Ia tahoê atu tatou e te taeae aratai i te haapiiraa buka
1 E tuhaa faufaa roa to te haapiiraa buka no te faariro ia tatou ei mau tavini o te parau apî maitai aravihi aˈe. E tumu iho â e ia vai nainai noa te mau pǔpǔ, ia nehenehe teie tuatapaparaa i te Bibilia e te hoê buka a te Taiete ia tupu ma te mahanahana e te aufetii. Mea maitai roa teie huru tupuraa no te fanaˈo i te hoê haamataroraa o te tauturu ia tatou ia poro ma te aravihi atu â. I roto i te haapiiraa buka, mea ohie ia faaitoito te tahi i te tahi e ia horoa ˈtu i te ara-maite-raa taa ê. Nafea ia tahoê maite atu e te taeae aratai e ia huti mai i te faufaa o teie faanahoraa maitai roa?
2 Ia apiti tatou i roto i te pororaa ma te itoito: Hoê o te mau hopoia faufaa roa ˈˈe a te taeae e faatere ra i te hoê haapiiraa buka, o te tautururaa ïa i te melo tataitahi o te pǔpǔ ia apiti ma te itoito i roto i te pororaa. No nia i teie tuhaa, te faahaamanaˈo maira te buka Ta tatou taviniraa (farani), api 44, e “e riro to ˈna apitiraa ma te tamau, te itoito e te aau tae i roto i teie ohipa, i te ite-atoa-hia i nia i te tahi atu mau taata poro”. E poro te taeae aratai i te tahi taime e te mau melo o to ˈna utuafare, teie râ, e oaoa atoa oia i te haere na muri i te tahi atu mau taata poro i roto i te mau tuhaa taa ê o te taviniraa ia au i ta ˈna tabula ohipa. E nehenehe anei ta tatou e turu tamau i te mau putuputuraa no te pororaa? Eita e ore e e oaoa roa te taeae aratai i ta tatou haapiiraa buka e te tahi atu mau taata poro.
3 E tupu te mau putuputuraa no te pororaa i te mau vahi e tano ia nehenehe te taatoaraa e apiti ma te itoito i roto i te taviniraa. Ma te haapao atoa i te mau huru tupuraa o te fenua, e tia i te pǔpǔ tataitahi ia haamata oioi noa i te poro. E rave rahi mau taata poro e mau pionie o te fanaˈo nei i te mau faahopearaa maitatai ia tamau noa ratou i te poro i muri aˈe i te hora ahuru ma piti i te hopea hebedoma.
4 Te hinaaro ra anei tatou e ia tauturuhia mai tatou i roto i te hoê tuhaa o te taviniraa? E nehenehe te taeae aratai i ta tatou haapiiraa buka e ani i te hoê taata poro aravihi o te pǔpǔ ia poro na muri ia tatou. I te hopea avaˈe, ia tuu oioi noa tatou i ta tatou tabula taviniraa, e tia ˈi. E mauruuru roa te taeae aratai i te haapiiraa buka e tae noa ˈtu te papai parau i to tatou tahoêraa ˈtu i roto i teie tuhaa faufaa roa. — Hiˈo Luka 16:10.
5 I te tere farereiraa a te tiaau no te taviniraa: Mea matauhia ia haere te tiaau no te taviniraa e farerei i te hoê haapiiraa buka i te mau avaˈe atoa no te faaitoito i te feia poro ia rohi hau atu â i roto i te taviniraa. E horoa tatou i te ara-maite-raa taa ê i te oreroraa parau e 15 minuti o ta ˈna e vauvau i te hopea o te haapiiraa; e mau aˈoraa papu maitai teie o te tauturu i te pǔpǔ ia haere i mua i roto i te mau tuhaa taa ê o te pororaa. Te hinaaro atoa ra te tiaau no te taviniraa e poro e te mau melo taa ê o te haapiiraa buka i te hopea hebedoma. E huti anaˈe na tatou i te faufaa o teie faanahoraa taa ê; e faufaahia ïa tatou i to ˈna aravihi e to ˈna ite i roto i te taviniraa.
6 Mai te peu e e horoa tatou iho i te hiˈoraa na roto i te tahoêraa ˈtu e mai te peu e e tauturu tatou ma te hinaaro ru i te feia mea iti aˈe to ratou aravihi, e rave ïa tatou e ia tupu te hoê huru mahanahana e te auhoa i rotopu i te haapiiraa buka, no te mea “e hamani maitai tatou i te taata atoa, ia rahi atu râ i to te fetii faaroo ra”. — Gal. 6:10.