Te horoa ra te haapiiraa buka i te hoê haapiiraa maitai roa
1 E tiaraa faufaa roa to te haapiiraa buka i roto i te porotarama haapiiraa a te faanahonahoraa a Iehova. Ua tatuhaahia te mau haapiiraa buka i nia i te taatoaraa o te tuhaa fenua, ia nehenehe te taatoaraa ia haere ohie noa mai. E farii paha te mau taata e anaanatae ra i te haere i te haapiiraa buka mai te peu e tei pihai iho noa mai i to ratou fare.
2 Te arahia ra e ia ore te mau pǔpǔ ia rahi mai. E nehenehe ïa te taeae aratai e horoa i te tauturu iho i te taata tataitahi. E ere hoê â ohieraa te papuraa to te taatoaraa. Mai te peu e aita te hoê taata e taa ra i te hoê manaˈo, noa ˈtu e ua faaineine oia ia ˈna, e tuatapapa hohonu ïa te taeae aratai i te reira e o ˈna i muri aˈe i te haapiiraa. Hau atu, i roto i te hoê pǔpǔ nainai, e nehenehe tatou e horoa rahi i te mau pahonoraa e e taio i te mau irava bibilia. Te apiti tamau ra anei tatou i te aparauraa? Te tutava ra anei tatou i te pahono na roto i ta tatou mau parau? No to tatou iho maitai e to vetahi ê, eiaha tatou e haamarirau i te pahono. I roto i ta tatou faaineineraa, ia faaohipa tatou i to tatou feruriraa ia ite e nafea tatou iho ia faaohipa i te tahi mau manaˈo o te haapiiraa.—Heb. 5:14.
3 Ma te hiˈopoa i te huru haapiiraa a te taeae aratai i te haapiiraa buka, e nehenehe atoa tatou e haapii i te aratai i te mau haapiiraa bibilia anaanatae atu â e o te horoa i te mau haapiiraa. Na te hoê taeae aravihi e taio i te mau paratarapha, e i muri iho e horoahia te mau uiraa. Te faaitoito ra te taeae aratai i te feia i putuputu mai ia paraparau puai. Mai te peu e e taime, e tamata oia i te ani i te mau manaˈo i nia i te tahi mau irava bibilia no te haamatara mai i te faaohiparaa (hiˈo Nehemia 8:8). E nehenehe o ˈna iho i te tahi mau taime e haamaramarama i te hoê manaˈo aore ra e ani i te mau uiraa hau no te haamatara mai i te hoê manaˈo faufaa. E nehenehe te hoê hiˈoraa aore ra te hoê faahiˈoraa e tauturu ia tatou ia rave i te taairaa i roto i te mau tumu parau e to tatou oraraa.
4 E mea iti roa te feia e putuputu mai i roto i te tahi mau haapiiraa buka. Te haere tamau ra anei tatou? Ia ore anaˈe, aita ïa tatou e fanaˈo ra i te hoê faanahoraa faufaa. E mea na roto hoi i te haapiiraa buka o Iehova e faaite ai e te tâuˈa ra oia ia tatou (Petero 1, 5:7). Te hinaaro nei o ˈna e ia haere to tatou ite i mua e te paari no te haapuai ia tatou i te pae varua. E hinaaro râ o Satani e faataupupu i to tatou tupuraa i te pae varua e e haaparuparu ia tatou; e iti aˈe ïa to tatou faufaa i mua ia Iehova e i ta ˈna faanahonahoraa. Eiaha roa ˈtu te reira ia tupu mai! Ia vaiiho tatou i te mahanahana e te here i roto i taua pǔpǔ piri ra ia haaputapû i to tatou mafatu e ia turai ia tatou ia tamau i te arue ia Iehova.—Hiˈo Salamo 111:1.
5 Te ravehia nei te mau putuputuraa no te pororaa i roto i te rahiraa o te mau haapiiraa buka. E nehenehe te reira e ravehia i te ropuraa o te hebedoma, i te hopea hebedoma aore ra i te ahiahi. E hiˈo ïa te taeae aratai e ravai anei te mau tuhaa fenua e e haere mai hoê taeae no te haapao i te ohipa. Eita te mau putuputuraa no te pororaa e mairi e 10 e tae atu e 15 minuti. E tuatapapa poto noa te taata e aratai ra i te irava mahana mai te peu e te tuea ra e te pororaa, e e horoa ˈtu ai i muri iho hoê aore ra e piti manaˈo papu no nia i te taviniraa, aore ra e faanaho i te hoê faahiˈoraa poto i nia i te buka e pûpûhia i te roaraa o te avaˈe.
6 Te tutava nei te taeae aratai i te roaraa o te tau e poro e te mau melo atoa o to ˈna pǔpǔ, no te horoa ˈtu ia ratou ra i te mau faaitoitoraa e te haapiiraa tano.—Hiˈo Mareko 3:14; Luka 8:1.