A rave i te maitai, e aruehia ïa outou!
1 “E hau to roto ia ratou aita vau i ite aˈenei i roto i te tahi atu â mau haaputuputuraa.” “Mea au na matou e farii mai i tera pǔpǔ.” O tera mau â te huru o te mau tatararaa maitatai e rave rahi a te mau taata ta tatou i farerei i te taime o te mau tairururaa mataeinaa i te matahiti i mahemo, te faaite ra tera mau tatararaa e e roo maitai to tatou ei pǔpǔ. (Mas. 27:2; Kor. 1, 4:9) I te pae hopea râ, o Iehova te aruehia ra. (Mat. 5:16) I teie â matahiti, e riro te tairururaa mataeinaa “Orometua haapii i te Parau a te Atua” ei taime maitai roa no te arue i te Atua.
2 I te mau matahiti atoa, e haamanaˈohia mai tatou ma te hamani maitai eaha te haerea e tano i te tairururaa. No te aha? No te mea te ino noa ˈtura te huru feruriraa, te faaahuraa e te haerea o te ao, e eita tatou e hinaaro e pee i te reira. Eita tatou e hinaaro ia ino to tatou roo maitai. (Eph. 2:2; 4:17) No reira, e haamanaˈo anaˈe i te tahi mau faaararaa i muri nei.
3 E rave anaˈe i te maitai—i to tatou vahi faaearaa aore ra i te tahi atu vahi: Ua matauhia tatou ei mau taata haerea tia. (Heb. 13:18) Eita tatou e tunu i te maa i roto i te piha taotoraa mai te peu e eita e faatiahia. E faaite noa tatou e mea ite tatou i te peu e mea faaoromai tatou i roto i to tatou mau taairaa e te feia i farii mai ia tatou.
4 Ua maere atoa te tahi feia mataitai i to ratou iteraa e mea ite ta tatou mau tamarii i te peu e mea faaroo. (Eph. 6:1, 2) E te mau metua, a hiˈopoa na i ta outou mau tamarii ia ore ratou e haapeapea ia vetahi ê. E tia ia tatou paatoa ia haapao maitai eiaha e tapiri puai i te opani e eiaha e maniania i te maororaa po iho â râ.
5 E rave anaˈe i te maitai—i te tairururaa: Ua faaarahia mai e aita te vetahi i farii i te haa amui e te feia haapao i te fariiraa taata aore ra ua paraparau ratou ma te hoê huru eita e tano i te Kerisetiano. Aita te tahi pae i hinaaro e pee i te mau faaueraa a te mau taeae e ua tapea ratou i to ratou pereoo i te mau vahi mea opanihia. Eita mau â ïa te hoê haerea miimii e faaite e e mau taata tatou o te rave i te maitai, e eita atoa te reira e arue i te Atua ra o Iehova. No reira, e faaite anaˈe i te hoê haerea hamani maitai, te faaoromai e te haa amui.—Gal. 5:22, 23, 25.
6 I te poipoi, i te hora 8, i te tatararaahia te mau opani, ua itehia te tahi mau taeae e mau tuahine i te hororaa, te turairaa te tahi i te tahi ia noaa mai te mau parahiraa “maitai roa ˈˈe.” Ua pepe atoa vetahi pae i roto i taua mau poporeraa ra. Ua faaitoitohia tatou e faaineine i te hoê maa mâmâ no te hora 12, eita râ e tano ia tuu i te mau airaa maa i te vahi tapearaa pereoo no te faatupu i te tamaaraa rahi. E nehenehe te reira e faaauhia i te mau tamaaraa a te feia mataitai matauhia i roto i te mau haa tuaro.
7 E rave anaˈe i te maitai—na roto i te araraa i to tatou faaahuraa: I te matahiti i mahemo, i muri aˈe i te hoê o ta tatou mau tairururaa mataeinaa, ua papai te papai vea rahi o te hoê oire rahi e: “Te mea ta ˈu i maere roa i roto i te mau Ite, o to ratou ïa haerea. Mea oaoa ia ite i tera rahiraa taata e haerea tura e te faatura to ratou! Tau hanere fetii faaahu maitai no te mau nunaa e te mau opu fetii atoa te tomo mǎrû noa ra i nia i te tahua tuaro. Area te haerea o te rahiraa o te feia i matau i te haere mai i nia i tera tahua, mea ê roa ïa. Oia mau, mea ê roa te mau Ite i te rahiraa o te taata. Te mea peapea, te pee noa ˈtu ra te taata i te mau haerea tano ore ia amui ratou. . . . Area te mau Ite no Iehova, mea oaoa ïa ia hiˈo atu ia ratou.” No reira, e ara anaˈe eiaha e faaino i te huru pae varua o te tairururaa na roto i to tatou faaahuraa aore ra to tatou haerea.—Phil. 1:10; Tim. 1, 2:9, 10.
8 E rave anaˈe i te maitai—i te bapetizoraa: E hinaaro te feia e bapetizohia e faatura roa i tera taime. Ia oomo tatou i te hoê ahu hopuraa pape au noa, e faaite ïa tatou e ua ite tatou e mea moˈa tera ohipa. Mea maitai roa ia hiˈo faahou te mau Ite e faatere ra i te mau haapiiraa bibilia e te feia haapii i te tumu parau ra “Mau uiraa a te feia taio” i roto i Te Pare Tiairaa o te 1 no Eperera 1995, na mua ˈˈe i te tairururaa.
9 Na te hoê faaahuraa e te hoê haerea o te faaite hoi i to tatou paieti i te Atua, e haapapu atu â i ta tatou mau tiaturiraa Kerisetiano, e e ite oioi aˈe te feia haavare ore e tera te parau mau. No reira, ‘e rave tamau anaˈe i te maitai,’ ia arue-noa-hia tatou ia haere tatou i te tairururaa mataeinaa “Orometua haapii i te Parau a te Atua.”—Roma 13:3.