E faatupu anaˈe i te auhoaraa piri e o Iehova

1. Eaha ta te hoê tuahine i taa no nia i ta ˈna mau peu i te pae varua?

¹ “Fatata e 20 matahiti to ˈu oraraa i roto i te parau mau ma te faatia ture noa, ma te haere noa i te mau putuputuraa e te pororaa,” ta te hoê ïa tuahine Kerisetiano e faˈi ra. Te parau faahou ra râ oia e: “Ua taa ia ˈu i muri iho e noa ˈtu e mea faufaa, e ere na tera noa mau peu e turu ia ˈu ia fifihia. . . . Ua ite au i teie mahana e e mea tia ia faaafaro vau i to ˈu huru feruriraa e ia haamau i te hoê porotarama haapiiraa manuïa ia hinaaro vau e ite ia Iehova, e here ia ˈna e e haamauruuru no ta ta ˈna Tamaiti i pûpû mai.”

2. No te aha e mea faufaa ˈi ia faatupu i te auhoaraa piri e o Iehova?

² E mea titauhia te tutavaraa no te faatupu i te mau taairaa piri e o Iehova. Eita ïa e navai noa ia pee i te hoê porotarama ohipa Kerisetiano. Mai te peu e eita tatou e haamahora tamau i to tatou aau ia Iehova, i te pae hopea, e riro o Iehova no tatou mai te hoê hoa piri i mutaaiho, tera râ ua mutu to tatou taairaa atoa e o ˈna. (Apo. 2:4) E hiˈo anaˈe ïa e nafea te haapiiraa ia tatou iho i te Bibilia e te pure e nehenehe ai e tauturu mau ia faatupu i te auhoaraa piri e o Iehova.—Sal. 25:14.

3. E nafea te haapiiraa ia tatou iho e tauturu ai ia haafatata ˈtu i te Atua?

³ E mea faufaa roa te pure e te feruriruriraa: E ere noa te hoê haapiiraa ia tatou iho faufaa no te aau i te reniraa i te mau manaˈo faufaa o te hoê tumu parau haapiiraa e te taioraa i te mau irava i horoahia. E mea titauhia ia ui tatou ia tatou iho eaha ta te mau tumu parau haapiihia e faaite ra no nia i te mau eˈa o Iehova, i ta ˈna mau ture aveia e i to ˈna huru. (Exo. 33:13) Ia taa rii ia tatou te mau manaˈo pae varua, e faatupu te reira i roto ia tatou i te mau huru aau o te turai ia tatou ia feruri i to tatou oraraa. (Sal. 119:35, 111) Ma te fa e haafatata ˈtu ia Iehova e mea tia ˈi ia haapii tatou ia tatou iho. (Iak. 4:8) No te haapii maitai, e mea titauhia te taime e te hoê vahi tano; no te tamau i te na reira e mea titauhia te haavîraa ia ˈna iho. (Dan. 6:10) Noa ˈtu e e tapura ohipa î maitai ta outou, te faataa ra anei outou i te taime no te feruriruri i te mau huru maitatai taa ê o Iehova i te mahana taitahi?—Sal. 119:147, 148; 143:5.

4. E nafea te pure hou te haapiiraa ia tatou iho e tauturu ai ia tatou ia faatupu i te auhoaraa piri e o Iehova?

⁴ Ia hotu te haapiiraa ia tatou iho, e mea faufaa roa ia pure hohonu tatou. E mea na roto hoi i te ohipa a te varua moˈa e putapû ai to tatou aau i te pue parau mau bibilia e e turaihia ˈi tatou ia “pûpû i te Atua i te hoê taviniraa moˈa . . . ma te mǎtaˈu i te Atua e te tura.” (Heb. 12:28, MN) No reira, eiaha roa tatou e haamata i te haapii ma te ore e ani ia Iehova i to ˈna varua. (Mat. 5:3) Ia feruriruri tatou i te mau Papai e ia faaohipa tatou i te mau papai haapiiraa i horoahia mai e te faanahonahoraa a Iehova, te haamahora ra tatou i to tatou aau i te Atua. (Sal. 62:8) E ohipa haamoriraa te haapiiraa mai tera e nehenehe ai tatou e faaite e e haapuai i to tatou paieti ia Iehova.—Iuda 20, 21.

5. No te aha e mea titauhia ˈi ia feruriruri tatou i te mau mahana atoa i te Parau a te Atua?

⁵ Mai te tahi atu taairaa atoa, e mea tia ia atuatu noa tatou i to tatou auhoaraa e o Iehova ia hinaaro tatou ia rahi â te reira i te roaraa o to tatou oraraa. No reira, e tutava anaˈe i te mau mahana atoa i te faaherehere maite i te taime no te haafatata ˈtu ia Iehova, ma te papu e e haafatata mai oia ia tatou.—Sal. 1:2, 3; Eph. 5:15, 16.