E faatura anaˈe i te vahi haamoriraa a Iehova
1 Ia titau-manihini-anaˈe-hia tatou i te fare o te hoê taata, e faatura ïa tatou i ta ˈna mau taoˈa e eiaha e faaino atu. Eita atoa tatou e faahuehue i te mau peu maitatai matauhia o te utuafare. Eita anei e ite-atoa-hia mai te reira mai te peu e e feia tiahapa aore ra e manihini tatou no Iehova? Ia haapao ïa tatou i to tatou haerea i roto i to ˈna ra fare. (Sal. 15:1; Tim. 1, 3:15) Noa ˈtu e e tupu ta tatou mau putuputuraa kerisetiano i te Piha no te Basileia, i te hoê utuafare aore ra i te hoê fare huiraatira, e faaite ïa te rahiraa o tatou nei i te faatura i te vahi haamoriraa o tei au i te fare o Iehova “tei nia ê to ˈna hanahana i te fenua nei e te mau raˈi atoa ra.”—Sal. 148:13.
2 I te tahi taime, aita te tahi mau taeae e faatura nei i te mau taime putuputuraa; e maniania ratou, aore ra e faaite mai to ratou haerea e mea faufaa ore te mau tumu parau e vauvauhia ra. Te tamau noa ra vetahi mau taata paari i te paraparau faufaa ore noa i te vahi tomoraa, i te vahi fariiraa, i te vahi haumitiraa aore ra i rapae i te Piha no te Basileia, e ua haamata aˈena hoi te putuputuraa. Ia vaiiho-anaˈe-hia te hoê tamarii ia haapao i te hoê tamarii rii, e riro paha raua i te hauti e mea iti ïa ta raua fanaˈoraa i te porotarama. Ua itehia na te mau tamarii ia hauti i rapae au mai i te Piha no te Basileia i muri iho i te putuputuraa, ma te maniania rahi e haere roa ˈtu i te rave i te fata karate ia ratou iho. I te tahi taime, ua haapeapea na ratou i te mau taata tapiri aore ra ua haafifi i te tereraa i roto i te vahi vairaa pereoo aore ra i nia i te purumu.
3 Eiaha na tatou e faatura ore faahou: Mai te peu e te taa papu ra ia tatou i te tura e i te moˈa o ta tatou nei haamoriraa, eita roa ïa tatou e hinaaro e haafifi i te feia i tae mai na roto i te omuhumuhuraa, i te amuamuraa i te maa, i te amuamuraa i te chewing-gum, i te haamiˈomiˈoraa i te papie, e na roto atoa i te haere-faufaa-ore-noa-raa i te vahi haumitiraa e a hoˈi mai ai, aore ra ia tae maoro mai i te mau putuputuraa. E opani ïa te mau metua faatura e te mauruuru i ta ratou mau tamarii ia faarepo i te vauvau tahua, te mau ahu faanehenehe aore ra i te mau pǎpai o te Piha no te Basileia e to te fare i reira te haapiiraa buka e faatupuhia ˈi. I te tahi aˈe pae, ua ite na tatou paatoa e eita te parau tiaâ, te parau rii maamaa ra, e te parau faufau, noa ˈtu â e eaha te huru, eita roa ïa e au i roto i te mau putuputuraa.—Eph. 5:4.
4 Mai te peu e te vai noa ra ia tatou te fa o ta tatou mau putuputuraa kerisetiano, e faaite ïa ta tatou mau tamarii e o tatou iho i te faatura e tano no te haamoriraa ia Iehova i te vahi ta tatou i “maiti i te haere.”—Sal. 84:10, MN.