Pahonoraa i ta outou mau uiraa

◼ Eaha te taime e tano no te haamau i te hoê haapiiraa buka hau?

E tia ia faaoti i te haamau i te hoê haapiiraa buka apî i te taime e titauhia ˈi te reira no te faaiti mai i te mau taata e haere mai i nia i te faito hoê ahuru ma pae aˈe i roto i te mau haapiiraa buka atoa, tae noa ˈtu i tei putuputu i te Piha a te Basileia. No te aha teie faaueraa?

Mai te peu e e faaitihia mai te pǔpǔ haapiiraa buka, e nehenehe ïa te taeae faatere e haapao maitai aˈe i te mau taata atoa o te haere mai. Hau atu â, e nehenehe te feia e haere mai e pahono pinepine aˈe i roto i te hoê tupuraa eita ratou e mǎtaˈu i te faaite i to ratou faaroo i mua i te taata. (Heb. 10:23; 13:15) Ia putuputu te mau pǔpǔ iti i te mau vahi rau o te tuhaa fenua a te amuiraa, e tae ohie mai ïa te taata i te haapiiraa buka e i te mau putuputuraa no te pororaa. Ua ite te tahi mau amuiraa o tei haamau i te tahi mau haapiiraa buka apî e ua maraa te numera o te feia atoa i haere mai.

I roto i te tahi mau tupuraa taa ê, mea faufaa paha ia haamau i te tahi haapiiraa buka apî, noa ˈtu e e pǔpǔ iti roa. Tera paha te huru tupuraa o te tahi mau vahi atea a te amuiraa aore ra mea nainai roa anaˈe te mau vahi fariiraa aore ra aita e parahiraa e tano. Mai te peu e e hinaarohia, e nehenehe e haamau i te hoê haapiiraa buka i te ao no te mau taeae e mau tuahine ruhiruhia, no te feia e rave ra i te ohipa i te po aore ra no te mau tuahine e ere ta ratou tane i te Ite.

Tau aˈe feia poro itoito e te puai i te pae varua, tae noa ˈtu te hoê taeae faatere e te hoê taeae taio aravihi, i roto i te mau haapiiraa buka atoa, e tia ˈi. Ia ineine te mau taeae i te haapao i te mau hinaaro o ta ratou amuiraa i roto i taua tuhaa ra.

E nehenehe te mau matahiapo e turu i te mau haereraa i mua a te amuiraa ma te ara maite e mea au noa te faito rahi o te mau haapiiraa buka, e e tupu te mau putuputuraa i te mau vahi e tano, e e tâuˈa-mau-hia te mau hinaaro pae varua o te feia e haere mai. Mai te peu e e nehenehe, e tia ia haamauhia te tahi mau haapiiraa buka apî ia noaa rahi atu â i te taata taitahi te mau maitai o taua faanahoraa pae varua otahi roa ra. E nehenehe anei ta outou e farii i te hoê haapiiraa buka i ǒ outou? E rave rahi o tei fanaˈo i te mau haamaitairaa pae varua.