Pahonoraa i ta outou mau uiraa

◼ E nehenehe anei na metua e piti e tapao i te taime faaohipahia no te haapiiraa tamau ei utuafare?

Noa ˈtu e na te mau metua tane te hopoia matamua e haapii i ta ratou mau tamarii “ma te aˈo a te Fatu ra” o Iehova, e rave na metua e piti i te haapiiraa i ta raua mau tamarii. (Eph. 6:4) Te faaitoito ra te Bibilia i te mau tamarii: “E faaroo mai, e tau tamaiti, i te aˈo a to metua tane, e eiaha e faarue i te faaitoito a to metua vahine ra.” (Mas. 1:8) Te hoê tuhaa faufaa o te faaineineraa horoahia e te mau metua, o te haapiiraa bibilia utuafare ïa.

I mutaa iho, na te metua noa e faatere i te haapiiraa utuafare e te mau tamarii bapetizo-ore-hia e tapao i te taime, noa ˈtu e o na metua e piti te apiti atu i te aparauraa. Ua faatanohia râ te reira. Mai te peu e e rave amui na metua e piti i te haapiiraa o ta raua mau tamarii i te taime haapiiraa utuafare, e nehenehe raua toopiti e taio hoê hora i te hebedoma i nia i te tapura taviniraa. Parau mau, e horoa te mau metua hau roa ˈtu i te hoê hora i te hebedoma no te haapii i ta ratou mau tamarii. E titau te haapiiraa i te tamarii i te mau tutavaraa tamau i na metua e piti. (Deut. 6:6-9) E faaite na mua roa râ te tapura taviniraa i tei ravehia i roto i te pororaa e tia ˈi. E tapao-noa-hia ïa hoê hora i te hebedoma, noa ˈtu e ua faaterehia te haapiiraa hau atu i te hoê hora, hau atu i te hoê taime i te hebedoma, aore ra e te tamarii taitahi. Na hoê noa metua e tapao i te haapiiraa bibilia utuafare e hoê noa farerei-faahou-raa i te hebedoma e faaterehia ˈi te haapiiraa.