Pahonoraa i ta outou mau uiraa

◼ No te aha e tia ia tatou ia horoa oioi i te hoê tabula taviniraa i te mau avaˈe atoa?

Te oaoa nei tatou paatoa ia faaroo anaˈe tatou i te mau faahopearaa maitatai i noaa mai i roto i te pororaa i te poroi o te Basileia. (Hiˈo Maseli 25:25.) Te faatia ra te Ohipa 2:41 e, i te mahana Penetekose, i muri aˈe i te oreroraa parau putapû a Petero, ua ‘amui-atoa-hia maira e toru atoa tausani.’ I muri noa ˈˈe, ua maraa teie numera e “pae atura tausani.” (Ohi. 4:4) Auê ïa te mau Kerisetiano i te senekele matamua ra i te oaoa e, i te faarooraa i te reira! I teie mahana, mai teie atoa ïa to tatou huru ia faaroo anaˈe tatou i te mau tabula faaitoito. Te ite nei tatou i te oaoa rahi ia faaroo tatou i te mau faahopearaa maitatai e fanaˈohia ra e to tatou mau taeae na te ao nei, i roto i te pororaa i te parau apî maitai.

Mea titauhia e rave rahi taime e te mau tutavaraa no te tapao i taua mau huru tabula ra, e mea faufaa atoa hoi te turu a te feia poro tataitahi o te Basileia. Te ite ra anei tatou i te faufaaraa ia horoa oioi i ta tatou tabula taviniraa i te mau avaˈe atoa?

Te faaoaoa rahi nei te maraaraa e faaitehia maira. Hau atu, e nehenehe te Taiete e hiˈopoa i te mau haereraa i mua o te ohipa na te ao nei, na roto i te mau tabula. E tia ia ravehia te mau faaotiraa no nia i te mau tuhaa fenua e hinaaro ra i te tauturu, no nia i te mau buka e te mau vea e maitihia no te nenei e te rahiraa te tia ia neneihia. I roto i te amuiraa tataitahi, te hiˈopoa nei te mau matahiapo i te mau tabula taviniraa, no te hiˈopoa i te mau tuhaa te nehenehe e haamaitaihia. Te faaitoito nei e te turai nei te mau tabula maitatai ia tatou tataitahi ia hiˈopoa i ta ˈna taviniraa, no te ite e ihea oia e nehenehe ai e haere i mua.

E tia i te taata poro atoa ia ite i ta ˈna iho hopoia, o te horoa-oioi-raa ïa i ta ˈna tabula taviniraa i te mau avaˈe atoa. E nehenehe ta te mau taeae faatere i te haapiiraa buka, e faahaamanaˈo i te feia poro i taua hopoia ra, no te mea te tutava atoa nei ratou i te tauturu roa ˈtu i te feia e fifihia ra paha no te poro tamau i te mau avaˈe atoa. E nehenehe ta ratou e faahaamanaˈo i te haapiiraa buka hopea o te avaˈe, aore ra i te tahi atu taime e tano. Mai te peu e eita e nehenehe e horoa i te mau tabula taviniraa i te Piha no te Basileia, e nehenehe ïa ta te taeae faatere i te haapiiraa buka e ohi e e horoa ˈtu i te taeae papai parau i te taime au, ia nehenehe oia e tapao i te reira i roto i te tabula avaˈe a te amuiraa, o te haponohia i te Taiete ra.

Ia horoa oioi tatou ma te haapao maitai i te tabula o ta tatou taviniraa, e faaohie ïa te reira i te ohipa a te mau taeae e haapao ra i to tatou maitai i te pae varua.