E faatura anei tatou i te mau mea moˈa?
1 Ia ui mai te hoê taata e e faatura anei tatou i te mau mea moˈa, e pahono oioi paha ïa tatou e, e! Eaha te tahi mau faanahoraa moˈa a te Atua ta tatou e faatura?
2 Auê tatou i te poihere i te mau taairaa piri ta tatou e nehenehe e faatupu e to tatou Metua i te raˈi e! Te haapapu maira oia e ‘ia haafatata ˈtu tatou ia ˈna e haafatata mai oia ia tatou.’ (Iak. 4:8) Ahiri e aita te tusia taraehara a Iesu Mesia, eita roa ˈtu ïa te hoê taata e nehenehe e fanaˈo i te ora mure ore. (Ioa. 3:16) No to tatou mehara haavare ore, e haamauruuru mau tatou i te Atua i te mau mahana atoa no teie ô faufaa na roto i te pure.
3 Mea moˈa atoa no tatou te Parau faauruahia a te Atua, te Bibilia Moˈa, mai te faanahonahoraa a Iehova i te fenua nei. E faaite tatou i te mauruuru e tia no teie mau faanahoraa ma te pee i te mau faaueraa tumu Bibilia i roto i to tatou oraraa, ma te haapaari i to tatou mau taairaa here taeae e tahoê ra ia tatou, ma te faatura maite i te faanahoraa teotaratia e ma te ohipa amui e te mau taata e aratai ra ia tatou.—Pet. 1, 1:22.
4 Na roto i te arai o te tavini haapao maitai e te paari, te fanaˈo nei tatou i te pueraa maa pae varua. E na reira faahou â i teie matahiti i te Tairururaa Mataeinaa ‘Feia rave i te Parau a te Atua.’ E fanaˈo tatou i te hoê haapiiraa hinaarohia e te mau auhoaraa mahanahana ta tatou e hiaai mau ra. Nafea ia faaite i te hoê faatura haavare ore no teie faanahoraa moˈa?
5 Eiaha tatou e faarue i te fare o Iehova: Ua faaitoito Nehemia i te feia o tei rohi i te patu faahou i te mau patu o Ierusalema ‘eiaha e faarue i te fare o to ratou Atua.’ (Neh. 10:39) I teie mahana, te “fare” o Iehova, o te mau faanahoraa ïa ta ˈna e rave ra i te pae haamoriraa. To roto ta tatou mau tairururaa mataeinaa. Ia ore tatou e faarue i taua faanahoraa ra, e tia ia tatou ia tae mai e ia faaroo maitai; e faaite ïa tatou ia Iehova e te haafaufaa mau roa ra tatou i ta ˈna mau faanahoraa. (Heb. 10:24, 25) Eaha te tia ia tatou ia rave i teie nei â no te faaite e te faatura hohonu ra tatou i teie tupuraa moˈa?
6 Ia tae mai tatou i na mahana e toru: E tia ia tatou taitahi ia faanaho ia tatou e ia tae mai i na mahana e toru o te tairururaa. Te opua ra anei outou e tae oioi mai i te mau mahana atoa e e faaea mai e tae roa ˈtu i te pure hopea i te Sabati? E haamaitai-rahi-hia ïa outou. E ere mau â i te mea ohie ia haere i te hoê tairururaa. Ia vata mai tatou i ta tatou ohipa, e tia ia tapea papu i ta tatou mau faaotiraa i te tahi mau taime. E ere i te mea ohie roa i te pae o te mau faurao. Eiaha râ tatou e vaiiho i taua mau mea ra e haaparuparu ia tatou ia haere i te tairururaa.
7 E feruri anaˈe i teie hiˈoraa maitai: I nia i te purumu e tae atu ai i te hoê tairururaa mataeinaa i te matahiti i mairi aˈenei, i te hoê fenua Afirika te tupu ra te tamaˈi tivila, ua farerei te hoê pǔpǔ taeae i te tahi mau faehau. Ua ui teie mau faehau ia ratou e: “O vai outou e te haere ra outou ihea?” Ua pahono aˈera ratou e: “E mau Ite no Iehova matou, e te haere nei matou i te tairururaa mataeinaa.” Ua parau atura te hoê o te mau faehau e: “Outou, te mau Ite no Iehova, eiaha roa ˈtu outou e mǎtaˈu. A haere ïa, e e tupu ta outou tairururaa ma te fifi ore. E farerei mau â râ outou e rave rahi mau faehau. A haere noa na ropu i te purumu! Ia ite outou i te hoê haaputuputuraa taata, a haere tamau noa na ropu i te purumu.” Ua na reira te mau taeae, e ua tae mau â ratou i te tairururaa ma te maitai. Ua haamaitaihia taua mau taeae ra i to ratou faaturaraa i te mau mea moˈa.
8 Mai to tatou mau taeae no Afirika, e fifi to tatou. Teie râ, e nehenehe mau â tatou e pee i te hiˈoraa o to ratou faaroo e e rave i te faaotiraa e haere i te mau rururaa atoa o ta tatou tairururaa mataeinaa. Mai te peu e e titauhia ia tatou i te tahi mau haapaeraa, e imi anaˈe i te aratairaa a Iehova, ma te ite e e haamaitai mai oia i te mau tutavaraa ta tatou e rave no te haere i te tairururaa taatoa.
9 E ooti anaˈe i te mau haamaitairaa: E hinaaro rahi to tatou i te Parau a te Atua, no te mea, maoti te reira e paari ai tatou no te faaoraraa. (Pet. 1, 2:2) Na roto i te haereraa i te tairururaa mataeinaa e te faarooraa i te mau oreroraa parau, e patu tatou i to tatou faaroo i te Parau a te Atua e e ineine maite aˈe tatou i te patoi i te mau aroraa a Satani. Hau atu â, e faaite tatou ia Iehova e i te mau taata hiˈopoa atoa e e faatura hohonu tatou i te mau mea moˈa e “e ere . . . tatou i to te feia i orai tia i muri . . . no te feia râ i noaa te faaroo, e ora ˈtu ai te [nephe].”—Heb. 10:39; 12:16; MN; Mas. 27:11.
10 Ia tiaturi papu tatou e e iriti te Atua ra o Iehova i te mau haamaramarama o te raˈi e e ninii rahi roa ino i te mau haamaitairaa pae varua i nia ia tatou. (Mal. 3:10) Ia haamau tatou i te tapao e tae mai i te Tairururaa Mataeinaa ‘Feia rave i te Parau a te Atua’ i te haamataraa iho â, i te Mahana pae i te poipoi e tae roa ˈtu i te pure hopea e i te “amene” i te Sabati i te taperaa mahana. Eita tatou e tatarahapa!