Te porotarama o te mahana tairururaa taa ê i mua nei
Teie te manaˈo tumu o te mau mahana tairururaa taa ê e haamata i te 1 no Setepa 1999: “E hiˈopoa anaˈe i te mau mea hohonu a te Atua.” (Kor. 1, 2:10) Eaha te mau mea faufaa ta tatou e haapii i reira?
E rave rahi taata e maimi ra i te ite o te ore roa ˈtu e tamahanahanahia ra e te mea ta ratou e haapii ra. E faaoraora mairâ te Bibilia ia tatou. O ta te tuhaa ïa e vauvauhia mai e te tiaau haaati e faaite e teie hoi te tumu parau: “E hopoi mai te hiˈopoaraa i te Parau a te Atua i te tamahanahanaraa.” E taai te taeae orero ratere i te maimiraa i te mau mea hohonu a te Atua e te pororaa i te parau apî maitai ma te pahono i te uiraa “Nafea outou ia hiˈo i te pororaa i te Basileia?”
Nafea te mau metua e nehenehe ai e tauturu i ta ratou mau tamarii ia faahohonu i te Parau a te Atua? E pûpû mai te oreroraa parau “A haapii i ta outou mau tamarii i te Parau a te Atua,” ia ratou i te mau manaˈo ohie. E ohipa to ratou amuimuiraa i te mau melo paari i te pae varua o te amuiraa ma te maitai i nia i te mau taurearea Kerisetiano. I roto i te tuhaa ra “Te mau taurearea e haapiihia e te feia paari,” e faaite te tahi mau hiˈoraa i te mau faahopearaa oaoa o taua ohiparaa ra.
No te aha e tia ˈi ia tatou i teie tau ia maimi maite i te mau taoˈa huna i te pae varua? O Iehova te Taata faaite i te mau parau moe. I roto i te oreroraa parau ra “E faaite mǎrû noa mai Iehova i te mau mea hohonu,” e haamaramarama mai te taeae orero ratere eaha ta Iehova i faaite i mutaa ihora e i to tatou tau. E haapuai te reira i ta tatou faaotiraa papu e tamau i te ‘hiˈopoa i te mau mea hohonu a te Atua.’
A faanaho ia outou i teie nei â no te haere atu i taua tairururaa ra. Ia faaara oioi ïa te feia e hinaaro ra e pûpû ia ratou no Iehova na roto i te bapetizoraa i te tiaau peretiteni. E haapuai te mea ta tatou e faaroo i taua tairururaa ra i to tatou hinaaro rotahi e faahohonu i te Parau a te Atua. Eiaha ïa outou e mairi aˈe i taua mahana haapiiraa taa ê i te pae varua ra.