E horoa o Iehova i te puai hau aˈe i tei matauhia
1 Ua horoahia i te mau pǐpǐ atoa a Iesu i te hoê haamaitairaa faufaa roa no nia i te taviniraa moˈa: oia te toroa kerisetiano. (Mat. 24:14; 28:19, 20) Tera râ, no te huru tia ore o te taata, e no te mau fifi o teie faanahoraa o te mau mea, e nehenehe paha tatou e manaˈo e eita e maraa ia tatou ia rave.
2 Ia tupu anaˈe te reira, e nehenehe tatou e itoitohia na roto i te rata ta Paulo i faatae atu i te mau Kerisetiano faatavaihia no Korinetia. Ua papai oia e: “Te farii nei râ matou i taua taoˈa nei i te farii repo nei.” (Kor. 2, 4:7) Ua tiaturi na o Paulo e: “E teie nei, tei ia matou mai nei teie nei toroa . . . , aita ˈtura matou i rohirohi.” (Kor. 2, 4:1) E farii anaˈe e e ere i te mea ohie no te taata, e melo faatavaihia anei tatou aore ra e melo o te mau “mamoe ê atu,” ia tamau noa i te faaite i te parau apî maitai e ‘ia ore e rohirohi.’ Te hinaaro nei tatou e ia horoa mai te Atua i te puai, oia “te puai hau aˈe i tei matauhia.”—Ioa. 10:16; Kor. 2, 4:7b, MN.
3 E mea itoito mau ia ite e, noa ˈtu te patoiraa uˈana, te mau ati rahi no te oraora-maitai-raa aore ra te fifi no te pae faanavairaa, e rave rahi mau Ite e feia poro itoito ratou. Ia papu maitai ia tatou e te turu nei o Iehova i ta tatou pororaa. No reira, eiaha roa tatou e vaiiho i te paruparu aore ra i te manaˈo taiâ ia faaiti noa ˈˈe i ta tatou opuaraa papu, tera râ “ia itoito [tatou] i te Fatu, e i to ˈna ra puai rahi.”—Eph. 6:10; Mas. 24:10.
4 E mea nafea ia roaa te puai o te Atua: E tamau uˈana maite â i te pure i te Atua no te ani ia ˈna i ta ˈna tauturu e i to ˈna puai. (Roma 12:12; Phil. 4:6, 7) I muri iho, ma te aau tae mau, e tuu anaˈe i to tatou tiaturiraa ia Iehova, ma te papu e e horoa mai oia i te puai hau aˈe i tei matauhia. (Mas. 3:5) E taio anaˈe i te mau aamu no te oraraa i neneihia i roto i te mau vea; na te reira e haapapu mai e te tauturu nei o Iehova i ta ˈna mau tavini no te faaruru i te mau tamataraa. E amui piri anaˈe i te mau taeae e tuahine o te amuiraa, e eiaha hoi e faarue i te mau putuputuraa.—Roma 1:11, 12; Heb. 10:24, 25.
5 E tutava anaˈe tatou no te farii i te puai o Iehova, te hoê puai hau aˈe i tei matauhia, ia ore tatou ia faaea i te rave i teie ohipa faufaa mau oia hoi te pororaa i te Basileia.