Aravihi e ineine no te haapii ia vetahi ê
1 Ua maiti o Iehova ia Mose no te tia ˈtu no ˈna, ua manaˈo râ o Mose e e ore ta ˈna e nehenehe e faaite i te mau parau a te Atua ia Pharao ra. (Exo. 4:10; 6:12) I to ˈna parauraa ˈtu i te Atua e aita oia i ite i te parau, ua faaite o Ieremia e e ere oia i te mea aravihi no te riro ei peropheta na Iehova. (Ier. 1:6) Oia mau, i te omuaraa, ua erehia raua i te tiaturiraa ia raua iho, ua riro râ teie nau peropheta e piti ei mau ite itoito no Iehova. Ua haamataro te Atua ia raua ma te aravihi.
2 I teie mahana, te horoa maira o Iehova i te mea e hinaarohia e tatou ia ore tatou e taiâ i roto i ta tatou taviniraa. (Kor. 2, 3:4, 5; Tim. 2, 3:17) Mai te hoê taata tataˈi aravihi e mea navai maitai ta ˈna mau tauihaa, ua faaineinehia tatou ma te au no te rave i ta tatou taviniraa ma te aravihi. I teie avaˈe Tenuare, te pûpû nei tatou i te mau buka atoa e 192 api i neneihia na mua ˈˈe i te matahiti 1984 te vai ra ta te amuiraa. Noa ˈtu e e ere taua mau tauihaa pae varua ra i te mea apî, e tano noa râ te mau tumu parau Bibilia e tuatapapahia ra i roto, no teie tau e e tauturu te reira i te mau taata ia ite i te parau mau. E nehenehe te mau manaˈo i muri nei e faatanohia e te mau huru buka atoa o ta tatou e pûpû.
3 E nehenehe tatou e faaara i te anaanatae no te Parau a te Atua, ma te paraparau no nia i te haapiiraa. E nehenehe tatou e haamata i te aparauraa mai teie:
◼ “I teie mahana, te tuu-rahi-hia ra te tapao i nia i te maitairaa o te haapiiraa. I to oe manaˈoraa, teihea huru haapiiraa te tia ia titau no te ite i te oaoa e te manuïa? [A faaroo i te pahonoraa.] E nehenehe te feia e noaa ia ratou te ite no nia i te Atua, e fanaˈo i te mau haamaitairaa mure ore. [A taio Maseli 9:10, 11.] Ua niuhia teie buka [a faaite i te iˈoa o te buka o ta tatou e pûpû ra] i nia i te Bibilia. Te huti ra oia i te ara-maite-raa i nia i te tumu hoê o te ite e aratai i te ora mure ore.” A faaite i te hoê hiˈoraa papu i roto i te buka. Mai te peu e e faaite mai te taata i te anaanatae haavare ore, a vaiiho atu i te buka ia ˈna ra e a faanaho i te hoê taime farereiraa no te hoˈi faahou e hiˈo ia ˈna.
4 Ia hoˈi tatou e hiˈo i te hoê taata o ta tatou i paraparau no nia i te faufaaraa o te haapiiraa Bibilia, e nehenehe tatou e na ô e:
◼ “I te taime i mairi aˈenei, ua ite tâua e o te Bibilia te pu o te hoê haapiiraa o te nehenehe e haapapu mai i te hoê oraraa mure ore a muri aˈe. Parau mau, e tia ia tatou ia rave i te mau tutavaraa no te haapii i roto i te mau Papai i te mea te tia ia tatou ia ite. [A taio Maseli 2:1-5.] Te manaˈo nei e rave rahi taata e mea fifi ia taa i te tahi mau irava o te Bibilia. Te hinaaro nei au e faaite poto noa ˈtu i te hoê ravea o ta matou e faaohipa pinepine nei, no te tauturu i te mau taata ia ite hau atu â no nia i te mau haapiiraa faufaa roa a te Bibilia.” A iriti i te buka o ta tatou i vaiiho atu i te hoê api e tano, e a rave i te tahi faahiˈoraa poto no nia i te haapiiraa Bibilia. Mai te peu e te hinaaro ra te taata e haapii tamau, e faataa ïa tatou ia ˈna e e hoˈi mai tatou e hiˈo ia ˈna e ta tatou buka haapiiraa ra Te ite e aratai i te ora mure ore.
5 E rave rahi taata e tapitapi nei no te mau mirioni tamarii e mauiui nei na te ao nei. Peneiaˈe, e nehenehe ta tatou e tauturu i te taata ia ite i te manaˈo o te Atua i nia i to ratou huru oraraa mauiui, ma te parau e:
◼ “Ua ite paha oe i te mau hohoˈa no nia i te mau tamarii na te ao nei, e pohe poia ra, e maˈihia ra e tei faaruehia. No te aha hoi e aita te mau faanahoraa e haapao ra i te reira, e manuïa ra i te faatitiaifaro i te huru tupuraa? [A faaroo i te pahonoraa.] Te hinaaro nei te Atua i te mea maitai aˈe no te mau taata. A hiˈo na e eaha ta ˈna e tǎpǔ ra i roto i te Bibilia no te mau tamarii e te feia paari. [A taio Apokalupo 21:4.] Te horoa ra teie buka [a faaite i te iˈoa] i te mau haamaramaramaraa no nia i te hoê ao haamauhia e te Atua, i reira te mauiui e ore roa ˈi.” Mai te peu e e nehenehe, a faaite i te hoê hohoˈa o te Paradaiso e a faataa ˈtu. A pûpû i te buka e a rave i te mau faanahoraa no te hoˈi faahou mai.
6 Mai te peu e, i te taime matamua, ua paraparau tatou no nia i te mau mauiui o te mau tamarii, e nehenehe tatou e faahaere i te aparauraa i mua, ia hoˈi faahou tatou, mai teie:
◼ “I to ˈu haereraa mai i tera mahana ra, ua faaite mai oe i to oe tapitapi no te huru oraraa peapea o te mau tamarii e ora ra i roto i te mau utuafare amahamaha, aore ra e faaruru ra i te oˈe, i te maˈi e te haavîraa uˈana. E mea mahanahana ia ite e te parau ra te Bibilia no nia i te hoê ao, e ore roa te maˈi, te mauiui e te pohe e tairi faahou i te mau tamarii e te feia paari. Te faataahia ra te hoê oraraa maitai aˈe i nia i te fenua nei, i roto i te hoê parau tohu a te buka a Isaia.” A taio i te Isaia 65:20-25 e a faataa ˈtu. A faaite atu i te ravea e haapii i te Bibilia na roto i te buka ra Te ite.
7 E nehenehe tatou e haamata i te hoê aparauraa no nia i te pure, i te mea hoi e e peu matauhia teie e te feia faaroo, ma te parau e:
◼ “I te tahi mau taime o to tatou oraraa, te farerei nei te rahiraa o tatou i te mau fifi, o te turai nei ia tatou ia pure i te Atua no te ani i te tauturu. Tera râ, te manaˈo nei e rave rahi e aita ta ratou mau pure e faaroohia ra. E au atoa ra e, aita te mau pure no te hau e faaotihia ra e te mau raatira haapaoraa i mua i te taata, e faaroohia ra. Te parau nei tatou i te reira, no te mea te tamau noa ra te mau tamaˈi e te haavîraa uˈana i te tairi i te huitaata nei. Te faaroo mau ra anei te Atua i te mau pure? Mai te peu e oia, no te aha ïa e au ra e aita te rahiraa pure e faaroohia ra? [A faaroo i te pahonoraa.] Te faataa ra te Salamo 145:18 i te mea e tia ia rave, ia faaroohia ta tatou mau pure. [A taio i taua irava ra.] Na mua roa, ia riro te mau pure i te Atua ei mea haavare ore e ia tu i te parau mau i roto i ta ˈna Parau, te Bibilia.” A faaite i te buka o ta tatou e faaohipa ra e a huti i te ara-maite-raa i nia i te mea e parauhia ra no nia i te faufaaraa o te pure.
8 No te faahaere i te aparauraa no nia i te pure i mua, e nehenehe tatou e tamata i te parau e:
◼ “Ua oaoa vau i te paraparauraa ia oe no nia i te pure. Papu maitai, e farii oe e ua horoa mai o Iesu i te hoê tauturu ohie, ma te faahiti i to ˈna manaˈo no nia i te mau mea e nehenehe e anihia i roto i te mau pure.” A taio i te Mataio 6:9, 10 e a haamatara i te mau tumu parau rahi ta Iesu i haafaufaa i roto i te pure ra to Matou Metua. A iriti i te buka ra Te ite i te pene 16 ra “Nafea oe ia haafatata ˈtu i te Atua,” e a ani e e nehenehe anei ta tatou e faaite atu e nafea ia tuatapapa i te buka.
9 Ia faahiti anaˈe tatou i te parau e faaite i te ite no nia i te Atua ia vetahi ê, te ui nei paha tatou e: “O vai tei aravihi no teie mau mea?” Te pahono ra te mau Papai e: “O tatou nei.”—Kor. 2, 2:16, 17, MN.