia i nia i te tapura taviniraa. (Deut. 6:6-9; Mas. 22:6) E nehenehe e haapopouhia te mau metua Kerisetiano e amo ra i te hopoia teimaha e haapii i ta ratou mau tamarii “ia paari ma te aˈo [e te mau faaararaa a Iehova].”—Eph. 6:4; MN.