Ia au to tatou haerea i te parau apî maitai
1 Na nia i to tatou tiaraa Ite no Iehova, te hinaaro nei tatou e faahanahana i te iˈoa o Iehova. Ua ite tatou e e nehenehe to tatou haerea, ta tatou paraparauraa, to tatou ahuraa e to tatou huru pahereraa rouru e mana mai i nia i te huru hiˈoraa o vetahi pae i te haamoriraa mau. E nehenehe te reira e itehia i ta tatou mau putuputuraa. E tia ia tatou ia papu e te tano ra te mau mea atoa e parauhia ra e e ravehia ra i te parau apî maitai e te faahanahana ra ia Iehova.—Phil. 2:4.
2 E rave rahi huru to te ao i te pae o te ahuraa e te pahereraa rouru e eita e fariihia no te mau kerisetiano. E tia i te mau tavini o te parau apî maitai ia haapao maite i te reira uiraa. Ua nehenehe e taiohia i roto i Te Pare Tiairaa no te 1 no tiunu 1989, api 20: “Mai te peu e aita e faufaa ia oomo i te mau ahu moni rahi, ia riro râ ïa to tatou mau ahu ei mau ahu mâ, te au maitai e te ieie ore. Ia mâ maitai atoa to tatou mau tiaa e ei huru faanehenehe au maitai to tatou e tia ˈi. E tia atoa ia tatou ia vai mâ noa e ia oomo i te mau ahu mâ maitai e te nahonaho maitai i te mau putuputuraa atoa, e tae noa ˈtu i te haapiiraa buka.”
3 E tapao atoa te taeraa i te hora tano no te tâuˈaraa ia vetahi pae e no te ara-maite-raa i turaihia e te here. E nehenehe te mau ohipa e tupu i te taime hopea e haafifi ia tatou ia tae i te hora tano i te hoê putuputuraa. Tera râ, e nehenehe te taere-tamau-raa e faaite e aita tatou e faatura ra i te huru moˈa o te mau putuputuraa e te tâuˈa ore nei tatou i te hopoia e vai nei ia tatou ia ore e haafifi i te tahi pae. Mea pinepine, te haafifi nei te mau taata taere i te tahi atu feia i putuputu mai e eita atura ïa ratou e nehenehe e huti hau atu â i te mau vahi faufaa o te putuputuraa. Te faaite ra to tatou taeraa i te hora tano i to tatou faatura i te mau manaˈo hohonu e te mau faufaa o te feia atoa i tae mai.
4 E tia i te here no te taata-tupu ia turai ia tatou ia haapao maitai ia ore tatou e riro ei tumu no te faafariu ê i te manaˈo o vetahi ê i te mau putuputuraa. E nehenehe te paraparau-mǎrû-raa, te tamaaraa, te auauraa i te chewing-gum, te oroororaa i te papie, e te haere-noa-raa i te vahi haumitiraa ma te faufaa ore e haafifi i te tahi pae ia feruri maite e e faaino i te tura e tano no te vahi e haamorihia ˈi o Iehova. Eita e tano e ia haapao te hoê taata i te mau hopoia a te amuiraa aore ra ia tauaparau e te tahi pae, taa ê noa ˈtu i te hoê huru tupuraa ru o te faahepo i te mau taeae ia faarue i to ratou parahiraa. Aita anaˈe, e tia i te taatoaraa ia parahi noa e ia faaroo no to ratou iho maitai e no to ratou utuafare. Aita e parahiraa to te mau peu iino i roto i te Piha no te Basileia, no te mea “eita [te here] e rave i te mea au ore.”—Kor. 1, 13:4, 5; Gal. 6:10.
5 Te arue-atoa-hia ra e te faahanahanahia ra te iˈoa o Iehova na roto i te haerea maitai o ta tatou mau tamarii i te mau putuputuraa. E mea faufaa e ia hiˈopoa tamau te mau metua ia ratou. E tia e ia faaitoitohia te mau tamarii ia faaroo e ia apiti. E rave rahi mau metua o te maiti i te hoê parahiraa e nehenehe ai ratou e haere ohie noa i rapae no te haapao i ta ratou mau aiû ma te ore e haapeapea faufaa ore noa ia vetahi ê.
6 Ua horoa o Paulo i teie faaitoitoraa e: “Ia au râ ta outou parau i te evanelia.” (Phil. 1:27). No reira, e tutava tatou ia faaite i te mau peu maitatai e te tâuˈaraa ia vetahi ê ia haere tatou i te mau putuputuraa. Na te ohipa-amui-raa a te taatoaraa e horoa i ‘te tahi faaitoitoraa mahanahana te tahi e te tahi, na te faaroo o te tahi e faaitoito i te tahi atu.’—Roma 1:12.