Te mauruuru ra anei outou i te faaoromai o Iehova?

¹ Ahiri aita o Iehova i faaoromai i te roaraa o te mau ahuru matahiti i mairi aˈenei, ia nehenehe hoi te hoê faaiteraa rahi e horoahia, e ite anei outou i te parau mau? Auê tatou i te mauruuru i to ˈna faatiaraa i te tahi atu mau taata ‘ia noaa te tatarahapa’! “E tae mai” râ te mahana haavaraa rahi a Iehova “mai te eiâ.” (Pet. 2, 3:9, 10) No reira, e ere te auraa o te faaoromai o te Atua e e maoro te hopea o teie faanahoraa o te mau mea.—Hab. 2:3.

² A aroha i te taata: E hau ê te faaoromai ta Iehova e tamau ra i te faaite i to tatou manaˈo. Eiaha tatou e haamoe eaha te fa o te reira. (Iona 4:1-4, 11) Te ite maira Iehova i te ati rahi o te huitaata e te aroha ra oia ia ˈna. Hoê â huru manaˈo to Iesu. Ma te aroha i te mau nahoa taata ta ˈna e poro ra, ua hinaaro oia e ia parare te ohipa pororaa ia nehenehe e rave rahi atu â taata e fanaˈo i te ora mure ore.—Mat. 9:35-38.

³ Ia tupu te hoê ati, aita anei to tatou mafatu e putapû ra no te mau taata aita i ite i te parau mau? I teie mahana, “mai te nǎnǎ mamoe tiai ore” to tatou taata-tupu o te tutava ra i te faaruru i te huananeraa o teie ao e ia itea mai ia ratou te auraa o te oraraa. (Mar. 6:34) A poro ai tatou i te parau apî maitai ma te itoito, te tamahanahana ra tatou i te feia e mafatu au to ratou e te faaite ra tatou e te mauruuru mau ra tatou i te faaoromai o Iehova.—Ohi. 13:48.

⁴ Mea ru ta tatou ohipa: I te matahiti i mairi aˈenei, e 323 439 feia tei bapetizohia e ua hau atu i te 14 000 000 taata tei tae mai i te oroa Haamanaˈoraa. Mea rahi â ïa o te nehenehe e ape i te haamouraa o teie faanahoraa ino. Mai te aha te rahi o te nahoa taata, aita tatou i ite. (Apo. 7:9) Mai te aha te maoro o ta tatou ohipa ei feia poro, aita atoa tatou i ite. Area o Iehova râ, ua ite ïa oia. E porohia te parau apî maitai a titau noa ˈi oia, “o te hopea ihora ïa i reira ra.”—Mat. 24:14.

⁵ Ua haapotohia te taime e toe ra e te piri maira te mahana o te Atua. (Kor. 1, 7:29a; Heb. 10:37) Ma te papu maitai roa, ‘ua fatata to tatou [faaoraraa, i te tau] o to tatou faarooraa ra.’ (Roma 13:11; MN) Eiaha tatou e ere i te fa o te faaoromai o te Atua. Ia poro tatou ma te ru, ia nehenehe te tahi atu mau taata e hinaaro ra i te parau-tia e ite i te aroha rahi o Iehova.