E tauturu anaˈe i ta tatou mau tamarii ia haafaufaa i te tairururaa

¹ Te titau-manihini-hia ra te mau taata haamori atoa a Iehova ia haere mai i te Tairururaa Mataeinaa ‘Feia rave i te Parau a te Atua.’ I to matou faaineineraa i taua tairururaa ra, aita matou i haamoe i te feia apî e rave rahi e vai ra i roto i te faanahonahoraa a Iehova. Oia mau, e te feia apî, te tiaturi atu nei matou e e tae mai iho â te taatoaraa, oia atoa “te tamarii.”—Deut. 31:12.

² E te mau metua, a faaite i ta outou mau tamarii e no ratou atoa te tairururaa. E nehenehe te mau tamarii e haere maitai i mua i te pae varua ia taa ia ratou e e mau tuhaa o ta ratou haamoriraa to ratou taeraa mai e to ratou faaroo-maitai-raa i te tairururaa. E ere noa râ i te mea ohie no te mau tamarii ia parahi noa e ia faaroo maitai i te roaraa o te mau rururaa. Hau atu â, mea fifi paha no ratou vetahi mau tumu parau. No reira, e tia mau â i te mau metua ia vai ara noa e ia tutava i te tauturu ia ratou.

³ I te mau tairururaa, e mea faaitoito mau ia hiˈo i te anaanatae mau ta te mau tamarii e te mau taurearea e horoa ra i te mau faufaa pae varua. Noa ˈtu e o te manaˈo e tere haere, e ite i te taata, e tamaa i te tahi atu vahi eiaha râ i te fare, e te vai ra ˈtu â, te tumu o to ratou anaanatae, e nehenehe atoa te mau tamarii rii e haapii i te au i te tairururaa iho e e fanaˈo i te mau haamaitairaa pae varua.

⁴ Te tauturu a te mau metua: E tia ia arataihia te manaˈo o te mau tamarii i nia i te mau mea pae varua no te tairururaa e fatata maira. Hou te reira, no te aha e ore ai e rave i te hoê taime no te hiˈo faahou e o ratou i te parau ra “Attachement à Dieu” i roto i te buka ra Étude perspicace? Eita e ore e e tauturu te reira i te melo taitahi o te utuafare ia huti mai i te tahi mea i te tairururaa.

⁵ E mau faahopearaa maitatai ta te mau metua e rave rahi i noaa mai na roto i te horoaraa i te hoê Bibilia, te hoê buka himene e te tahi atu mau papai i ta ratou mau tamarii. Ia faaô outou i te hoê manaˈo maitai no nia i te Bibilia e te mau papai i roto ia ratou, eita ïa ta outou mau tamarii e peni i te hohoˈa aore ra e papaipai i nia iho. A faaitoito i ta outou mau tamarii ia rave i te mau tapaopaoraa ta outou pauroa e hiˈo faahou i te po. Hau atu i te reira, mea au aˈe eiaha e afai mai i te tahi mau hauti aore ra te tahi mau buka peni.

⁶ Te aˈo e te huru faanehenehe: Ua itehia te tahi mau metua i te vaiihoraa i ta ratou mau tamarii ia haapeapea ia vetahi ê i te mau taime rururaa. I te roaraa atoa o te mau pure, te vai ra te tahi mau tamarii o te hauti ra aore ra o te haafifi ra i to ratou taata tapiri. A uiui na e: ‘Te aha ra ta ˈu mau tamarii i te roaraa o te mau pure? E tia anei ia ˈu ia faatia ia ratou ia faarue i to ratou parahiraa i te mau taime oreroraa parau?’ E faaoti te mau metua haapao maitai ma te paari e parahi i pihai iho i ta ratou mau tamarii ia nehenehe ratou e hiˈo maitai atu, ia ore paha ta ratou mau tamarii e haapeapea ia vetahi ê. Noa ˈtu e e mau hopoia ta ratou i taaihia e te tairururaa, e tia i te mau metua ia rave i te mau mea atoa ta ratou e nehenehe no te parahi e ta ratou mau tamarii i te mau taime rururaa. I rapaeau i te vahi tairururaa, tei raro aˈe atoa te mau tamarii i te hiˈoraa a to ratou mau metua e tia ˈi ia faaanaanatae rii ratou.

⁷ Nafea ta tatou mau tamarii e faanehenehe ai ia ratou no te mau tairururaa? Ia omono ratou i te tahi mau ahu haapaoraa ore e te tahi mau tiaa tuaro, e taa maitai anei ia ratou te faufaaraa o te tairururaa? I te tahi aˈe pae, te faaite ra te mau tamarii faanehenehe-maitai-hia no te mau tairururaa Kerisetiano i te tura e te faufaaraa o te tairururaa, o te arue e te faahanahana ïa i te iˈoa o Iehova.

⁸ E nehenehe outou e faaitoito i te hoê huru feruriraa haapao maitai ma te faanaho ia outou e ia rave ta outou mau tamarii i te tahi ohipa rii i muri aˈe i te mau rururaa. E nehenehe te mau tamarii i raro mai i te 16 matahiti e ohipa e te hoê o to ratou metua aore ra e te tahi atu taata paari haapao maitai, i raro aˈe i te aratairaa o te tuhaa ohipa no te mau rima tauturu. No te mau taurearea e rave rahi, tera te hoê tuhaa maitai o te tairururaa.

⁹ Ma te feruri i teie mau manaˈo tauturu, e metua tane aore ra e metua vahine anei outou aore ra eita, e nehenehe outou e vai ara ia nehenehe te mau tamarii e huti i te mau haamaitairaa rahi roa ino i te tairururaa.