Ua tuuhia mai te parau apî maitai
1 Auê tatou i te fanaˈo e i te tuuraahia mai te parau apî maitai a te Atua! (Tes. 1, 2:4) Noa ˈtu e aita vetahi e farii ra i taua poroi puai ra, te anaanatae nei te feia aau tia i te reira, mai i te hoê hauˈa noˈanoˈa au roa. (Kor. 2, 2:14-16) No te feia e farii i te parau apî maitai e e auraro atu, o te ora ïa. (Roma 1:16) E nafea tatou e hiˈo ai i tei tuuhia mai?
2 Iesu e te mau aposetolo: Ua tuu Iesu i te pororaa i te parau apî maitai i te parahiraa matamua. (Luka 4:18, 43) Noa ˈtu to ˈna rohirohi e to ˈna poia, ua turai to ˈna here i te taata e to ˈna haafaufaaraa i te poroi ia ˈna ia faaite i te reira ia vetahi ê. (Mar. 6:30-34) Na roto i ta ˈna mau parau e to ˈna hiˈoraa, ua haamau oia i roto i te feruriraa o ta ˈna mau pǐpǐ i te faufaaraa ia poro.—Mat. 28:18-20; Mar. 13:10.
3 Mai ia Iesu, ua poro te mau aposetolo ma te itoito rahi i te poroi o te Basileia. Noa ˈtu e ua pǎpǎihia aore ra ua faauehia ia ratou ia mamû, ‘aita ratou i tuutuu i te aˈo e i [te faaite i te parau apî maitai].’ (Ohi. 5:40-42; MN) Ua rave te aposetolo Paulo i taua ohipa ra ma te rohirohi ore. (Kor. 1, 15:9, 10; Kol. 1:29) Ua faaau oia i te fanaˈoraa taa ê e faaite i te parau apî maitai i te hoê tarahu ta ˈna e faahoˈi atu i to ˈna taata-tupu, e ua ineine oia i te haapae i to ˈna iho maitai no te haapao i te reira.—Ohi. 20:24; Roma 1:14-16.
4 Ta tatou fanaˈoraa taa ê i teie mahana: Ma te mauruuru no te ohipa moˈa i tuuhia mai, e imi tatou i te mau ravea no te faarahi i ta tatou apitiraa i roto i te pororaa. (Roma 15:16) I nia i to ˈna parahiraa turairai, e parahi Edward i te uputa o te hoê hotera e e paraparau oia no nia i to ˈna faaroo i te mau hoani. Teie râ, no to ˈna hinaaro e rave hau atu â, ua ani oia ia hamanihia te hoê piha iti i nia i te paˈepaˈe o te hoê pereoo uta tauihaa. Maoti taua pereoo ra, ua tavini oia ei pionie e rave rahi matahiti i te maoro, ma te ratere e mau tausani kilometera i te atea. Mai ia Edward, e rave rahi o te faanaho nei ia ratou no te apiti hau atu â i roto i te haaparareraa i te parau apî maitai.
5 Mai ia Iesu e te mau aposetolo, ia tamau noa tatou i te haafaufaa i te pororaa! Ia na reira tatou, e faaite ïa tatou i to tatou here ia vetahi ê e to tatou mauruuru no te parau apî maitai o tei tuuhia mai ia tatou.