E faaoaoa te faaiteraa tapǔpǔ
1 Ia ˈna i tono e 70 o ta ˈna mau pǐpǐ ia poro, ua haapii atu Iesu i tei titauhia ia ratou ia parau. Ua haaputuputu oia ia ratou ei tatoopiti e horoa ˈtura i te hoê tuhaa fenua taa maitai e tia ia ravehia. Ua faatupu teie mau faanahoraa i to ratou oaoa. (Luka 10:1-17) I teie mahana atoa, e faaineine, e faanaho e e faaitoito te faaiteraa tapǔpǔ i te mau tavini a te Atua no te pororaa.
2 Te horoa ra te mau matahiapo i te hiˈoraa: E tuhaa faufaa roa ta te mau matahiapo i te tautururaa i te taata taitahi ia apiti tamau i roto i te pororaa. Na te tiaau no te taviniraa e rave i te mau faanahoraa no te pororaa i roto i te hebedoma. Na te tiaau taitahi no te haapiiraa buka te hopoia e faanaho i te ohipa a ta ˈna pǔpǔ, i te hopea hebedoma iho â râ. Ia putuputu mai te taatoaraa o te amuiraa no te pororaa, i muri aˈe paha i te haapiiraa o Te Pare Tiairaa, e haapao te tiaau taitahi no te haapiiraa buka i ta ˈna pǔpǔ e tia ˈi.
3 ‘Ma te tia e ma te nahonaho’: E haamata te taata faanahohia no te faatere i te putuputuraa no te pororaa i te hora tia e no te hoê roaraa 10 e tae atu i te 15 minuti e tia ˈi. E mea maitai aˈe e ia faanaho oia i te mau pǔpǔ e ia horoa ˈtu i te hoê tuhaa fenua (aore ra e haapaohia mai te reira e te mau tiaau no te haapiiraa buka, mai ta tatou i faahiti mai nei) hou a faaoti ai i te pure. Eita ïa te feia poro e ruru i roto i te tuhaa fenua, o te nehenehe hoi e faaino i te tura o ta tatou taviniraa. Te ohipa atoa ra ïa tatou ia au i te aˈoraa a te aposetolo Paulo: ‘E rave i te mau mea atoa ra ma te tia e ma te [nahonaho].’ (Kor. 1, 14:40; MN) E turu te feia poro atoa i te nahonaho ia tae mai i te hora tia, ia haa amui roa ˈtu e te taata e faatere ra i te putuputuraa e ia haere oioi i roto i te tuhaa fenua ia faaoti te reira e tia ˈi.
4 Haaputuputuhia i roto i te auhoêraa: E ravea maitai roa te faaiteraa tapǔpǔ no te haamatau i te tahi atu mau melo o te amuiraa. Noa ˈtu e eita e opanihia ia faanaho tatou na mua ˈˈe e poro e te tahi taata, e fanaˈo atoa tatou i te mau haamaitairaa ia apiti tatou i te mau putuputuraa no te pororaa ma te ore e rave i te mau faanahoraa taa ê na mua ˈˈe. Peneiaˈe e anihia ia tatou ia apiti atu i te hoê melo aita tatou i matau maitai, o te tauturu ïa ia tatou ia “mahora noa” to tatou here.—Kor. 2, 6:11-13.
5 E faaitoito e e tahoê te faaiteraa tapǔpǔ ia tatou te “feia rave ohipa atoa i te parau mau.” (Ioa. 3, 8) Ia apiti hau atu â ïa tatou!