Pahonoraa i ta outou mau uiraa

◼ Ia ore te taeae na ˈna e hohora i te oreroraa parau huiraatira e tae mai i te putuputuraa i te hora tia, nafea ïa?

Aita paha te hoê taeae i tae mai i te hora tia no te hohora i te oreroraa parau i faataahia, no te tahi mau huru tupuraa manaˈo-ore-hia. Mai te peu e te manaˈo ra te mau matahiapo e e fatata o ˈna i te tae mai, e nehenehe ratou e faaoti e haamata i te putuputuraa e te haapiiraa o Te Pare Tiairaa; e te putuputuraa huiraatira i muri iho. Mai te peu râ e eita iho â te taeae orero e tae mai, peneiaˈe na te hoê taeae orero o te amuiraa e hohora i te hoê o te mau oreroraa parau ta ˈna i horoa aˈena.

Maoti te hoê porotarama tei haamau-maitai-hia na mua ˈˈe, e nehenehe e ape i teie fifi. E tia i te taeae na ˈna e faanaho i te porotarama o te mau oreroraa parau huiraatira, ia faaara i te taeae orero hoê aˈe hebedoma na mua ˈˈe no te faahaamanaˈo i ta ˈna tuhaa. E haapapu faahou atu o ˈna i te hora o te putuputuraa e te vahi e te numera niuniu o te Piha no te Basileia, ma te horoa ˈtu i te mau faaiteraa faufaa atoa no te tae i reira. E tia i te taeae orero ia tapao maitai i teie mau haamaramaramaraa. E tia ia ˈna ia haafaufaa i ta ˈna tuhaa e ia rave i te mau faanahoraa atoa e titauhia no te faatura i teie hopoia. Ia farerei noa ˈtu oia i te hoê haafifiraa manaˈo-ore-hia, e tia ia ˈna ia faaara oioi i te taeae haapao i te porotarama o te mau oreroraa parau huiraatira, ia imi i te hoê mono. Ia ravehia te reira no te ape i te mau faaoreraa i te taime hopea. Mai te peu e ua taerehia te taeae orero no te tahi noa minuti, e taniuniu oia i te Piha no te Basileia no te faaara i te mau taeae e ia ite atoa ratou e eaha te rave.

Ia haafaufaa anaˈe te mau taeae orero huiraatira i ta ratou tuhaa, ia faanaho-maitai-hia te hoê porotarama na mua ˈˈe, ia ravehia te mau faahaamanaˈoraa hinaarohia na mua roa e ia haapao-maitai-hia taua ohipa ra, papu maitai e e fanaˈo te amuiraa i te hoê oreroraa parau huiraatira anaanatae i te hebedoma tataitahi.