E tauturu anaˈe na i to tatou mau taata-tupu ia haamori i te Atua

“[Ia] tomo mai (...) te hoê taata faaroo ore e te ite ore, (...) i itea ihora te parau aro i roto i to ˈna aau, tipapa ihora oia i raro, haamori atura i te Atua.” — KORINETIA 1, 14:24, 25.

1-3. Mea nafea e rave rahi mau Korinetia i te tautururaahia ia nehenehe te Atua ia farii mai ia ratou?

I ROTO i te piti o to ˈna tere mitionare, ua faaea ihora te aposetolo Paulo i Korinetia hoê matahiti e te afa. I roto i taua oire ra, “riro roa ˈtura [oia i te parau], e ua parau hua ˈtura”. Eaha ˈtura ïa tei itea mai i roto i taua taviniraa na ˈna ra? “E rave rahi to Korinetia i ite e ua faaroo, e bapetizohia ihora.” (Ohipa 18:5-11). Ua “haamoˈahia [ratou] (...), [ua] haapaohia ei feia moˈa”. — Korinetia 1, 1:2.

² I muri aˈe, ua haere maira o Apolo i Korinetia, tau taime i muri aˈe i to Perisila raua o Akuila tautururaa ia ˈna ia taa “maite i te parau a te Atua”, mai te tumu parau no nia i te bapetizoraa. Ua riro maira hoi taua kerisetiano ra ei tumu no te hamani maitai o te Atua, ua fariihia aˈera oia e A ˈna (Ohipa 18:24 e tae atu i te 19:7). I to ˈna aˈe pae, ua tauturu aˈera o Apolo i to Korinetia, o tei ‘riro hoi i te mau idolo vava ra’ i mutaa ihora. (Korinetia 1, 12:2.) Eita e ore e haapiihia na taua mau taata ra i te Bibilia, i to ratou iho utuafare, e nehenehe atoa râ ta ratou e faarahi atu â i to ratou ite ma te amuimui atu i roto i te mau putuputuraa kerisetiano. — Ohipa 20:20; Korinetia 1, 14:22-24.

³ Maoti taua haapiiraa ra, e rave rahi to Korinetia tei riro na hoi i mutaa ihora ‘ei feia faaroo ore e ei mau taata ite ore’ tei hutihia i roto i te haamoriraa mau. Ma te papu maitai, ua oaoa roa te mau kerisetiano i te iteraa ˈtu ratou i taua mau tane e mau vahine ra i te haereraa i mua e tae roa ˈtu ai i te bapetizoraa e ia fariihia mai e te Atua. Mai te reira atoa hoi i to tatou nei anotau.

Nafea ia tauturu i ‘te feia faaroo ore e te ite ore’

4. I to tatou nei tau, mea nafea e rave rahi i te tautururaahia mai te feia faaroo ore i Korinetia?

⁴ I to tatou atoa nei tau, te auraro nei te mau Ite o Iehova i te faaueraa a Iesu oia hoi ‘e haere e faariro i te mau fenua atoa ei pǐpǐ, e a bapetizo atu ai ia ratou’. (Mataio 28:19, 20.) I muri aˈe i to ratou ueueraa i te mau huero o te parau mau i roto i te mau mafatu farii maitai, e hoˈi faahou mai ratou e pîpî i taua mau huero ra (Korinetia 1, 3:5-9; Mataio 13:19, 23). Te faaau nei te mau Ite i to ratou mau taata-tupu i te hoê haapiiraa no nia i te Bibilia ma te tamoni ore i te mau hebedoma atoa i to ratou utuafare, ia itea ia ratou i te pahonoraa i ta ratou mau uiraa e ia ite atoa ratou i te mau parau mau bibilia. Te titau atoa nei te mau Ite ia ratou ia amuimui mai i roto i te mau putuputuraa ta ratou e faatupu nei i to ratou vahi, mai ta te taata “faaroo ore” i na reira i te senekele 1, i roto i te amuiraa no Korinetia. Eaha râ ïa te huru o te mau Ite o Iehova i nia i te mau taata e haapiihia ra i te Bibilia e e amuimui ra i te mau putuputuraa?

5. Eaha te mau hiˈoraa bibilia e faaitoito maira ia tatou ia haapao maitai i to tatou mau auraa e te tahi mau taata?

⁵ Mea oaoa roa na tatou ia ite atu tatou i taua mau taata ra ia haafatata ˈtu i te Atua, eiaha râ ia moehia ia tatou e aitâ ratou i bapetizohia ˈtura. Ia haamanaˈo atoa na tatou i na haapiiraa e piti tei matara mai i roto i te tumu parau na mua ˈtu: 1) E haapao maitai na te mau ati Iseraela i to ratou mau auraa e te mau taata ěê, oia hoi e amuimui na i roto i te nunaa o te Atua e e faatura na i te tahi mau ture, aitâ râ hoi i farii atura i te haapaoraa ati iuda e aitâ i peritomehia ˈtura, e ere i to ratou mau taeae i roto i te haamoriraa. 2) E haapao maitai atoa te mau kerisetiano no Korinetia i to ratou mau auraa e ‘te feia faaroo ore e te ite ore’ no teie mau parau a Paulo e na ô ra e: “Eiaha outou e amui-au-ore-hia i te feia faaroo ore ra: eaha to te parau-tia auraa e te parau-tia ore?” — Korinetia 2, 6:14.

6. Mea nafea te “feia faaroo ore” e nehenehe ai ia “aˈohia” i roto i te mau putuputuraa, e mai te aha te huru taua aˈoraa ra?

⁶ No reira, a farii maite ai tatou ‘i te feia faaroo ore e te ite ore’, te papu maitai ra tatou e aitâ ratou i faaî atura i te mau huru e titauhia ra e te Atua. Mai ta te Bibilia e haapapu maira i roto i te Korinetia 1, 14:24, 25, eita e ore e tia mau ratou ia ‘hiˈo-paatoa-hia’, oia hoi “ia aˈohia”, e te mea e haapiihia ra ia ratou. E ere roa ˈtu i te mau aˈoraa mai te ture e aˈo ra; eita ratou e tuuhia ˈtu i roto i te hoê tomite haava i roto i te amuiraa no te mea aitâ ratou i riro atura ei melo bapetizohia. Teie râ, na roto i te mau mea ta ratou e haapii, ua noaa i taua mau taata ra i te haapapuraa e e faautua te Atua i te mau haerea miimii atoa e te tia ore.

7. Eaha ˈtu â vetahi mau vahi apî ta e rave rahi mau taata e haapiihia ra i te Bibilia e hinaaro ra e rave, e no te aha?

⁷ I roto i te roaraa o te tau, e rave rahi mau taata tei ore i bapetizohia teie e hinaaro nei e rave hau atu â i te faaroo-maite-noa-raa ˈtu i roto i te mau putuputuraa a te amuiraa. Te horoa mai nei teie mau parau a Iesu i te tumu: “Aore te pǐpǐ i hau i tana ra orometua, o te pǐpǐ râ i haapii-hua-hia ra, e riro ïa i te faito atoa i tana ra orometua.” (Luka 6:40). E taa papu te taata e haapiihia ra i te Bibilia e mea faufaa roa no te taata e haapii maira ia ˈna, i te ohipa pororaa, e e oaoa rahi te noaa mai ia ˈna i roto i taua ohipa ra (Mataio 24:14). A rahi noa ˈtu ai to ˈna faaroo, e nehenehe te taata e tuatapapa ra i te mau parau mau bibilia e e amuimui ra i roto i te mau putuputuraa, e haafaufaa i teie nei mau parau e na ô ra e: “Te nehenehe o te avae o te vea i nia i te mouˈa, o te hopoi mai i te parau maitai ra, o tei faaite hua mai i te parau hau ra! o tei hopoi mai i te parau oaoa e te maitai ra, e o tei faaite hua mai i te ora ra!” (Isaia 52:7; Roma 10:13-15). Noa ˈtu â ïa e aitâ oia i bapetizohia ˈtura, peneiaˈe te hinaaro ra oia e riro mai ei taata poro no te Basileia, ma te apiti atu i te amuiraa a te mau Ite o Iehova.

8, 9. a) Eaha te tia ia tatou ia rave ia hinaaro te hoê taata e haapiihia ra i te Bibilia e apiti atu i roto i te ohipa pororaa i te vahi taata? b) Ia putuputu e piti na matahiapo e te hoê taata e nehenehe e riro mai ei taata poro, eaha te tia ia raua ia rave? c) Eaha ˈtura ïa te hopoia a te taata poro apî?

⁸ Ia papu i te Ite e haapii ra i te Bibilia i te hoê taata mai teie te huru e, te hinaaro ra oia e apiti atu i roto i te pororaa, e faaite atu ïa oia i te reira i te tiaau-peretiteni. E ani atu te tiaau-peretiteni i e piti na matahiapo ia haere atu e farerei i taua taata e haapiihia ra i te Bibilia e te taata e haapii ra ia ˈna. Mea oaoa roa na te mau matahiapo ia hinaaro te hoê taata e tavini i te Atua. Ua papu maitai i te mau matahiapo e aita e titauhia ra e ia noaa te hoê ite rahi roa ia ratou, mai te mau melo bapetizohia o te amuiraa tei papu maitai i roto i te parau mau e o te tia hoi ia horoa hau atu â. Teie râ, e hinaaro te mau matahiapo e ite e ua noaa mau anei i te taata e haapiihia ra, i te tahi maramarama no nia i te mau haapiiraa bibilia e ua faaau anei oia i to ˈna oraraa i nia i te mau faaueraa tumu a te Atua hou oia e tahoê atu ai i te amuiraa i roto i te ohipa pororaa. E mau tumu maitai atura ïa e vai ra, ia putuputu e piti na matahiapo, te taata e hinaaro ra e poro e te Ite e haapii ra ia ˈna.a

⁹ E faaara ˈtu na matahiapo e piti i te taata e haapiihia ra e mai te peu e te faaî ra oia i te mau huru e titauhia no te apiti atu i roto i te ohipa pororaa e ia apiti atoa ˈtu oia, e nehenehe hoi ta ˈna e vaiiho i te hoê tabura taviniraa. E faaîhia hoi te hoê tabura taviniraa taata poro i to ˈna iˈoa i roto i te mau parau a te amuiraa. E tapao hoi te reira no to ˈna amuiraa mai e to ˈna auraro i te faanahonahoraa teotaratia a te mau Ite o Iehova (mai te reira atoa hoi te huru no te feia atoa e vaiiho i te hoê tabura taviniraa). E tuatapapahia te tahi mau aˈoraa bibilia, mai te mau aˈoraa e vai ra i te mau api 98 e tae atu i te 100 o te buka ra Organisés pour bien remplir notre ministèreb. O te taime tano paha ïa te reira no te horoa ˈtu i teie buka na te taata e haapiihia ra.

10. a) Nafea te hoê taata poro apî bapetizo-ore-hia e nehenehe ai e tamau â i te haere i mua, e no te aha? b) No te aha e tano mau ai ia tauihia te parau ra “hoa fariihia”? (Hiˈo i te nota i raro i te api.)

¹⁰ Te taata e faaî noa ˈtu i te mau huru e titauhia no te riro mai ei taata poro bapetizo-ore-hia, no te parau apî maitai, e nehenehe ïa oia e riro mai ei ‘taata ite-au-hia’c. (Luka 2:14.) Noa ˈtu â ïa e aitâ oia i pûpû atura ia ˈna e i bapetizohia ˈtura, e nehenehe ta ˈna i teie nei e vaiiho i te hoê tabura no ta ˈna taviniraa mai te mau milioni feia poro e ‘faaite ra i te parau a te Atua’ ma te itoito i roto i te ao taatoa nei (Ohipa 13:5; 17:3; 26:22, 23). E nehenehe e faaara ˈtu i te amuiraa e ua riro mai oia ei taata poro apî bapetizo-ore-hia. E tia ia ˈna i muri iho ia tamau â i te haapii i te Bibilia, ia horoa i te mau pahonoraa i roto i te mau putuputuraa, ia faaohipa i te mea ta ˈna e haapii ra e ia haere atu e faaite i te reira i te tahi pae. Eita e maoro roa oia i te hinaaro e bapetizo ia ˈna; e fariihia ˈtura hoi oia e te Atua e noaa ˈtu ai ia ˈna i te “tapao” no te ora. — Ezekiela 9:4-6.

Te tauturu te tia ia horoa ia hara noa ˈtu te hoê taata

11. E nafea te amuiraa ia rave te hoê o to ˈna mau melo bapetizohia i te hoê hara ino roa?

¹¹ I roto i te tumu parau na mua ˈtu, ua faahiti tatou i te parau no nia i te tauturu te tia ia horoahia i te hoê kerisetiano bapetizohia tei rave i te hoê hara ino roa (Hebera 12:9-13). Ua tuatapapa aˈenei tatou e, ia au i te Bibilia, e ia ore oia e tatarahapa, e tia i te amuiraa ia tiavaru ia ˈna, e ia ape i te farerei noa ˈtu ia ˈna (Korinetia 1, 5:11-13; Ioane 2, 9-11; Tesalonia 2, 2:11, 12). Nafea râ ïa tatou, ia rave noa ˈtu te hoê taata poro bapetizo-ore-hia i te tahi mau hapa aore ra i te tahi mau hara ino roa?

12. a) No te aha e tia atoa ˈi ia tauturuhia ma te hamani maitai i te feia poro bapetizo-ore-hia, tei rave i te hara? b) Eaha ta te faaueraa tumu i faahitihia i roto i te Luka 12:48 e faaite maira no nia i te hopoia a te hoê taata rave hara?

¹² Ua faaitoito o Iuda i te amuiraa ia hamani maitai atu i te mau kerisetiano faatavaihia tei feaa te manaˈo aore ra tei hara, ia tatarahapa iho â râ ratou (Iuda 22, 23; hiˈo atoa Korinetia 2, 7:10). Eita anei i te mea tano roa ˈtu â ia hamani-maitai-hia te hoê taata rave hara bapetizo-ore-hia e tei tatarahapa (Ohipa 3:19)? Oia mau, no te mea e ere to ˈna huru i te pae varua i te mea etaeta roa e aita hoi i noaa ia ˈna i te aravihi i roto i to ˈna oraraa kerisetiano. Peneiaˈe aitâ oia i ite atura i te manaˈo o te Atua no nia i te tahi mau tumu parau. Aitâ oia i tuatapapa ˈtura e te mau matahiapo no nia i te mau tumu parau bibilia no nia i te bapetizoraa, e aitâ oia i rave atura i te opuaraa faufaa roa e bapetizo ia ˈna. Hau atu, te parau ra hoi Iesu e “o tei tuuhia ˈtu te mea rahi, e mea rahi atoa te titauhia ˈtu”. (Luka 12:48.) Mea rahi atura ïa te mau mea e titauhia i te mau melo bapetizohia o te amuiraa oia hoi, i te mea e ua noaa ia ratou i te ite hau atu e te mau haamaitairaa, e amo ïa ratou i te hoê hopoia taa ê. — Iakobo 4:17; Luka 15:1-7; Korinetia 1, 13:11.

13. Ia ore te hoê taata poro bapetizo-ore-hia e haapao i te ture a te Atua, e nafea ïa te mau matahiapo no te tauturu ia ˈna?

¹³ Ia au i te aˈoraa a Paulo, e hinaaro iho â ïa te mau kerisetiano tei noaa ia ratou i te mau huru i te pae varua, e tauturu i te mau taata poro bapetizo-ore-hia e roohia i te hapa na mua ˈˈe oia e ite ai (hiˈo Galatia 6:1). E nehenehe te mau matahiapo e ani atu i e piti o ratou (peneiaˈe te feia i putuputu e o ˈna) ia tamata i te faahoˈi mai ia ˈna i nia i te eˈa maitai ra, ia farii oia e ia tauturuhia oia. E na reira ratou, eiaha no te mea te hinaaro ra ratou e aˈo ia ˈna ma te etaeta, ma te hamani maitai râ e te aau mǎrû (Salamo 130:3). I roto i te rahiraa o te mau tupuraa, e navai noa te tahi mau faaitoitoraa e te tahi mau manaˈo ohie ia faaohipa, niuhia i nia i te mau Papai, no te aratai i te taata rave hara ia tatarahapa e ia faahoˈi faahou mai ia ˈna i nia i te eˈa maitai ra.

14, 15. a) Eaha ta tatou e nehenehe e rave ia tatarahapa mau te taata rave hara? b) I te tahi mau taime, eaha te parau faaararaa poto roa e faaitehia ˈtu i te amuiraa no te haamaramarama i te reira?

¹⁴ E horoa ˈtu na matahiapo e piti, i te taata rave hara bapetizo-ore-hia i te mau aˈoraa tano maitai ia ˈna. I roto i te tahi mau huru tupuraa, e manaˈo paha ïa ratou e, mea maitai i roto i te hoê area taime, ia ore te taata rave hara ia apiti faahou atu i roto i te Haapiiraa o te taviniraa teotaratia aore ra ia ore oia e horoa faahou i te mau pahonoraa i te mau putuputuraa. E ani paha ïa ratou ia ˈna eiaha e haere faahou e poro i tera fare e tera fare e te amuiraa e tae noa ˈtu te taime oia e haere ai i mua i te pae varua. I muri iho, i te taime oia e nehenehe faahou ai e apiti atu i roto i te taviniraa, e faaara ˈtu ïa ratou ia ˈna. Mai te peu e aita te hara i faatupu i te peapea e aita atoa e haafifi ra i te huru viivii ore o te nǎnǎ, aita ïa e faufaa ia faaite atu te reira i te amuiraa.

¹⁵ E nafea râ ïa mai te peu e te ite ra na matahiapo toopiti e te tatarahapa mau ra te taata rave hara, ua ite râ hoi e rave rahi mau taata i to ˈna haerea ino aore ra e itehia ˈtu i muri iho? Mai te peu mai te reira te huru ra, e nehenehe ta ratou e faaara ˈtu i te tomite taviniraa a te amuiraa, o te faaineine i te hoê parau faaararaa poto noa, mai teie te huru: “Ua tuatapapa te mau matahiapo i te parau no nia ia..., e e taata poro bapetizo-ore-hia noâ oia [vahine aore ra e tane] no te amuiraa.” Mai roto atoa i te mau ohipa atoa e tuatapapahia mai teie te huru, e hiˈo ïa te tino aratai a te mau matahiapo e e tia anei ia vauvauhia ˈtu te hoê oreroraa parau a muri aˈe, no te horoa ˈtu i te tahi mau aˈoraa ia au i te hara i ravehia.

16, 17. a) Eaha na huru tupuraa e piti i reira e tano ai ia horoahia i te hoê parau faaararaa mai te reira te huru? b) Mai te aha te huru taua faaararaa ra?

¹⁶ E ite-atoa-hia i te tahi taime i te hoê taata poro bapetizo-ore-hia ia rave i te ino e ia ore oia e farii i te tauturu here mau e ravehia no ˈna, aore ra eita oia e hinaaro faahou e tamau â i te haere i mua e tae roa ˈtu i te bapetizoraa e e faaara ˈtu oia i te mau matahiapo e eita o ˈna e hinaaro faahou e riro ei taata poro. E nafea ïa mai te peu e mai te reira te huru? Eita taua mau huru taata ra e tiavaruhia, i te mea hoi e aita ratou i ite-au-hia e te Atua. E tano te tiavaruraahia te feia hara o te ore e tatarahapa i te mau taata e ‘parauhia e taeae’, oia hoi tei bapetizohia (Korinetia 1, 5:11). Te auraa ra, te tapohia ˈtura ïa te mata i nia i te ino? Eita.

¹⁷ E hopoia na te mau matahiapo i te ‘faaamuraa i te nǎnǎ a te Atua i raro aˈe i ta ratou aratairaa’. (Petero 1, 5:2.) Ia ite na matahiapo e piti e pûpû ra i ta raua tauturu i te taata rave hara bapetizo-ore-hia e aita oia e tatarahapa ra e aita oia e faaî faahou ra i te mau huru e titauhia no te riro mai ei taata poro, e faaara ˈtu ïa oia ia ˈnad. Aore ra mai te peu e e faaite atu te hoê taata poro bapetizo-ore-hia i te mau matahiapo e eita o ˈna e hinaaro faahou ia tapaohia oia ei taata poro, e farii ïa ratou i ta ˈna opuaraa. I roto i na huru tupuraa e piti nei, mea tano mau â ia faaite atu te tomite taviniraa i te amuiraa i te hoê parau e haapapu atu e “eita o... i te taata poro faahou no te parau apî maitai”.

18. a) I muri aˈe i taua parau faaararaa ra, e tia i te mau kerisetiano ia haapao i te aha ia ite mau ratou e eaha to ratou iho huru haerea? b) Mea tano anei ia ape tatou i te farerei atu i te mau taata bapetizo-ore-hia tei rave i te hoê hara ino roa i mutaa ihora?

¹⁸ Eaha ïa te huru o te mau Ite i nia i taua taata poro bapetizo-ore-hia ra, i muri aˈe? Na mua ˈˈe, e taata ‘faaroo ore’ oia e amui mai na i roto i te mau putuputuraa. Ua faaite oia i muri iho i to ˈna hinaaro e riro mai ei taata poro no te parau apî maitai, e ua faaî oia i te mau huru e titauhia. I te mea hoi e e ere faahou mai te reira te huru, ua riro faahou ïa oia ei taata no teie nei ao. Aita te Bibilia e faahepo ra i te mau Ite ia ore e paraparau faahou atu ia ˈna, no te mea aita oia i tiavaruhiae. E pee râ te mau kerisetiano i te huru ta te mau ati Iseraela i faaite i nia i te mau taata ěê peritome-ore-hia ma te haapao maitai i roto i to ratou mau auraa e taua taata o teie nei ao ra e ore e haamori ra ia Iehova. E riro taua huru haapao-maitai-raa ratou, i te paruru i te amuiraa i te faahopearaa o “te faahopue iti haihai ra”, i te hoê melo e haaviivii (Korinetia 1, 5:6). Mai te peu râ i muri iho, e faaite mai taua taata ra i to ˈna hinaaro mau e haapii i te Bibilia e mai te peu e e manaˈo te mau matahiapo e aita e ohipa e patoi ra i te reira, e riro paha ïa taua haapiiraa ra i te tauturu ia ˈna ia ite faahou e e faufaa rahi mau te pûpûhia maira ia tatou nei i te haamoriraa tatou ia Iehova i pihai iho i To ˈna nunaa. — Salamo 100.

19. Eaha te tauturu ta te mau matahiapo e horoa tataitahi atu i te tahi mau taime?

¹⁹ Ia ite te mau matahiapo e te riro ra te hoê taata ei fifi taa maitai no te nǎnǎ, e faaara ˈtu ïa ratou i te mau melo o te amuiraa e haafifihia ra, e te reira ma te faaara tataitahi atu. Ei hiˈoraa, e riro paha e e taurearea te taata poro tahito tei topa i roto i te peu taero ava aore ra tei taiata. Noa ˈtu â ïa e ua faaarahia te amuiraa e e ere o ˈna i te taata poro bapetizo-ore-hia faahou, peneiaˈe te hinaaro ra oia e amuimui atu i te mau melo taurearea o te amuiraa. Mai te peu mai te reira ra, e aparau tino roa ˈtu te mau matahiapo i te mau metua o te mau taurearea e fifi ra e oia hoi e taua mau taurearea iho ra (Hebera 12:15, 16; Ohipa 20:28-30). Mai te peu noa ˈtu e e faahuehue te hoê taata, mea varavara hoi i te itehia, aore ra e taata imi peapea oia, e nehenehe ïa e faaite atu ia ˈna e eita o ˈna e hinaarohia i te mau putuputuraa, e ia hoˈi noa mai oia, e nehenehe ïa oia e parihia i te orure hau, inaha aita oia e faatura ra i te taoˈa a vetahi ê ra.

E tauturu anaˈe na i te mau tamarii aita i taeahia te matahiti, ia haamori i te Atua

20. Eaha te tauturu ta te mau metua kerisetiano e horoa ˈtu na ta ratou mau tamarii, e eaha hoi te vahi apî e noaa mai?

²⁰ Ia au i te Bibilia, e hopoia na te mau metua te haapiiraa i ta ratou mau tamarii i roto i te eˈa o te parau mau a te Atua (Deuteronomi 6:4-9; 31:12, 13). Te faaitoito nei ïa te mau Ite o Iehova a hia ˈtura maororaa i teie nei, i te mau kerisetiano ia tuatapapa i te Bibilia e to ratou utuafare fetii, i te mau hebedoma atoa. E tia i te mau metua kerisetiano ia faaitoito i ta ratou mau tamarii ia haere i mua e tae roa ˈtu ai i te pûpûraa ia ratou iho e i te bapetizoraa ia nehenehe te Atua ia farii mai ia ratou (Maseli 4:1-7). Te ite nei tatou i roto i te mau amuiraa i te hotu oaoa mau o ta ratou mau tutavaraa: te here nei e rave rahi hanere tausani feia apî ia Iehova e te hinaaro nei hoi ratou e haamori ia ˈna e a muri noa ˈtu.

21-23. a) Tei ia vai ra te hopoia matamua no te aˈoraa i te hoê tamarii aita i taeahia te matahiti e tei rave i te hara? b) E nafea ïa te mau matahiapo o te amuiraa i roto i taua huru tupuraa ra?

²¹ E hopoia tumu atoa na te mau metua kerisetiano i te aˈoraa e te faatitiaifaroraa i te haerea o ta ratou mau tamarii ma te faahepo atu ia ratou ma te here, i te haapaeraa aore ra i te utua ta ratou e manaˈo ra e mea tano (Ephesia 6:4; Hebera 12:8, 9; Maseli 3:11, 12; 22:15). Mai te peu noa ˈtu e rave te hoê tamarii aita i taeahia i te matahiti, e tei tahoê mai hoi i te amuiraa ma te tiaraa taata poro bapetizo-ore-hia, i te hoê haerea viivii, e hopoia ïa na te mau matahiapo e ‘haapao ra’ i te mau melo o te nǎnǎ, i te tuatapaparaa i taua fifi ra. — Hebera 13:17.

²² Ma te papu maitai, e tia taua huru ohipa nei ia faatitiaifarohia ia au i te huru raveraa i faahitihia ˈtu i nia ˈtu. E maitihia e piti matahiapo no te tuatapapa i taua tumu parau ra. I te mau taime matamua ei hiˈoraa, e nehenehe ta ratou e haere atu e uiui i te manaˈo o te metua tane e (aore ra) o te metua vahine no nia i te ohipa i ravehia e taua taata poro apî ra, no nia i to ˈna haerea, e no nia i te ohipa i ravehia no te faatitiaifaro i to ˈna haerea (hiˈo Deuteronomi 21:18-21). Ia noaa i te mau metua kerisetiano i te faatitiaifaro i taua fifi ra, e nehenehe noa ïa ta te mau matahiapo i te tahi taime, e ani atu ia ratou eaha te vahi apî i noaa mai ia ratou e e horoa ˈtu i te mau aˈoraa e te mau manaˈo faufaa mau, e tae noa ˈtu hoi i te tahi mau faaitoitoraa here mau.

²³ I te tahi râ hoi taime, e faaite mai te aparauraa i rotopu i te mau matahiapo e te mau metua e mea maitai aˈe ia putuputu amui ratou e te tamarii rave hara tei ore i taeahia te matahiti. A haamanaˈo noa ˈi ratou i te mau otia e te mau huru e au i te ui apî nei, e faaitoito ïa te mau tiaau i te haapii i te taata poro apî tei ore i bapetizohia, e te reira ma te mǎrû (Timoteo 2, 2:22-26). I te tahi mau taime, e papu-maitai-hia e aita oia e faaî faahou ra i te mau huru e titauhia no te riro ei taata poro e e tia hoi te reira ia faaarahia ˈtu i te amuiraa na roto i te hoê parau faaararaa tano maitai.

24. a) Noa ˈtu â ïa e ua rave te hoê tamarii tei ore i taeahia te matahiti, i te hara, eaha te mea tia i to ˈna mau metua ia rave, e e nafea ïa ratou? b) Nafea teie faaueraa tumu e nehenehe ai e tano i te hoê tamarii tei ore i taeahia te matahiti e tei tiavaruhia?

²⁴ Eaha ïa ta te mau metua e nehenehe e rave i muri iho i nia i taua tamarii ra tei ore i taeahia i te matahiti, no te tauturu ia ˈna ia hoˈi faahou mai i nia i te eˈa tia ra? E hopoia noâ na ratou ta ratou tamarii, noa ˈtu â ïa e aita oia e faaî faahou ra i te mau huru e titauhia i te taata poro tei ore i bapetizohia, aore ra ua tiavaruhia oia mai te peu e ua rave oia i te hara i muri aˈe i to ˈna bapetizoraahia. Mai ia ratou e tamau â i te horoa ˈtu na ˈna i te maa, te ahu e te nohoraa, e horoa atoa ˈtu ratou na ˈna i te haapiiraa e te aˈoraa ia au maite i te Parau a te Atua (Maseli 6:20-22; 29:17). E nehenehe atura ïa ta taua mau metua here mau ra e faanaho i te hoê haapiiraa bibilia e o ˈna, noa ˈtu e ua tiavaruhia oiaf. Peneiaˈe oia i te fanaˈo rahi mai i te haapiiraa ia haapii raua e o ˈna. Aore ra, e nehenehe raua e opua e nehenehe ta ˈna e tamau â i te amui mai i roto i te haapiiraa fetii. Noa ˈtu â ïa e ua atea ê oia i te eˈa tia, mea hinaaro na raua e ite ia ˈna ia hoˈi mai ia Iehova ra, mai te tamaiti i haere i te fenua roa ra ta Iesu i faahiti i roto i te hoê o ta ˈna mau parabole. — Luka 15:11-24.

25. No te aha te “feia faaroo ore” e haapaohia ˈi e e tauturuhia ˈi ma te here mau i to tatou nei tau?

²⁵ Te tapao e titauhia ra e ta tatou ohipa pororaa e ohipa haapiiraa, te tautururaa ïa i to tatou mau taata-tupu ia riro mai ei mau taata haamori oaoa o te Atua mau ra. Ua hinaaro aˈera hoi ‘te feia faaroo ore e te ite ore’ no Korinetia e ‘tipapa i raro e e haamori i te Atua, i te na ôraa e, tei roto mau â te Atua ia outou.’ (Korinetia 1, 14:25). Auê hoi tatou i te oaoa i teie tau, ia ite atu tatou i te taata e rahi noa ˈtura teie e haere atoa mai nei e haamori i te Atua! O te hoê tupuraa faahiahia mau hoi teie o te parau a te mau melahi e na ô ra e: “Ia haamaitaihia te Atua i nia i te raˈi teitei, ei hau to teie nei ao, e ia ite auhia mai te taata nei [aore, te mau taata ta te Atua e farii]!” — Luka 2:14.

[Nota i raro i te api]

Te haamanaˈo ra anei outou?

◻ Eaha te huru o te mau kerisetiano i nia i te feia “faaroo ore ra” e amui mai nei i roto i te mau putuputuraa?

◻ Ia hinaaro te hoê taata e haapiihia ra i te Bibilia e apiti mai i roto i te ohipa pororaa, eaha ïa te ohipa e ravehia e te mau matahiapo, e eaha ˈtura ïa te hopoia ta te taata e haapiihia ra e farii?

◻ Eaha te tia ia ravehia ia rave te hoê taata poro bapetizo-ore-hia i te hoê hara ino roa?

◻ Noa ˈtu e e rave te hoê tamarii tei ore i taeahia te matahiti e o te ora atoa ra hoi i pihai iho i to ˈna metua, i te hoê hara ino roa, eaha ïa te tauturu ta to ˈna metua e ta te mau matahiapo e nehenehe e horoa mai na ˈna?

[Hohoˈa i te api 25]

Noa ˈtu â ïa e aitâ oia i oti atura i te bapetizohia, te taata e hinaaro noa ˈtu e riro mai ei taata poro, te rave ra ïa oia i te hoê taahiraa avae rahi roa ˈtu â, e titau i te tahi mau hopoia, i nia i te eˈa e tauturu ia ˈna e fariihia mai ai oia e te Atua.