Eaha ta outou e parau i te hoê taata faaroo Buddha?
1 I te tahi mau fenua, hau atu i te afaraa o te mau taata i bapetizo ia ratou e feia faaroo Buddha ïa. Na te aha e aratai ra i teie mau taata i te parau mau? Nafea ïa ia faaite i te parau apî maitai i te hoê taata faaroo Buddha?
2 A faaite i te hoê anaanatae rotahi: Ua parau e rave rahi taata faaroo Buddha tahito e e ere na te hoê feruriraa hohonu i aratai ia ratou i te parau mau. Ua putapû roa ratou i te anaanatae mau i faaitehia ia ratou. Ua maere roa te hoê vahine no Asia e ora ra i te mau Hau Amui no Marite, i te maitai o te tuahine o tei haere mai i ǒ na e ua farii oia i te haapii. Aita oia e paraparau maitai i te reo Beretane, ua faaoromai râ te tuahine. Ia rohirohi taua vahine ra aore ra ia ore oia e nehenehe e haapii, e haere noa te tuahine e farerei ia ˈna ma te auhoa e e faaau i te hoê taime farereiraa no te tahi atu taime. I te pae hopea, ua bapetizo taua vahine ra, ta ˈna na tamaroa e piti e to ˈna metua vahine ruhiruhia. Ua hoˈi atu oia i te fenua i fanauhia ˈi oia e ua tauturu e rave rahi taata ia ite i te parau mau. Te tavini ra te hoê o ta ˈna nau tamaroa i te amaa i teie nei. Pauroa teie mau haamaitairaa, mea na roto ïa i te faaohiparaa i ‘te hamani maitai e te [“here,” MN] i te taata’ ta Iehova e faaite ra.—Tito 3:4.
3 Te manaˈo faaroo Buddha: Mea pinepine e feruriraa aano to te mau taata faaroo Buddha; e farii ratou i te mau manaˈo taa ê atu i to ratou, e ere râ mea faufaa na ratou ia pee i te hoê haapiiraa taa ê. Ei faahopearaa, mea taa ê te mau tiaturiraa o te taata taitahi. Te tumu parau matauhia i roto i te tahi amaa o te haapaoraa Buddha, oia hoi ua î te oraraa i te mauiui, maoti râ te turamaraa e nehenehe ai e faaore i te ohuraa hopea ore o te fanau-faahou-raa no te mau oraraa oaoa ore. Ia au i te feia turu i taua tumu parau ra, e tia i te taata e hinaaro ra e tiamâ mai i taua ohuraa ra ia noaa ia ˈna te Nirvana, te hoê ïa huru o te ore e nehenehe e faataa, no te mea e ere te reira i te hoê vahi e ere atoa i te hoê tupuraa, o te hoê râ mea aita e mauiui e e maˈi. (Hiˈo Eaha te tupu i nia ia tatou ia pohe tatou?, mau api 9-10.) Eaha ïa ta te reira e faaite maira? Mea faufaa ore ia faatupu i te mau aparauraa i nia i te philosophia faaroo Buddha. Mea au aˈe ia tauaparau i te mau fifi ta te mau taata atoa e farerei ra.
4 A haamatara e hoê â ta tatou mau anaanataeraa: I te mea hoi no te feia faaroo Buddha, ua taai-pinepine-hia te ora i nia i te fenua nei i te mauiui, e nehenehe te manaˈo o te ora mure ore i nia i te fenua nei e riro ei mea maamaa. Teie râ, te hinaaro nei tatou pauroa e ora i te hoê oraraa utuafare oaoa, e ite i te mauiui ia faaorehia e te auraa o te oraraa. E hiˈo anaˈe na nafea ia haamatara i taua mau anaanataeraa ra e vai ra ia tatou.
5 E nehenehe tatou e tamata i teie omuaraa parau:
◼ “I teie nei mahana, te ora nei tatou i roto i te hoê ao e rave rahi taata hapa ore teie e mauiui ra. I to oe manaˈoraa, eaha te hinaarohia ia ore te oto e te veve no tatou paatoa? [A vaiiho i te taata ia pahono.] Ua ite au i te hoê parau tǎpǔ tahito o tei tamahanahana roa ia ˈu. [A taio i te Apokalupo 21:4.] Parau mau, aita i tae atura i taua taime ra, ia tae mai râ, e hinaaro ïa tatou e ora i te reira, e ere anei?” E pûpû anaˈe i te hoê papai e faataa ra nafea te mauiui e faaorehia ˈi.
6 I te hoê taata paari, e nehenehe tatou e parau e:
◼ “Peneiaˈe te haapeapea ra oe, mai ia ˈu atoa hoi, i te mau manaˈo faufau e parare ra e te faahopearaa ta te reira e faatupu ra i nia i ta tatou mau tamarii. No te aha te peu taiata e hauti rahi ai i nia i te mau taurearea? [A vaiiho i te taata ia pahono.] Ua ite anei oe e ua tohuhia te reira i roto i te hoê buka tei haamatahia i te papai hou te haamauraa o te mau haapaoraa Mahometa, Kerisetiano e Hindu? [A taio i te Timoteo 2, 3:1-3.] A tapao na e te itehia ra taua mau tupuraa ra noa ˈtu e te rahi noa ˈtura te maramarama o te taata. [A taio i te irava 7.] Ua tauturu teie papai ia ˈu ia taa i te parau mau ta te rahiraa o te taata e ore roa e haapii. E hinaaro anei oe e taio i te reira?” E pûpû anaˈe i te hoê buka aore ra i te hoê buka rairai e tano.
7 Mea pinepine e faatura te feia faaroo Buddha i te Bibilia; te faariro nei ratou i te reira ei papai moˈa. E taio roa ˈtu anaˈe ïa i te reira. (Heb. 4:12) Mai te peu e te haapeapea ra te taata i te mana o te peu tumu no te pae tooa o te râ, e haapapu anaˈe ia ˈna e e mau taata no te pae Hitia o te râ ma te mau taata papai Bibilia taatoa.
8 Eaha te mau papai tano aˈe? Te vai ra te api parau iti ra Will Suffering Ever End?, tei nenei-taa-ê-hia no te feia faaroo Buddha, na roto i te mau reo Cinghalais, Tapone, Thaï e Tinito. Hau atu â, e rave rahi feia poro e mau faahopearaa maitatai ta ratou e noaa e te mau papai i muri nei: te mau buka ra L’humanité à la recherche de Dieu, Te ravea e itehia ˈi te oaoa i te utuafare e Les jeunes s’interrogent—Réponses pratiques; te mau buka rairai ra “Inaha, te faaapî nei au i te mau mea atoa nei,” Eaha te tumu o te oraraa? Nafea outou e ite ai i te reira?; e mai te peu e te vai faahou ra, Te parau apî o te Basileia no 35, E here anei te mau taata i te tahi e te tahi? Te haapii na mua nei te rahiraa o te mau taata faaroo Buddha o te ite ra i te parau mau i teie nei i te buka rairai ra Titau, i muri iho te buka ra Te ite.
9 Noa ˈtu e ua parauhia e ua haere mai te tahi mau mitionare faaroo Buddha i Ateno fatata e 400 matahiti hou Paulo e poro ai i reira, aita e haapapuraa e ua farerei aˈenei oia i te hoê taata e pee ra i taua haapiiraa ra. Ua ite râ tatou i te mea ta Paulo i manaˈo na no nia i te pororaa i te mau taata atoa. Ua faariro oia ia ˈna iho ei “tavini no te taata atoa” ia nehenehe oia ‘e faaora te tahi pae i te mau ravea atoa.’ (Kor. 1, 9:19-23) E nehenehe tatou e pee i to ˈna hiˈoraa ma te faaite i te anaanatae i te mau taata e ma te tuu na mua i to tatou tiaturiraa ia horoa tatou i te faaiteraa i te taata atoa ta tatou e farerei.