“E rohi hua anaˈe i te rohiraa maitai ra i te faaroo”
1 Ua faaitoito te aposetolo Paulo ia Timoteo ia ‘rohi hua i te rohiraa maitai i te faaroo.’ (Tim. 1, 6:12) Ua ora oia iho ia au i taua mau parau ra. I muri aˈe, ua parau oia ma te papu e ua aro oia i te hoê aroraa maitai. (Tim. 2, 4:6-8) I roto i te mau tuhaa atoa, ua rave oia i ta ˈna taviniraa ma te mǎtaˈu ore, ma te itoito e ma te faaoromai. Na roto i te peeraa i to ˈna hiˈoraa, e noaa ia tatou taua atoa tiaturiraa ra e te rave ra tatou i tei maraa ia tatou i roto i ta tatou aroraa no te faaroo Kerisetiano.
2 E rave anaˈe i te mau tutavaraa e titauhia: Ua rohi o Paulo i roto i te taviniraa. (Kor. 1, 15:10) Oia atoa tatou, ia imi tatou i te taata atoa e au i roto i ta tatou tuhaa fenua. (Mat. 10:11) Oia hoi, no te farerei i vetahi o ratou, e tia paha ia tatou ia ara oioi no te poro ia ratou i nia i te purumu, aore ra ia tamau noâ i ta tatou taviniraa e tae noa ˈtu i te taperaa mahana, i te ahiahi atoa, no te farerei ia ratou ua hoˈi mai anaˈe ratou i ǒ ratou.
3 Mea faufaa atoa te haavîraa ia ˈna iho e te hoê porotarama maitai ia tae mai i te hora tia i te mau putuputuraa no te pororaa e ta tatou haapiiraa buka. Ei hiˈoraa, i te mau hopea hebedoma atoa, e titauhia hoê hora, no te haere e no te hoˈi mai atoa, i te tahi mau melo no te utuafare o te Betela no te tere atu i roto i te tuhaa fenua a ta ratou amuiraa. E nehenehe tatou e haapopou vetahi mau utuafare aore ra vetahi feia poro o ta tatou amuiraa o te haere atea mai e o te tae mai râ i te hora tia. Ia peehia ta ratou mau tutavaraa e te nahoraa ta ratou e faaite ra e tia ˈi.
4 Oia atoa, e tia ia tatou ia hinaaro e haapao i te anaanatae atoa ta tatou e farerei ra i roto i ta tatou taviniraa. Ia vaiiho atoa tatou i te tahi mau papai i roto i te pororaa faanaho-ore-hia aore ra i nia i te purumu, e tia ia tatou ia tutava i te ani i te vahi nohoraa aore ra te numera niuniu o te taata ta tatou i paraparau no te faahotu noa i te anaanatae e te haamata i te hoê haapiiraa Bibilia.
5 Ia haere tamau tatou i roto i ta tatou taviniraa: Mea tamau e mea haapao maitai Paulo i roto i ta ˈna pororaa. (Roma 15:19) E o outou? Te poro tamau ra anei outou? Ua poro aˈena anei outou i teie avaˈe? E hinaaro te mau taeae faatere i te haapiiraa buka e ia apiti te mau melo atoa o ta ratou pǔpǔ i roto i te taviniraa i te avaˈe Atete. E tauturu ratou ia outou ia na reira.
6 Ma te pee i te hiˈoraa o Paulo i te paruru-maite-raa i te parau apî maitai, e tamau tatou i te ‘rohi hua i te rohiraa maitai i te faaroo.’