Te haerea e faahanahana i te Atua
1. Ei Ite no Iehova, e nafea e itehia ˈi e te haere ra tatou i te tairururaa mataeinaa?
1 Mea ohie no vetahi ê ia ite e te haere ra tatou i te tairururaa mataeinaa. I te mau oire e faatupuhia ˈi te reira, e pinepine e faaarahia te huiraatira eaha te tupu. No te tairururaa, e î te mau hotera e fare tamaaraa i te taata. Ia pinehia te tareta iˈoa e ite te feia o reira e e Ite no Iehova tatou. E tauturu mai to muri nei haamanaˈoraa ia faahanahana i te Atua maoti to tatou haerea maitai i roto i te oire e tupu ai te tairururaa.—Pet. 1, 2:12.
2. E nafea ia faahanahana i te Atua maoti to tatou faaahuraa au maitai i te tairururaa?
2 Faaahuraa au maitai: E pinepine e maere te taata e hiˈo maira i to tatou faaahuraa maitai a haere ai i te tairururaa. E na reira atoa anaˈe i te mau taime atoa, i te hotera, te fare tamaaraa e ia hoohoo tatou. E taui paha ïa to vera ma manaˈo no nia i te mau Ite no Iehova. Noa ˈtu e mea taa ê tera mau tupuraa, e mea tia ia au maitai, ia tura noa to tatou faaahuraa eiaha râ ia haapaoraa ore. E itehia ïa to tatou taa-ê-raa ia vetahi ê. (Roma 12:2) Hau atu â, e pine anaˈe i te tareta tairururaa no te faaite i te taata o reira eaha te tupu, no te poro e ia nehenehe te tahi atu hoa faaroo e ite mai.
3. E nafea ia faaite i te faaoromai e te faatura?
3 Faaoromai e faatura: I teie mahana, e rave rahi taata mauruuru ore e te haapao noa ia ratou. Auê ïa i te au ia ite mai te taata, te mau rave ohipa o te hotera e fare tamaaraa i to tatou faaoromai e faatura! (Tim. 2, 3:1-5) Ia tapao tatou i te parahiraa aore ra ia haere e tii i te mau papai apî, e imi anaˈe i to vetahi ê maitai eiaha râ to tatou. (Kor. 1, 10:23, 24) I te tairururaa matamua ta ˈna i haere, ua parau te tahi taata “E ere te mau oreroraa parau ta ˈu e haamanaˈo ra o te haerea râ o te mau Ite no Iehova.”
4. Mai te peu e e nehenehe, no te aha e horoa ˈi i te rima tauturu i te tairururaa?
4 Rima tauturu: E feruriraa horoa noa iho â to te Kerisetiano mau. (Sal. 110:3) E nehenehe anei oe e horoa i te rima tauturu i te tairururaa? No te tamâ i te vahi tairururaa, ua na reira e 600 tiahapa taeae e tuahine. Ua na ô te mau rave ohipa o tera vahi: “Teie te ohipa maere roa ˈˈe ta matou i ite aˈenei! Mea fifi ia manaˈo e e rima tauturu anaˈe ratou.” Te tiai ru nei ïa tatou i te tairururaa mataeinaa 2013 eiaha no te faaroo e te haapii noa no nia i te Atua no te faahanahana atoa râ ia ˈna.
[Tumu parau tarenihia i te api 3-6]
Haamanaˈoraa no te tairururaa mataeinaa 2013
◼ Hora: E matara te opani i te hora 8. Ia taˈi te upaupa na mahana e toru i te hora 9:20, e haere paatoa anaˈe e parahi. E nehenehe ïa te porotarama e haamata ma te tura. I te Mahana pae e te Mahana maa, e hope te rururaa i te hora 4:50. I te Tapati râ, tei te hora 3:35.
◼ Vairaa pereoo: I te mau vahi tairururaa atoa i reira te pereoo e tiaihia ˈi, e nehenehe e tomo atu ma te tamoni ore. O te mau pereoo e tae matamua mai te faanahohia na mua. Mea taotiahia te vairaa pereoo, a rave noa ïa hoê pereoo. Mai te peu e e parau faatia a te ture aore ra a te tomite tairururaa, e nehenehe e tapea i te vahi faataahia no te huma mero.
◼ Parahiraa: A tapao noa no te feia anaˈe e noho ra i ǒ oe, tei na muri mai ia oe e no ta oe mau piahi Bibilia. No te iti o te mau parahiraa no te ruhiruhia e taata maˈimaˈi, eita te utuafare atoa e nehenehe e parahi atu i pihai iho. E faatiahia râ te taata haapao.—Kor. 1, 13:5.
◼ Tamaaraa i te avatea: A hopoi mai i ta outou maa. Eiaha e faarue i te vahi tairururaa i te taime faafaaearaa i te avatea no te haere e hoo mai i te maa. E nehenehe e rave i te hoê farii faatoetoeraa maa nainai a tuu atu ai i raro aˈe i te parahiraa. Mea opanihia te farii faatoetoeraa maa rahi e te mau farii hiˈo.
◼ Ô: E nehenehe e faaite i to tatou mauruuru no te mau faanahoraa o te tairururaa ma te horoa noa i te ô no te ohipa na te ao nei. Ia papaihia i nia i te parau moni atoa: “Association Les Témoins de Jéhovah.”
◼ Raau: A hopoi mai i te raau. Eita e horoahia i te vahi tairururaa. Mai te hotera, e faaruehia te mau nira patia a te feia maˈi omaha tihota i roto i te farii faataahia no te pehu atâta eiaha râ i roto i tei matau-noa-hia.
◼ Tiaa: I te mau matahiti atoa, mea rahi te pepe nei. A oomo mai ïa i te tiaa au maitai e te tano i te mau vahi atoa.
◼ Feia eita e faaroo maitai: E haapurorohia te porotarama i nia i te ratio i te vahi tairururaa. E rave ïa te feia e hinaaro i ta ratou taoˈa nainai o te haru i te ratio e te taoˈa faaroo tamauhia i roto i te tariˈa.
◼ Pereoo turairai tamarii e parahiraa tufetu: E opanihia te mau pereoo turairai tamarii e parahiraa tufetu i te vahi tairururaa. E faatiahia râ ia tamau i te parahiraa aiû i pihai iho na metua.
◼ Faanoˈanoˈa: Ia faatupuhia te tairururaa i te hoê vahi e tapirihia te opani, ia ore te feia maˈi aho pau aore ra te tahi atu e fifi eiaha e pîpî faarahi i te monoˈi e te faanoˈanoˈa hauˈa puai. Ma te na reira te hamani maitai atu ra ïa tatou.—Kor. 1, 10:24.
◼ Veuillez suivre l’intérêt (S-43): Ia poro tatou ma te faanaho-ore-hia i te taata i anaanatae mai, e faaî anaˈe i te api parau Veuillez suivre l’intérêt. E nehenehe e horoa ˈtu i tei haapao ra i te mau buka. Aita anaˈe, i te papai parau ïa o ta outou amuiraa.
◼ Fare tamaaraa: A faahanahana i te iˈoa o Iehova ma to outou haerea maitai i te fare tamaaraa. Ei faaahuraa e au i te Kerisetiano to tatou e tia ˈi. I vetahi mau fenua, e vaiihohia te tahi moni haamauruuru na te tuati.
◼ Hotera:
(1) Eiaha e tarahu i te mau piha hau aˈe i te hinaaro-mau-hia, e a faatura i te rahiraa taata fariihia no te hoê piha.
(2) No te tahi tupuraa taa ê e faaore paha oe i te tarahuraa, a faaara oioi atu ïa i te hotera.—Mat. 5:37.
(3) I te hotera, ia faaohipa oe i te tareta moni, e tapeahia te tahi tino moni ia tuino noa ˈtu oe i te taihaa. I muri aˈe noa to oe faarueraa i te hotera e aufau-taatoa-hia ˈi te piha tarahu.
(4) A rave noa i te hoê turairaa taihaa e a faahoˈi oioi atu ia nehenehe vetahi ê e faaohipa.
(5) I vetahi fenua, e mea tano ia vaiiho i te tahi moni haamauruuru na te taata amo taihaa e te vahine tamâ piha.
(6) Eiaha e tunu i te maa i roto i te mau piha mai te peu e eita e faatiahia.
(7) E vai faito noa a rave ai i te maa e pûpûhia na te hoani o te hotera (maa, taofe aore ra pape paari).
(8) A faaite i te hotu a te varua i nia i te mau rave ohipa o te hotera i te mau taime atoa. E rave rahi hoani ta ratou e haapao. E oaoa ïa ratou ia faaite tatou i te mǎrû, te faaoromai, e te haerea e au.
(9) I te hotera, ia haapao noa te metua i ta ratou tamarii i te mau vahi atoa. I te vahi hopuraa pape anei, fariiraa taata, piha faaetaetaraa tino e te vai ra ˈtu â.
◼ Rima tauturu: Ia hinaaro noa ˈtu te tahi, a farerei atu i te mau taeae e haapao ra i tera tuhaa i te tairururaa. E farii-atoa-hia te tamarii i raro aˈe i te 16 matahiti ia haa oia e to ˈna metua, taata haapao aore ra tei faatiahia.