Ia faatura tatou ia vetahi ê—Tuhaa matamua
1 Te oaoa nei tatou i te iteraa e te rahi maira te nunaa o Iehova, o te aratai i te hoê maraaraa o te mau amuiraa. I roto i te tahi mau fenua, i roto iho â râ i te mau oire rarahi, te faaohipa-rahi-hia nei te mau Piha o te Basileia, no te mea i te tahi mau taime e rave rahi mau amuiraa o te faaohipa i te hoê noa piha. Te titau nei teie huru tupuraa i te hoê ara-maite-raa rahi o te feia atoa no ratou teie parau.
2 E mea tano ia ara te amuiraa tataitahi o te putuputu i roto i te Piha o te Basileia e ia vai mâ noa e te nahonaho no te mau taeae e mau tuahine no muri iho mai. E faaafarohia te mau parahiraa, e tatarahia te mau buka atoa i nia i te paepae, e e ohihia te mau taoˈa atoa vaiihohia i roto i te piha. Ia tamâhia te mau haumitiraa, ia faanaho faahou i te pua, te tamǎrǒ rima e te papie no te haumitiraa, ia faaruehia te mau pehu i roto i te mau farii.
3 Ia faanahohia e tupu e piti putuputuraa i muri aˈe i te tahi, eiaha ïa te feia o te putuputuraa matamua ia faataere noa ma te faufaa ore, no te mea e haapeapea ratou i te mau faaineineraa a to muri iho. Ia faaroaroa vetahi i te mau aparauraa auhoa, te faaapiapi nei ratou i te tomoraa e te faataere nei i te mau taeae o te faanaho ra i te putuputuraa no muri iho. Aita paha i rahi te mau vahi tapearaa pereoo; e mea maitai ïa ia faarue oioi mai ia nehenehe te feia e tae maira e ite i te hoê vahi no te tapea i to ratou pereoo. Teie nei râ, eiaha atoa te feia no te putuputuraa no muri iho ia haere oioi mai, e faaapiapi ïa ratou i te tomoraa ma te faufaa ore, te vahi vairaa ahu e te vahi tapearaa pereoo.
4 Mai te peu e e rave rahi amuiraa te putuputu, e mea faufaa mau â ia rave amui i te ohipa no te haapao i te atuaturaa i roto i te hebedoma i te Piha o te Basileia. I te rahiraa o te taime, e apee te mau amuiraa i te hoê faaohuraa. Ia tae mai te taime o ta oe amuiraa, a rave i taua tamâraa ra ma te aravihi e te itoito. Eita ïa te tahi atu mau amuiraa e amuamu.
5 I te tahi mau taime, e titauhia i te amuiraa tataitahi ia taui i ta ˈna mau hora putuputuraa, ia ratere mai iho â te tiaau haaati. E tia ïa i te mau matahiapo ia faaara na mua roa i te mau matahiapo o te tahi atu amuiraa aore ra mau amuiraa ia nehenehe ratou e faaara oioi i te feia poro. Hau atu â, mai te peu e e opuahia e faaohipa i te piha no te tahi mau ohipa faatiahia, mai te Haapiiraa no te mau pionie, te hoê putuputuraa no te mau matahiapo o te tuhaa haaati, aore ra te hoê faaipoiporaa, e tia ia faaara na mua roa i te mau amuiraa, e te mau tiaau haaati atoa, ia ore ratou e faaohipa i te piha i te hoê â taime.
6 E rave rahi piha e faaohipahia nei e te tahi mau amuiraa no roto i te mau tuhaa haaati taa ê. E mea faufaa roa ia faaite te mau tiaau ratere o te haapao i taua mau amuiraa ra i te mau taio mahana ta ratou i opua e ratere atu. E titauhia paha te tahi mau tauiraa i taua taime ra aore ra e tupu mai te mau fifi ia tabula anaˈe e piti tiaau ratere i to raua tere i te hoê â hebedoma.
7 Ma te tutava i te faatura ia vetahi ê, ma te haamau i ta ratou porotarama na mua roa e ma te rave amui i te ohipa, e tupu ïa te mau taairaa maitatai i roto i te mau amuiraa e e manuïa ratou ‘i te rave i te mau mea atoa ma te tia e ma te nahonaho.’—Kor. 1, 14:40.