Te faaoromai ra anei outou?
1 “Aita ˈtu o ˈu oaoa rahi maori râ . . . e te haapao ra tau mau tamarii i te parau mau.” (Ioa. 3, 4) Ua faaoaoa rahi te faaoromai o te mau tamarii pae varua a Ioane ia ˈna. Auê ïa to tatou Metua i te raˈi i te oaoa atoa ia ite e mau mirioni o ta ˈna mau tamarii no a muri aˈe ‘e haapao ra i te parau mau’!—Mas. 23:15, 16; 27:11.
2 A tamau noa ˈi te nunaa o te Atua ei pǔpǔ i ta ˈna ohipa Kerisetiano ma te itoito, ua faaiti mai vetahi i ta ratou mau tutavaraa. Noa ˈtu e e mea itoito roa ratou a itea ˈi ia ratou te parau mau, i te roaraa o te tau, ua topa ratou i roto i te ohipa matau noa o tei aratai ia ratou ia apiti rii noa aore ra ia ore e tamau i roto i te ohipa e faariro i te taata ei pǐpǐ.
3 E taa ia tatou e ua haamǎrû mai te tahi atu no te mau taotiaraa paha a te matahiti aore ra a te ea. Teie râ, e tia ia haapopouhia ratou no to ratou faaoromai. Te rave ra ratou i tei maraa ia ratou. E tia râ i te feia atoa i pûpû i to ratou ora na te Atua ia uiui e: ‘Ua vaiiho anei au i ta ˈu iho mau fa ia haafariu ê ia ˈu e ia iti mai te tuhaa o te mau faufaa o te Basileia i roto i to ˈu oraraa? Ua “pumahana” mai anei au aore ra te “faaitoito hua” noa ra anei au?’ (Apo. 3:15, 16; Luka 13:24) Ia feruriruri ïa tatou paatoa i roto i te pure i ta tatou e rave ra e ia rave i te mau faatitiaifaroraa e titauhia, ma te haamanaˈo e te tǎpǔ ra Iehova e horoa i “te hinuhinu . . . , e te tura, e te hau, i te taata atoa i rave i te maitai ra”!—Roma 2:10.
4 Nafea ia faaoromai: Na te aha i tauturu ia Iesu ia faaoromai? Te faataa ra Paulo e: “O tei faaoromai i te [pou haamauiuiraa], aore i haapao i te haama, [no te oaoa] i tuuhia mai i mua i tana aro; e te parahi ra i teie nei i te pae atau i te terono o te Atua ra.” (Heb. 12:1-3; MN) Ua hau ê roa te oaoa i tuuhia i mua ia Iesu i te mau tamataraa poto tei tia ia ˈna ia faaruru. Oia atoa, e itea ia tatou te puai no te faaoromai ia haamanaˈo tatou i te oaoa i tuuhia mai i mua ia tatou. (Apo. 21:4, 7; 22:12) Mai te peu e e imi tatou i te puai i pihai iho ia Iehova maoti te haapiiraa taitahi, te tae-tamau-raa mai i te mau putuputuraa e te pure-pinepine-raa, e nehenehe ïa tatou e tamau noa i roto i te ohipa ta ˈna i ani ia tatou ia rave.
5 E oaoa Iehova ia faaoromai to ˈna mau taata haapao maitai. No reira, e faaoaoa rahi anaˈe ia ˈna ma te tamau i te ‘haapao i te parau mau.’